Lukas 22

Yudasti, “Yesus pan khebanun,” aro Yahudi nimi nubunangap saekag lebeka

(Matius 26:1-5,14-16; Markus 14:1-2,10-11; Yohanes 11:45-53)

1Yahudi nimi sembe nubu sum peramag wamogpa, nimi maiknori, “Nubu sum Paskah taleba, as Yerusalem sani yoro telameberi, kwaneng roti walerop komne ik saekpare telamukap,” aro Yerusalem longoro yalamek. 2Longolamekti wamekpa, memnang Allah sembe palirop nang sikini yaboap, Musari yubu amohirop nangap tanekori, “Welaro Yesus obukap,” senelamek. “Obukap,” senelamek aghana, nimi maiknori Yesusti yubu awi uro ka'elamekpa, sin Yahudi nimi nubunang taneko logti, “Welaro Yesus obukap,” aro ina elamek. 3“Yesus salero obukap,” aro ina elamekpa, Yesusti wepto pogsiog nang aobare nang agha nimi nhonna, Yudas Iskariotne wamog. Phia yonge sikini nubunge Yudas kulomag wa'ina wana aluklamogpa, 4Yudas neneko memnang Allah sembe palirop nang sikini yaboap, Allahri Mem Ae yae ua unnang yin salerop nang sikini yaboap wamekag piogti, “Welaro Yesus a'unag pan khebanun,” aro yubu nikne lelamek. 5Yudasti, “Yesus pan khebanun,” aro ambatsiogpa, sin wana awi uahiogpa, “Yesus nunag pan khebamenba, kamna kaptoba tatkukap,” aro salag lero pibek. 6Saekag lebekneag agha Yudasti wali seogti, “Yesus nimi oroghag pileba, pa'asea wamleba, pan khebanun,” aro weamogti, keme nelero seneraglamog.

“Paskah sum eneko kwaneng nhon tukap,” aro meneklameka

(Matius 26:17-25; Markus 14:12-21; Yohanes 13:21-30)

7Yahudi nimiri ik saekpare kwaneng roti walerop komne telamek ko'o alnirop sum, nubu sum Paskah sum eneko taog. Paskah sum talamogpa, Yahudi nimiri ul piropne sunsunum uro, “Sumene pham domba me oro yobaukap,” aro uanepneog wamog. 8“Yobaukap,” aro ulamekti, eldi yubu ka'ero neleptop nang phende Petrusap Yohanesap abeneko Yesusti poglamsiogti, “Nu Paskah sum pham domba me oro yoro tukap. A'un samenag pirumundi meneklamturom,” aro pogsiog.

9Wene aro pogsiogpa, sindi Yesusag hailamdekti, “Nai tala siba yoro meneklolamnunam,” aro haibarek.

10Wene aro haibarekpa, Yesusti sinag samoro ambarelamsiogti, “As soro kalurop as Yerusalem pururom. As wa'ilamtumun abeneko pere, nimi kabuni nhon mag tero poa yalamlenge pone haiptamundi, elag nelebarurom. Elag nelepto palapmundi, el wa'alogle ae eneag wa'irurom. 11Wa'irumundi ae ngainge ponekoag, ‘Yubu amohiropne ponekori nun anag pogsilba yanam. Anag hailangkeldi, “Nanap nari yubu ka'ero neleptop nangap Paskah sum eneko mo wameberi, andi ae lom nhonag telaukap. Ae lom nelag agha nanap nari yubu ka'ero neleptop nangap mo wameberi, pham domba me nhon tukap?” aro hailangkeldi, nu pogsilba yanam,’ sururom. 12Wene surumunba, ae ngainge ponekori a'unag ae tika paliagneag ae lom nubunge ambatsilul. Ae lom nubunge anekoag ae usa puna babe, kwaneng palinag babe ni sunuro nu sembe wero wamla. Ae lom aneag agha nu ni sembe wero palilamturom,” aro Yesusti sin phende pogsiog.

