Matie 12

'Kʋgënyʋa kplä ‑nyʋʋ 'yii Sabaa‑gwlɛylʋʋ 'kʋ

(Makö 2.23‑28; Lukö 6.1‑5)

1'Tänyɩ ‑bhloo', Sabaa‑gwlɛylʋʋ 'kʋ, Zozii ‑kʋ bhä ‑nyʋʋ‑zizee' ghläädä. ‑Mä ɔɔ' 'kʋgënyʋa ‑gbugbe bhlʋwa bhlä nä, wa kplä bhä 'klaa 'mnö ‑nyʋʋ 'yii, 'nɩ wa luu bhä. 2Falizɩɛnyʋa niwa‑ lä 'yi nä, kwa ‑soo Zozii, wlä ‑naa 'kʋgënyʋa wälɩɩ wa nʋ lä nä, ‑anyɩa ‑jlämaa 'mnö ɩɩ' ‑wʋ 'kʋ ‑ŋwa nynä Sabaa‑gwlɛylʋʋ 'kʋ, nyɩkpɔ nʋ sɔɔ. 3'Nɩ Zozii yiwa soo, ɔ lä wälɩklëa Davidö ‑nʋ bhlä nä, a 'nöa ‑läzä Laagɔ‑bɔɔgʋʋ 'mnö ‑zɛnö ‑a? 'Tänyɩɩ ‑gbugbe bhlä lä Davidö ‑yä ɔɔ' 'kʋnämʋnyʋa 'sɔ nä,#12.3 Ɩ bha 1 Samɩɛ 21.6. 4kä Davidö ‑mʋ Laagɔɔ' bʋbɔda 'nɩ ɔ ‑yä ɔɔ' 'kʋnämʋnyʋa 'sɔ bhlüü‑ bʋbɔdaa' 'flɔɔ 'kʋ 'nɩ wa ‑luu. ‑Bhlɛ ‑Jlämaa 'mnö nä, ɩɩ' bhɔɔ 'kʋ ‑ŋwa nynä ‑mä wa luu. Laagɔ‑bhutuu 'mnö 'flɔɔ ‑glö Laagɔɔ' 'Cibhisänyʋaa' 'flɔɔ. 5Bʋkʋ, 'Cibhisänyʋa 'titi, wa kä Laagɔ‑bhutuu 'mnö lebhee nʋdä ‑kʋ nä, wa sä 'sɩɩ Sabaa‑gwlɛylʋʋ 'klʋkpää'. Sɔɔ ɩ ‑kʋ 'nɩ ‑lɔɔ' ‑gesii ŋënʋwa ‑wʋ 'kʋ. ‑Lɔɔ' wälɩklëa a 'nöa ‑läzä ‑Jlämaa 'mnö zɛnö ‑a? 6Kä n mʋ'anyɩ yɩ soo ‑kä nynä nyɩkpɔ ‑kʋ ‑lää 'nɩ, ɔ ‑zi Laagɔ‑bhutuu 'kädʋʋ! 7Wälɩklëa ‑a ci lä nynä ‑mä, 'cibhisälɩ nn' tänö ‑wʋ nyɩkpɔɔ' ‑mä plɛkʋmɛnɔ‑ n 'ylänöɔ#12.7 Ɩ bha Ozee 6.6. nä, a kä bhlä aa' ‑zɔɔ ‑yi nä, aa' ‑lä bhɔɔ nyɩkpanä 'flɛflɛ gbʋ 'nyɛɛ. 8Nyɩkpɔɔ ‑Yowli 'mɔɔ‑ plöö‑ lä Sabaa‑gwlɛylʋʋ' 'kämänyɔɔ.

