Péna a Apotereri 13
13
Têm Pukí ten Barnabas rá̧ Sôl
1A ɓil Egilize a Aŋtiyós, porofɛ́tri rá̧ njuku tɔ́ʼɔhɛ̧ri̧ erú: Barnabas, Simɛyɔ́ŋ (a kú ɗí ɓá bâa pírí), Lisiyús (a pû Sirɛn), Manayɛn (ka hɔ̧́ mbêw kú mbây Herod, a kaw mbây ka tísiri a Galilê), rá̧ Sôl 2Sêe a há̧na, a kú mára̧ kaw ɗél Gáŋmbây, a sáŋhɛ̧, Têm Pukí sa hí̧ kuriri ɓá: «Í ɓá Barnabas rá̧ Sôl kaw ɓórí ɓay a niŋ nzáʼapéna ka mi ɗí kuriri ɓayké.» 3Dáy, fal gɔ́ŋ Gáŋvbôn rá̧ sáŋhɛ̧, kú ɓá ndɔ̂ʼɔ kɔ̧ tûl a Barnabas rá̧ Sôl, a pɔŋ kuriri kála.
Barnabas kú Sôl ka̧ Sípɛ́rɛ
4Barnabas kuu Sôl ka Têm Pukí pé kuriri, sé ka̧ Silisí, a goló kú mbí batô ɓay a sé tûlkɔ̂ɔ a Sípɛ́rɛ. 5Gelka kú gé ka̧ ɓil pû Salamîn, kú gé tí tɔ́ʼɔɓay a Gáŋvbôn, a ɓil vûn gɔ́ŋ Gáŋvbôn a Juyífri. Zâŋ Márke e kuu kuriri, ɓay hí̧ndɔ̂ʼɔ hí̧ kuriri. 6Kú tá tûlkɔ̂ɔké too a sé ka̧ Pafós. A goló kú gé ziŋ njuku niŋ hɛ̧sáʼama a há̧na, ka rɛŋɛ́ ɓá Bâr Zezú. Ké ɓá Juyíf, a mbí mûn nɛ́ ɓá porofɛ́t. 7Ké ná gbaŋ a vûn a mbây tûlkaw a tûlkɔ̂ɔké, ka rɛŋɛ́ ɓá Sɛrziyus Pawulús, ké kaw ɓá njuku hɛ̧túna. Ké ɗí Barnabas gí rá̧ Sôl, ɓayhí̧lé, ké zi ɓay a ké láɓay a Gáŋvbôn. 8Dáy Elimás, njuku niŋ hɛ̧sáʼama (ka ɓá rɛŋ ka nzáʼa Girɛ́k), many há̧na kuu kuriri, ɓay a ké de ŋgboro láɓulaw hí̧ mbây tûlkawké. 9Dáy Sôl, a kú ɗí nɛ́ kɔ́ ɓá Pôl, mbá ka Têm Pukí, dáy a ɛ̧rɛ̧ Elimás, 10a sa hí̧ nɛ́: «Bâa ŋgbɔ́ra rá̧ njuku nzáʼa rɔ́ʼɔ, gun a Zábolo, njuku ŋgá̧na a hɛ̧ a bélákéri! Mɔ́ tí pɔŋ ɓew ŋgboro péna a Gáŋmbây yá lé? 11Dáy a ŋgɛŋnɛ́, mɔ́ lá: Gáŋmbây e vbá̧ mɔ́, nûn nɔ́ e rá̧na a tí kó hɔrɛ sêe yá, nâm kpay.» Núnmbɛ̧́nɛ́, nûn a Elimás ra̧. Ké kí ɔ gel a mbêwké, a ɛ́ njuku ɓay a ké ŋgbá ndɔ̂ʼɛ, a tɔ́ʼɔ nɛ́ ŋgboro. 12Mbây tûlkawké kó hɛ̧ ka táy, a láɓulaw, ɓayhí̧lé hɛ̧tɔ́ʼɔ a Gáŋmbây ri lawɛ́.
