Marku 5

Kuhanyiswa ka m'thu a nga ti ni moya wo biha

(Matewu 8:28-34; Luka 8:26-39)

1Se va to hoka mtxhatuko ka digova, ditikoni ka Vagerasa. 2Ku ti ngako Jesu a di humile ngu ngalavani, konako m'thu wu a nga ti ni moya wa nza mbwa, awu a nga ti huma ngu mayivani, a to mu hingeta. 3Eneyo a ti zumba mayivani, kambe ku ti si nga ni m'thu wa mtamo wu a nga txi sikota ku mu sunga, hambi ngu titxhini. 4Nguko a sungilwe ka kungi ngu makhodha ni titxhini, kambe a funyile makhodha ni kubhenula titxhini, ku si maneki ni m'thu wa mtamo wo sikota ku mu xula. 5Yotshe mbimo, wusiku ni mitshikari a ti tsimbila mayivani ni mimangoni, a txi kwangula, a txi ti kurumulela ngu marigwi. 6Ku ti ngako a di woni Jesu, a di ngadi kule, a to tutuma eya mu khizamela. 7Se a txi peka huwa ngu dipswi da hombe a txi khene: “I mhaka muni u ku nayo ni nathu, awe Jesu Mwanana wa Txizimu Nyatxitimwi?” 8Nguko Jesu a ti khene kwakwe: “Huma ka m'thu wuwa, awe moya wa nzambwa.” 9Se e mu wotisa a txi khene: “Ditina dako u mani?” Wona wu mu xamula wu txi: “Ditina dangu ni Txikwata, nguko hi vangi.” 10Se wu to mkhongotela ti to asi thuki a txi yi tovela kule ni ditiko dile.

11Kona hale hafuhi ni mmango, ku ti ni mtxhambi wa hombe wa tikhumba, wu txi hava. 12Se mimoya yotshe yi mkhongotela, yi txi kha yona:

“Hi rumele tikhumbani, hi ya wulela ka tona.”

13Kunukunuko Jesu a to yi tumelela se mimoya yile ya nzambwa yi huma yi ya wulela tikhumbani; se mtxhambi wu tutumela mkovani, wu ya ti rinza digovani, tikhumba ti sela txihindo, mtengo wa tona wu ti lava kuva wa 2.000.

14Vadyisi va tikhumba va to tutuma veya zivisa vathu va didhoropani ni va thembweni, se vona ve huma veya wona ti ti nga humelela. 15Ku ti ngako va di hokile ka Jesu, ve wona wu a nga ti ni txikwata txa mimoya a di khalahatshile, a di ambate, a di ni mapimo amanene va to telwa ngu dizowa. 16Ava va nga ti wona va to xawutela ati ti nga humelela ka m'thu wu a nga ti ni madhimoni ni mhaka ya tikhumba. 17Se ve khongotela Jesu ti to e khukha ditikoni kwawe. 18Jesu ngako a di bete ngalavani, m'thu wu a nga ti ni madhimoni a to mkombela kuzumba nayo. 19Aniko Jesu kha mtumelela, a to khene kwakwe: “Tsula mwani, ka va ka kwanu, u ya zivisa totshe ti Mkoma a nga ku mahela tona, ngu ku kupfela wusiwana.” 20Se a to khukha, e khata kuhuwelela ditikoni ka Dhekapoli totshe ti a nga mahelwa tona ngu Jesu, se votshe ve xamala.

Txikombelo txa Jayiro ka Jesu

(Matewu 9:18-26; Luka 8:40-56)

21Ngako Jesu a di tshawunyetile kambe ngu ngalava a txi ya mtxhatuko, va to ya tshangana masoni kwakwe vathu votala ngutu, hafuhi ni digova. 22Konaho a to bwaka mmweyo wa vathangeli va disinagoga, ditina dakwe a dhanwako ku i Jayiro. Se a di mu woni, a to mu khizamela, 23a txi mkombela ngu kukarateka a txi khene: “Mwanana wangu wa txihoranana a hafuhi ni kufa, ngono u ta msanzeka manza, a na kalamuka a txi hanya.” 24Jesu a to longoloka nayo na a txi londetelwa ngu vathu votala, va nga txi mu kama.