Zozii ‑yamä ‑klɔɔpɛ‑känyɔ

(Makö 3.1‑6; Lukö 6.6‑11)

9Zozii ‑bha lä ‑lɔɔ nä, kɔ ‑mʋ 'nɩ ɔ yi waa' Laagɔ‑bhutuu 'mnö plä. 10‑Mä ‑klɔɔpɛ‑känyɔ ‑kʋ bhä ‑mɔɔ. Nä, nyɩkpaa tään bhɛlä nynä wa 'kä Zozii gbʋ 'nyɛɛ nä, kwa ylɔɔ‑, wlä ‑mä ɩ ‑ŋwa bhä 'kʋ nynä Sabaa‑gwlɛylʋʋ 'kʋ, nyɩkpɔ yamää gupanyɔ ‑a? 11'Nɩ Zozii yiwa 'ylä, ɔ lä anyɩa nëdëë' nyɩkpɔ ‑sä ‑ɔnö 'bhabhlɛɛ‑ gä bhä Sabaa‑gwlɛylʋʋ 'kʋ 'sɔkʋʋ ‑bhlüü, 'nɩ ‑ɔ 'nɩɛ ‑lä bhä klä ‑yä ɔ 'kɛ ‑mɔɔ ‑sää? 12‑Mä nyɩkpɔ nä, kɔ kään gbʋ 'nɩ ‑ɔ ‑zi 'bhabhlɛ nä! Ɩ ‑kä 'ŋnö nä, ‑Jlämaa lä ɩ ‑ŋwa 'kʋ nynä ‑mä nyɩkpɔ nʋ ɔ ‑lie 'nää Sabaa‑gwlɛylʋ 'kʋ. 13Ɔ cii‑ lä sɔɔ 'nɩ ɔ yi nyɩkpɔɔ soo, ɔ lä ‑n gbɔɔ ‑naa sɔɔ 'mʋ! Sä nyɩkpɔɔ gbɔɔ‑ lä gään ɔɔ' sɔɔ 'mʋ nä, kʋ ‑yamä 'nɩ ʋ plöö‑ nynä ‑mɔɔ' ‑lʋʋ. 14‑Mä Falizɩɛnyʋa ‑bha Laagɔ‑bhutuu' 'nɩ wa yi 'nii ‑yä sä wa 'kä lä Zozii 'bhlä nä, wa 'kä sɔɔ 'kʋ 'ŋʋʋ.

Gänʋnyɔɔ' lɔɔ Laagɔ ŋʋʋ‑ lä ɔɔ' dä nä

15Zozii nuu‑ lä nynä wlä wa 'kɔ 'bhlä nä, kɔ ‑bha ‑lɔɔ' 'lëkpëa 'mnö. Ɔ ‑kʋ lä mʋdä nä, nyɩkpaa ‑bhutukpä güo‑ bhä 'kʋ. 'Nɩ waa' pää' gupanyʋa 'fɩɩn ɔ yiwa yamä. 16Ɔ yamänʋwa lä nä, kɔ ‑bhuwa ‑kɔkwɩ nynä wa 'nä ‑sää ‑lä nyɩkpɔ 'dö. 17Kɩ plöö‑ lä sɔɔ 'kʋ ‑yä, wälɩɩ 'plɔfɛtɩ Ezayii cii‑ bhlä nä, ɩ 'kä glää. 18Kɔ cii‑ bhlä nynä

Laagɔ lä a ni ‑nɔnɔ,

Ɔmɔ n ‑sä lä ‑yä

Ɔ kä'ä ‑gä nʋ.

N ‑wɔɔ 'nägäsä!

Ɔɔ' plɛkʋ mɛnö'ö kpänyɩ.

N yio 'naa 'Wugɔɔ 'kʋ kwlie,

'Nɩ 'bhlɩɩ 'fɩɩn 'mnö nyɩkpaa

Ɔ yiwa Laagɔɔ' 'yigëë‑blɔɔ' yëkuu' wälɩ soo.

19 Ɔ ‑yä nyɩkpɔ 'sɔɔ ‑lä 'kʋ bhlää,

'Nɩ ɔɔ' ‑lä 'sɩɩ 'kɛsɛ kään.

Nyɩkpɔ 'nöɔ ‑lä 'tlii 'kʋ 'mʋ ‑säädä 'nii.

20 'Popi ‑gägbɔyee' # 12.20 'Popi ‑gägbɔyee: ‑Pitivänä, a kʋ 'nyie yëku, 'nɩ a kʋ 'sɩɩ 'popie 'mnö. ‑Vʋvɔlʋ kä yi nä, a mii‑ ‑wʋ 'nɩ a 'kä däbhlo 'nynigo. Kä ‑vʋvɔlʋʋ 'sëka sëkanöa. lɛɛ‑ ‑gëmuo wɛzä lä nä,

Ɔ 'nɩɛ ‑lä 'kätö.