13Wene aro pogsiogpa, eldi yubu ka'ero neleptop nang phende abeneko pirekpa, Yesusti sinag, “Ipturom,” seogne sunsunum uro iptek. Iptekti ae lom anekoag wa'irekti, “Paskah sum sembe kwaneng nhon tukap,” aro togto meneklamdek.

Nu Saelba Uhiropneri, “Nanag seneragto kwaneng maghap tululom,” aro ambatsiogha

(Matius 26:26-30; Markus 14:22-26; 1 Korintus 11:23-25)

14Heng purukaogpa, “Wene tukap,” sembaekti aeag wa'ina Yesus eldi wepto pogsiog nang tanekoap, “Kwaneng nikag tukap,” aro pulaek. 15-16Pukekti Yesusti sin ambarelamsiogti, “Nu Yahudi nimiri wene Paskah sum pham domba me yoro telamapne saog uro nen tenun kom. A'unag ambarelamsinne ka'ebahut! Allahri mog so'oag nimi saelbamsilula lag tale sum uro yabile taneogna, nu Paskah sum seneragto ulamapne ni sunsunupto yabilul. Sum eneko mo wene yoro telamapne saog uro nen tenun. Ane sembe, na anam seklenne sekleban komag na wana maikno uro a'unap nhon, ‘Paskah sum sani yoro nikag kwaneng tehebe,’ senelamnori wamna,” aro ambatsiog.

17Wene seogti, mag ma'iag mag anggur lolterop mag tero lirop mag ma'i tobogti, saelbamogti Allahag, “Wali tatsilam,” aro kibog. “Wali tatsilam,” aro kibogti sinag tarelamsiogti, 18“Allahri nimi mog so'oag nimi saelba uhin ko'o anam uro yabin komag, anggur lolterop mag nen tenun kom. A'unag ambarelamsinne ka'ebahut! Ot Allahri nimi mog so'oag nimi saelba uhin ko'o lag tale sum eneko og, anggur lolterop mag nen tenun. Ane sembe, wene mag ma'i a'unag tarelamsinne nene topmundi, a'unkaboag pogtangto telamlulom,” aro tatsiog.

19Wene seogti, Yesusti kwaneng roti tobogti, “Nani, wali tatsilam,” aro Allah kibog. “Wali tatsilam,” aro yubu lebogti, kwaneng roti aneko saeri khepto-khepto tatsiog. Tarelamsiogti, “Nari nong ane a'un sembe tarelamsin. Wene kwaneng roti telamap saog uro a'undi amik telapmun sum babe na sembe ekon tan koma seneraglamnumundi ulamlulom,” aro tatsiog.

20Kwaneng roti khepto-khepto tatsiogpa teekpa, eldi kwaneng roti tatsiogne saog uro mag anggur lolterop mag ma'i babe tobogti ambarelamsiogti, “Mag anggur lolterop mag ma'i ane nari eneng ikto lambanualne eneag agha Allahap wendog yubu nikne kaupnepne sembe ikto a'unag tarelamsin. 21A'unap nhon kwaneng pairo terobag agha nikag telamap aghana, a'un wene saeri tolamlom nimi nhondi na pan khebanelul. 22Na mog so'oag nimi tahinge nanag uro yabilul nena, samenag Allahri, ‘Undo uro yabilul,’ aro yubu lebogne sunsunum uro tebanun. Ot na pan khebanele nimi sembe yaghe senero seklebalul,” aro Yesusti sin aobare nang ambatsiog.

23Wene aro ambatsiogne sembe sin mamun, “Etneri pan khebalulne sembe lepla,” aro hail dalamek.

Sin Yesusti wepto pogsiog nang aobare mamun, “Etne agha nubunge wamlul?” aro yubu lel dalameka

24Sin aobare nang tanekori sin mamun yubu lelamekti, “Nun anabiag etne agha nubunge wamla?” aro yubu lel dalamek.

