Matíó 15

Yə́susu na Bɛfalísia bá ndɔ tə́ŋə́niə

(Mə́l 7.1-13)

1Nɔ́yɛ́, Bɛfalísia na bamanya umbə́ndə́ ɔbá bá ná əbú húlə́kinə ɔ Yəlúsalɛma bá ná tɔ́mbálɛ́la a Yə́susu busíə́, bá ná wɛɛ́ya batá bá sɛ́á: 2«Ɛlɔ́áyɛ́ yatɛ́ báwɔ́á bɔkɔ́nɛna bá lɛ ndɔ bikiní ɔ́ŋgɔ əə́? Ɔ taká, ikúílí yɛ́ ɔnɛ́á, bá ndɔ nɛ́á ɛŋaná makátá ɔsɔa.» 3Yə́susu a sɛ́á: «Mba uwə́nú, ɛlɔ́áyɛ́ yatɛ́ nɔ lɛ ndɔ Umbə́ndə́ wɔ́ Huɛlɛ́ tə́tə́niə, nɔ ndɔ ɔŋgɔ ɔbánɔ́ á bikiní bɛ́ bíə́núə́ bisə́kúlulúnə́ əə́? 4Ɔ taká, Huɛlɛ́ a sɛ́á: “Lúbúnə́kə́ tɛ́á na nɛ́á.” A ka laa tɔ́na a sɛ́á: “Bá ná hɔ́ánáná bá wɛ́ɛ́yɛ́ ɔ́nɔ́kɔ́ ɔwá a ŋɔ isə́ ata inyə́ tikisiə.” 5Mba uwənú, nɔ ndɔ ínə́niə ɔwá, ábá mɔndɔ a ná yayɛ́á isə́ ata inyə́ lɛ́na a sɛ́á: “Bɔɔ́la ɔbɔ́á mɛ óso ɔwáwɔ uwíndiə ɛlɔ́áyɛ́ ɔwáwɔ ɔwɔ́lɔ, bɔ́ lɛa ɛlɔ́áyɛ́ Huɛlɛ́.” 6Wɛ́ɛ́yɛ́ mɔndɔ a lɛ ndɔ isə́ lúbúnə. Nɔ́yɛ́, nɔ ná Ɛtambá yɛ́ Huɛlɛ́ húə́síə́ ɛlɔ́áyɛ́ ɔkɛa ɛ́sɛ́á bíə́núə́ bikiní bɛ́ ndɔ bənú ínə́niə. 7Á bɛndɔ bá nɛbɛ́nyɔ́nyɔlɔ! Isáya a ka mənyiə muɛsɛ ɔ uwənú ɛlɔ́á a sɛ́á:

8“Yɛ́ɛyɛ ilúkunə yɛ́ ndɔ mɛaŋɔ́á bə́tiə na munuə;

wə́búə́ mɔlɛ́má wɔ́ báka hata na mɛaŋɔ́á.

9Mə́búə́ manyáná má nibə́tiə má báka itə́mbí,

bilə́líə́ ɔbɛ́á bá ndɔ bɛndɔ úkúniə, bɛ́ lɛa ɔbánɔ́ bɛkɛndɛ́ná bɛ́ bɛndɔ.”»

Bɛkɔa ɔbɛ́á bɛ́ ndɔ mɔndɔ tífílə

(Mə́l 7.14-23)