'Nɩ 'näpɛɛ' lɛɛ ‑ɛ yä lä yiosä ŋomo nä,

Ɔ 'nɩɛ ‑lä ŋëma.

Ɔ yi sɔɔ nʋ ‑aaa,

'Nɩ Laagɔɔ' 'yigëgbɩɩ yi 'kʋ zi.

21 'Nɩ 'bhlɩɩ 'fɩɩn 'mnö nyɩkpaa yio dë 'tɛɛ. # 12.18‑21 Ɩ bha Eza 42.1‑4.

Zozii ‑yä 'Dëvloo 'sɔɔ nʋʋ ‑wʋ 'kʋ

(Makö 3.22‑30; Lukö 11.14‑23; 12.10)

22'Tänyɩ ‑kʋ ‑lɔɔ 'nɩ nyɩkpɔɔ' lɔɔ ‑zizinyenyi ‑kʋ bhlä kätää' nä, wa ‑lɔɔ Zozii yëku. Nyɩkpɔɔ' 'ni bhɔɔ sä 'nɩ ɔɔ' ‑sää bhɔɔ 'mʋ. ‑Mä Zozii ‑yamänöɔ, 'nɩ ɔ nuu‑ 'nɩ ɔ ‑sää 'mʋ. 23'Nɩ plɛkʋ 'ninie nyɩkpa‑gbʋʋ 'nɩ wa ci bhä, wlä ‑ma Davidö ‑Yowli 'mɔɔ‑ bhä ‑lɔyɩ ‑kʋ ‑a? 24‑Mä Falizɩɛnyʋa nuu‑ lä sä nyɩkpaa sää bhlä 'mʋ nä, kwa cii‑, wlä ‑zuzunyënyuu wa laa lä Bɛzebuu 'nɩ ‑ʋ 'kämä lä ‑zizinyenyii 'fɩɩn nä, ʋmʋʋ‑ nyɛ lä nyɩkpɔnɔ 'päwä 'nɩ ɔ tlü lä ‑zizinyenyii. 25‑Mä Zozii ‑yi bhlä waa' bhobhowluu nä, kɔ ‑sonʋwa, ɔ lä 'leyidu ‑bhlobhlo 'mnö nyɩkpa kä 'mʋ doo‑ 'nɩ wa kä vë nä, kä ‑lɔɔ' 'leyiduu nuë. 'Duu 'mnö nyɩkpa kä 'mʋ doo‑ nä, ‑lɔɔ' 'duu kʋ bhɩä. 'Gbë ‑bhlobhlo 'mnö nyɩkpa 'kä 'mʋ doo‑ nä, ‑lɔɔ 'gbëa ka nuë. 26Nä, 'Dëvlo 'titi kä ʋ yëku 'tlü nä, kɩ ci lä nynä ‑mä ʋʋ' 'leyi‑bhlɩɛ yä 'mʋ doo nä dä ‑sä ɛ 'kä bhä ‑pɛɛ ŋëë? 27'Nɩ 'Dëvlo‑zuzuu Bɛzebuu 'mʋʋ‑ gä'ä 'päwä 'nyɛ 'nɩ n kä 'Dëvloo' ‑zizii 'tlü nä, anyɩ, anyɩa' 'kʋgënyʋa, ‑ɔ nyɩwa‑ bhä 'päwä 'nɩ wa tlii bhää? Kä waa' nʋnʋgbɩɩ pana nynä ‑mä anyɩ 'titi a yä mnɔ. 28‑Mä Laagɔɔ' 'päwaa 'mää‑ gä yɩ gbä 'nɩ n kä ‑zizinyenyii 'tlü nä, kɩ pana lä nynä ʋʋ' 'Leyiduu' 'päwaa ya'anyɩ yëku ŋëë. 29Ɔ lä waa' ŋënö ‑wʋ 'tɛtɩ‑käänyɔɔ' gbëë' 'nɩ wa 'kä 'flɛ 'sää ɔɔ' ‑bhutuu ‑zɔɔ plä 'nɩ wa 'kɔ kääkäälɩɩ ‑sä. Wa kä 'fɩa ‑lɔɔ' 'tɛtɩkäänyɔɔ ‑gʋä nä, ‑lɔɔ wa mii 'nɩ wa sɔɔ lä ɔɔ' kääkäälɩɩ. 30Nä nyɩkpɔ ‑yä ‑amʋ 'sɔ 'nö 'pɛlʋ ‑bhloo' ‑kʋʋ nä, ‑lɔɔ' nyɩkpɔɔ kɔ ‑yä ‑amʋ 'sɔ doo‑ lä 'mʋ. 'Nɩ nyɩkpɔ ‑yä ‑amʋ 'sɔ 'nö 'kʋ 'wlää nä, lɔɔ' nyɩkpɔɔ kɔ dlüa lä. 31'Ɩzä n sonö'anyɩ lä nynä ‑mä, nyenyii' 'cënänä nyɩkpɔ yi lä nʋ nä, 'nɩ wälɩ‑nyenyii' 'lɩɩ ɔ yi lä Laagɔ yëku cii nä, ‑lɔɔ' nyɩkpɔɔ Laagɔ yi mii 'nɩ ʋ yio cie. ‑Mä nyɩkpɔ kä Kplɔɔkplɔɔ‑wugɔɔ 'bhɩsɛ nä, ‑lɔɔ' nyɩkpɔɔ' ‑lä 'kɔɔn cienöɔ. 32Nyɩkpɔ kä Nyɩkpɔɔ ‑Yowli nyenyisä yëku 'mʋ ‑sää nä, Laagɔ yi mii 'nɩ ʋ yio cie. ‑Mä nyɩkpɔ kä Kplɔɔkplɔɔ‑wugɔɔ nyenyisä yëku 'mʋ ‑sää nä, ‑lɔɔ' nyɩkpɔɔ' ‑lä 'kɔɔn cienöɔ. Ɔɔ' ‑lä zëkpënä 'mnö cienöɔ, 'nɩ ɔɔ' ‑lä ‑mɔɔ 'yikʋʋ' zëkpëa 'mnö cienöɔ.