25Wene alamekpa, Yesusti sinag yubu ambarelamsiogti, “Nimi sisa Yahudi kom nimi sembe yubu sia lennangdi nimi luknuhiro salelamsiang. Sin Yahudi kom nimi anabiag agha mikip taek nimiri aruksirop yubu ambarelamsiangdi, sindam nimi sembe, ‘Na a'uni walinge wamna,’ aro maibil dalamang. 26Sindi undo ulamang aghana, a'undi unuahiseng kom. Sindi ulamangne saog uro uan koma a'undi ulamlulom nena, a'un agha nimi nubu sirikne wamlam tanena, andamne mombolag nenep tangto olog sirikne saog nenep talulam. Nimi whingag menangalamsilamba, neleplangkeang tanena, nimi yepsinne saog nenep talulam. 27Nari a'unag, ‘Andamne mombolag nenep talulam,’ aro aruklamsin saog uro nari babe nandamne mombolag nenel dalamna. Sunumnana nimi nhon, ‘Kwaneng tenun,’ aro pukamsoba, eldi aruknari kwanengap maghap el whingag payingkina yebelaho tanena, nimi phende nene agha mog so'oag nimiri nelagha nubunge senelamang? Nimi nubungena, ot el kwaneng telamnange poneko nimi nubunge sembanep. Na a'un anabiag wamnange, ‘Yepne,’ aro arukahinep aghana, nimi yeplamsinne tahiri wamna.

28-29Nari Nai ponekori na wepto, ‘Mog so'oag nimi saelbamsululam,’ aro pogneog. A'un tane wamlom nangna, na eraruk uro ulamnoag a'undi na laploa pineom kom. Ane sembe Nari Nairi nanag, ‘Saelbamsululam,’ aro ambatneog saog uro a'unag babe, ‘Nimi saelbamsululom,’ aro a'un saeag nenelamsin. 30‘Nimi saelbamsululom,’ aro a'un saeag nenelamsin andarina, nari mog so'oag nimi saelba ulamsine abeneko pere a'undi babe nimi nubunge puka urobag pukapmundi, na umag nimi salero yubu sia lelapmunba, Israel ponekori nimi sisa aobare liksiog nimi sembe tam lelekto kemero karebalulom. Nari umag nimi salero yubu sia lelapmundi, nari kwanengap maghap pairo telamneag a'undi babe nanap nhon nikag telamukap,” aro Yesusti eldi wepto pogsiog nang aobare nang tanekoag ambatsiog.

Yesusti Petrusag, “Andi na sembe, ‘Ekonne,’ sululam,” aro ambarogha

(Matius 26:31-35; Markus 14:27-31; Yohanes 13:36-38)

31Yesusti Simon Petrusag yubu lelamogti, “Simon, Simon wali uro ka'eamlulam! Phia yonge sikini nubungeri a'un nari yubu ka'ero neleplamnelom nang taneko sembe Allahag molbaongena, ‘Nari sin ni mipsinun. Miplamsineri nimiri kwaneng roti wana poloro yo'oag agha, “Kolopto yingkilul,” aro keloplamang saog uro sin wepsinun,’ aro phia nubunge nenekori Allahag molbao. 32Molbao aghana, nari an sembe mo kopto Allahag molona molbatkenongena, Simon andi nanag sikne aro wana palilamlamne neneko, ‘Lupto yabilul kom,’ aro molbatkeno. Phia yonge sikini nubungeri mipkeleba, andi nanag samoro yamen tanena, andi ankabori nanag wana seneragnange mikip nembahilulam,” aro Yesusti Simonag ambarog.

33Wene aro ambarogpa, Simondi samoro Yesusag, “Nai, nu Saelba Uhiropne wamlam. Na anag ya'ag neleplangkenun. Nimiri na anap haing sae kaupto kop aeag tobongkipsiika babe, anap nhon tebanemea babe an liloa pikenun kom,” aro wene seog.

