If you have would like a copy of this version please contact info@davaraudiobibles.org

The Gofa Bible, CC-BY-SA-4.0, The Word for the World International and The Word for the World Ethiopia. (Text). Gofa Audio Bible, CC-BY-SA-4.0, Davar Partners International, 2018. (Audio).

ጌሻ ማፃፋ

The Word for the World International and The Word for the World Ethiopia

ፆሳይ ኖሄነ እያ አደ ናይታ ሀይሳዳ ያግድ አንጅስ፤ “የለትተ፥ ዳርተ፥ ሳአ ኡባ ኩምተ። ሳኣ ዶአት፥ ሳሎ ካፎት፥ ቢታን ዎፅ ቃፅያባይነ አባን ደእያ ሞሎት ኡባይ ህንተዉ ያሻንነ ዳጋማን ደኦ። ኤንቲ ህንተዉ ሃረቶ። ታኒ ዶልያ ዱማ ዱማ ጭልኦባታ ህንተዉ እምዳይሳዳ፥ ደኦይ ደእያ ዎፅ ቃፅያ መተ ኡባይ ህንተዉ ካ ግዳና መላ እማስ። ሽን ሸምፖይ ግዶን ደእያ ግሾ ሱ እያ ግዶን ደእያ አሾ ሞፕተ። ኦንካ ሸምፖ ዎዳይ ፕርደታና። ቃስ አሳ ሱ ጉስያ ዶአካ ሀይቆን ፕርዳና። ፆሳይ አሰ ባና ዳንስድ መዳ ግሾ፥ አሳ ሱ ጉስያ ኦና ግድኮካ እያ ሱይካ አሳ ኩሸን ጉካና። ህንተ የለትተ፥ ዳርተ፥ ህንተ ሼሻይካ ሳአ ቦላ ዳሮ” ያግስ።
ሄሳፈ ጉየ፥ ፆሳይ ኖሄነ እያራ ደእያ እያ አደ ናይታ ሀይሳዳ ያግስ፤ “ህዛ፥ ታኒ ታ ጫቁዋ ህንተራ፥ ህንተ ሼሻራነ ደኦይ ደእያ መተ ኡባራ ጫቃይስ። ታኒ ታ ጫቁዋ ካፎታራ፥ መህያራ፥ ሳአ ዶአ ኡባራነ፥ ማርካብያፐ ህንተራ ከይዳ፥ ደኦይ ደእያ መተ ኡባራ ጫቃይስ። ታኒ ህንተራ ጫቅዳይሳ መላ ህዛፐ ደኦይ ደእያ መተት ዮ ሃን ዮኮና፤ ሀ ሳኣካ ዛር ዮ ሃ ይሰና” ያግስ።
ቃስካ ፆሳይ፥ “ታኒ ታፐነ ህንተፈ፥ ደኦይ ደእያ መተ ኡባፈ ግዶን ጫቅያ ጫቁዋ ማላይ ሀይሳ፤ ታኒ ታ ዙላ ሻራን ኤሳስ። እ ታፐነ ሳአ ቦላ ደእያ መተ ግዶን ደእያ ጫቁዋስ ማላ ግዳና። ታ ሳሉዋ ሻራ ማይዝዳ ዎደነ ሻራን ዙል ኤቅዳ ዎደ፥ ታፐነ ህንተፈ ግዶን፥ ደኦይ ደእያ ዱማ ዱማ መተ ኡባፈ ግዶን ጫቅዳ ታ ጫቁዋ አኬካና። ደኦይ ደእያ መተ ኡባ ይሳናዉ ህዛፐ ጉየ ዮ ሃ ዬና። ዙል ሻራን ኤቅዳ ዎደ ታ እያ በአዳ ታፐነ ሳአ ቦላ ደእያ ዱማ ዱማ መተ ኡባፈ ግዶን ጫቅዳ መርና ጫቁዋ አኬካና” ያግስ።
ፆሳይ ኖሄ፥ “ታኒ ታፐነ ሳአ ቦላ ደኦይ ደእያባ ኡባፈ ግዶን ጫቅዳ ጫቁዋ ማላይ ሀይሳ” ያግስ።

ማርካብያፐ ከይዳ ኖሄ አደ ናይት ሴማ፥ ካማነ ያፈታ፤ ካም ካናነ አዋ። ሀ ሄት ኖሄ ናይታ፤ ሳአ ኡባን ደእያ አሳይ ኤንታፈ የለትዶሶና።
ኖሄይ ጎሻንቾ፤ እ ዎይነ ቶከን ኮይሮ አስ። እስ ጋላስ ኖሄይ ሄ ዎይንያፐ ኡይድ ማትድ ባ ዱንካንያ ግዶን ፅረ ካሎ ዝንእስ። ካናነ አዋ ካም ባ አዋ ካሉዋ በእድ፥ ካረ ከይድ፥ ባ ናምኡ እሻታስ ኦድስ። ሽን ሴምነ ያፈት አፍላ ኤክድ፥ ናምአይካ ባንታ ሀሽያራ ሀሽያራ ጋ ኦይክድ፥ ጉየ ጉ ሄመት ገልድ፥ ባንታ አዋ ካሉዋ ካምዶሶና። ኤንቲ ባንታ አዋ ካሉዋ በኦና መላ ባንታ አይፍያ ሀራሶ ዛርዶሶና።
ኖሄይ ማይ አን፥ ባርክድ፥ እያ ካሎ ናአይ ኦዳባ ኤርስ። ኖሄይ እያኮ፥
“ካናነይ ባደትዳባ ግዶ!
እ ባ እሻታስ ዉርሰ አይለ ግዶ”
ያግስ።
ቃስካ ኖሄይ፥
“ጎዳይ፥ ሴማ ፆሳይ ጋላተቶ!
ካናነይ ሴማ አይለ ግዶ፤
ፆሳይ ያፈታ ቢታ አሶ።
ያፈታ ሼሻይ ሴማ ሼሻራ ዎላ ደኦና፤
ካናነይ ያፈታ አይለ ግዶ” ያግስ።
ዮ ሃፈ ጉየ፥ ኖሄይ ሄ ፄታነ እሻታሙ ላይ ደእስ። ኖሄይ ኡዱፉን ፄታነ እሻታሙ ላይ ደእድ ሀይቅስ።

వినండి መተ 9