Luk 24

Jisas ga tut hut sukun ra minaat.

(Matiu 28.1-8; Mak 16.1-8; Jon 20.1-8)

1Ra Sade ra malabungbung dal no kaba hahin dal ga kap hawaat ira waiwai ing dal gate tagure. Ma dal ga haan ukaia tano midi. 2Io, dal ga nes bia di gate pulukane se no haat tano matana no midi. 3Sen bia dal ga laka dal pa ga nes no palatamai Jisas. 4Ma ing bia dal ga lilik uta iakan ra linge, kaik at mon airuo tunaan dir ga tur huat taar ta dal. Ma ira kiniasi dir ga laklakituan hoira hile. 5Ira hahin dal ga manga burut kaik dal gaam tutudung ma ira matmataan ta dal uras napu tano pise. Iesen ira iruo tunaan dir ga tange ta dal, “Wara bih mutal silsilihe no lilona nalamin ta ira minaat? 6Ie panim kai. I te tut hut sukun ra minaat! Na tahut bia mutal na lik leh ira uno nianga ing ga kis tika ma mutal aras Galili. Ga tange hoken: 7‘Da tar se Nong a Tunotunoi ta ira lima diet ira ut na sakena. Da tut ie tano ula kabai ma tano aitul a bung na tut hut baling.’” 8Io, ing dal ga hadade dal ga lik leh ira uno nianga.

9Ma bia dal ga tapukus balin mekaia ra midi dal ga hinawase ira sangahul ma tikai na bulu na harausur ma ira mes ta kaiken ra linge bakut. 10Dal Maria me Magadalen, Ioana, Maria no pawasi Jemes ma ari mah dal ing dal ga hinawase ira apostolo. 11Iesen diet pa ga nurnur ta ira hahin kanong diet ga lik bia a linge bia kaike ra udal nianga. 12Ma Pita balik ga taman tut ma ga hilau ukaia hono midi. Ga tudu suur ga nes leh ira katona maal sen kaia napu. Io, ga haan sukun iakano katon gaam manga lilik uta iakan ra linge.#24.12 Buturkus 12 i panim ta ari a tuarena pakpakat.

Jisas ga harapuasa taar ta ira iruo tunotuno tano ngaas u Emaus.

13Ma ta iakano bung airuo ta diet ga hanahaan uras tiga taman di kilam ie bia Emaus, haruat ma ra sangahul ma tikai na kilomita meram Ierusalem. 14Ma dir ga wawor tika haan uta ira linge bakut ing ga hanuat. 15Bia dir ga harianga haan ta dir, Jisas at ga hanuat tupas dir ma ga tiktika haan ma dir. 16Iesen dir pa ga petlaar wara nesnes kilam ie.

17Io, ga tiri dir, “Mur waworana sa ing mur tiktika haan?”

Io, dir ga tur matien, ma ira iruo matmataan ta dir ga nanaas marmaris. 18Ma tikai ta dir, a hinsana Kiliopas ga tirii, “Augu sen mon ta ira wasire aram Ierusalem pau nunure ira linge ing i hanuat kaiken ra bar bung?”

19Io, ga tirii, “A linge sa?”

Dir ga babalu bia, “Ira linge uta Jisas meras Nasaret. Iakan ra tunotuno a tangesot ie. Ira uno nianga ma ira uno pinapalim ga dadas ra matmataan ta God ma ira matanaiabar mah. 20Ira tamat ta ira ut na pakila lotu ma ira mes na lualua diet ga tar sei bia na tur ra harkurai. Ma di ga kure bia na maat. Kaik di gaam tut ie tano ula kabai. 21Iesen mehet ga kis na balaraan taar bia aie at nong na halangalanga ise Israel. Ma a mes na linge mah te hanuat. Aitul a bung te sakit ing di ga tut tar ie tano ula kabai. 22Ma ari ta ira numehet hahin dal manga hakarup het. Dal haan taar tano midi katin ra malabungbung. 23Sen bia dal pai nes no palatamaine. Ma dal me hinawase mehet bia dal nes tiga ninaas na tanuo ma airuo angelo dir tange bia i te lon baling. 24Io, ari ta ira numehet harwis diet gi haan taar tano midi ma diet nes leh ira linge hoing ira hahin dal tange. Iesen aie, diet pai nes ie.”