34Wene seogpa, Yesusti Petrusag, “Petrus, sik uro ambarelangken. Sumene winang ayamdi anam kau sen komag andi ik wilindi na sembe, ‘Nimi ene na ekonne,’ sululam,” aro Yesusti Petrusag wene seog.

“Nimiri a'un aisa nembahukangne sembe wero wamlulom,” aro Yesusti ambatsiogha

35Wene aro Petrusag ambare agha sin taneko ambarelamsiogti, “Nari samenag a'un poglamsinori, ‘Palapmundi kamna kaptoba babe, ag babe, yan wangana nen nhon babe poro koma sae lam pululom,’ aro pogsino aghana, a'unag kwema unna olog uahio to, kom to?” aro haibahiog.

Wene aro haibahiogpa, sindi samoro “Kwema nunag uahio kom,” seek.

36Wene aro, “Kom,” seekpa Yesusti yubu lelamogti, “Samen nari a'un, ‘Sa'a-sa'a poro koma pululom,’ aro pogsino aghana, wenena a'undinge kamna kaptoba lirop ag wamleba, ag nongag enektop ag babe, kwaneng lirop ag babe wamsile tanena, toro poroamundi pululom. A'un pelep tanepne sembe karog wamsile kom tanena, a'undinge ag siliro pelengero wangka ulamlom ag nimiag kamna kapto toroamundi, kamna nenekoag agha karog toroamundi pululom. 37Nari a'unag, ‘Unualulom,’ aro ambatsinne nene tibin nenero ambatnuahin. Allah yubuag samenag na sembe mome toro pibog yubu nhon sik uro nanag uro sunup talul. Samenag Allahri yubu silimu tiptopne ponekori na sembe mome toro palilamogti,

‘Nimiri el sembe, “Yubu sia ingisaptopne,” aro seneragtop,’ aro mome toro pibog.#Yesaya 53:12

Anamag nimiri amik na senelamneikne sembe mome toro pibogne nene sik uro sunup talul. Wene babe uro yabinual,” aro Yesusti ambatsiog.

38Wene aro ambatsiogpa, Yesusti yubu ka'ero neleptop nang tanekori Yesusag, “Nai, nu Saelba Uhiropne. Karog phende abene wamla,” seekpa Yesusti, “Hae sunsunum,” seog.

Yesus Getsemani so'oag piogti, Allahag molona molbaogha

(Matius 26:36-46; Markus 14:32-42)

39Wene seogti, Yesus sop-sop Zaitun yimag palamog saog uro sum eneko babe Zaitun yimag piogpa, eldi yubu ka'ero neleptop nimi taneko babe nelepto piek. 40“Pukap,” sembaekag aneko piekti, Yesusti sin neleplamek nimi tanekoag, “Orabari a'un mipsileba, malia ulapmunagti, a'undi Allahag, ‘Nu yepsi,’ aro molona mololamlulom,” aro ambatsiog.

41Wene aro ambatsiogti, olog we uro piogti, yabu sanukto pulingkina Allahag molona mololamogti, 42“Naniong, andi nanag, ‘Seklero tebalulam,’ aro mag tebatneloa saog uro tatneomne neneko ikin wamla. An wali sembalam tanena, mag tebatneloa saog uro tatneomne neneko kom nembalulam. Ot nari, ‘Undo yaboho,’ seneropne agha ualulam kom. Andi wanaag seneropne agha uro yabilul,” aro Allahag molona molbaog.

43Wene aro Allahag molona molbaogpa, Allah arukna malaikat imag agha yingkina el whingag lag taogti, mikip nenelamog. 44Yesus el seklenne seklebanepne ikin sirikti, Yesusti wana ikinneag agha Allahag molona mololamog abeneko pere elag whin tinilamogne eneng karaklamloa saog uro so'oag tinilamog.

