If you would like a copy of this version please contact info@davaraudiobibles.org

Lahuali New Testament, CC-BY-SA-4.0, The Love Fellowship. Lahuali New Testament Audio Bible, CC-BY-SA-4.0, Davar Partners International, The Love Fellowship, 2022.

Lahuali New Testament

Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.

फरीसी मीहतु बिचङ नीकुदेमुस मिन्दु इच्च़ा मीह तोहई, अरी यहुदी मीहतु नेता तोहई। दोई राता रिंङ यीशु कछंङ अंज़े कुंई, हे गुरु, ञेंहच़ी ञेंहनी कि परमेश्वरे कांह ञेंहतिंङ सिखाएच़िमी थल्जी चरच़ि शुनाह; छना कुचे अच़िला झांह ठ्रोह चिन्ह चमत्कार अंऊ केई लहज़ातन, अगर परमेश्वर दोरंङ साते माह शुई ता लेह मरच़ि।”
यीशु ज़ि दोबि जुबाब रेंई, गेह करंङ साते हेले कुट्र्तग, अगर अच़िया खरकोई जन्म माह लेप्ति ता दोई परमेश्वरो राज्यो अनुभव लेह मरपोतो। नीकुदेमुसे दोहरंङ साते कुंई, मीह अपेहल यांङषे य्वात दंङ छना जन्म लेहपच़ी तरप्तो? दिह पक्‍का ए तोह कि इच्च़ा मीह अई फेरा जन्म लेहप्च़िमी थल्जी एनोह याहो खोकटुंङ इबि मरच़ि। यीशु ज़ि जुबाब रेंई, गेह केतंङ साते हेले कुट्रातग, अपेहल तचेक अरीया मीह ती ए पवित्र आत्मा रंङ साते माह जेह्कपोतो ता दुह परमेश्वरो राज्य रिंङ इबि लेह मरपोतो। मीहज़ी एनातु कटुतिंङ जन्म रंड्री। तांला सिर्फ परमेश्वरो आत्मा ए केतिंङ परमेश्वरो कटुतु रूपंङ लेहकि तरपोतो। हेरान थशुह कि गेह करंङ साते कुहतग, कि कनिंङ खरकोई रूपा रंङ जन्म लेहपच़ी ज़रूरी तोह। लहन अंऊखा इबिमी तोह दोखा इबि, दंङ केई दोऊ सग थक्शातन, पर केई माञेंहना कि दुह अंऊच़ि अपा दंङ अंऊखा य्वा? अरी पवित्र आत्माओ दोरच़ी जेहक्पी दुह ध्वांए तोह।
नीकुदेमुसे दोबि रुहक्तो, “दी गप्पा छना शोतो?” दी रेड्रा यीशु ज़ि दोबि जुबाब रेंई, कांह इस्राएलो इच्च़ा महान गुरु तोतोन। कनिंङ दिहरे गप्पारे समझेक्सी जूंस। गेह करंङ साते हेले कुट्रातग कि ञेंहच़ी छि ञेंहच़ातन, दुह कुट्रातंई, दंङ अंऊ ञेंहच़ी तंङरी दोऊ गवाही रंड्रातंई, दंङ ञेंहच़ी छि कुट्रातन दोऊ टोहकठे केहच़ी विशवास माह लहज़ातंई अपेहल गेह केतंङ साते धरतीऊ टोहकठे शुहबिमी गप्पातु पाहठी कुहतेग दंङ केहच़ी विशवास माह लहज़ातेन, अगर गेह केतंङ साते स्वर्गो पाहठी कोग ता केहच़ी छिला विशवास लोहनी? अरीला स्वर्गंङ मेली, पर सिर्फ गेह मीहू योह इच्च़ा स्वर्ग च़ि योंखा अंज़े शुगाह। दंङ छना ठ्रोह मूसा ज़ि सुनसान ठाहरीरिंङ, रीयो ओमड्रा उथड़ेरिंङ केहच़ी च़रतिर, दिऊ थल्जी ज़रूरी तोह कि गेह मीहू योह ला उथड़ेरिंङ केओर। कि अच़िला गिऊ टोहकठे विशवास लोहर दोतिंङ अनंत जीवन खोकसोतो।
छना कुचे परमेश्वरे संसारो मीहतंङ साते झांह ठ्रोह दाह लहरी कि दोई एनोह इच्च़ा योह रें च़रति, कि अच़िला दोऊ टोहकठे विशवास लोहतो दुह नाश माह शोह्तो, पर दोच़ी अनंत जीवन खोक्पोर। छना कुचे परमेश्वरे एनोह योह बि संसारारंङ दिऊ थल्जी चरच़ि माह शुह कि संसारो मीहतिंङ दण्डो आज्ञा रमतो, पर दिऊ थल्जी कि संसारो मीहरे दोऊ दोरच़ी उद्धार खोक्पोर। अच़ि परमेश्वरो योहू टोहकठे विशवास लहज़ा, दोऊ टोईच़ी दण्डो आज्ञा माह शुहबी, पर अंऊ दोऊ टोहकठे विशवास माह लहज़ा, दुह दोषी शुहचे इलजी तोह; दिऊ थल्जी कि दोई परमेश्वरो इच्च़ा योहू मिन्दु टोईच़ी विशवास माह लहरिर। छना कुचे ऊई दण्डो हुकुमो दी बजह शुह कि छंङी संसार रिंङ अंज़े तोह, दंङ मीहज़ी हंयारा बि छंङी बे महस रूठे चेहतिर छना कुचे दोतु कम मांजी तोहई। छना कुचे अच़िला मांजी लोहर, दोई छंङी रंङ बेर तहच़ि, दंङ छंङीऊ कछंङ माह अपि, झांह शुबी मेस कि दोऊ कमो टोईच़ी दोष अपतो। पर अरी सच्चाई टोईच़ी जोज़ा, दुह छंङीऊ कछंङ अपा, कि दोऊ कम प्रगट शोतो कि दोरे परमेश्वरो हुकुमो दोरच़ी लहसी शुह।

