Génesis 1
1
1. NAPNEG-BINNISAD-IGAR, DEGI, DULEMAR-AMBIKUSAD-IGAR
(1:1–11:32)
1a. Ibmar-obinnilesad, degi, dule-obinnilesad
(1:1–2:3)
Bab-Dummad nibneg, napnegbo obinnisad-igar
1Bab-Dummadi, gebe-negasailaunni, nibneg, napneg obinnisad.
2Deunni, napneg gwen nabir-daklesulid, neg olloo-dakleged,
unnila dii-wilasailad-birgi negsichidbi naid.
Bab-Dummad-Burbadi dii-birgi aibannaid.
3Geb degine, Bab-Dummad sogded:
“Neg-meegwad nagu.”
Agi, neg-meegwad nagunonikid.
4Geb Bab-Dummad dakded, neg-meegwad, ibnuedi.
Agi, Bab-Dummad neg-meegwad, negsichid-ebo bachikii imaknonikid.
5Bab-Dummad neg-meegwad ibginedye onug-imaksad.
Negsichiddi mutikidye onug-imaksad.
Weyob neg osedosad, geb neg oibosbalid.
Deyob, ibagwenadgi neg gusad.
6Geb degine, Bab-Dummad sogdebalid:
“Neg-ollor-dummad nagu,
adi, diimar bachikii naguegar.”
7Deyobi, Bab-Dummad neg-olloled-dummad nasiksad.
Neg-ollor-dummad-birgi dii nagunonikid,
degi, neg-ollor-dummad-urba dii nagunonibalid.
Deyob gunonikid.
8Bab-Dummad a-neg-olloled-dummad mogir-aradye onugsasad.
Weyob neg osedosad, geb neg oibosbalid.
Deyob, ibabogwadgi neg gusad.
9Geb degine, Bab-Dummad sogdebalid:
“Dii-mogir-arad-urba-naid bachiki nagu,
adi, neg-dinnagwad naguegar.”
Deyob gunonikid.
10Bab-Dummad, neg-dinnagwad, napaye onugsasad.
Geb diidina, demarye onugsanonikid.
Geb Bab-Dummad dakded, we-ibmar bela nueganbi.
11Agi, Bab-Dummad sogdebalid:
“Bela ibmar-durbamar napagi nagu:
Gaganmar-gwag-nikad ambikumar,
degine, akar-akar sapi-sunna-sanmakmalad, e-sangi gwag-nika gusun.
Ibmar-durbamar akar-akar bela na egad-egad-balibimaladba ambikumarsun.”
Deyob gunonikid.
12Geb napagi ibmar-durbamar nagunonikid:
Gaganmar-gwag-nikamalad bela na akar-akar egad-egad-balibimaladba,
degi, sapimar-e-sangi-gwag-nikumalad
bela akar-akar na egad-egad-balibimaladba ambikunonimalad.
Bab-Dummad dakdebalid, we-ibmar bela nueganbi.
13Weyob neg osedosad, geb neg oibosbalid.
Deyob, ibapaagwadgi neg gusad.
14Geb degi, Bab-Dummad sogdebalid:
“Nibneggi gwallumar nagu,
adi, neg-mutikid, neg-ibgined-ebo bachikii guegar.
Adi, ibagan-nagumaid, yolamar-nagumaid, birgamar-nagumaid magar daklegegar.
15Degi, gwallumar-niba-naid napneg-mee saegar.”
Deyob gunonikid.
16Bab-Dummad gwallu-dummagan gwabo obinyenonikid:
Gwallu-dummad, neg-ibginedgi negdaknai guegar.
Gwallu-senigwaddi, neg-mutik negdaknai guegar.
Degine, niisgwamar obinnisbalid.
17Bab-Dummad napneg-mee-imakega,
gwallumar, niisgwamar, nibneggi nasiksad.
18Adi, neg-ibginedgi negdaknai guegar,
degi, neg-mutikidgi negdaknai gubaligar.
Adina, neg-meegwad, negsichid-ebo bachikii imakegar.
Bab-Dummad dakded, we-ibmar bela nueganbi.