45Yesusti molona molbaogti, sekom agha yingkina kemelamsiogpa, eldi yubu ka'ero neleptop nang malameka kembahiog. Sin kwahing malamek nimi taneko wana ikindi, nong pesa tahiogpa, malameka ipsiog. 46Malameka ipsiogti, yubu lelamogti, “Sa'a sembe a'un malamlom? Pukmundi Allahag molona mololamsu. Orabari a'un mipsileba, malia ulapmunagti, a'undi Allahag, ‘Nu yepsi,’ aro molona mololamlulom,” aro wenero ambatsiog.

Yesus saelbaekti, haing sae kaupto pabieka

(Matius 26:47-56; Markus 14:43-50; Yohanes 18:3-11)

47Yesusti anam yubu ambarelamsiog abeneko eldi yubu ka'ero neleptop nang aobare nang nhon Yudas neneko menangkamogti, nimi maikno payalamsiog. Poa yahiogti, Yudas nenekori, “Yesus togtog aro somoro kipnun,” aro Yesus whingag sekel piog. 48Yudasti Yesusag unuaog aghana, Yesusti yubu lelamogti, “Yudas, na mog so'oag nimi tahingena, andi togtog aro na pan khelamnelam te?” seog.

49Yesusag neleptop nang elap aneko wamek nang tanekori ibekti, wene uro yabinepne sembe el taekti, yubu lelamekti, “Nu Saelba Uhiropne, nimi tane karog agha opsukap te?” seek.

50Wene seekpa sin, “Yesus saelbaukap,” aro yaek nimi anabiag agha memnang Allah sembe palirop nang sikini nubunge arukna nhon babe wamog. Wamogpa Yesusag neleptop nang taneko nhondi karog kilbom agha memnang sikini arukna wamogne poneko ao sirikne pubom agha pelengkaog. 51Undo unuaog aghana, Yesusti irikto yubu lelamogti, “Unualamne nene libe,” seogti nimi enekori aoag Yesusti sae pibogti, nimi eneko wali nembaog.

52-53Wene aro wali nembaogpa, memnang Allah sembe palirop nang sikini yaboap, Allahri Mem Ae yae ua urop nang sikini yaboap, Yahudi nimi wenehirop nangap yaek nang tanekoag Yesusti yubu lelamogti, “Na sop-sop Allahri Mem Ae aramag wa'alamnori, a'un whingag ua ulamno aghana, a'undina salelamneom kom. Na, ‘Mo sekukap,’ aro mal tarop nimi sikini wamsene tanena, a'undi nanag yalamlomne karoghap kameap payalamlomne sunsunum sembanep. Na, ‘Mo sekukap,’ aro mal taropne wamna te? Ane sembe a'undi nimi whingag yo kom uro na saelbanep aghana, Allahri ko'o ologha ane a'un liamsilbana, el inipnag saelba uhiropne phia sikini nenekori senenne sunsunum uro a'undi ul palamlom,” aro Yesusti ambatsiog.

Petrusti Yesus sembe, “Na ekonne,” seogha

(Matius 26:57-58,69-75; Markus 14:53-54,66-72; Yohanes 18:12-18,25-27)

54Sindi Yesus saelbaekti poa lebekti, memnang Allah sembe palirop nang sikini nubungeri aeag poa piek. Yesus saelbaekti, poa palamekpa, Petrusna amik nelepto weag uro tiro palamog. 55Nelepto tiro palamog aghana, memnang Allah sembe palirop nang sikini nubungeri aramag aneko auk nhon lolbaekti, nimi orange babe auk lekto puro warekamekpa, Petrus babe sin anabiag auk lekto pul piog. 56Auk lekto pukamogpa, olog wareamogpa, kel nhon memnang Allah sembe palirop nang sikini nubunge arukna wamog kel nhondi Petrus pukamogha ibog. Ibogti yubu lelamogti, “Nimi ene babe Yesusap nhon ua ulamdang,” seog.

