MWANDUSO 8
8
Kimambukizo cha Ummemelo wa Mazi
1Ila Mulungu kamgelegeza Nuhu na wang'onyo wose wa kumuhulo na wofugigwa waja wakalile hamoja na heyo muna isafina. Mulungu kadigala beho muisi yose, na igamazi gasonga kuhunguka. 2Nzokwe za mazi zili muisi na imizonzo ya mazi ya kuulanga vihindigwa, na mvula ileka kutoa. 3Vigabitile mazua mia na malongo matano mazi gakala gahunguka lugaluga muisi, 4na mdizua da longo dimwe na saba da mulenge wa saba isafina ima hachana ya imigongo ya Alalati. 5Igamazi gahunguka, na mdizua da ichanduso da umulenge wa longo dimwe, sota za imigongo zoneka.
6Vigeshile mazua malongo mane Nuhu kadivugula idizonzo diyatendile muisafina 7na kumulava hanze bondwa, nayo habwelile, ila kaguluka kuno na kuno mbaka igamazi viganyalile. 8Abaho Nuhu kamulava hanze hua yalole kamba igamazi gahungula muisi. 9Ila ija ihua hapatile hanhu ha kwima kwavija kukala na mazi muisi yose, avo kabwela ha Nuhu muisafina. Nuhu kaugolosa mkono wake kamsola ija ihua na kum'bweza kumwake muisafina. 10Kabeta mbaka mazua saba gayagwe, abaho kamulava ihua kabili. 11Ija ihua viyabweleganye mkipigiti cha ichungulo, mmulomo wake kakala na jani bisi da mzaituni, avo Nuhu kavitanga kamba mazi gahunguka muisi. 12Abaho kabeta mazua saba gayagwe, kamulava hanze ija ihua. Kipigiti kino habwelile kabili kumwake.
13Nuhu viyakalile na milao mia sita na umwe, mdizua da mwanduso da umulenge wa mwanduso, igamazi ganyala. Nuhu kakisegeza ikigubiko cha isafina, kasungulila, na kona kamba isi ikala inyalile. 14Vuuvikile mulenge wa ikabili na mazua malongo mabili na saba, isi ikala inyalile kabisa.
15Abaho Mulungu kamulongela Nuhu, 16“Lawa hanze ya isafina, gweye na mtwanzi wako, na wanago na watwanzi zao. 17Walave hanze kila kinhu kilumbigwe kili na ugima kili hamoja na gweye, ndege, wang'onyo, na kila kinhu kilumbigwe kitembela muisi giladi wenele muisi na kulela na kongezeka.” 18Avo Nuhu kalawa muisafina hamoja na mtwanzi wake, na wanage, na watwanzi zao. 19Wang'onyo wose, kila kinhu kilumbigwe kitembela muisi, na ndege wose walawa muisafina, kulingana na namna zao.
Nhosa ya Kulukuzwa
20Nuhu kamzengela MNDEWA kilingo cha kulavila nhosa. Kamsola mng'onyo imwe na ndege imwe kulawa ha wang'onyo na ndege wa namna zose walumbile kulavigwa nhosa, kawalava nhosa mkuwasoma na moto hana ikilingo cha kulavila nhosa. 21Mnung'ho wa inhosa umnogela MNDEWA, na heyo kailongela mwenyego mmoyo wake, “Siidukumiza isi kabili sama ya gaja gawatendile wanhu, hata kamba ngelegeza zao zikala zihile songela haudodo wao. Na sivibananga kabili vinhu vose vilumbigwe vili na ugima kamba vinitendile. 22Milao yose isi vondaikale, vipigiti vino haviziga, kipigiti cha kuhanda na kuhuna, kipigiti cha kihuhe na keakea, kipigiti cha zua na mvula, na kipigiti cha imisi na ikilo.”
தற்சமயம் தேர்ந்தெடுக்கப்பட்டது:
MWANDUSO 8: Kizalamo
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Zaramo Bible Translation Project: © 2023 Pioneer Bible Translators
New Testament is a revision of: Zaramo New Testament: © 2020 The Word for the World International and © 2020 Pioneer Bible Translators