Pôl rá̧ Barnabas ka̧ Aŋtiyós a tísiri a Pisidí
13Pôl rá̧ njuku séna a mɛ̌ri̧, he batô a kála sé Pafós, ɓay a sé pɛrze ka tísiri a Pamfílí. A goló Zâŋ Márke gé pɔŋ kuriri a rekála sé Zerúzalɛ̂m. 14Falké, Pôl rá̧ Barnabas uru ka pɛrze a sé ka̧ Aŋtiyós a tísiri a pisidí. A sêe ɔʼɔ, kú sé ri ɓil vûn gɔ́ŋ Gáŋvbôn a Juyífri, a gé káwa siri. 15Falké ka njuku a há̧na kɛ̧́ mbété a sáŋna rá̧ mbété a porofɛ́tri, gáŋnjuku koro vûn mára̧ gɔ́ŋ Gáŋvbôn a Juyífri, vbí Pôl rá̧ Barnabas ɓá: «Nyîn nírí̧, há̧na i erú ka ɓay, ɓay a í sa hí̧ njukuri, ɓay a kpúmûn a kuriri lé, í sa!» 16Dáy, Pôl uru a lá ndɔ̂ʼɛ a sa: «Wǎy njuku Izirayɛ́lri rá̧ wǎy njukuri ka zi tí ɓá Juyífri yáy, ka gí ɗél Gáŋvbôn, i lá mí! 17Gáŋvbôn a Izirayɛ́lri ten zîi a manárí̧, a hí̧ kuriri ŋgɛ́rɛ, kú ŋgɛ̧́ a kú pa̧n ɓá gɔ́rɔ́ ka tísiri a Ezípte ɓáy. Falké, Gáŋvbôn ten kuriri ka Ezípte ka kpɔ́ŋa a mɛ̌. 18Sé gbaŋa mbimbɔ̂m bonɛŋ, ké koro kuriri a ɓil lawkɔr. 19Falké, ké gbɛʼɛrɛ nzáʼaɓayri ɓórí ɓórí, zíndɔ̂ʼɔsáy ka tísiri a Kanaa, dáy a hí̧ tísiriké hí̧ kuriri. 20A nɔ́ too, zaa ké ka̧ mbimbɔ̂m ísɔ́t nɛŋ a bon ndíɓí.»
A falké, Gáŋvbôn hí̧ njuku walɓayri hí̧ zîi a manárí̧, sé ka̧ nâm a porofɛ́t Samuwɛl. 21Falké, zîi a manárí̧ vbí mbây, dáy Gáŋvbôn hí̧ Sawûl, gun a Kísi a bɔʼɔdii ká̧na a Bɛŋzamɛŋ. Sawûl kaw mbây mbimbɔ̂m bon nɛŋ. 22Falké, ka Gáŋvbôn sáŋ nɛ́y, ké hí̧ Davít, ɓá mbây hí̧ kuriri. Dáy a ké saɓay a Davít ɓá: «Mi ziŋ Davít, gun a Jesé, ɓá njuku ka ri law ní, ɓayhí̧lé ké e niŋ hɛ̧ too ka mi ziy» 23Gun ɓil a Davít mbêw, pé ɓá Zezú ka Gáŋvbôn ɓá nɛ́ ɓá njuku pɛ̧́ gun Izirayɛ́lri, nǎŋnɔ́ pé ké hí̧nzáʼa. 24Ɗambɛl rá̧ Zezú ké gíy, Zâŋ Batís tɔ́ʼɔɓay a ɗí njuku Izirayɛ́lri ɓá kú fere káwa a kuriri, a kú nyá batêm! 25Gelka Zâŋ Batís kaw ɔ́rɔ́ péna a mɛ̌y, ké sa ɓá: «A wǎyri, i kɛrɛ ɓá, mi ɓá gé lé? Mi zi tí ɓá njuku ka i kaw zokáké yá! Dáy í lá, ké mí gíw ka falní, mi zi marú̧ ɓay a sɛ́l sɛl sabɔʼɔ a mɛ̌ nyá.»
