1. Mose 9
9
O baro Devel dell peskro lab, kay bičrell yob bouder gar savo baro pani pral i phoub
1Oun o Devel rakras lače laba pral o Noah oun pral leskre čavende vin oun penas: “Anenn boud čaven ap i phoub, te vell i phoub t'mendar pherdo! 2I tsele firhe ap i phoub oun i tsele čirkle an o bolepen hounte darenn oun trashenn t'mendar. Halauter, hoy djivella ap i phoub, oun i tsele mače an o baro pani, dau an t'mare vasta. 3Halauter, hoy djivella, dau me t'mende, te rhan kova nashte. Me dau les t'men te rhal, yaake har dom t'men o zenlepen. 4Kokres o mass, kay hi gomme rat dren, kova hounte rhan gar; an o rat hi o djipen.
5Kek hounte lell t'maro djipen. Hakeno koon lell t'maro djipen, kolestar lau me ninna leskro djipen: hako firhestar oun hako menshestar. 6O Devel kras o menshes, yaake har yob hi. Doleske hounte vell kova moulo dino i menshestar, kay i menshes moulo das. 7Anenn čaven ap i phoub, – boud čaven, te vell i phoub t'mendar pherdo!”
8Oun o Devel penas ap o Noah oun ap leskre čavende: 9“Shounenn, me dau t'men miro lab oun dau miro vast koy pre. Ko lab hi t'menge oun t'mare čavenge, kay pal t'mende venna, 10oun lauterenge pash t'mende, hoy djido hi, – lauterenge, kay djan vin dran o panyeskro kheer: hake čirkle oun hake firhe ap i phoub, kolla, kay divye hi oun kolla, kay gar divye hi. 11Kova hi ko lab, kay dau miro vast koy pre: Me anau bouder gar savo baro pani pral i phoub, te tassell hako djipen ap i phoub. Savo baro pani vell bouder gar pral i phoub.”
12Oun o Devel penas: “Me dau t'men i sikepen, te djinenn t'mer, ko lab, hoy dom me t'mende oun hake firhende pash t'mende, ninna lauterende, kay venna pal t'mende, ko lab ačella hako tsireske: 13Me čivom miro brishineskro bogo an o bolepen. Te dikenn les, djinenn t'mer, kay vell bouder gar savo baro pani pral i phoub. 14Hako kopo, kay dau brishin pral i phoub oun ko brishineskro bogo tardo hi an o bolepen, 15vell ko lab an miro shero, hoy me dom t'men oun lauteren, kay djivenna: Me moukau kek pani bouder te vell, hoy yaake baro vell, te tassell o tselo djipen. 16Te hi miro brishineskro bogo an o bolepen tardo, dikau les, oun ko lab, hoy dom, vell an miro shero. Ko lab ačell tardo hako tsiro mange oun hakeneske, kay djivella ap i phoub.”
17Oun o Devel penas ap o Noah: “Ko brishineskro bogo hi ko sikepen, te rikrau miro lab, hoy me dom hakeneske, hoy ap i phoub djivella.”
O Noah vell mato
18Oun o Noaheskre čave, kay djan dran o panyeskro kheer, his o Sem, o Ham oun o Yafet. (O Ham hi kova, kolestar o Kanaan vell.) 19Kolla triin hi i čave o Noahestar. Lendar venna i tsele menshe ap i phoub.
20Oun o Noah his i harho oun čivas drakengre rouka an i phoub. 21Dran i drake kras yob mool, vas lo mato, rivas peskre koola vin oun his nanges an peskri plarhteno kheer čiddo. 22Oun o Ham, koleskro čavo o Kanaan hi, dikas peskro dades nanges, oun djas vin oun penas kova peskre douy phralenge. 23Koy lan o Sem oun o Yafet i ripen oun čivan les pral pengre phika oun djan pengro doumo glan-vi pash pengro dadeste, yaake kay dikan les yon nashte gar. Oun yon čakran les.
24Har o Noah djangelo vas dran peskro matepen oun shounas, hoy leskro terneder čavo kras, penas yob: 25“Bibarht ap o Kanaan! Yob vella o telstouno boudepaskro peskre phralenge!”
26Palle penas yob: “Me sharau o baro Debles, ko Debles kones o Sem an-mangella. Oun o Kanaan vell peskro phraleskro boudepaskro! 27Mou krell o Devel o Yafeteskro them yaake bourhlo, te djivenn leskre menshe mashkral i menshende, kay venna pal o Sem. Oun o Kanaan vell leskro boudepaskro!”
28O Noah djivas 350 (triin-sheel-te-paash-sheel) bersha pal o baro pani, hoy vas pral i phoub. 29Leskro tselo djipen his 950 (enya-sheel-te-paash-sheel) bersha. Oun yob meras.
தற்சமயம் தேர்ந்தெடுக்கப்பட்டது:
1. Mose 9: Sint-Man2024
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.