Matie 19

'Ŋnɔ ‑yä ɔ ‑nyoto 'sɔɔ 'mʋ ‑bhabhalɩɩ' wälɩ

(Makö 10.1‑12; Detlo 24.1‑4; Matie 5.31‑32)

1Zozii ‑bhɩä lä cilɩ nä, kɔ ‑bha Galilee‑bhlɩɛ 'mnö 'nɩ ɔ yi Zudee‑bhlɩɛ 'mnö mʋ, ‑mɔɔ Zludɛɛ‑nyie klë. 2'Nɩ nyɩkpa ‑bhutukpä güo‑ bhä ‑mɔɔ 'kʋ 'nɩ ɔ yiwa yamä. 3‑Mä Falizɩɛnyʋä ‑yio yëku ‑yä wa 'kɔ ‑zɔɔ ‑sä. Wa ylɔɔ‑, wlä Cɩanyɔ‑, wälɩɩ' 'cë ‑nänä nyɩkpɔɔ' 'ŋnɔ yi lä nʋ nä, ɩ yi bhä 'ŋnö kää 'nɩ ɔ yio bhä cɛɛ ‑a? 4'Nɩ Zozii yiwa soo, ɔ lä ‑ɩ ‑jɩjlɔ lä ‑mɔɔ Laagɔ‑bɔɔgʋʋ 'mnö nä, a 'nɩ ‑wʋ ‑zɛɛ ‑a? Kä Laagɔ‑bɔɔgʋʋ ci lä nynä ‑mä, ‑bhɔɔdää nä, Laagɔ ‑nʋ ŋwadi 'nɩ ʋ ‑nʋ 'ŋnɔ.#19.4 Zɛɛ 'sɩɩ Ciedä 1.27; 5.2. 5'Nɩ ʋ cii 'sɩɩ, ʋ lä Ɩ ‑kä 'ŋnö nä, ŋwadi yi ɔ 'bä ‑yä ɔ 'nɔ 'sɔ yëku ‑bha 'nɩ ɔ ‑yä ɔ 'ŋnɔ 'sɔ yi 'jɛnyɩ 'nɩ wa yi 'yɛkɛ ‑bhlo 'plö.#19.5 Ɩ bha Ciedä 2.24. 6Waa' ‑läyɩɔ 'sɔ ‑bhlü, ‑mä plöö‑ yɩ 'yɛkɛɛ ‑bhlo. Nä, Laagɔ kä yɩ 'lʋʋ 'jɛnyɩ‑ nä, nyɩkpɔɔ' yi ‑läyɩ 'nɩ ɔ 'kʋ ‑säsä!

7'Nɩ Falizɩɛnyʋa yio 'ylä, wlä ‑mä 'nɩ sɩ ‑kʋ bhä 'nɩ Moyizöö' ‑Jlämaa ci bhä nynä ‑mä, nyɩkpɔ kä cii‑ nynä ɔ 'kä ɔ 'ŋnɔ cɛɛ nä, ɔ gbɩɔ 'bɔɔgʋ 'kʋ nynä ɔɔ' 'ylɔɔ yɩɔ?#19.7 Zɛɛ 'sɩɩ Detlo 24.1‑4.

8Zozii lä kpänyɩ a 'tɛ 'nyukwli, 'ɩzä Moyizö cii‑ lä nynä nyɩkpɔ yi mii 'nɩ ɔ yi ɔ 'ŋnɔ cɛɛ. ‑Bhɔɔdää nä, sɔɔ ɩɩ' bhɔɔ ‑kʋ. 9‑Mä kä n sonö'anyɩ yɩ nynä ‑mä, 'ŋnɔ 'nö 'wlie ylää‑ 'nɩ ɔ ‑nyoto kɔ cɛɛ‑, 'nɩ ɔ kä 'yigädaŋnɔ nöö‑ nä, ‑lɔɔ' nyɩkpɔɔ yä 'ŋnɔ 'ylä.