26«Nyîn nírí̧, wǎy gun a Abarahamri̧, rá̧ wǎy njukuri ka zi tí ɓá Juyífri yá, ka gí gelé ɓay a ɗél Gáŋvbôn: Ɓá ɓay a maná pé Gáŋvbôn pé nzáʼapéna pɛ̧́na nɛ́ gíy. 27Ɓayhí̧lé, njuku Zerúzalɛ̂mri̧ rá̧ mbây a kuriri, zi tu a gé ɓá Zezú yá, ka zi lá ɓil ɓay a porofɛ́tri a kú kɛ̧́ ka nâm ɔʼɔ dát yá. Dáy, kú niŋ péna ka ɓayké sáy, a walɓay ŋgbá Zezú; 28A kú zi ziŋ ɓá ɓay ŋgbá nɛ́ nyáy, a ɓilké nɔ́ too, kú vbí Pilát ɓá ké í nɛ́. 29Fal a kú niŋ hɛ̧ri̧ too ka Mbété a Gáŋvbôn tí sa sé tûl a Zezú dáy, kú ɗere Zezú ka tûl dii vbatay, a sé goro nɛ́ ka̧n lɔ̂ʼɔpâl. 30Dáy, Gáŋvbôn toma nɛ́ a bazeŋ a hûlri, 31Nâmri̧ ɓá a ŋgɛ̧́náké, Zezú tɔ́ʼɔ mûn nɛ́ hí̧ njukuri ka ɗa nɛ́ í̧ŋásá̧, tí ka Galilê sé ka̧ Zerúzalɛ̂m, ka a rekaw a ŋgɛŋnɛ́ ɓá njukuri ka saɓay a Zezú a mbɛl a njuku Izirayɛ́lri. 32Ɓurú kɔ́, rú ɓá Bélaɓayké gí hí̧ wǎyri: Hɛ̧ ka Gáŋvbôn tí hí̧nzáʼa hí̧ zîi a manárí̧, 33Gáŋvbôn, niŋ hɛ̧ké a ŋgɛŋnɛ́ hí̧ maná, ka ɓá gun a kuriri, a toma Zezú ka hûl, ɓá báŋké a kú ɗé a ɓil mbété a Si̧ŋ gáŋké sérey:
“Ɓá mɔ̌ pé ɓá Gun a mǐ.
Tí a sénɛ́, mǐ, pé ɓá Bâa a mɔ̌.”
34Gáŋvbôn tí sa, ɓá ké e toma Zezú ka hûl, mûn nɛ́ tí puŋá ka̧n ɓil lɔ̂ʼɔpâl yá. Ɓaykénɔ́ pé ké sa:
“Mi e hí̧ wǎyri, béla a táŋáké rá̧ gbátké
ka mi tí hí̧nzáʼa hí̧ Davít.”
35Ɓaykénɔ́, pé ké sa ɓáy, a ɓil mbété a féké ɓá:
“Mɔ tí pɔŋ ɓá gun a mɔ̌ ké puŋ a ɓil lɔ̂ʼɔpâl yá.”
36Ɓayhí̧lé Davít, a ɓil káwa a ndísɛ̌ʼɛ a mɛ̌, niŋ nzáʼapéna a Gáŋvbôn, falké ké hú, kú goro nɛ́ ka̧n gbaŋ pâl a zîi a mɛ̌ri̧, hûl a mɛ̌ puŋ a ɓil lɔ̂ʼɔ. 37Dáy, njuku ka Gáŋvbôn toma nɛ́ a bazeŋ a hûlri, ké zi puŋ a ɓil lɔ̂ʼɔpâl yá. 38-39Nyîn nírí̧, mi zi ɓá i tu hɛ̧ mbêw: Ɓá ka ŋgboro a Zezú, pé kú tɔ́ʼɔɓay a vbá̧buma ɓéké hí̧ wǎyri. Ka ŋgboro a mɛ̌, pé njuku too ka láɓulaw e ziŋ tɛ̧́na a ɓil ɓékéhɛ̧ tooy, hɛ̧ ka Sáŋna a Mɔyíze ma niŋáké yáy. 40Dáy i kó rá̧, ɓay a hɛ̧ri̧ ka porofɛ́tri sáy, ké zi ná ziŋ wǎyri, ɓayhí̧lé kú sa ɓá:
41“Í kó, wǎyri njuku yáwhɛ̧ri̧,
Í kaw yér, a í ɓɔ́l!
