Рут 1
1
Эли-Малик хъизангун цадахъ МогӀавалде гочин
1Доб, къадизабазул#1:1 Доб заманалда ГӀизраилалда ханзабазул бакӀалда къадизаби рукӀана. нухмалъиялда гъоркь ГӀизраил бугеб заманаялъ, гьениб ракъи ккана. Ва, Ягьудиялъул Бетлегьем абураб шагьаралдаса цо чи ана гочун, цадахъ ячун жиндирго лъадигун ва кӀиго васгун, МогӀавалъул авлахъалда гӀумру гьабизе. 2Гьев чиясда цӀар букӀана Эли-Малик, гьесул лъадуда цӀар букӀана НогӀоми, ва гьесул васазда цӀар букӀана МахӀлон ва Килеон. Гьел рукӀана Ягьудиялда бугеб Бетлегьемалдаса Эпратил къавмалъул чагӀи.
Гьел рачӀана МогӀавалъул ракьалде ва гьениб гӀумру гьабун чӀана. 3КватӀичӀого хвана Эли-Малик ва хутӀана НогӀоми жиндирго кӀиявго васгун. 4МогӀавалъул руччабазда гьоркьоса лъудби рачана гьез жидеего – цоялда цӀар Орпат, цогиялда цӀар Рут букӀана. АнцӀго сонгӀанасеб заман бана гьез гьеб бакӀалда. 5Амма хадур гьелъул кӀиявго вас хвана – МахӀлонги Килеонги, ва хутӀана гьей гӀадан жийго, росги хун, лъималги хун.
НогӀоми Бетлегьемалде тӀад юссин
6БетӀергьанасул рахӀму рещтӀун бугин Гьесул халкъалде ва кӀудияб рикъзи кьун бугин рагӀун, НогӀомил къасд ккана МогӀавалъул авлахъаздаса жиндирго ракьалде тӀад юссине. КӀияйго нусги яхъана гьелда цадахъ. 7Рахъана НогӀомиги кӀияйго нусги цадахъ гьеб бакӀалдаса къватӀире ва Ягьудиялде нух босана.
8НогӀомица нусаздехун юссун гьадинаб калам гьабуна: «Нуж тӀадрусса нужерго эбел-инсул рокъоре. БетӀергьанас льикӀабщинаб гьабеги нужее, нужеца нужер хварал росазе ва дие гьабураб гӀадин. 9БетӀергьанас кумек гьабеги нужее ва талихӀги кьеги цӀиял росабазул рокъоб».
Гьелъ гьезда убачалги гьарун къо-мех лъикӀ гьабулаго, гьел биччан гьаракьгун гӀодана 10ва гьез абуна: «Ниж дуда цадахъ рилълъина, дур халкъалда гьоркьор рукӀине». 11НогӀомица абуна: «ТӀадрусса, дир ясал. Щай нужее дида цадахъ рилълъун? Нужее росаллъун рахъине жеги васал гьаризе дир хӀалкӀвелищ? 12ТӀадрусса, дир ясал, нуж а. Росасе ине дунги гьанже херлъун йигелъул. Жеги хьул кватӀун гьечӀинги абун, жакъаго росасеги ун, къасиго дир ургьире васал ккезе рес букӀарабанигицин, – 13бегьилаанищ гьел кӀудиял гӀезегӀан нуж ралагьун чӀезе?#1:13 ЖугьутӀазул динияб къануналда рекъон, лъимерги нахъе течӀого пуланай гӀаданалъул рос хвани, гьей ячине кколаан хадусев вацас. Гьесдаса гьелъие гьавурав вас рикӀкӀунаан дов хварасул васлъун ва досул цӀарги кьолаан гьев васасе. Хварав чиясул цӀар ва наслу тӀагӀинчӀого букӀине ва гьесул мал-мулкги чияхъе ккечӀого букӀине гьабулаан гьеб. Бегьилищ нуж гьедин къороллъуда чӀезе, росасеги инчӀого? Бегьиларо, дир ясал. Дир къисмат гӀемерго кьогӀаб буго, нужеца дида цадахъ гьеб къулчӀизе ккеларо. БетӀергьанасул ццин рещтӀун буго дида тӀаде».
14ЦӀидасан риччан гьаркьалгун гӀодизе лъугьана гьел. Орпатица убачги гьабун, жиндирго якьадалъулгун къо-лъикӀ гьабуна, амма Рут гьелда аскӀоса ягъаричӀо. 15НогӀомица абуна: «Балагье, дур дандияй уней йиго тӀадюссун жиндирго халкъалъухъе ва жиндирго аллагьзабазухъе, мунги а долда цадахъ». 16Амма Рутица жаваб кьуна: «Мунги рехун тун дун хӀалицаго нахъе гъоге. Мун аралъуе дунги ина, мун чӀаралъуй дунги чӀела; дур халкъ букӀина дир халкълъун, дур Аллагь вукӀина дир Аллагьлъун. 17Мун хваралъуй дунги хвела, мун юкъаралъуй дунги юкъила. БетӀергьанасул ццин рещтӀаги дида тӀаде, дида тӀад къоно чӀвараб къоялъ гурони дица мун рехун тани». 18НогӀомида бичӀчӀана гьелда цадахъ йилълъине гьабураб Рутил хӀукму щулияб букӀин, ва токӀаб гьелъ гьелда тӀадюссиналъул цӀар бахъичӀо.
19Гьей кӀияйго гӀадан ана Бетлегьемалде щвезегӀан. Гьел шагьаралде жанире щварабго, гьениб кӀудияб багъа-бачари лъугьана. «Гьай гӀадан унгоги НогӀомийищ гъарин?!» – ан хӀикмалъун кӀалъалел рукӀана руччаби. 20НогӀомица гьезие жаваб кьун абуна: «Дида тӀокӀаб НогӀомиян (гьуинайин) абуге, Марайин (кьогӀайин) абе, щайгурелъул диде Къудратав Аллагьасул кӀудияб балагь рещтӀун бугелъул. 21Дун гьаниса ана бечедай гӀаданлъун, амма гьале БетӀергьанас чӀоёго тӀад юссинаюна. Щай нужеца дида НогӀомиян абулеб? БетӀергьанас дие тамихӀ гьабуна, Къудратав Аллагьас дида тӀаде балагь рещтӀинабуна».
22Гьедин юссана НогӀоми, цадахъ жиндирго нус Рут могӀавияйгун, МогӀавалъул ракьалдаса Бетлегьемалде. Гьеб букӀана пурчӀина лъилъизе байбихьулеб заман#1:22 Апрель-май моцӀ..
தற்சமயம் தேர்ந்தெடுக்கப்பட்டது:
Рут 1: АварАК
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© Институт перевода Библии, 2005-2023