ꠙꠞꠤꠌꠤꠔꠤ
ꠢꠣꠘ꠆ꠘꠣꠘ ꠘꠣꠝꠞ ꠍꠤꠙꠣꠞꠣꠞ ꠔꠣꠟꠤꠝ ꠅꠁꠟ, ꠢꠎꠞꠔ ꠁꠍꠣ ꠀꠟ-ꠝꠍꠤꠃ ꠅꠁꠟꠣ ꠀꠟ꠆ꠟꠣꠞ ꠇꠣꠟꠣꠝ, ꠛꠣ ꠇꠣꠟꠤꠝꠣꠔꠥꠟ꠆ꠟꠣ। ꠅꠃ ꠇꠣꠟꠣꠝ ꠅꠁꠟꠣ, ꠡ꠆ꠛꠄꠅꠋ ꠀꠟ꠆ꠟꠣꠞ ꠛꠥꠟꠤ ꠛꠣ ꠀꠅꠀꠎ, ꠎꠦ ꠀꠅꠀꠎꠦ ꠔꠣꠝꠣꠝ ꠎꠉꠔꠞ ꠎꠘꠝ। ꠀꠟ꠆ꠟꠣꠞ ꠝꠞ꠆ꠎꠤꠄ ꠅꠃ ꠇꠣꠟꠣꠝꠦ ꠝꠣꠘꠡꠞ ꠍꠥꠞꠔ ꠙꠣꠁꠟꠣ, ꠀꠞ ꠝꠣꠘꠥꠡ ꠞꠥꠙꠦ ꠖꠥꠘꠤꠀꠔ ꠔꠡꠞꠤꠚ ꠀꠘꠟꠣ। ꠢꠎꠞꠔ ꠁꠍꠣꠃ ꠅꠁꠟꠣ ꠀꠟ꠆ꠟꠣꠞ ꠇꠣꠟꠣꠝ, ꠁ ꠇꠕꠣ ꠇꠁꠔꠦ ꠉꠦꠟꠦ ꠀꠝꠞꠣ ꠛꠥꠎꠔꠣꠝ ꠙꠣꠞꠤ, ꠈꠣꠟꠤ ꠔꠣꠘ ꠃꠍꠤꠟ꠆ꠟꠣꠄꠃ ꠀꠝꠞꠣ ꠝꠢꠣꠘ ꠀꠟ꠆ꠟꠣ ꠙꠣꠇꠞ ꠀꠍꠟ ꠖꠤꠖꠣꠞ ꠛꠣ ꠙꠞꠤꠌꠄ ꠙꠣꠁ।

ꠀꠝꠞꠣ ꠀꠞꠅ ꠖꠦꠈꠤ, ꠖꠥꠘꠤꠀꠔ ꠀꠁꠀ ꠢꠎꠞꠔ ꠁꠍꠣꠄ ꠛꠃꠔ ꠇꠦꠞꠣꠝꠔꠤ-ꠇꠥꠖꠞꠔꠤ ꠇꠣꠝ ꠇꠞꠍꠂꠘ। ꠄꠞꠝꠣꠎ ꠕꠣꠇꠤ ꠅꠃ ꠍꠤꠙꠣꠞꠣꠔ ꠘꠤꠡꠣꠘꠣ ꠛꠣ ꠌꠤꠘ ꠢꠤꠡꠣꠛꠦ ꠛꠤꠡꠦꠡ ꠡꠣꠔꠈꠣꠘ ꠇꠦꠞꠣꠝꠔꠤꠞ ꠛꠤꠡ꠆ꠔꠣꠞꠤꠔ ꠛꠄꠀꠘ ꠇꠞꠣ ꠅꠁꠍꠦ, ꠎꠦ ꠇꠣꠝ ꠕꠣꠇꠤ ꠛꠥꠎꠣ ꠎꠣꠄ, ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠎꠛꠣꠘꠞ ꠛꠥꠟꠤꠃ ꠀꠟ꠆ꠟꠣꠞ ꠇꠣꠟꠣꠝ, ꠔꠣꠘ ꠇꠣꠝ ꠅꠁꠟ ꠀꠟ꠆ꠟꠣꠞꠃ ꠇꠣꠝ। ꠁ ꠍꠤꠙꠣꠞꠣꠞ ২০ ꠘꠝ꠆ꠛꠞ ꠞꠥꠇꠥꠞ ৩১ ꠀꠄꠀꠔꠅ ꠀꠍꠦ, “ꠈꠣꠟꠤ ꠅꠃ ꠊꠐꠘꠣ ꠅꠇꠟ ꠟꠦꠈꠣ ꠅꠁꠍꠦ, ꠎꠣꠔꠦ ꠅꠔꠣ ꠔꠤꠟꠣꠅꠔ ꠇꠞꠤꠀ ꠔꠥꠝꠞꠣ ꠁꠝꠣꠘ ꠀꠘꠅ, ꠢꠎꠞꠔ ꠁꠍꠣꠃ ꠀꠟ꠆ꠟꠣ ꠙꠣꠇꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ, ꠔꠣꠁꠘꠃ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ, ꠀꠞ ꠁꠝꠣꠘ ꠀꠘꠤꠀ ꠎꠣꠔꠦ ꠔꠣꠘ ꠃꠍꠤꠟ꠆ꠟꠣꠄ ꠔꠥꠝꠞꠣ ꠀꠈꠦꠞꠤ ꠎꠤꠘ꠆ꠖꠦꠉꠤ ꠢꠣꠍꠤꠟ ꠇꠞꠅ।” (ꠀꠟ-ꠝꠍꠤ, ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ, ꠁ ꠡꠛ ꠘꠣꠝ-ꠃꠙꠣꠗꠤꠞ ꠝꠣꠘꠤ ꠜꠣꠋꠉꠤꠀ ꠖꠦꠈꠛꠣ ꠇꠤꠔꠣꠛꠞ ꠢꠦꠡꠦ ꠇꠤꠔꠣꠛ ꠡꠥꠔ꠆ꠞ ꠘꠣꠝꠞ ꠅꠋꠡꠔ।)

ꠁ ꠍꠤꠙꠣꠞꠣꠔ ꠢꠎꠞꠔ ꠁꠍꠣꠄ ‘ꠀꠝꠤꠃ’ ꠇꠁꠀ ꠘꠤꠎꠞ ꠡꠣꠔꠈꠣꠘ ꠛꠤꠡꠦꠡ ꠉꠣꠁꠛꠤ ꠘꠣꠝ ꠞꠣꠈꠍꠂꠘ। ꠅꠃ ꠡꠣꠔꠅ ꠘꠣꠝ ꠅꠁꠟꠉꠤ: ꠀꠝꠤꠃ ꠎꠤꠘ꠆ꠖꠦꠉꠤ-ꠞꠥꠐꠤ; ꠀꠝꠤꠃ ꠖꠥꠘꠤꠀꠞ ꠘꠥꠞ; ꠀꠝꠤꠃ ꠖꠥꠀꠞ; ꠀꠝꠤꠃ ꠀꠍꠟ ꠞꠣꠈꠣꠟ; ꠀꠝꠤꠃ ꠇꠤꠀꠝꠔ ꠀꠞ ꠎꠤꠘ꠆ꠖꠦꠉꠤ; ꠀꠝꠤꠃ ꠙꠕ, ꠢꠇ ꠀꠞ ꠎꠤꠘ꠆ꠖꠦꠉꠤ; ꠀꠞ, ꠀꠝꠤꠃ ꠀꠍꠟ ꠀꠋꠉꠥꠞ ꠉꠣꠍ। ꠁ ꠉꠣꠁꠛꠤ ꠘꠣꠝ ꠅꠇꠟ ꠖꠤꠀ ꠛꠥꠎꠣ ꠎꠣꠄ, ꠈꠣꠟꠤ ꠔꠣꠘ ꠃꠍꠤꠟ꠆ꠟꠣꠄ ꠀꠟ꠆ꠟꠣꠞ ꠖꠤꠖꠣꠞ ꠙꠣꠅꠀ ꠎꠣꠄ, ꠈꠣꠟꠤ ꠔꠣꠁꠘꠃ ꠔꠞꠣꠘꠦꠀꠟꠣ, ꠖꠥꠘꠤꠀꠞ ꠘꠣꠎꠣꠔ ꠖꠦꠅꠞꠣ ꠎꠘ, ꠎꠦꠁꠘ ꠀꠖꠝ ꠎꠣꠔꠤꠞꠦ ꠁꠛꠟꠤꠍꠞ ꠇꠛꠎꠣ ꠕꠣꠇꠤ ꠝꠥꠇ꠆ꠔ ꠇꠞꠂꠘ।
