Péna a Apotereri Túlɓay
Túlɓay
Mbété a Péna a Apotereri, ɓá gázín Bélaɓay a ɓil mbété a Luk. Ké saɓay a tɔ́ʼɔɓay a Apotereri zi ɓay a sa ɓá njuku nzáʼapéna a Zezúri. Kú tí tɔ́ʼɔɓayké a Zerúzalɛ̂m, falké a ɓil kaw a gbaŋkéri, rá̧ a ɓil pûri ka ná ɗɔ́ŋ mbii lúkí a Medíteranɛ́. Nǎŋnɔ́ pé kú niŋ nzáʼapéna ka Zezú hí̧ kuriri (Luk 24:47-48 rá̧ Pap 1:8).
Ka títáʼa mbété a Péna a Apotereri, Zezú he sé nûnalê sé kaw gbaŋa a Gáŋvbôn (1:9). Ŋgɛŋnɛ́, kú zi kó nɛ́ a bazeŋ a Apotereri ɓá báŋa a í̧ŋásá̧ mbaa, dáy ké pé Têm Pukí ka gí a gel a Gáŋvbôn, gí hí̧ Apotereri (Pap 2). Têm Pukíké nɔ́ hí̧ kuriri ŋgboro tɔ́ʼɔ gáŋ hɛ̧ri̧ ka Gáŋvbôn niŋ. Tí ka títáʼa mbétéké sé ka̧ kɔ́rɔ́ké, Têm Pukí tɔ́ʼɔ ŋgboro sé gel a Zezú hí̧ njuku láɓulawri.
Sé ka̧ gáŋké 12, Apotere Píyɛ́r kaw ɓá njuku a kú saɓay a mɛ̌ ŋgɛ̧́ mambá a ɓil mbété a Péna a Apotereri.
Gunbɔʼɔ a Zezúri kaw ɓá Juyífri. Kú tɔ́ŋ sé vûn a Gáŋvbôn ka Zerúzalɛ̂m dát, a saɓay a gáŋnjuku a kuriri. Nǎŋnɔ́ mbây a Juyífri yɔʼɔlɔ kuriri ɓá báŋa Zezú kɔ́ (gáŋké 3 sé ka̧ 8).
Nǎŋnɔ́, njuku láɓulawri sé magélri too, lá ɓil kaw a Judé, ɓil kaw a Samarí rá̧ gel a fékéri. Kú sé a tɔ́ʼɔ Bélaɓay hí̧ njuku a ǎ̧yrí̧ ka zi tí ɓá Juyífri yáy kɔ́ (gáŋké 8 sé 12). Ná ɓá gáŋ hɛ̧ a féké, ɓayhí̧lé, a ɓil nâmké nɔ́, ɔ ɓá Juyífri pé tu gbát Gáŋvbôn mbêw yáŋ. Kú kɛrɛ ɓá njuku a fékéri zi ma tu Gáŋvbôn nyá. Dáy Zezú ŋgburu ŋgboro hí̧ njukuri too ɓay kú kaw mbêw kuu Gáŋvbôn. Nǎŋnɔ́ mára̧ a njuku láɓulawri ziŋ tɛ̧́na a ŋgɛ̧́ gé ɓá mbɛl, a mára̧ njukuri ka ɓá Juyífri rá̧ njukuri ka zi tí ɓá Juyífri yáy kɔ́.
Tí ka gáŋké 13, Apotere Pôl mbí nzáʼa péna a Píyɛ́r. Zezú ɗí Pôl (gáŋké 9). Egilize a Aŋtiyós ka tísiri a Siri, mbí nɛ́ kuu njuku a fékéri, ɓay a sé tɔ́ʼɔ Bélaɓay a Zezú hí̧ njuku a fékéri ɓá ɗínáké. Tí ka gáŋké 13 sé ka̧ 28 saɓay a nzáʼapéna gɔ́rɔ́ a mɛ̌. Kú sa a̧ní Bélaɓay a Zezú wal ma gelri ɗɔ́ŋ mbii lúkí a Medíteranɛ́ sé ka̧ Rɔm, gáŋ pû a tísiriké.
Bélaɓay a Zezú Kiris ka ŋgboro a Luk, saɓay sé ɓil nâm a Zezú ka tísiri. Kuu mbété a Péna a Apotereri, nâm a Egilize tí. Ɓá ɓil nâm, ka njuku láɓulawri kaw tɔ́ʼɔ Bélaɓay a Zezú Kiris dát lá gelri too. Kú tɔ́ʼɔ hí̧ njukuri too táŋ ɗém ɓilké: gun a léléri, gáŋnjukuri, fóyári rá̧ njuku hɛ̧zíŋári̧.
தற்சமயம் தேர்ந்தெடுக்கப்பட்டது:
Péna a Apotereri Túlɓay: pnz
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2023 CABTAL