Matiyu 18

Jawawi Isaye kǝla jama tia gawuyen

Wundunja kura wo?

(Mar 9.33-41; Luk 9.46-50)

1Sa adǝn fuwurawadǝ na Isayero isane tiro: «Curo nodo bargaa Mai Samemayen wundu kura wo?» cane tia keworo. 2Daji Isa tadaana laaa bowoje dawunjan isadajiye 3tayiro: «Jiremaro nayiro wulnjagakki, karwundo falde tadawa sanana gairo walluwwia, tǝmmaro nodo bargaa Mai Samemayero ngawuwwawo. 4Adǝ nangaro wundu duwon tadaana adǝ gai kǝlanjua awimaro ngojǝnnidǝ, curo nodo bargaa Mai Samemayen tima kura wo.

5«Koro wundu duwon tadaana adǝ gaia cunilan#18.5 cunilan - Isa nangaro. cǝmowonamadǝ, wumaa sǝmowo. 6Amma wundu duwon tadawa sanana wua mǝrsasanaso aniye falnjaa cakke talje biwu cǝdidǝ, kamdǝye daunjuro kau neduram mafǝndi lujagane bǝrǝm kuruwuro gǝpcaanama tiro ngalwo.

7«Kuttunja am duniayeso, dalilnjudǝ awowa tayia casakke taljane biwu cadi mbeji. Jaraptaso kadu baworo isai, amma kuttunju kam tiyen isaidǝ! 8Mukkonǝm bi sinǝm njakke tallǝme biwu dimia, tia kamme nin kuruwunno gǝmme! Mukko yindia bi si yindia kannu tǝmmaro nuiwaworo ngawodǝroa, maskin bi dungu ro sawisoyero ngaammama niro ngalwo. 9Koro simmǝm njakke tallǝme biwu dimia, tia kulaine nin kuruwunno gǝmme! Sim yindia kannu jaanamayedǝro ngawodǝroa, sim falla ro sawisoyero ngaammama niro ngalwo.

Misal dimi faccǝgǝnaye

(Luk 15.1-7)

10«Hangal gǝnanowo, bare tadawa sanana aniye falnjamaro rudu gǝnagǝwwi! Nayiro wulnjagakki, samelan malaiyawanja sawisoro fǝkka Bawani Mai Samemaye carui kasarga. 11[Awoa Tada Kambedǝ awo faccǝgǝnasodǝa maje njǝkkaworo isǝna.] 12Awi gǝle tǝmanuw? Kam laa diminju miaa duwon, fal fatkeyenoa, filǝgar lǝgaridǝa kǝrisolan kolje leje fal faccǝgǝnadǝa maji, mare? 13Jiremaro nayiro wulnjagakki, kiwandoa, karwukǝji duwon kǝla faldǝyen cǝdidǝ, kǝla filǝgar lǝgari faccagannidǝyen cǝdidǝmaa kojǝna. 14Adǝgaima Bawando Samema ye tadawa sanana aniye falnjaye fattuwu cǝraanni.

Kǝraminǝmbe biwu niro njǝddo

15«Kǝraminǝm biwu niro njǝddia, lene katte nayi yindi rundoyen tiro biwunjudǝa wulgǝne. Mananǝm fanjia, kǝraminǝmdǝa mowomma. 16Fanjiwawoa, kam fal bi yindi ngone kallo lenowo. Adǝgainin mana fi yaye ci sheda yindi bi yakkuyen tabbattiyi. 17Tayi yea fanduro wajia, jama wua gawuro wulgǝne. Koro yaye jama wua gawudǝmaa fanduro wajia, kǝrdi bi akki mowoma gairo tia ngone. 18Jiremaro nayiro wulnjagakki, awi duwon dunian geruwidǝ same yen tikkerǝna, koro awi duwon dunian wuinuwidǝ same yen wuidǝna. 19Koro nayiro wulnjagakki, dunian kamndo yindi kǝla awi yayen ardijane Bawani Mai Samemaa caworia, tayiro ci. 20Dalilnjudǝ na duwon kam yindi bi yakku cunilan captanadǝ, wu ye dawunjan,» yeno.

Misal kam gawurdu wadumaye

21Daji Biturus na Isayero ise tiro: «Kǝma, kǝramini wuro biwu sǝddiya, ndawuro tia gawurnǝkki? Har gadegade tulurro?» cǝne tia kiworo. 22Isaye tiro: «A’a, har gadegade tulurro gǝni wulnjǝgǝkko, fitulur gadegade tulurro tia gawurne! 23Adǝ nangaro nodo bargaa Mai Samemaye alamanju mai laa wolodiyanju-a kǝla kasunjayen balas dio cǝraanadǝ gai. 24Maidǝ balas dio badiyenniya, kam talanti#18.24 talanti - Talanti faldǝ alama alwasi kida kǝrwu mewu wuriye gai. dǝwu mewuro jǝgaimaa tiro kekkudo. 25Kamdǝ awonju rǝmboye bawodǝ, Maidǝ wada ce ti-a kamunju-a yallanju-a kǝndanju samma-aa calado kasudǝ tǝrǝmbo yeno. 26Amma kamdǝ fuwu Maidǝyen tungurumje tiro: “Barganǝmmin, kanadi tai, sammaa rǝmbǝkki, diye!” yeno. 27Daji Maidǝ tia njunoje kasudǝa wajiye tia kolje leyeno.

28«Kiluwunniya, wolodi adǝ ye kamanju laa dinariyus#18.28 dinariyus - Dinariyus faldǝ alwasi kida kawu falle. miaro jǝgaimaa kiro. Tia dauyen rǝpciye kimiljiye: “Awo nia njǝgakkidǝa rǝmbe!” yeno. 29Daji kamanjudǝ fuwunjun tungurumje tia lowoje: “Marne, kanadi tai, rǝmbǝkki, diye!” yeno. 30Amma waje tia kosoro cakke, har kasudǝa cǝrǝmbiro yeno.

31«Wolodiya amanjudǝ awo wakkajǝnadǝa kerunniya, karwunja jauro bannade lejane Maidǝro awo wakkajǝna sammaa wulyeyera. 32Daji Maidǝ koro walde wolodidǝa bowoje tiro: “Ni wolodi kǝlado! Lowosǝgǝmma nangaro, kasunǝm adǝ sammaa wangeyekko. 33Njunonjǝkkǝnadǝ gai, wolodi kamanǝmba njunodudǝ niro wajimnjǝgǝna, gǝna?” cǝne 34gǝrgaje tia mukko am tiro ajawu caddiyero cakke, har ti ye sammaa cǝrǝmbiro yeno. 35Adǝgaima wundundo yaye karwunjun kamanjua gawurjiwawoa, Bawani Mai Samema ye tiro ngaidǝmaa cǝddi,» yeno Isaye.

தற்சமயம் தேர்ந்தெடுக்கப்பட்டது:

Matiyu 18: kby

சிறப்புக்கூறு

பகிர்

நகல்