Su ‑yä ʋʋ' 'bhü

(Matie 7.16‑17; Lukö 6.44‑45)

33Su kä nää nä, kä ʋʋ' 'bhü nää. Su 'nö nää nä, ʋʋ' 'bhüü namä ‑wʋ. 'Nɩ suu' 'bhü wa wloo lä 'sɩɩ 'nɩ wa yibhënʋ. 34‑Boomnä‑nyɩkpanyɩ‑! Anyɩmɔɔ‑ ‑nyu lä ‑käkäkä nä, säsä 'nägäwälɩ yi'anyɩ bhä nëë' ghlää? ‑Ɩ ‑kʋ lä nyɩkpɔɔ' pleyii nä, ɩmɩɩ‑ ghlänöɔ lä nëë'. 35Nyɩkpaa 'nänɔ nä, 'nägäbɩɩ‑ bhɔɔ lä pleyii nä, ɩmɩ ɔ nʋ. 'Ɩzä nyɩkpa ‑nyonyo nä, gbenyenii' bha lä ɔɔ' pleyii nä, ɩmɩ ɔ nʋ. 36Nä kä n mʋ'anyɩ yɩ soo ‑kää nynä Laagɔɔ' 'tite 'kädɛɛ' pläylʋʋ 'kʋ nä, wälɩɩ 'fɩɩn nyɩkpɔ cii‑ lä 'nɩ ‑ɩɩ ‑wʋ lä gba ‑kä nä, wa yio 'ɩza ‑jlëë' 'ŋʋ. 37Ciciwälɩɩ ‑ɩ bha lä ‑naa nëë' nä, ɩmɩɩ‑ sä‑ä gbʋʋ', 'nɩ ɩmɩɩ‑ klä‑ä 'sɩɩ gbʋ.