दिऊ थल यीशु ए दोऊ चेलारे यहुदिया प्रदेशंङ अतिरे; दंङ यीशु दोतंङ साते बंङज़ा बपतिस्मा रंड्री लेहती दंङ यूहन्ना ला सामरिया शहरा रिंङ शालेम इलाकाओ कछंङ एनोन नगरंङ बपतिस्मा रंड्रा तोहई, छना कुचे दोर्तिंङ महस ती तोहई, दंङ मीहरेर अंज़े बपतिस्मा लेहप्च़ातेर। छना कुचे यूहन्ना दुह मुका तचेक जेला रिंङ माह केहषी तरेर। दोर्तिंङ यूहन्ना ओ चेला तु अरीया यहुदी मीह रंङ साते रिवाज़ो हिसाबे शुद्ध शुहबिमी पाहठी बहस शुई। दंङ यूहन्नाओ चेलाज़ि दोऊ कछंङ अंज़े दोरंङ साते कुंई, “हे गुरु अंऊ मीह यरदन बेंड़ीऊ नुरेच़ि करंङ साते तोहई, दंङ अतु पाहठी केई गप्पा लहतेन; खंणु, दोई बपतिस्मा रंड्रा, दंङ भत्ते दोऊ कछंङ अपातोर।”
यूहन्ना ज़ि जुबाब रेंई, “अपेहल तचेक मीह बि स्वर्गंङ च़ि मा रेंई, दोहपल तचेक दोच़ी छले मा खोक्पोर। केहच़ी केनाज़ि गिह्बी कुट्री थाशातेंई, ‘गेह मसीह माह शुगाह, पर दुबे तुई च़रसी शुगाह।’ ब्याहू ब्याहुत्रीह रंङ साते ब्याह लेह, पर ब्याहू साथी दोरंङ साते शुबी दंङ दोऊ गप्पा रेड्री रंङ साते खुश शुबी, ध्वांए गिऊ सेहम खुशी रंङ साते पिंङषा इलजी तोह।”
ज़रूरी तोह कि दुह महसे खास शुबी जूंस दंङ गेह दोबे कम। अंऊ स्वर्गंङ च़ि अपा दुह भत्ते बे मोह्ड़े शुह; अंऊ धरतीरिंङ च़ि अपा दुह धरतीऊ शुह, दंङ दोई धरतीऊ ए गप्पा लहज़ी: अंऊ स्वर्गंङ च़ि अपा, दुह भत्ते बे खेका तोह। अंऊ ला दोई खंणी दंङ रेड्री, दोऊ ए गवाही रंड्रा; पर थोड़े अरे मीहरे दोऊ गवाही ग्रहण लहज़ातेर। पर अंऊ दोच़ी दोऊ गवाही ग्रहण लहरिर दोई दी गप्पा पक्‍का लेह च़रति कि परमेश्वर सच्चा तोह। छना कुचे अतिंङ परमेश्वरे च़रति, दोई परमेश्वरो गप्पा लहज़ी: छना कुचे दिह ए दुह ए शुह अतिंङ परमेश्वरे पवित्र आत्मा भरपूरी रंङ साते रांहषी ततो। पिता परमेश्वरो योह रंङ साते दाह लहज़ा, दंङ दोई भत्ते चीज़र दोऊ गुहड़िंङ रें च़रति। अच़ि परमेश्वरो योहू टोहकठे विशवास लहज़ा, अनंत जीवन दोऊ शुह; पर अच़ि योहू टोहकठे विशवास माह लहज़ा, दोबि अनंत जीवन माह खोकसोतो, पर परमेश्वरो सज़ा दोऊ टोहकठे शोतो।

వినండి यहून्नो 3