25Se mmweyo wa wamsikati a ti ti xuphwa ngu malwati a lingolengole, ngu txipimo txa digumi da malembe ni mambidi; 26awu a nga tsimbila a txi xaniseka ngu kulava kuthumwa mu ka tiñanga to tala, a txi luza yotshe thomba yakwe, asi kalamuki, ka malwati yawa ma nga txi tamarisa kuya kubihani. 27Ngako a di engisile va txi womba-womba ngu Jesu, a to ta bwaka hagari ka dibutho, a to ema ngu msana kwakwe Jesu, a txi mu gwesa nguwo yakwe; 28nguko a ti ti khene: “Hambi idiku no sikota kugwesa syambalo sakwe dwe, ni na hanyiswa.” 29Kha ditshuri, ngu ka yoneyo mbimo, wu to leka kuhumela mnoha, se ene a txi tipfa ha mmidi kwakwe ti to a hanyisilwe ka malwati ale. 30Kunukunuko Jesu, a di pfite ti to mtamo wule wu humete kwakwe, a to tshembereka a txi wonetela dibutho, a txi khene: “I mani a nga gwesa tinguwo tangu kani?” 31Vagondiswa va to mu angula va txi kha vona: “Wa ti wona ti to vathu va kukama ngu otshe madhawa, se wa nga wotisa tito, ‘I mani a nga ni gwesa?’ ” 32Kambe ene a to gula maso a txi rumarumela ngu kulava kuziva ti to i mani a nga maha tiya. 33Sekoko awule wamsikati, na a txi dhudhumela ngu kuthava, ngu kuwa a nga txi tiziva tiya ti nga mu humelela, a to ya khizama masoni kwakwe, a txi mu txhamusela dotshe ditshuri. Se Jesu a nje khene kwakwe: 34“Mwanangu, likholo lako li ku hanyisile, tsula ngu kuthutha, thuseka ka malwati ako.”

35Ene a di ngadi a txi womba-womba, ku to bwaka vathu va kuta ngu m'tini ka mthangeli wa disinagoga va txi kha vona: “Mwanana wako a fite; se u karatela txani kambe M'gondisi kani?” 36Aniko Jesu, na asi khatali txilo ngu mhaka yi yi nga ti wombwa, a to gela mthangeli wa disinagoga a txi khene: “U nga thave, tumela dwe.” 37Se Jesu kha tumela ti to mmwani e tsula nayo, hahanze ka Pedro ni Jakobe ni Johani, mwanawe Jakobe. 38Mbimo yi a nga hoka m'tini ka mthangeli wa disinagoga, a to ya mana masaluko a hombe, ni vathu va nga txi dila ni kupeketela tihuwa. 39Se a txi va gela ku khene: “Masaluko awa nga txani ni kudila kuwa nga txani kani? Dihorana kha da fa, di to otela.” 40Vona va to khata ku mu seka. Aniko Jesu a to humisa hahanze votshe vathu vale, a txi teka dwe tate ni mame wa mwanana wule wa txihoranana, kumweko ni vale va nga ti tile nayo, e wulela ka wukhalo wu a nga ti otelisitwe kona mwanana. 41Se a di mu ñote ngu diwoko a to womba a txi khene: “Talita kumi!” Ati ti wombako ku: “Txihoranana ni khani kwako, wuka!” 42Kunukunuko, a to wuka a txi tsimbilatsimbila, nguko i ti wa tanga ya digumi da malembe ni mambidi. Votshe vathu ve xamala ngutu. 43Ene a to va leletisisa ti to ni wammweyo asi thuki a txi tiziva ati ti nga maheka, se a txi va gela ti to ve ninga sakudya mwanana wule wa txihoranana.

தற்சமயம் தேர்ந்தெடுக்கப்பட்டது:

Marku 5: BEC2016

சிறப்புக்கூறு

பகிர்

நகல்