Wa 'ylää Zozii 'yiziziogbɩ

(Matie 16.1‑4; Makö 8.11‑12; Lukö 11.16,29‑32)

38'Nɩ ‑Jlämöcɩanyʋä ‑yä Falizɩɛnyʋä 'sɔ yi yi 'nɩ wa yi Zozii soo, wlä Cɩanyɔ‑, ‑a ‑waa nynä ‑mä ‑n nʋ 'yiziziogbɩ ‑yä ‑a 'gɩɩ 'yi 'ni. 39Wa cii‑ lä sɔɔ nä, kä Zozii ‑sonʋwa, ɔ lä 'bhlɛsʋnʋ 'mnö nyɩkpaa ‑nyuu 'nɩ waa' 'mänyɩ ‑wʋ Laagɔ, 'nɩ wamää‑ tänö 'yiziziogbɩɩ' panalɩ. 'Nɩ ‑ɔnö yɩ 'plɔfɛtɩ Zonasöö' 'tänyɩɛ mnö 'yiziziogbɩɩ‑ nä, kä waa' ‑lä lä 'yiziziogbɩ ‑bhlo 'coo 'yi 'ni. 40Sä 'plɔfɛtɩ Zonasö ‑goo lä 'nyigluu' zliiyi 'kädɛɛ 'gʋʋ 'mnö, 'nɩ ɔ ‑sä lä ‑mɔɔ ‑gägä‑zëlüü' ylɩɩ taa ‑yä bhlübhlüylɩ taa nä, sɔɔ ‑säkä ‑säkä Nyɩkpɔɔ ‑Yowli 'kä lä ‑gägä‑zëlüü' ylɩɩ taa ‑yä bhlübhlüylɩ taa gbämnä‑dʋdʋʋ 'mnö ‑sä. 41‑Mä Laagɔɔ' 'tite 'kädɛɛ' pläylʋʋ 'kʋ nä, 'Ninivö‑dunyʋä yi yi 'nɩ wa yi 'bhlɛsʋnʋ 'mnö nyɩkpaa gbʋ klaa ‑mɔɔ Laagɔ dëlüü. ‑Ɔnöza bhää? Ninivö‑dunyʋä nä, 'tänyɩɩ' wa nuu‑ lä 'plɔfɛtɩ Zonasöö' ciciwälɩɩ nä, kwa 'cɩcɩ‑ 'nɩ wa ‑bha waa' gbenyenyii 'mnö.#12.41 Zɛɛ 'sɩɩ Zona 3.5,8,10. 'Nɩ n mʋ'anyɩ yɩ 'sɩɩ soo ‑kää nynä ‑mä, ‑lää anyɩ nëëdë nä, nyɩkpɔ ‑kʋ ‑lää 'nɩ ɔ 'ghlü 'nɩ ɔ ‑zi 'plɔfɛtɩ Zonasö! 42Laagɔɔ' 'tite 'kädɛɛ' pläylʋʋ 'kʋ nä, 'leyi‑ŋnɔɔ ‑ɔ ‑bha bhlä jiee' ‑zɔɔ fɛɛn fɛɛn, 'nɩ ‑ɔ yi bhlä 'loyo Salomɔɔ' ‑dɔɔ 'nyukwli poo ‑kää nä, ɔ yi 'bhlɛsʋnʋ 'mnö nyɩkpaa 'yikʋ 'nynigo 'nɩ ɔ yiwa gbʋ klaa Laagɔ dëlü. ‑Ɔnöza bhää? 'Ŋnɔyɩ nä, kɔ ‑bha ɔ 'bhlɩ fɛɛn, 'nɩ ‑ɔ ‑yi 'loyo Salomɔɔ' ‑dɔɔ 'nyukwli poo ‑kää.#12.42 Zɛɛ 'sɩɩ 1 'Loyua 10.1‑10. 'Nɩ n mʋ'anyɩ yɩ 'sɩɩ soo ‑kää nynä ‑mä, ‑lää anyɩ nëëdë nä, nyɩkpɔ ‑kʋ ‑lää 'nɩ ɔ 'ghlü 'nɩ ɔ ‑zi 'loyo Salomɔɔ!