10Əlimə yɛ nɔ́yɛ́, Yə́susu a ná ilúkunə yɛ́ bɛndɔ ɛlɛ́ákɛ́na, a sɛ́á: «Nɔ́ məlúə́ básɛ́á, nɔ́ ɔ́kɔ́ muɛsɛ: 11Tátá bɔɔ́la ɔbɔ́á mɔndɔ a ndɔ nɛ́á bɔ́ ndɔ wɛɛ́ya tífílə, mba yatɛ́ ɔyɛ́á yɛ́ ndɔ fáma ɔ ɔwáyɛ́ munuə, yɛ́ ndɔ wɛɛ́ya tífílə.» 12Nɔ́yɛ́, Bɔkɔ́nɛna bá ná bɛ́nyálɛ́la, bá sɛ́á: «Ɔ ndɔ manya ɔwá Bɛfalísia bá ná bɛ́áwɔ́á bɛtambá ɔ́kɔ́ mɔbɛ́á əə́?» 13A sɛ́á: «Ata ɔ́ ubúə́níə́ bɔlɔŋɔ́tɛ́ ɔbɔ́á yamɛ́á Isə́ ɔ Nɔɔ́mɛná á sa nɛma, bá ŋɔ bɔɛ́ta tɔba. 14Nɔ́ bəə́bu niása; bá lɛa bəndímə́ndímə ɔbá bá ndɔ bɔsɔ́kɔ́ bəndímə́ndímə kɛndana. Ábá mundímə́ndímə a ndɔ ɔsɔ́kɔ́ mundímə́ndímə kɛndana, bá ŋɔ ka kɔ́á ɔ hɛfɛa bəə́bu bəkimə báfandɛ́.» 15Nɔ́yɛ́, Bíə́lə a sɛ́á: «Tɔ́kɔ́lɛ, nífúnínə́ bəsú wútə́yí ɔŋana.» 16Mba, Yə́susu a sɛ́á: «Nɔ́ ənú lɛa tɔ́na bɛála əə́? 17Nɔ lɛ ndɔ manya ɔwá, bikimə ɔbɛ́á bɛ́ ndɔ fíninə ɔ munuə bɛ́ ndɔ ka kɔ́á ɔ tɔna; əlimə yɛ nɔ́yɛ́ bɛ́ fámákɛna ɔ ɛfalɔ́ əə́? 18Mba, bɛtambá ɔbɛ́á bɛ́ ndɔ fáma ɔ munuə, bɛ́ húlə́kinə ɔ mɔlɛ́má, bɛɛ́ta bɛ́ ndɔ mɔndɔ tífílə. 19Ɔ taká, ɔ mɔlɛ́má nuúmə́ wɔ́ mɔndɔ á bɛfɛka bɛbɛ́á bɛ́ ndɔ húlínə, bɛɛ́ta bɛ́ ndɔ wɛɛ́ya lɔ́ma ɔ muɔnɔ́nɔ, ɔ nɛbambɛa, ɔ mɔnyɔ́kɔ́lɛ́, ɔ buíbi, ɔ imbóŋi yɛ bɛkanja na ɔ bɛkɔ́bálɛ́. 20Ɔ́ bɛ́táyɛ́ bɛkɔa bɛ́ ndɔ mɔndɔ tífílə. Mba, ɔnɛ́á ɛŋaná makátá ɔsɔa wɔ́ lɛ ndɔ mɔndɔ tífílə.»

Mukiníə́nú ɔ muəndú a nɔ́ nɛ́áyɛ́á nɛkɔmba tálɛ́na a Yə́susu

(Mə́l 7.24-30)

21Əlimə yɛ nɔ́yɛ́, Yə́susu a ná hɔalɛ́na ɔmɔ́tɔ́yɛ́, a ná ákáná ɔ ɛsalɛ yɛ́ misí yɛ Tíli na yɛ Sítono. 22Muəndú ɔmɔtɛ́, milóní yɛ Kánahána, a ka báá a ndɔ tuənə umə́; a ná ndásá á Yə́susu busíə́, a ná bótólíə́ ɔ ɔwayɛ́ ɔ baŋɛna, a sɛ́á: «Á Isə́lúkú, á Mɔná wa ndə́witi, wə́ə́ mɛaŋɔ́á mɛɛ́lɔ! Wamɛ́á mɔná ɔ muəndú a ndɔ məsə́kə ɔ́kɔ mɔŋɛ́ŋa; a báka na umbúínyi mɔbɛ́á.» 23Mba, Yə́susu a ná wɛɛ́ya indímə́ sana. Báyɛ́á bɔkɔ́nɛna bá ná bɛ́nyálɛ́la, bá sɛ́á: «Kúbə́kə́ wɔ́ɔwɔ muəndú bɔkɔasɛ́á, a ndɔ bəsú ɔŋgɔ na hikókó hɛ́ malɛlá.» 24Mba, a sɛ́á: «Yamɛ́á Isə́ a ka mɛaŋɔ́á lɔ́ma ɔbánɔ́ ɔ ɛndɔ́mbá yɛ́ Ísilahɛ́lɛ ɔyɛ́á yɛ́ ná niminə.» 25Ata nɔ́yɛ́, wɛ́ɛ́yɛ́ muəndú a ná bɛ́nyálɛ́la, a ná kiníə́ á Yə́susu busíə́, a sɛ́á: «Á Isə́lúkú, tɔ́kɔ́lɛ, ɔ́lɔ́ mɛaŋɔ́á.» 26Yə́susu a sɛ́á: «Yɛ́ lɛ báá muɛsɛ ɔwá bá bɛ́labɔ́nɛ́á bɛ́ tɔlɔ́matɔ́ ɛ́tá, bá índíə́kínə ɔ tɔnámɔ́á.» 27Muəndú a sɛ́á: «Ɛ́ɛ! Á Isə́lúkú yɛ́ lɛa nɔ́yɛ́ taká, mba ɔ matá ma ɛtáka, tɔnámɔ́á tɔ́ ndɔ imbumbú nɛ́á ɔtɔ́á bíə́búə́ bisə́lúkú bɛ́ ndɔ kuəsiə.» 28Nɔ́yɛ́, Yə́susu a sɛ́á: «Á wɔ́ɔwɔ muəndú, yáwɔ́á ilumininə yɛ́ lɛa yɛŋɛ́ŋa! Yɛ́ aŋɔ́á bɛ́kɛ́áká ɛ́sɛ́á ɔ ndɔ siə.» Ɔ umisíúmə́, wayɛ́á mɔná ɔ muəndú a ná niŋə.