10Ɔ cii‑ lä sɔɔ nä, ɔɔ' 'kʋgënyʋa lä nä 'sɔɔ ɩ kä yɩ ‑kʋ nä, Kwlienyɔ‑, ɩ ‑ŋwa 'gää 'kʋ nynä ‑mä nyɩkpɔɔ' nöö ‑lä 'ŋnɔ! 11'Nɩ Zozii yiwa soo, ɔ lä ‑lää' wälɩnɩ nä, nyɩkpaa 'fɩɩn‑ 'nui ‑wʋ 'mʋ. ‑Lʋa Laagɔ nyɛ lä nynä wa 'nui 'mʋ nä, wamää‑ nui lä 'mʋ. 12Gbëgü bhutukpä ‑kʋ 'nɩ ɩ gbä 'nɩ nyɩkpaa' ‑nänʋä nöö ‑wʋ 'ŋwnɩä. ‑Nänʋä ‑kʋ ‑lɔɔ 'nɩ wa ‑yä ‑lɔɔ wälɩklëa 'sɔ bha 'nɔmnö. ‑Nänʋä ‑kʋ 'sɩɩ ‑lɔɔ 'nɩ 'ylʋzɔkʋnyʋä ‑gbä 'nɩ waa' ‑wʋ ŋwadië plöö‑. 'Nɩ ‑nänʋä ‑kʋ ‑lɔɔ 'nɩ waa' 'ylä ‑wʋ ŋnʋ‑nöölɩ ‑yä wa 'kä Laagɔɔ' lebhee ‑bhlo 'coo 'yi 'gë wa 'kɛ nʋ. Nä ‑ɔ gä cii‑ nynä ‑mä ɔ yi 'nu nä, ɔ 'nu.

Zozii gboo 'yua 'kʋ

(Makö 10.13‑16; Lukö 18.15‑17)

13'Tänyɩ ‑kʋ ‑lɔɔ 'nɩ nyɩkpa ‑lä Zozii 'yuë yëku nynä ɔ gbɩwa ‑klɔgbö 'kʋ ‑yä ɔ 'kwa 'wlu bhibhie. ‑Mä nyɩkpaa‑ lä bhlä 'yua nä, kä Zozii' 'kʋgënyʋa ‑fʋwa bhä nëkʋ. 14'Nɩ Zozii yi ci, ɔ lä a ‑taa 'yuëlɩa 'yi ‑yä wa yinö'ö, ‑mä a 'nä 'tluwa ‑lä! Laagɔɔ' 'Leyiduu nä, nyɩkpaa‑ ‑kʋ lä nynä 'yuëlɩä nä, waa' lʋʋ lä. 15'Nɩ ɔ yi 'yua ‑klɔgbö 'kʋ gbɛɛ 'nɩ ɔ yiwa 'nyu 'pä. 'Nɩ ɔ yi ‑lɔɔ ‑bha 'nɩ ɔ yi ‑mʋ.

Nyëblu plöö‑ lɛkäänyɔ 'kädɔ

(Makö 10.17‑31; Lukö 18.18‑30; 13.30)

16‑Mä nyɩkpɔ ‑bhlo 'jloo‑ Zozii yëku 'nɩ ɔ yio 'ylä, ɔ lä Cɩanyɔ‑, 'pʋpʋɛɛ‑ ‑kʋ lä 'kɔɔkɔɔ ‑za nä, 'nää 'cësä n kä bhä ‑nʋ 'nɩ n yie bhä 'nii? 17Zozii lä sɩ ‑kʋ bhä 'nɩ ‑n ylä'ä bhä 'nää nʋlɩɩ' wälɩ 'kʋ? Nyɩkpɔ ‑bhlo ‑kʋ ‑lɔɔ nä, ɔmɔɔ‑ nää‑ lä ɔmɔ ‑bhlo. ‑N gä ‑waa nynä 'pʋpʋɛɛ‑ ‑kʋ lä 'kɔɔkɔɔ ‑za nä, ‑n 'gɛ 'ni nä, n 'ŋʋ Laagɔɔ' ‑Jläma 'klʋkpää. 18Nyɩkpɔɔ lä ‑Jlämaa' 'cësa bhää? Zozii lä Laagɔɔ' ‑Jlämaa ci nynä ‑mä ‑Naa 'bhlä ‑lä ‑n ‑lie, ‑naa 'ylä ‑lä ‑n ‑liee' 'ŋnɔ ɩyä ‑naa 'ylä ‑lä ‑n ‑liee' 'wli, ‑naa ghlü ‑lä, ‑naa lü ‑lä ‑kpläkplö ‑dläfʋɛ, 19‑n 'ŋʋ ‑n 'bä ‑yä ‑n ‑nɔɔ, ɩyä sä ‑n ‑waa lä ‑n yëku nä, ‑n wamä sɔɔ ‑n ‑lie.#19.18‑19 Ɩ bha 'Nämʋ 20.12‑16; Detlo 5.16‑20; Levi 19.18.

