LUKA 23
23
Ko Iesu i Mua o Pilato
(Mata 27.1-2,11-14; Male 15.1-5; Ioa 18.28-38)
1Ne 'tu ki luga a tino katoa, takitaki atu ei ne latou a Iesu ki a Pilato, 2kae kamata o fai atu olotou mau penei: “Ne maua ne matou a ia nei ko takitaki 'se te fenua, ne taofi ne ia mo a ma fai lafoga ki a Kaisala, kae fai mai foki i a ia ko te Keliso te Tupu.” 3Ne fesili mai Pilato ki a ia, “A koe ko te tupu o tino Iutaia?” Ne tali atu a ia, “Tena eiloa ne fai mai ne koe.” 4Ne fai atu Pilato ki faitaulaga sili mo te vaitino, “E se iloa ne au se mea e sala ei te tino tenei.” 5Ka ko latou ne kinau malosi faeloa penei. “Ko fakamakosu ne ia a te fenua i ana akoakoga, e kamata mai i Kalilaia o fano ki Iutaia katoa, ke oko mai eiloa ki konei.”
Ko Iesu i Mua o Helota
6I te lagonaga ne Pilato a te mea nei, fesili atu ei penei, “A te tagata nei se Kalilaia?” 7I te iloaga ne ia i a Iesu se tino mai te pulega a Helota, uga atu ei ne ia ki a Helota, tela e nofo tumau i Ielusalema i aso kona. 8Ko oko eiloa i te fiafia o Helota i te kiloga ki a Iesu, me ko oti ne lagona ne ia, ka ko leva foki ne fia fetaui mo ia; ne fakamoemoe foki a ia ke fai ne Iesu ne fakailoga. 9Ne fesili mai Helota ki a Iesu i ne fesili e uke, kae seai eiloa sena tali ne fai. 10Ka ko faitaulaga sili mo faiakoga o te Tulafono ne 'maka atu ki mua, o fakamalosi te lotou mau e uiga ki a Iesu. 11A Helota mo ana sotia ne fakatauemu, kae fakaseaoga ne latou a Iesu. Ne fakapei ne latou a ia ki te gatu malapulapu, kae toe fakafoki atu ki a Pilato. 12Ne toe 'lei ei Pilato mo Helota i te aso eiloa tena; me ne fai fili laua muamua.
Ko Fakasala a Iesu ki te Mate
(Mata 27.15-26; Male 15.6-15; Ioa 18.39—19.16)
13Ne 'luku ne Pilato faitaulaga sili, pule, mo te fenua katoa. 14Ne fai atu a ia ki a latou, “Ne aumai ne koutou te tagata tenei ki a au, e pela me se tino e faka'se ki te fenua, kae kiloke, ko oti ne sukesuke ne au a ia i otou mua, kae e seki iloa ne au se mea e sala ei te tagata tenei, i mea ne molimau mai ei koutou e uiga ki a ia. 15Ne seki maua foki ne Helota se 'se o Iesu, tela toe uga mai ei a ia ki a tatou, me seai sena mea masei ne fai, e 'tau ei o mate. 16Tela la, ka kini ne au a ia ko 'tala atu ei.” 17(I Paseka takitasi, e masani Pilato o fakasaoloto atu a te pagota e tokotasi ki a latou.) 18Ne ka'laga a te vaitino katoa penei, “Tamate a ia, kae fakasaoloto mai Palapa ki a matou!” 19I a Palapa ne pei ki te fale puipui me ne kosu ne ia te fa'kai, kae tatino foki. 20Ne manako Pilato o fakasaoloto a Iesu, tela ne toe faipati atu ei ki a latou. 21Kae ne ka'laga malosi mai latou penei, “Fakasataulo! Fakasataulo a ia!” 22Tenei te fai atu fakatolu o Pilato ki a latou, “Se a te mea masei ne fai ne ia? E se maua ne au sona 'se e 'tau ei o mate; tela la, ka kini ne au a ia, ko 'tala atu ei.” 23Kae ne paka'laga mai eiloa latou ke na fakasataulo, kae ne manumalo olotou leo. 24Tela, fakasala ei ne Pilato a Iesu, e tusa mo te lotou manakoga. 25Ko fakasaoloto atu ne ia a te tagata tela ne ma'nako latou ki ei, ko te tino tela ne fale puipui ona ko te kosu fenua mo te tatino, kae tuku atu ei ne ia a Iesu ki a latou, e pela eiloa mo te lotou manakoga.
Ko te Fakasatauloga o Iesu
(Mata 27.32-44; Male 15.21-32; Ioa 19.17-27)
26Ne takitaki atu ne latou a Iesu, fepaki ei mo te tagata e igoa ki a Simona te Kulene, tela ne vau mai vao. Ne puke ne latou a ia, kae fakaeke atu ki ei te sataulo, ke tautali atu i tua o Iesu.
