तबे आत्त्मा के बुल्णों गाशी, प्रभू यीशू जाँगल़ों दे नींऐं, के शैतान के जाँणें तिनकी परख, करी ज़ाँव, प्रभू यीशू च़ाल़ीष देस, अरह् च़ाल़ीष रात, बिना किऐ खाई-पी, बरतू रूऐ, तिन्दें पाछ़ी जबे तिनू भूख लागी; तबे पर्ख्णों वाल़े शैतान नंजीक आऐयों प्रभू यीशू खे बुलो, “जे तू पंणमिश्वर का बैटा असो, तअ अज्ञाँ दे के पाथरो की रोटी बंणी ज़ाँव।”
प्रभू यीशू ऐ जबाब दिता “पबित्र-ग्रन्थों दो ऐजो भे लिखी थो: के
‘आदमी सिर्फ रोटी शा ने, परह् ऐक नाँम बचन जुण्जें पंणमिश्वर के मुँहों ज़ात्ती शे नींकल़ो तिन्दी ही लई से जीऊँदा रंह।’”
तबे शैतान ऐ प्रभू यीशू पबित्र नंगर यरूशलेम दे नींऐं, अरह् देऊँठी की खुन्नेंऊँणीं गाशी ख्ल़ियाऐं, अरह् तिनखे बुलो, “जे तू पंणमिश्वर का बैटा असो, तअ आपु ईथै शी ऊदी दे; किन्देखे के पबित्र-ग्रन्थों दो लिखी थो: के
‘पंणमिश्वर तेरे बारे दी आप्णें स्वर्गदूत्तो खे अज्ञाँ देंदे, अरह् से ताँव हाथे-हाथ ऊबा थाग्दे; जू कद्दी ऐशो ने हईयों के तेरे लातो दी पाथरो लई ढैस-ठूकर ने लागो।’”
प्रभू यीशू ऐ जबाब दिता, “के पबित्र-ग्रन्थों दो ऐजों भे तअ लिखी थो: ‘तू प्रभू, आप्णें पंणमिश्वर के परख ने करे।’”
प्रभू यीशू शैतान ऐं बेजाऐ ऊगले धारह् गाशी नीऐं, अरह् बादी संईसारी को राज्य, अरह् तिन्दें की चंम्क-दंम्क, तेने बुलो, “जे तू घुढकुँणिऐं लाँम्बे पसरियों मुँखे नंमष्कार करे, तअ हाँव ऐजो सब-कुछ ताँव्खें देऊँबा।” तबे प्रभू यीशू ऐ जबाब दिता, “ओ शैतान, ईथै शा दुरका ज़ा! किन्देंखे के पबित्र-ग्रन्थों दो लिखी थो:
‘तू प्रभू आप्णें पंणमिश्वर खे नंमष्कार करह्, अरह् सिर्फ तिनकी ही सेवा करह्।’”
तबे शैतान तिन कैई शा आगू हुटा, अरह् देखो, स्वर्गदूत्त आऐयों प्रभू यीशू के सेवा कर्दे लागे।


जबे प्रभू यीशू ऐं ऐजो शुणों, के संत्त-यूहन्ना बाँनियों कय्दी दा पाया, तबे से गलील खे हुटे। अरह् प्रभू यीशू नासरत गाँव छुड़ियों, कफरनहूम नंगर दे, जू झीलो के टिराँव्टी दे असो, से जबूलून अरह् नाप्तली के ईलाके दी असो, अरह् प्रभू तेथै रंह्दें लागे। ऐष्णों ईन्देंखे खे हुवो, के ऋषी-यशायाह की सेजी बरंम्बाणीं पुरी हों:
“यरदन नंदी के पाईले ढबे, झील की टिराँव्टी गाशी, ज़बूलून अरह् नाप्तली ईलाके की झील गलील ईलाके दे जेथै गऐर यहूदी लोग बसे अंदे असो।
जुण्जे लोग ईनाँरें दे बऐठी रूऐ थिऐ, तिन्ऐ बड़ा प्रकाष दे:खा; अरह् जुण्जे मंऊँत्ती के देश अरह् छ़या दे बऐठी रूऐ थिऐ, तिनू गाशी प्रकाष चंम्का।”
तेसी बख्तो शुभा प्रभू यीशू ऐ ऐजा प्रचार करणा शुरू करा, “मंन बद्ल़ो किन्देंखे के स्वर्गो को राज्य नंजीक आऐ पुंज़ौ।”


गलील झील, की टिराँव्टी दे चाल्दे-फिर्दे प्रभू यीशू ऐ, दो भाऐ दे:खे: शमौन जेस्खे पतरस बुली थिया, अरह् तेस्का भाऐ अन्द्रियास जेसी झील दा ज़ाल़ो लई पणंकाँदें दे:खा थिया; किन्देखे के से झियोंर मंछ़वारे थिऐ।
प्रभू यीशू ऐ तिनखे बुलो, “मुँह पाछी आओं, तअ हाँव तुँओं आप्णे चैले बंणाँणों वाल़े बाँणूबा।”
से दुईनें भाऐ तेख्णी आप्णें ज़ाल़-पाँणकें छुड़ियों प्रभू यीशू पाछी चाले।
जबे से तेथै शे आगुड़े हुटे, तअ प्रभू यीशू ऐ ओके दो भाऐ तेथै दे:खे, जब्दी के बैटे, याकूब अरह् तेस्का भाऐ यूहन्ना। तिनू दुई भाई ऐ आप्णे पिता की गईलो नाँव गाशी, आप्णें जाल़ सुवाँरी लुऐ थिऐ, प्रभू ऐ तिनू भे बईदे। तेख्णी से नाँव, अरह् आप्णा पिता छुड़ियों प्रभू यीशू पाछी चाले।


प्रभू यीशू बादे गलील दे, रिट्दे-फीर्दें, अरह् यहूदियों के चौत्रें दे शिक्क्षा देंदे रूऐ, स्वर्ग राज्य के पंणमिश्वर की खुषख्बरी का प्रचार कर्दे लागे; अरह् प्रभू लोगो की साँत्त-भाँत्ती बीमारी अरह् रोग, अरह् बादी कंमजूरी दूर कर्दे रूऐ। बादे सीरिया देश दा तिनका ज़ष फऐली गुवा; अरह् लोगे बादे बीमार जू नाँनी-बड़ी बीमारी की दु:ख दे जक्ड़े अंदे थिऐ, अरह् जिन्दी दुष्ट-आत्त्मा थी, अरह् मिर्गी वाल़े अरह् अदरंगो के दु:खिया तिन कैई आँणें अरह् प्रभू यीशू ऐ तिनू चाँगे करे। गलील ईलाके शे, अरह् दिकापुलिस ईलाके शे, अरह् यरूशलेम नंगर, शे अरह् यहूदिया ईलाके शे, अरह् यरदन नंदी शे पाईले ढबे के लोगों की बेशुमाँर भीड़ तिनू पाछी चाली।

వినండి मत्ती 4