Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወሶበ ፈጸመ እግዚእ ኢየሱስ ዘንተ ነገረ ተንሥአ እምገሊላ ወበጽሐ ውስተ ብሔረ ይሁዳ ማዕዶተ ዮርዳኖስ። ወተለውዎ አሕዛብ ብዙኃን ወፈወሶሙ በህየ።

ወመጽኡ ኀቤሁ ፈሪሳውያን እንዘ ያሜክርዎ ወይቤልዎ ይከውኖሁ ለብእሲ ይድኀር ብእሲቶ በኵሉ ዘአበሰት ሎቱ። ወአውሥአ ወይቤሎሙ ኢያንበብክሙኑ ዘውስተ ኦሪት ከመ ዘፈጠሮሙ እግዚአብሔር እምትካት ተባዕተ ወአንስተ ገብሮሙ። ወይቤ «በእንተዝ የኀድግ ብእሲ አባሁ ወእሞ ወይተልዋ ለብእሲቱ ወይከውኑ ክልኤሆሙ አሐደ ሥጋ።» እንከሰኬ ኢኮኑ ክልኤተ አላ አሐዱ ሥጋ እሙንቱ ዘእግዚአብሔር አስተፃመረ ሰብእ ኢይፍልጥ። ወይቤልዎ ለምንት እንከ አዘዘ ሙሴ ከመ የሀብዋ መጽሐፈ ኅዳጋቲሃ ወይኅድግዋ። ወይቤሎሙ ሙሴሰ አዘዘክሙ በከመ እከየ ልብክሙ ትኅድጉ አንስቲያክሙ ትካትሰ አኮ ከማሁ ዘተገብረ። እብለክሙ አነሂ ኵሉ ዘይድኅር ብእሲቶ ዘእንበለ ትዘሙ በላዕሌሁ ለሊሁ ረሰያ ዘማ ወአውሰበ ካልእተ ዘመወ ወእንተሂ ደኀርዋ አውሰበ ዘመወ። ወይቤልዎ አርዳኢሁ እመሰ ከመዝ ውእቱ ሥርዐተ ብእሲ ወብእሲት አኮ ሠናይ አውስቦ። ወይቤሎሙ አኮ ለኵሉ ዘይትከሀል ዝንቱ ዘእንበለ ዳዕሙ ለዘተውህቦ። እስመ ቦ ሕፅዋን እለ ከማሁ ተወልዱ እምከርሠ እሞሙ ወቦ ሕፅዋን እለ ሐፀውዎሙ ሰብእ ወቦ ሕፅዋን እለ ሐፀዉ ርእሶሙ በእንተ መንግሥተ ሰማያት ወዘሰ ይክል ተዐግሦ ለይትዐገሥ።

ወእምዝ አምጽኡ ሎቱ ሕፃናተ ከመ ያንብር እዴሁ ላዕሌሆሙ ወይጸሊ ወገሠጽዎሙ አርዳኢሁ። ወይቤሎሙ እግዚእ ኢየሱስ ኢትክልእዎሙ ለሕፃናት ይምጽኡ ኀቤየ እስመ ለዘከመ እሉ ይእቲ መንግሥተ ሰማያት። ወአንበረ እዴሁ ላዕሌሆሙ ወኀለፈ እምህየ።

ወናሁ መጽአ አሐዱ ወሬዛ ወይቤሎ ሊቅ ኄር ምንተ እግበር እምሠናያት ከመ እረስ ሕይወተ ዘለዓለም። ወይቤሎ ለምንት ትብለኒ ኄር አልቦ ኄር ዘእንበለ አሐዱ እግዚአብሔር ወእመሰ ትፈቅድ ትባእ ውስተ ሕይወት ዕቀብ ትእዛዛተ። ወይቤሎ አያተኑ ዘአዐቅብ ወይቤሎ እግዚእ ኢየሱስ ኢትቅትል ነፍሰ ኢትዘሙ ኢትስርቅ ኢትኩን ስምዐ በሐሰት። አክብር አባከ ወእመከ ወአፍቅር ቢጸከ ከመ ነፍስከ። ወይቤሎ ውእቱ ወሬዛ ዘንተሰ ኵሎ ዐቀብኩ እምንእስየ ምንት እንከ ዘተርፈኒ። ወነጸሮ እግዚእ ኢየሱስ ወይቤሎ አሐቲ ተርፈተከ እመሰ ትፈቅድ ፍጹመ ትኩን ሑር ወሢጥ ኵሎ ዘብከ ወሀብ ለነዳያን ወታጠሪ ለከ መዝገበ ዘበሰማያት ወነዓ ትልወኒ። ወሰሚዖ ወሬዛ ዘንተ ነገረ ኀለፈ ትኩዞ እስመ ብዙኅ ጥሪቱ። ወይቤሎሙ እግዚእ ኢየሱስ ለአርዳኢሁ አማን እብለክሙ ከመ ባዕል እምዕፁብ ይበውእ ውስተ መንግሥተ ሰማያት። ወካዕበ እብለክሙ ይቀልል ይኅልፍ ገመል እንተ ስቍረተ መርፍእ እምባዕል ይባእ ውስተ መንግሥተ እግዚአብሔር። ወሰሚዖሙ አርዳኢሁ አንከሩ ጥቀ እንዘ ይብሉ መኑ እንጋ ይክል ድኂነ። ወነጸሮሙ እግዚእ ኢየሱስ ወይቤሎሙ በኀበ ሰብእ ኢይትከሀል ዝ ወበኀበ እግዚአብሔርሰ ኵሉ ይትከሀል።

ወእምዝ አውሥአ ጴጥሮስ ወይቤሎ ናሁኬ ንሕነ ኀደግነ ኵሎ ወተሎናከ ምንተ እንከ ንረክብ። ወይቤሎሙ እግዚእ ኢየሱስ አማን እብለክሙ አንትሙ እለ ተለውክሙኒ አመ ዳግም ልደት አመ ይነብር ወልደ ዕጓለ እመሕያው ዲበ መንበረ ስብሐቲሁ አንትሙኒ ትነብሩ ዲበ ዐሠርቱ ወክልኤቱ መናብርት ወትኴንኑ ዐሠርተ ወክልኤተ ሕዝበ እስራኤል። ወኵሉ ዘኀደገ አብያተ ወአኀወ ወአኃተ ወአበ ወእመ ወብእሲተ ወውሉደ ወገራውሀ በእንተ ስምየ ምእተ ምክዕቢተ ይነሥእ ወሕይወተ ዘለዓለም ይወርስ። ወብዙኃን ቀደምት ይከውኑ ደኀርተ ወደኀርትኒ ይከውኑ ቀደምተ።

వినండి ወንጌል ዘማቴዎስ 19