20Nyëbluo lä Cɩanyɔ‑, ‑Jlämänä, n ŋʋa‑ 'klʋkpää' 'nɩ n ‑bhɩa ‑mɔɔ. Nä 'klë ‑sä ‑too bhä ‑pɛɛ ‑mɔɔ? 21'Nɩ Zozii yio soo, ɔ lä ‑n gä cii‑ nynä ‑mä ‑n yi Laagɔ dëlü kplɔɔ nä, ‑n mʋ ‑yä ‑n 'ŋʋ ‑naa kääkäälɩɩ 'fɩɩn 'kpä, ɩyä ‑n dëë ɩɩ' moniee ŋäzönyʋä, ‑mä ‑mɔɔ Laagɔduu' nä, ‑n yi ‑mɔɔ leylü kään. Ɩyä ‑n yi ‑yä ‑n gë'ë 'kʋ! 22‑Mä nyëbluo nä, ɔ ‑glö bhlä lɛkäänyɔ 'kädɔ nä, kä wälɩɩ ‑kamänöɔ kpänyɩ yëkuu', ɩ ‑kä bhɛ 'ŋnö nä, ɔ ‑kʋ ‑cʋʋn 'nɩ ɔ yi mʋ. 23'Nɩ Zozii yi ɔɔ' 'kʋgënyʋa soo, ɔ lä ‑nʋawlɛɛ', n sonö'anyɩ nynä ‑mä, lɛkäänyɔ 'kä Laagɔɔ' 'Leyiduu 'mnö plä nä, ɩ yi 'tɛmä kpänyɩ! 24Kä n sonö'anyɩ lä bʋkʋ nynä lɛkäänyɔ 'kä Laagɔɔ' 'Leyiduu 'mnö plä nä, kɩ 'tɛ 'nɩ ɩ ‑zi sä mnɛgwli 'kä kwɛɛ' këfë nëë' blüë nä 'kʋ. 25‑Mä 'kʋgënyʋa nuu‑ lä sä Zozii cii‑ lä nä, kä wälɩɩ ‑slʋwa nükpëë'. Wlä 'aaa! Nä, ɩ kä yɩ sää ‑kʋ nä, nyɩkpɔ ‑sä yi bhä ‑lɔɔ nëë' ‑bhaa? 26‑Mä Zozii ‑wluwa 'yii ‑plɩɩ, 'nɩ ɔ yiwa soo, ɔ lä nyɩkpɔ 'nɩ ‑lä mii ‑mä, Laagɔ nä kʋ mii ‑lɩɩ 'fɩɩn.

27'Nɩ Pɩɛlö yio 'ylä, ɔ lä Cɩanyɔ‑, 'nɩ ‑anyɩ! Ka ‑bha ‑anyɩa kääkäälɩɩ 'fɩɩn gbʋʋ' 'nɩ ‑a yi‑i lä 'kʋ 'gë. Nä, säsä ‑anyɩa wälɩɩ 'kä bhä 'kʋ 'plöö? 28Zozii lä n sonö'anyɩ ‑nʋawlɛɛ 'mnö nynä ‑mä, zëkpü‑lëlëa' 'tänyɩɛ 'mnö, dä Nyɩkpɔɔ ‑Yowli 'kä lä ɔɔ' 'klʋagbaa' 'leyi‑këkpëa 'kʋ sä kʋ nä, anyɩmɔɔ‑ gëë'ë lä 'kʋ nä, a yi 'leyi‑këkpü 'kʋgbä 'sɔ 'kʋ kʋ. Anyɩ‑ 'gä lä 'Yizlɛnyʋää' 'lɔlʋkpɔɔ 'kʋgbä 'sɔɔ 'titee plä. 29'Naa 'ŋnöö ‑za, nyɩkpɔ kä ɔɔ' 'gbë yëku ‑bha nä, ɔ bhelie ɔ ‑bha yëku ‑o, ɔ bhɛŋwnɩä ɔ ‑bha yëku ‑o, ɔ 'bä ɔ ‑bha yëku ‑o, ɔ 'nɔ ɔ ‑bha yëku ‑o, ɔɔ' 'yuë ɔ ‑bha yëku ‑o, ɔɔ' 'kälö ɔ ‑bha yëku ‑o, ‑lɩɩ 'fɩɩn ‑lɔɔ' nyɩkpɔɔ ‑bha lä yëku nä, ɔ yi ɩɩ' 'ci gwlɩ ‑ngbü 'ni. 'Fɩa 'nɩ 'pʋpʋɛɛ‑ ‑kʋ lä 'kɔɔkɔɔ ‑za nä, ɔ yie 'ni. 30‑Mä bhtukpä ‑kʋ 'yikʋ 'nɩ wa yi klë 'plöö, 'nɩ bhutukpä ‑kʋ klë 'nɩ ‑wa yi 'yikʋ 'plöö.

தற்சமயம் தேர்ந்தெடுக்கப்பட்டது:

Matie 19: god

சிறப்புக்கூறு

பகிர்

நகல்