19Weyob neg osedosad, geb neg oibosbalid.
Deyob, ibabakegwadgi neg gusad.
20Geb degi, Bab-Dummad sogdebalid:
“Diigi ibmar-dulamar bela akar-akar ambikumar,
degine, nuumar ambikumar,
we-napneggi nabir niba gukudii gumalagar.”
21Bab-Dummad demargi ibdula-dummagan obinnisad,
degine, diigi belagwapa ibmar-dulamar obinnisbalid.
Bela na egad-egad-balibimaladba obinnisad.
Degine, Bab-Dummad bela nuumar na egad-egad-balibimalad obinnisbalid.
Bab-Dummad dakded, we-ibmar bela nueganbi.
22Bab-Dummad a-ibmar-durgangi ise-nued-binsaedgi amarga sogded:
“Bemar dula-mergumai gumarsun.
Demargi bukidar-dula-mergumai gumarsun.
Degine, nuumar, bemar we-napneggi bukidar-dula-mergumai gumarmosun.”
23Weyob neg osedosad, geb neg oibosbalid.
Deyob, ibataledgi neg gusad.
24Geb degi, Bab-Dummad sogdebalid:
“Napagi bela ibmar-durgan na egad-egad-balibimaladba ambikumar:
Ibmar-durgan-sunna-akwilemalad,
ibmar-durgan-napagi-garmakdimalad,
ibmar-durgan-sapurbarmalad,
bela na egad-egad-balibimaladba ambikumar.”
Deyob gunonikid.
25Bab-Dummad bela ibmar-durgan-sapurbarmalad
na egad-egad-balibimaladba obinnisad.
Ibmar-durgan-sunna-akwilemalad
bela na egad-egad-balibimaladba obinnisbalid.
Degine, ibmar-durgan-napagi-garmakdimalad
bela na egad-egad-balibimaladba obinnisbalid.
Bab-Dummad dakded, we-ibmar bela nueganbi.
26Geb degi, Bab-Dummad sogdebalid:
“Emisgindi, anmar, dule-obinyesun,
anmar-sunnague anmar imakoed.
Dulede, we-ibmar-durganmargi gangued-nika guoed:
Uamargi, nuumargi,
ibmar-durgan-sunna-akwilemaladgi,
ibmar-durgan-sapurbarmaladgi,
ibmar-durgan-napagi-garmakdimaladgi,
bela we-ibmarmargi we-napneggi gangued-nika guoed.”
27Bab-Dummad dule-obinyenonikid,
na e-sunnague obinyenonikid.
Bab-Dummad e-sunnague na imaksad.
Machered, ome-ebo obinnisad.
28Bab-Dummad we-dulemargi ise-nued-binsasadba, ega sogded:
“Bemar mimmigan-bukidar nikumar.
We-napneggi dula-bukidar urbemar,
degi, bela we-napneg-ugakaase ambikumar.
Bemar we-napneggi be gangued-nikadba
bela we-ibdurganmargi be obindii gumarsun:
Uamargi, nuumargi,
degi, ibmar-durgan-napagi-garmakdimaladgi.”
29Geb degi, Bab-Dummad dulega sogdebalid:
“We-napneggi bela gagan-nabir-gwag-nikumalad, degi, bela sapimar-e-sangi-gwag-nikumalad, an bemarga uked.
A-ibmar-durba bela bemar-masga guoed.”
30Bab-Dummad we-napneggi bela we-ibmar-durganga sogdebalid:
“Bela ibdula-unimaladga,
bela nuumarga,
bela ibdurgan-napagi-garmakdimaladga,
bela gagan-ara-aramalad e-masga-guega an ega uked.”
Deyob gunonikid.
31Geb degine, Bab-Dummad dakded, bela ibmar-na-obinnisadi, bela-bela nueganbi.
Weyob neg osedosad, geb neg oibosbalid.
Deyob, ibanergwadgi (6) neg gusad.
ప్రస్తుతం ఎంపిక చేయబడింది:
Génesis 1: cuk
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2014, Wycliffe Bible Translators, Inc. All rights reserved.