Yə́susu a nɔ́ bɛnákɛnákɛ niŋəsəkiə

29Yə́susu a ná hɔalɛ́ná ɔ yɛ́táyɛ́ ɛbɔ́ka, a ná ákáná ɔ ɛsɛ́lɛ́ yɛ́ nɔmɔ́ nɛ́ Kalɛ́lɛa. A ná báláka ɔ ɔmáá ɔmbáŋá, a ná tuə́nə ɔ misí. 30Nɔ́yɛ́ ilúkunə yɛŋɛ́ŋa yɛ́ bɛndɔ yɛ́ ná ndásákɔ́na ɔwáyɛ́ busíə́, bá ná bitíndə bɛ́ bɛndɔ húlə́kə́nə, bəndímə́ndímə, bɛáta, məmúkú na bɛndɔ bá bɛfɛ́kɛ́ binə́binə́. Bá ná bəə́bu bɛ́lɛ́ákɛ́ná ɔ ɔwayɛ́ busíə́, a ná bəə́bu niŋə́sə́kíə́. 31Bilúkunə bɛ́ ná ə́lə́mə́nə́ ɛ́sɛ́á məmúkú má ndɔ hɔ́ɔ́, bɛndɔ bá bɛfɛ́kɛ́ bá niŋəkə, bitíndə bɛ́ kɛndaka muɛsɛ, bəndímə́ndímə bá siəkinənə. Bá ná botólíə́ á Huɛlɛ́ yɛ Ísilahɛ́lɛ ɔ tuúmə uwíndiə.

Yə́susu a nɔ́ tukóló túnisə tɔ́ bɛndɔ lúkə́kə

(Mə́l 8.1-10; Mat 14.13-21)

32Yə́susu a ná báyɛ́á bɔkɔ́nɛna ɛ́lɛ́ákɛ́na, a sɛ́á: «Mahana má ndɔ mɛaŋɔ́á ítiə ɛlɔ́áyɛ́ yɛ́ɛyɛ ilúkunə bɔkɔasɛ́á, ɔ́ mɔɔsɛ́ máama málálɔ́ ɔmá bá lɛ́á na mɛaŋɔ́á. Bá lɛ báá tɔ́na na bɔ́labɔ́nɛ́á. Mɛ lɛ ndɔ siə ɔ uwəbú uwúluəsiə mɛtaná, ɛkasɛ bá sá kɔakɔna ɔ ɛnɔ́mɛ ɛŋaná iŋgínə́.» 33Bɔkɔ́nɛna bá ná wɛɛ́ya batá bá sɛ́á: «Hə́níə́ tɔ óso ɔ bɛbɛlɛ́tɛ ɔbɔ́ŋɔ bɛ́ úlúkínə ɔ nɛ́ɛnɛ nindínə́ nɛ́ ilúkunə, mbá bá nibíə́kínə́ ɔ mátána makɔ́tákɛ əə́?» 34Yə́susu a sɛ́á: «Bɛbɛlɛ́tɛ bɛ́nɛ́á bɛ́ bənú lɛ́á əə́?» Bá sɛ́á: «Bɛ́lɛ́ndɔ́lɔ́mɔnɔ na yɛmɔtɛ́ tɛ́tɛ́á yɛ tuɔfɔfɔ́.» 35Nɔ́yɛ́, Yə́susu a ná ilúkunə tuənə́kíníə́ ɔ misí, 36a ná bɛ́táyɛ́ bɛ́bɛlɛ́tɛ bɛ́lɛ́ndɔ́lɔ́mɔnɔ na tɔ́táyɛ́ tuɔfɔ́ ɛ́ta. A ná Huɛlɛ́ mohóloniə híə́níníə́, a ná bɛɛ́ta bísə́kə́níə́. A ná índíə́kínə́ ɔ bɔkɔ́nɛna, bá ná bəə́bu bəkimə afákɛ́ná. 37Báyɛ́ bɛndɔ bəkimə bá ná nɛaka, bá ná nibíə́kínə; bɔkɔ́nɛna bá ná bɛbɛ́sɛ́bɛsɛ kɔtáka ɔbɛ́á bɛ́ ná tikənə; bá ná úndúsə́kíə́ ɔ bɛkana bɛ́lɛ́ndɔ́lɔ́mɔnɔ. 38Ɔmbana wɔ́ bɛndɔ ɔbá bá ná nɛ́áká, wɔ́ ka báá tukóló túnisə, ɛŋaná bəəndú na tɔlɔ́matɔ́ ɔfanɛna. 39Ɛnaka Yə́susu á bɛndɔ bəkimə úlúə́sə́kíə́, a ná fínə ɔ isóyí, a ná ákáná ɔ nɛkɛ́tɛ nɛ́ misí yɛ Makatána.

தற்சமயம் தேர்ந்தெடுக்கப்பட்டது:

Matíó 15: tvu

சிறப்புக்கூறு

பகிர்

நகல்