ꠟꠦꠈꠇ ꠙꠞꠤꠌꠤꠔꠤ ꠀꠞ ꠡꠝꠄ
ꠀꠟ꠆ꠟꠣ ꠙꠣꠇꠞ ꠢꠥꠇꠥꠝꠦ ꠅꠃ ꠍꠤꠙꠣꠞꠣ ꠟꠦꠈꠍꠂꠘ ꠢꠎꠞꠔ ꠢꠣꠘ꠆ꠘꠣꠘ (ꠞꠣ꠩)। ꠔꠣꠁꠘ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ১২ ꠎꠘ ꠍꠣꠢꠣꠛꠤꠞ ꠝꠣꠎꠞ ꠄꠇꠎꠘ। ꠢꠎꠞꠔ ꠁꠍꠣ ꠖꠥꠘꠤꠀ ꠕꠣꠇꠤ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠦꠅꠀꠞ ꠅꠘꠥꠝꠣꠘ ৪০-৫০ ꠛꠍꠞ ꠛꠣꠖꠦ ꠅꠃ ꠍꠤꠙꠣꠞꠣ ꠇꠤꠔꠣꠛꠞ ꠀꠇꠣꠞꠦ ꠟꠦꠈꠣ ꠅꠁꠍꠦ।
ꠄꠞꠝꠣꠎꠦ ꠀꠍꠦ,
(ꠇ) ꠀꠟ꠆ꠟꠣꠞ ꠇꠣꠟꠣꠝ ꠝꠣꠘꠥꠡ ꠍꠥꠞꠔꠦ ꠘꠣꠎꠤꠟ ১:১-১৮ ꠀꠄꠀꠔ
(ꠈ) ꠢꠎꠞꠔ ꠄꠢꠤꠀ ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠙꠄꠟꠣ ꠃꠝ꠆ꠝꠔ ১:১৯-৫১
(ꠉ) ꠀꠟ-ꠝꠍꠤꠞ ꠔꠛꠟꠤꠉ ꠀꠞ ꠇꠦꠞꠣꠝꠔꠤ ꠇꠣꠝꠞ ꠛꠄꠀꠘ ২—১২ ꠞꠥꠇꠥ
(ꠊ) ꠃꠝ꠆ꠝꠔ ꠅꠇꠟꠞꠦ ꠢꠎꠞꠔ ꠁꠍꠣꠞ ꠀꠈꠦꠞꠤ ꠔꠣꠟꠤꠝ ১৩—১৭ ꠞꠥꠇꠥ
(ꠌ) ꠢꠎꠞꠔ ꠁꠍꠣꠞ ꠃꠙꠞꠦ ꠎꠥꠟꠥꠝ-ꠝꠍꠤꠛꠔ ꠀꠞ ꠔꠣꠘ ꠃꠚꠣꠔ ১৮—১৯ ꠞꠥꠇꠥ
(ꠍ) ꠢꠎꠞꠔ ꠁꠍꠣ ꠝꠃꠔꠞ ꠛꠣꠖꠦ ꠎꠤꠘ꠆ꠖꠣ ꠅꠁꠟꠣ ꠀꠞ ꠛꠃꠔꠦ ꠖꠦꠈꠟꠣ ২০—২১ ꠞꠥꠇꠥ

వినండి ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ ꠙꠞꠤꠌꠤꠔꠤ