Matɨyo 3

Bɛrnɛ di da Ja̰ ba-lɔɔ batɛm

(Marg 1:2-6; Lug 3:1-6; Ja̰ 1:19-23)

1Boy wɔlɛdi gɨ nee le, Ja̰ ba-lɔɔ batɛm andaŋ dus a duroy daldɨŋ di Jude tee bɛrnɛ yen̰ kalaŋ ye hɨn̰: 2«Bɨlgɨŋ gɨye-lɔɔdɨgɨŋ, kɨya wa dɔɔ-ƴaa di daa nii bugoŋ mɨnde gusɨgɨŋ ɨni.» 3Ijay ba-yɔɔ-kɔl-gɨ-Kumu-ba-yɔɔ tumɔ ye hɨn̰:

«Noy ungo gɨ pɨna wo̰ ye a duroy daldɨŋ pəŋ pəŋ ye hɨn̰:

“N̰anagɨŋ gɨyəŋ gɨ da Ba-gulɔŋ bɨ,

Laagɨŋ karɨn̰ gɨyəŋ kayi ɗe ɨre dan̰ durɔ ɗɨngar bɨ.”#3:3 Ayge na duroy: Esaïe 40:3.»

4Ja̰ le orɨn̰ na dan̰ badɨge ga leege dan̰ teɗi jambal bɨ, saɗɨ te wɨrɨndi na dan̰ ɓala bɨ. Hɨnga dɔɔdi na dugunun̰əŋ bɨ, sɔŋ di tumu di coŋ bɨ. 5Kɨɗɨn̰ ga nee le, kalaŋ nɔm ga a cay ƴaa-di-gumu di Jerusalɛm dɨŋ bɨ, ga a cay gɨsəŋ ga Jude gaŋ bɨ, ga a cay gɨsəŋ ga gasɨbi kuray ga Jurdḛ gaŋ bɨ, orge gusii. 6Kan torge te ɨsɨnan̰əŋ kage daa tumoy kalaŋ bɨ, Ja̰ leege batɛm duroy kuray gɨ Jurdḛ gɨŋ.

7Kɨɗɨn̰ ga Ja̰ sol kondɨwadi Parɨsɨn̰an̰əŋ bɨ, kondɨwadi Sadusɨn̰ɛn̰əŋ bɨ, ga ɨrgage gusii ɗe ban na leege batɛm le na, ban yege hɨn̰: «Kɨŋ, te wɔɔ gɨ da karin̰əŋ, kɛ na waŋ ba gɨlgɨŋ gɨyəŋ gɨ ni gɨrɨn̰ mɨn̰ɨn̰ kuduroy-hɔmɛ da Kumu di ba kɨya caga le ga? 8Laagɨŋ gɨye gɨ gɨl gɨ kɨŋ na bɨle gɨye-lɔɔdɨgɨŋ leen̰ cɨndi. 9Bɨ kɨŋ ɗɔɔ ba sɔmɛ gɨ ni ɨrɨme kuduroygɨŋ yɔ hɨn̰: “Abɨraham na mon̰ini” ƴɔbɨ naŋ. Ɗe aŋ yəgɨŋ daa waŋ, hɨn̰ gɨ Kumu na gey naga na, ban kɨya ɓale bɨle orun̰əŋ ga kɛ le, leen̰ karɨn̰aŋ bɨn̰ Abɨraham. 10Kumu n̰an gusi kɨya bɔyɛ kɔl a cay kalaŋ nɔm ga kan̰ge tɔrɛ-kɨbɨge. Ungo gɨ na ɗa kardi ɨsɨna koyi coŋ naŋ na, Kumu kɨya dɨbii duroy tɨwa di ƴee bɨlɨm bɨlɨm dɨŋ, hɨn̰ gɨ ungo ba sɨdɨrde hayaŋ ga ɨsɨndəŋ bɨ, tal tɨwa nee ulɨn̰ gurɔɗɨ coŋ wo̰. 11Ɨŋ-bandi na, ɨŋ leegɨŋ batɛm na dan̰ kaŋ ɗe gɨl gɨ kɨŋ na bɨle gɨye-lɔɔdɨgɨŋ. Ama ban gɨ tɨlga karɨnɨ nee le, dɔnɔdi ɗəŋ bɨrɨŋ gɨ ɨŋ ɓala gɨ ni pɨndɨre gangɨdi gɨyabe ga a tɨbayi coŋ naŋ. Ungo gɨ nee le ba kɨya loogɨŋ batɛm dan̰ Turnɔ ɗe-kuduroy-bɛrɛ bɨ, dan̰ tɨwa bɨ. 12Ungo gɨ nee le orɨn̰ dan̰ kee koyi kobi bɨ, ban kɨya pɨye mɨsɨɗɨm coŋ ɗon̰ cɨn̰ gasa. Cɨn̰-gasa le ban kɨya bɔgɛ te tugulu toyii dɨŋ. Ama ban kɨya ule mɨsɨɗɨm le na a duroy tɨwa di kɨya bayaŋ naŋ bɨrɨŋ dɨŋ.»

Ja̰ leen̰ Jesu batɛm

(Marg 1:9-11; Lug 3:21-22; Ja̰ 1:29-34)

13Ɨni na, Jesu sayga a cay gɨsəŋ ga Galile gaŋ, bɨ ɨrga gusi Ja̰ a kɨbɨ kuray gɨ Jurdḛ gɨŋ, lee gɨ ban leeyi batɛm. 14Ama Ja̰ say mal gɨyəŋ gɨ ni kan̰e, bɨ yen̰ Jesu hɨn̰: «Na ɨŋ-bandi ba orɨn̰ dan̰ n̰age gɨ ji na laaŋ batɛm, ma na mɨna ma mɨn̰ ɨrga gusɨnɨ ga?» 15Ama Jesu dɨbii cay nee yey hɨn̰: «Gɨ haw kɛ na, ɗa ɗe ana lee hɨn̰ wo̰. Kɨya wa hɨnga nɔm ga Kumu gey gɨ na na laa le, na kɨya lɔɔ ɗe or kɨɗɨn̰dɨge gaŋ hɨn̰ wo̰ le kɔ.» Ɨni na, Ja̰ say gey cay nee bɨ leeyi batɛm. 16Kɨɗɨn̰ ga ban leen̰ Jesu batɛm coŋ ɨni na, ban andaŋ duroy kaŋ gaŋ doŋ. Kɨɗɨn̰di ga nee gaŋ le bɨ ga ma, gɨɗɨgɨ-Kumu hangaŋ wɨn̰ bɨ, Jesu sol Turnɔ di da Kumu sayga daa gɨlɨn̰ hɨn̰ guu di bɛrɛ kən̰jəŋ wo̰, ɨrga gɨsɨn cayi. 17Bɨ ga ma, noy ungo ye a gɨɗɨgɨ-Kumu gɨŋ hɨn̰: «Ban gɨ kɛ le na Kuronɨ, ɨŋ lee-toyi tɔgɨ, gusɨnɨ mɔŋ cayi na ase naŋ.»

தற்சமயம் தேர்ந்தெடுக்கப்பட்டது:

Matɨyo 3: gab

சிறப்புக்கூறு

பகிர்

நகல்