Génesis 16
16
Agar jín se̱ꞌya ña Ismael
1Sarai ya̱ kúvi ña ñasɨ́ꞌɨ́ Abram ntu níyo se̱ꞌya ña jín re̱ꞌ. Jee íyó ɨɨn musúꞌ nkeꞌen ya̱ yɨ́ꞌɨ́ xi̱ntíín ña ya̱ kúvi ñaꞌan ñuunꞌ Egipto naní Agar. 2Jee nkachiꞌ Sarai nu̱u̱nꞌ Abram:
―Jíníꞌ nú ya̱ I̱toꞌoꞌ‑ó nchu̱sává re̱ꞌ ya̱ koo se̱ꞌya ni̱ꞌ soo koo va̱ꞌa iniꞌ nú kusuꞌ nú jín musúꞌ ni̱ꞌ jee sa̱naanꞌ koo se̱ꞌya ña ya̱ kúvi se̱ꞌya ni̱ꞌ.
Jee nka̱níjiá Abram ya̱ nkachiꞌ Sarai nu̱u̱nꞌ‑u. 3Jee Sarai, ñasɨ́ꞌɨ́ Abram, ña̱na̱ka ña Agar, ñaꞌan ñuunꞌ Egipto ya̱ kúvi musúꞌ ña, jee njia̱ꞌa ña maa nu̱u̱nꞌ Abram sáva kuvi ñasɨ́ꞌɨ́ re̱ꞌ. Nsa̱ꞌá ráa yaꞌá sáá nkuvi u̱ji̱ꞌ kui̱ya̱ꞌ ya̱ nééꞌ Abram nu̱u̱nꞌ ñuꞌún Canaán. 4I̱ña̱jée ña̱kuneeꞌ re̱ꞌ jín Agar, jee nna̱nise̱ꞌya ña, soo sáá niniꞌ ña ya̱ nékue̱ꞌi̱ꞌ ña jee nkuniichiꞌ ña i̱toꞌoꞌ ña Sarai. 5I̱ña̱jée nkachiꞌ Sarai nu̱u̱nꞌ Abram:
―Si̱kɨ̱ꞌ nú íyó ya̱ nóꞌo ni̱ꞌ, chi nchiꞌi ni̱ꞌ musúꞌ ni̱ꞌ xi̱ntíín nú jee sáá niniꞌ ña ya̱ nékue̱ꞌi̱ꞌ ña, jee kúníichiꞌ ña nuꞌuꞌ. Na̱ ka̱ꞌ sanáaꞌ I̱toꞌoꞌ‑ó né ɨɨn‑ó íyó si̱kɨ̱ꞌ, nuꞌuꞌ áxí noꞌó.
6Jee nna̱xiníkó Abram nu̱u̱nꞌ Sarai:
―Kune̱ꞌyá, musúꞌ nú ya̱ nkeꞌen, xi̱ntíín nú yɨ́ꞌɨ́‑ɨ, saꞌá jín ña na̱kua̱ꞌ jiáni iniꞌ nú né ɨɨn vá va̱ꞌa.
I̱ña̱jée nka̱jiéꞌé sákini Sarai maa, jee nkene ña kua̱ꞌa̱nꞌ ña nu̱u̱nꞌ Sarai. 7Jee máá najiáꞌáꞌ ííꞌ I̱toꞌoꞌ‑ó nke̱táꞌán re̱ꞌ ña nu̱u̱nꞌ káku nute nu̱u̱nꞌ ñuꞌun sáɨn. Nééꞌ nu̱u̱nꞌ káku nute vá ichi kuáꞌánꞌ ñuunꞌ Sur. 8Jee nkachiꞌ re̱ꞌ:
―Agar, musúꞌ Sarai, ¿né núꞌ va̱ji nú?, jee, ¿né núꞌ kɨ̱ꞌɨ̱nꞌ nú?
Jee nkachiꞌ ña:
―Nu̱u̱nꞌ i̱toꞌoꞌ ni̱ꞌ Sarai jínu ni̱ꞌ síyo ni̱ꞌ ―nkachiꞌ ña.
9Jee nkachiꞌ máá najiáꞌáꞌ ííꞌ I̱toꞌoꞌ‑ó nu̱u̱nꞌ ña:
―Nikó nu̱u̱nꞌ i̱toꞌoꞌ nú jee chiꞌi nú maánú xi̱ntíín ña.
10Jee suni nkachiꞌ máá najiáꞌáꞌ ííꞌ I̱toꞌoꞌ‑ó nu̱u̱nꞌ ña:
―Saꞌá ni̱ꞌ kukueꞌeꞌ víꞌí ka̱ꞌ se̱ꞌya ichiyúkúnꞌ nú ya̱ va̱ji ichinúúnꞌ, ya̱ ni nsáꞌ kuvi kaꞌvi ñɨvɨ ráa jie̱ꞌe̱ꞌ rá ntántúníꞌ kue̱ꞌe̱ꞌ ráa.
11Jee suni nkachiꞌ máá najiáꞌáꞌ ííꞌ I̱toꞌoꞌ‑ó nu̱u̱nꞌ ña:
―Nékue̱ꞌi̱ꞌ nú, jee koo ɨɨn se̱ꞌya yɨ́ɨ́ nú jee sikúnání nú maa Ismael, chi nteso̱ꞌo I̱toꞌoꞌ ntɨɨn kuéntáꞌ re̱ꞌ ya̱ nóꞌo nú. 12Jee kuvi re̱ꞌ ɨɨn te̱e kuiñɨ núne re̱ꞌ kuéntáꞌ ɨɨn burrúꞌ yúkú, kantáꞌán re̱ꞌ jín nɨꞌɨ rá ñɨvɨ jee nɨꞌɨ ráa kantáꞌán jín re̱ꞌ, jee kuiñɨ re̱ꞌ si̱kɨ̱ꞌ ntáká rá ñanitáꞌán re̱ꞌ.
13Jee I̱toꞌoꞌ‑ó ya̱ nkaꞌanꞌ re̱ꞌ jín ña, jee nsi̱kúnání ña maa: “Ndiosíꞌ ya̱ néꞌyá”, jee nkachiꞌ ña: “¿á suni yaꞌá nne̱ꞌyá ni̱ꞌ maáréꞌ ya̱ néꞌyá nuꞌuꞌ rúja?” 14Jee saáva nsi̱kúnání ráa sókó yaꞌá: “Sókó maáréꞌ ya̱ tékúꞌ ya̱ néꞌyá re̱ꞌ nuꞌuꞌ.” Nééꞌ sókó yaꞌá ma̱ꞌñú ñuunꞌ Cades jín ñuunꞌ Bered. 15Jee nsi̱káku Agar se̱ꞌya yɨ́ɨ́ ña jín Abram jee nsi̱kúnání re̱ꞌ maa Ismael. 16Jee ku̱mi̱xiko i̱ñu̱ꞌ (86) kui̱ya̱ꞌ íñɨ́ Abram sáá nsi̱káku Agar Ismael se̱ꞌya yɨ́ɨ́ Abram.
தற்சமயம் தேர்ந்தெடுக்கப்பட்டது:
Génesis 16: meh
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2022, Wycliffe Bible Translators, Inc. All rights reserved.