27Ne tau'tali atu i a Iesu a te vaitino e tokouke, fakatasi atu foki ei a fafine kola e fakatau'tagi kae fanoanoa ki a ia. 28Ne mafuli atu a Iesu ki a latou, kae fai atu, “Tamafine o Ielusalema! Sa 'tagi mai ki a au, kae 'tagi ki a koutou mo otou fanau. 29I te mea e oko mai aso, e fai mai ei tino penei, ‘Amutia fafine kola e se afu mo fafine e seki fanau, mo u e seki ugina.’ 30#Hose 10.8; Faka 6.16 Tena te taimi kafai mai ei tino ki mauga, ‘Ma'toli mai ki a matou!’ kae ki koga maluga'luga, ‘Fakapulou ifo matou!’ 31Me kafai e fai mea konei ki te lakau mata, kae se a te mea e fai ki te lakau pakupaku?”
32Ne ave ne latou a te sua tokolua pagota ke tamate fakatasi mo Iesu. 33I te okoatuga o latou ki te koga e fakaigoa ki te “Gatiulupoko,” ne fakasataulo ne latou a ia, fakatasi mo te tokolua pagota, e tokotasi i tena feitu fakaatamai, kae tokotasi i tena fakamaui. 34#Sala 22.18 Muna a Iesu, “Toku Tamana, fakamagalo latou; me se iloa ne latou te lotou mea tenei e fai.”#23.34: I nisi lomiga e seai ieiMuna a Iesu, “Fakamagalo latou, toku Tamana! E seiloa ne latou a te olotou mea e fai.”
Ne fai ne latou te vili ke tufa ei ona gatu. 35#Sala 22.7 Kae ne tulaki atu a tino o onoono atu, ka koi faifai muna mai takitaki o Iutaia ki a ia penei. “Ne fakaola ne ia a nisi tino, ke fakaola la ne ia a ia eiloa, manafai a ia ko te Keliso tela ne filigina ne te Atua!” 36#Sala 69.21 Ne faifai muna foki ki a ia sotia; kae o'mai foki ki a ia o tuku mai te uaina vi. 37Kae fai mai, “Kafai koe ko te tupu o tino Iutaia, fakaola la koe ne koe eiloa.” 38Konei pati e tusi mai luga i a ia, “Tenei te Tupu o tino Iutaia.”
39E tokotasi te pagota ne muna masei ki a ia penei. “E se ko koe te Keliso? Fakaola la koe pela foki mo maua nei!” 40Ne 'liko atu te sua pagota ki a ia penei, “E se mataku koe ki te Atua i a taua ko fakasala fakatasi mo ia? 41Ko tonu eiloa te ta fakasalaga, me ko taui mai mea 'se ne fai ne taua; ka ko ia nei, e seai eiloa sena mea 'se ne fai.” 42Ana muna ki a Iesu, “Masaua mai au manafai e vau koe i tou 'malu fakatupu!” 43Ne tali atu a Iesu ki a ia, “Au e muna tonu atu ki a koe ko te aso tenei e fakatasi ei taua i Palataiso.”
Ko te Mate o Iesu
(Mata 27.45-56; Male 15.33-41; Ioa 19.28-30)
44Ko pili o ta te sefululua i te matega o te la, pouli ei mo te fenua katoa ke oko ki te itula e tolu. 45#Eso 26.31-33 Kae ne masaelua foki te 'pui o te Fale Tapu. 46#Sala 31.5 Ne kalaga Iesu mo te leo maluga penei, “Toku Tamana, ko tuku atu ne au toku agaga ki ou lima!” I te otiga o ana muna konei kae mate. 47Ne matea ne te takitaki o te tokoselau a te mea ne tupu, 'viki atu ei ki te Atua penei. “E tonu eiloa, i a ia se tino amiotonu.” 48Ka ko tino katoa kola ne maopoopo o onoono ki mea ne 'tupu, lavea ei ne latou a mea kona, pāpā ei olotou fatafata i te fanoanoa, kae 'foki katoa ki olotou kaiga. 49#Luka 8.2-3 Ka ko ona takaga katoa, e aofia i ei fafine kola ne tau'tali i a ia mai Kalilaia, ne 'tu 'mao atu o onoono ki mea konei ne 'tupu.
Ko te Tanuga o Iesu
(Mata 27.57-61; Male 15.42-47; Ioa 19.38-42)
50E isi se tagata e igoa ki a Iosefa mai te fa'kai o tino Iutaia ko Alimataia, se tino o te Fonopule, se tino 'lei foki kae amiotonu. 51Ne seki kau a ia ki te lotou pulepulega ne fai, kae ne nofo fakatalitali ki te Malo o te Atua. 52Ne fano ki a Pilato o fakamolemole ke ave ne ia te foitino o Iesu. 53Ne tuku ifo ne ia a te foitino, kae pelu ki te sulukafu lino, fakatakato ei ne ia ki te tanuga ne tuki i kaupapa, tela e seki fakatakato eiloa se tino ki ei. 54Ko te aso Fakatoka tenei, me ko pili ki te Sapati.
55Ka ko fafine kola ne tautali i a ia mai Kalilaia, ne olo fakatasi mo Iosefa, onoono atu ei latou ki te tanuga, mo te fakatakatoga o tena foitino. 56#Eso 20.10; Teu 5.14 Ne 'foki latou ki olotou kaiga, fakatoka ei ne latou a mea manogi mo sinu.
Ne malo'lo latou i te Sapati e pela eiloa mo te Tulafono.
தற்சமயம் தேர்ந்தெடுக்கப்பட்டது:
LUKA 23: Tusi Tapu
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Tuvalu Revised Bible © Bible Society in the South Pacific
