लूका क हातऊँ मांडेड़ी दुसरी पोथी की जाणकारी
भेजेड़ा चेला का काम पोथी पेली बिस्वासी मंडळी की क्हाणी ह, जखी यरूसलेमऊँ लेर यहूदिआ, सामरीया अर इकै पार बी फेलरी ही, जंय्यां की ईस्बर नगरी म जाबाऊँ पेली ईसु आपका चेलानै बोल्यो हो। (भेजेड़ा चेला का काम 1:8) भेजेड़ा चेला का काम की पोथी लूका क हाता मांडेड़ी दुसरी पोथी ह। ओ बोई लूका ह, जखो लूका को चोखो समचार मांड्यो हो। ओ एक बेद हो अर ओ सूल अर सई ढंगऊँ बातानै मांडी ह। बो आपकी दोन्यु पोथ्या (लूका क हाता मांडेड़ा चोखा समचार अर भेजेड़ा चेला का काम) थियूफिलूसनै मांडै ह जखो एक यूनानी मिनख ह, पण सागैई अ पोथ्या यूनानी अर यहूदि दोन्यु मसी समाज ताँई मांडी गई ह।
अनुमान ह क भेजेड़ा चेला का काम की पोथी ईसु का जलम क 60-64 बरसा पाछै मांडी गई क्युं क सगळी पोथी मंडबा क पेली पोलुस जेळऊँ छुटगो हो। पोलुस का सफर म लूका बी बिकै सागै हो अर अनुमान ह क भेजेड़ा चेला का काम की पोथी अंताकीया म मांडी गई। आ पोथी लूका क हाता मंडेड़ा चोखा समचार क आगै की घटना क बारां म बतावै ह, जखी ईसु क ईस्बर नगरी म जाबा की घटना क सागै चालू होवै ह। इ पोथी क मांड्या जाबा क गेल बी लूका को बोई मकसद हो जखो पेलड़ी पोथी क गेल हो। बो थियूफिलूस अर गिणती म बढता बिस्वास्यानै जोक्यु बे सीख्या हा बा बाता म बानै पक्को करबो चातो हो जणा बो ईसु का जीवन अर मसीहत का फेलाव को एक लेखो-जोखो मांड्यो।
भेजेड़ा चेला का काम की पोथी आपणा ताँई पेल्या की बिस्वासी मंडळी अर ईसु का बिस्वास म जीबा को नमूनो दिखावै ह।
रूपरेखा
1. पेली बात पबितर आत्मा चेला प उतर्यो अर बिस्वासी मंडळी बढबा लागी। ( 1:1—8:1 )
2. बिस्वासी मंडळीनै दिन घालबो अर बिस्वासी मंडळी को यरूसलेम क बारनै फेलबो। ( 8:2—12:23 )
3. पोलुस को चोखा समचार परचार ताँई पेलो सफर। ( 12:24—14:28 )
4. नया बिस्वास्यानै काँई-काँई बाता मानबो चाए इ बात का फेसला ताँई बडका की सभा। ( 15:1–35 )
5. पोलुस को चोखा समचार परचार ताँई दुसरो सफर। ( 15:35—18:22 )
6. पोलुस को चोखा समचार परचार ताँई तीसरो सफर। ( 18:23—20:38 )
7. यरूसलेम म पोलुसनै बंदि बणाबो। ( 21—26 )
8. आखीर म पोलुसनै रोम लेज्याबो। ( 27—28 )

వినండి काम लूका क हातऊँ मांडेड़ी दुसरी पोथी की जाणकारी