‑Zuzunyënyu 'ylɩbhɔ bʋkʋ 'nɩ ʋ yi

(Lukö 11.24‑26)

43'Nɩ Zozii yi bʋkʋ ci, ɔ lä ‑zuzunyënyu kä nyɩkpɔ kätää' ‑bha nä, zëkpëa' ‑gbäsɩɩ‑ ‑yɛɛ lä 'mʋ suëkë suëkë nä, ‑mɔɔ ʋ mʋ jlä ‑kää. Ʋ tään 'kʋ wɔtɔdä, ‑mä ʋʋ' 'nii ‑wʋ ‑mɔɔ 'kʋ wɔtɔdä. 44Ɩ ‑kä 'ŋnö 'nɩ ʋ soo ʋ yëku, ʋ lä n 'kä 'ylɩbhɔ ‑yä 'naa ‑bhutuu n ‑bha lä 'mnö nä, n 'kʋ bʋkʋ 'mnö mʋ. Ʋ kä 'ylɩbhɔ‑ 'nɩ ʋ kä ‑yi 'nɩ ʋ kä wloo 'nɩ ‑bhutuu 'mnö ‑kʋ vëwuu nä, 'nɩ ‑mɔɔ kä ‑nynipüo wɩa, 'nɩ ‑mɔɔ ‑göglɔɔ 'nägäsä nä, 45kʋ 'ylɩbhɔ bʋkʋ 'nɩ ʋ mʋ ‑zizinyenyii' 'yigädalɩɩ soo ‑kää. ‑Zizinyenyii' lɩɩ‑ ‑nyu lä kpänyɩ 'mnö 'nɩ ‑ɩ ziu lä 'kʋ nä, ɩɩ' lɩɩ ‑ngbɔɔsɔ, ʋ sonɩ. 'Nɩ ʋ ‑yɩ 'sɔ yi ‑bhutuu 'mnö, 'nɩ ɩ kʋ ‑mɔɔ. Bhɩädaa 'mää‑ plöö‑ ylä nynä ‑mä, nyɩkpɔɔ ‑zizii ‑kʋ ylä sɔɔ kätää' nä, kä ɔɔ' zëkpëa nyimo 'nɩ a 'tɔtɔɔ nëkʋ. Nä, 'bhlɛsʋ nyonyunʋ 'mnö nyɩkpaa, sɔɔ waa' wälɩɩ 'kä lä 'sɩɩ 'kʋ 'plö.

A ni Zozii' 'lɔlʋkpaa 'titi

(Makö 3.31‑35; Lukö 8.19‑21)

46Zozii ‑kʋ ‑lätee ‑jlëa soo dä 'nɩ ɔ 'nɔ ‑yä ɔ bhelie ‑yi ‑lɔɔ. Wa 'nynigo‑ jlukʋ 'nɩ wa ylä bhä nynä wa 'kɔ wälɩklë soo. [47'Nɩ nyɩkpɔ ‑bhlogbe yio soo, ɔ lä Cɩanyɔ‑, ‑n ‑nɔɔ ‑yä ‑n bhelie, wa ‑kʋ ‑mɔɔ jlukʋ wlä wa 'kä‑ä soo.] 48‑Mä nyɩkpɔɔ cii‑ lä sɔɔ nä, kä Zozii ‑sonöɔ, ɔ lä ‑mä ‑ɔ plöö‑ bhä n ‑nɔɔ? 'Nɩ ‑wa plöö‑ bhä n bhelie? 49'Nɩ ɔ yi ɔɔ' 'kʋgënyʋa wlɩ 'klʋ tlaa, ɔ lä a ni, n ‑nɔɔ ‑yä n bhelie! 50N 'Bäɔ ‑ɔ kʋ lä ‑mɔɔ Laagɔɔ' nä, nyɩkpɔɔ' lɔɔ‑ nʋ lä ɔɔ' pɔlösa nä, ɔmɔɔ‑ plöö‑ lä n bheli, ‑yä n bhɛŋnɔ, ‑yä n ‑nɔɔ.

தற்சமயம் தேர்ந்தெடுக்கப்பட்டது:

Matie 12: god

சிறப்புக்கூறு

பகிர்

நகல்