Ɓayhí̧lé, mi e niŋ hɛ̧ há̧na, a ɓil káwa a ndísɛ̌ʼɛ a wǎyri, njuku gí sa hí̧ wǎyri a fal lé, i tí zibɔʼɔké yá#13:41 ABAKUK 1: 5!” »
42Falké, Pôl rá̧ Barnabas tɛ̧́ a vûn gɔ́ŋ Gáŋvbôn, kú sa hí̧ kuriri ɓá, nâm ɔʼɔ a fal lé, kú regí saɓay a nɔ́ ɓáy. 43A fal mára̧, Juyífri ɓá a ŋgɛ̧́náké rá̧ njuku a fékéri ka mbí mûn a kuriri tɔ́ŋ sáŋna a Juyífri, tɔ́ŋ Pôl rá̧ Barnabas. Dáy Pôl rá̧ Barnabas, saɓay hí̧ kuriri ɓá, kú ew ɓá kpúnáké, a kú niŋ law mbêw a ɓil béla a Gáŋvbôn.
44Nâm ɔʼɔ a féké, njuku ɓil pû a Aŋtiyósri ɓá ŋgɛ̧́náké mára̧ gí láɓay a Gáŋmbây. 45Gelka Juyífri kó njukuri, kú mbá ka sɛ́rɛ, a manyɓay a Pôl, a fára nɛ́. 46Pôl rá̧ Barnabas sa hí̧ kuriri táŋ wɔ́w ɓá: «Ɓá wǎyri, pé ɓay a Gáŋvbôn e tí tɔ́ʼɔ hí̧ wǎyri ɗambɛl. Dáy ka i sáŋ ɓaykéy, a tɔ́ʼɔ ɓá, i ma ɓay a ziŋ ndísɛ̌ʼɛ a Gáŋvbônké yáy! Ɓaykénɔ́, ŋgɛŋnɛ́ í kó, rú e pɔŋ wǎyri ɓay a fere sé gel a njukuri a zi tí ɓá Juyífri yáy. 47Nǎŋnɔ́, pé ɓá hɛ̧ ka Gáŋmbây tí sa hí̧ rúy, ɓá:
“Mi ɓá mɔ́ ɓá geltáŋa a ɓil a njukuri ka zi tí ɓá Juyífri yáy.
Rá̧ mɔ́ ɓá ɓay a pɛ̧́na
sé ka̧ kɔ́rɔ́ a tísiri too!” »
48Gelka, njukuri ka zi tí ɓá Juyífri yáy láɓayké, kú ri mûn a kuriri, a tí ɗél ɓay a Gáŋmbây. Njukuri ka Gáŋvbôn tí ten kuriri, ɓay a káwa ndísɛ̌ʼɛ ziŋ láɓulaw. 49Nǎŋnɔ́, ɓay a Gáŋmbây sé magél too a ɓil kawké. 50Dáy, Juyífri uru wûny rɛŋ ɗínari̧, ka zi tí ɓá Juyífri yáy, rá̧ gáŋnjuku pûri kɔ̧ tûl a Pôl rá̧ Barnabas, ɓay kú ɓá kuriri tɔ́ʼɔsêe a kú ní kuriri tɛ̧́ ka tísiri a kuriri. 51Pôl rá̧ Barnabas haŋ sôm a siri a bɔʼɔ a kuriri kɔ̧ pûké#13:51 Haŋa sôm a siri a bɔʼɔ kɔ̧ tûl pû, zi ɓay a sa ɓá: Ko wǎyri, sêm mûn a wǎyri zi tí tûl a ɓurú mbaa., a kála sé Ikoniyɔm. 52Gun láɓulaw a Aŋtiyósri mbá a lawrína rá̧ a Têm Pukí.
தற்சமயம் தேர்ந்தெடுக்கப்பட்டது:
Péna a Apotereri 13: pnz
சிறப்புக்கூறு
பகிர்
நகல்

உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2023 CABTAL