57Kel enekori wene seogpa, Petrusti kom alamogti, “Naipsa'el, nari babe nimi ene ekon nimi,” seog.

58Nen olog wamogpa, kabuni nhon yaogti, Petrus kembi agha, “An babe Yesusag neleplamlamne,” seog.

Wene seog aghana Petrusti kabuni enekoag, “Na kom! Na elag neleptopne kom,” seog.

59Wene seogti wamogpa, ko'o olog piogpa, nimi kabuni yogne nhon yaogti, yubu mikip uro, “Nimi ene Galileange ane sembe, otsik uro el babe Yesusag neleptopne wamla,” aro wene seog.

60Wene seog aghana, Petrusti samoro kabuni enekoag, “Nangkae, andi lelamlamne nene olog seneragna kom,” alamog abeneko winang ayamdi kau seog.

61Winang ayamdi kau seogpa, Yesus tangabom agha Petrusag kembaog. Kembaogpa Petrusti nu Saelba Uhiropne Yesusti lebogne seneraghog. Yesusti samenag Petrusag yubu ambarelamogti, “Sumene winang ayamdi kau sen komag, andi ik wilindi na sembe, ‘Ekonne,’ sunululam,” seogne seneraghog.#Lukas 22:34 62Seneraghogti sekom agha lambaogti, wana noro agha ngik-ngogha engelamog.

Yesus yubu nepto olameka

(Matius 26:67-68; Markus 14:65)

63Yesus yae wamek nimi tanekori yubu nepto ali nenelamekti, ol wa'alamek. 64Sindi Yesusti whing lilbi agha lelamekti, “Allahri an wana heklangkelne agha ambatsi. An etneri olangkelne si lepmen,” aro yubu nepto olamek. 65Yubu neplamekti, san tiliptop yubu maikno lelamekti, ali nenelamek.

Yahudi nimi sembe tam kareptop nang whingag Yesus pabieka

(Matius 26:59-66; Markus 14:55-64; Yohanes 18:19-24)

66Wamekpa kwelekaogpa, lukun sum eneko Yahudi nimi sembe wenelamsiekti, tam kareplamsiek nang Mahkamah Agama nimi taneko winip taek. Sin winil dalamek nimina, memnang Allah sembe palirop nang sikini yaboap, Musari yubu amohirop nangap poloro winip taekti, “Nu whingag Yesus poa yalulom,” seekpa poa piek. 67Yesus sin whingag pabiekpa, sin tam kareptop nangdi Yesus hailamekti, “Nu ambatsululam! Anna mog so'oag nimi taluro saelba uhinepne Kristus wamlam tanena, nunag ambatsi,” aro ambarek.

Wene aro ambarekpa, Yesusti samoro, “Nari samoro lag phoro a'unag ambatsisenea babe a'undi nanag sikne aro seneraglamnululom kom. 68Nari a'unag haibahisenea babe a'undi samoro ambatnululom kom.#Lukas 20:1-8 69Aghana wene agha, na mog so'oag nimi tangtopne poneko Allah Mikipne poneko sae sirik sip ya'ag uro puknep,” aro ambatsiog.#Sepna 110:1

70Wene aro ambatsiogpa, sin niri elag hailamekti, “Wene selam tanena anna, ‘Allah Elme wamna,’ selam te?” aro haibaek.

Wene aro haibaekpa Yesusti, “A'undi wene leplomne pone wamna,” seog.

71Wene seogpa, sindi lelamekti, “Nundam nimiri eldamneri pamag agha yubu leplange aori ka'ebap. Ane sembe yog nimiri, ‘Undo-undo lero ulamoa ka'ebanori imno,’ aro lenne nen ka'ebaukap kom,” seek.

தற்சமயம் தேர்ந்தெடுக்கப்பட்டது:

Lukas 22: kklKOS

சிறப்புக்கூறு

பகிர்

நகல்