Génesis 6
6
Jonibaon jakonma
1Nato main jonibo kaiti peokoonontianra jemaabotankin bakeakana iká iki, ainbo bakebo,
2Diossen bakebaon, ja ainbobo oinnara iká iki metsáshamanbo. Jatianra jainoa katotax jaton keenshamanbo oinnax jabo betan wanokana iki.
3Ikaxbira Ibon yoia iki: “Nato jonibora, yorayabo ikax jatíbitian jatimabo iki. Jakopíra, pacha rabé chonka baritia senenres en jato jamati iki, ikíra Dios iká iki”, akin.
4Diossen bakebaon, ja jonibaon bake ainbobo bixon jato betan bakeakanara, anishaman jonibo nato main pikoti peokookana iki, japekáora kaibotanreskana iki. Jabora ikana iki moatianbi koshi reteananaibo, jaton akábo oinxon onankana ikax ninkakataibo.
5Ibon oinnara jonibaon aká nato main bebonbires jakonma iká iki, jaton shinanra jatíbitian jakonma atires iki,
6jaweati en joni akárin ikira iká iki. Kikinni chexakaatira
7neskata iki: “En aká jonibora, nato mainmea tsoabi yamatiakin en jato keyoai, jatíbi yoinaboribi, main norex iki niaibo jainoax noyai yoinabo. ¡Ayamapainon en jato akárin ikíra ea ikai!” iki.
8Jaskara ikenbira, Ibon oinna Noébichores jakon iká iki.
Noekan ani waporo
9Natora Noé iní yoii iki. Noéra jakonhira joni iká iki, jatíbitianra Dios yoiti ixona iki. Ja janontianra jabé jonibo xaran, jabichores Dios keenai keskati jaa joni iká iki.
10Noéra kimisha benbo bakeya iká iki, jabaon jane iká iki, Sem, Cam, Jafet.
11Diossen oinnara nato main jakonma bochobires iká iki, itan onsati ramianankanai iká iki,
12jaskatira jatíbi jonibo jakonmai axekana iká iki. Diossen oinna nato main ichabires jakonma jaketianra,
13Noé yoia iki: “Enra shinanke jatíbi jonibo keyonoxon. Jaton jakonma kopíra nato neten ikonbiresi onsati reteanankanai, jaskara iketianra en jato keyoai, jatíbi nato neten ikáboyabi.
14Bepon jiwi wapóroawe, jawen chitébo awé, jaskáxon okenbekonbi ja wapóro xabábo boín boyawe, jemaori itan napoori, jene weinaketian.
15Ja wapóro akin, min topóntira neskara iti iki: Pacha kimisha chonka pichika metro jawen nenké, rabé chonka rabé metro, wetsa metro iti naponbekon jawen naxbá; jainoax chonka kimisha metro, wetsa metro iti naponbekon jawen keyá.
16Kimisha pekataya axon, bochiki ja wapóro peká nókoti, metro naponbekon ikain westíora ventanan awé; jainxon westíora xepótiribi awé.
17Enra jenen ewa raanai, mai mapoxon jatíbiainoa joni itan yoina jiriabo nato netemeabo keyonon ixon. Jatíbi nato main jaabora, mawáti iki.
18Ikaxbi miibetanra, ja senenhabekonti joi en akai. Ja wapóro meranra min bakebo weikanti iki, min awin, min baban ewabo itan miaribi jikiti iki.
19Jainxonribira min weimati iki, jatíbi nato netemea yoinabo, bene betan awinbora iti iki; jaboribira miibetan mawákantima iki.
20Jatíbi meskó yoinabora, rabébo miibetan ja wapóro meran weíkanti iki: noyai yoinabo, ináati yoinabo, main norex iki niaibo, jaboribi keyonaketian.
21Meskó jawékiatibo tsinkiwe, jaskáaxon benxoawe. Mato betanbi yoinabaon jawékiati janon ixon”, akin.
22Jatianra Noekan aká iki, senenhakin jatíbi ja Diossen ati yoiabo.
தற்சமயம் தேர்ந்தெடுக்கப்பட்டது:
Génesis 6: shp
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2011, Wycliffe Bible Translators, Inc. All rights reserved.