25Io, Jisas ga tange ta dir, “Hohe bia mur pai palai ma mur halis wara nurnur ta ira nianga ta ira tangesot? 26Tutun sakit no Mesaia ga wara kapkap at kaiken ra ngunngutaan nalua bia na laka tano minarine.” 27Ma Jisas ga hapalaine dir uta ira linge utana ing i kis narako ta ira pakpakat ta God, haburen ta Moses ma ira nianga ta ira tangesot.

28Ma ing bia dal ga hanuat hutet tano taman dir ga wara hinahaan ukaia, ga palai bia Jisas ga wara hinahaan hakakari. 29Iesen dir ga saring hadadas ie, dir gaam tange, “Nu kis tika ma mir kanong matarahien tuai um.” Io, ga laka wara kinkinis tika ma dir.

30Ma bia ga kis taar tano suuh na nian ga kap leh tiga katona beret, gaam tanga tahut utana, ga pidik ie, gaam palau dir mei. 31Io, ira udir lilik ga hanuat palai ma dir ga nes kilam ie. Ma Jisas ga panim sukun dir. 32Io, dir ga harianga ta dir bia, “Tutun sakit i karwas ira bala dar ing i haianga hani dar tano ngaas ma ing i papos ira kukuraina ta ira pakpakat gar ta God ta dar.”

33-34Kaik at mon dir ga taman tut dir gaam tapukus balin uram Ierusalem. Ma dir ga haan tupas ira sangahul ma tikai na bulu na harausur tika ma ari a mes. Diet ga kis hurlungen taar ma diet ga tangtange bia, “I tutun! No Watong i te tut hut baling ma i te harapuasa ta Saimon.” 35Io, kaike ra iruo dir ga hinawas uta ira linge tano ngaas ma bia dir ga nes kilam ie hohe ing ga pidik no katona beret.

Jisas ga harapuasa ta ira uno bulu na harausur.

36Ma ing bia diet ga iangianga baak uta kaiken ra linge Jisas at ga tur huat nalamin ta diet gaam tange ta diet, “A malum ta muat.”

37Io, diet ga karup ma diet ga burut. Diet ga lik bia diet ga nes tiga tabaraan. 38Ma ga tange ta diet, “Warah muat ngarngarau? Ma muat lilik iriruo warah? 39Muat na nes ira limagu ma ira kakigu. Iau at mon. Muat na sigire iau ma muat naga palai. Taie ta suruno ma ta palatamaine tiga tanuo hoing muat nes ira surugu ma no palatamaigu.”

40Ma bia ing ga tange huo ga hamines ira limana ma ira kakine ta diet. 41Ma pa ga tale baak diet bia diet na nurnur tana kanong diet ga hung ma ra gungunuama ma kinarup. Io kaik, Jisas ga tiri diet, “Ta da linge kana wara ienien?”

42Io, diet ga tabar ie ma tiga subana kirip i masos taar. 43Ga kap leh ie gaam ien ie ra matmataan ta diet. 44Ma ga tange ta diet, “Kaiken ira mangana linge iau ga hinawase muat ine ing iau ga kiskis tika ma muat. Iau ga hinawase muat bia ira linge bakut da gil sot ing di ga pakat utagu narako ta ira harkurai ta Moses, ira nianga ta ira tangesot, ma tano Buk na Ninge.”

45Io, ga papos ira udiet lilik bia diet naga palai ta ira pakpakat ta God. 46Ga tange ta diet hoken: “Di ga pakat ie bia no Mesaia na kilingane ra ngunngutaan ma na tut hut sukun ra minaat tano aitul a bung. 47Ma da harharpir ta ira hunhuntunaan bakut tano ula hanuo, haburen kai Ierusalem, bia ira matanaiabar diet na lilik pukus ma God na lik luban se ira magingin sakena. 48Muat te nes kaiken ra linge ma muat na hinawas. 49Iau ni tule hawaat no linge ta muat nong no agu Sus ga kukubus wara utana. Iesen muat na kis kawase tar ie kai ta iakan ra pise na hala tuk bia no dadas meram naliu na kasar muat.”

God ga kap haut Jisas uram ra mawe.

50Ma bia ga lamus hasur diet uras Betani ga tatik ira limana gaam idane diet. 51Ma ing bia ga inidane baak diet, God ga kap haut ie uram ra mame. 52Io, diet ga lotu tupas ie ma diet ga tapukus ma ra tamat na gungunuama uram Ierusalem. 53Ma diet ga hanan hait tano hala na lotu tamat ma diet ga pirpirlat God kaia.

ప్రస్తుతం ఎంపిక చేయబడింది:

Luk 24: gfkNTP

హైలైట్

షేర్ చేయి

కాపీ