Yohane 13

Yesu wakugeziska malundi gha ŵasambiri ŵakhe

1Sono pambere chiphikiro cha Paska chindafike, apo Yesu wakamanya kuti ora lakhe la kufumiramo mu charu ichi kuya ku Ŵawiske lafika, ndipo pakuŵatemwa ŵakhe na ŵakhe awo ŵakaŵa mu charu, wakaŵatemwa kufikira na ku umaliro.

2Ndipo pa nyengo ya chakurya cha mise, Satana wakawa kuti waŵika kale maghanoghano mu mtima wa Yudasi Isikariyoti, mwana wa Simoni, kuti wamwendere mphiska Yesu. 3Yesu pakumanya kuti Ŵawiske ŵakaŵika vinthu vyose mu mawoko ghakhe, na kuti wakafumira kwa Chiuta, ndipo wakawereranga kwa Chiuta, 4wakawuka apo wakaryanga, wakavura laya lakhe la kuwaro, ndipo wakatora thaulo na kujiphinya nalo mu chiuno. 5Penepapo wakapungulira maji mu beseni ndipo wakamba kugeziska malundi gha ŵasambiri ŵakhe na kughapuputa na thaulo ilo wakajiphinya nalo mu chiuno. 6Wakiza kwa Simoni Petrosi ndipo Petrosi wakati kwa iyo, “Fumu, kasi ndimwe mugeziskenge malundi ghane?”

7Yesu wakamuzgora wakati, “Ichi nkhuchita kuti ukuchimanya sono chara, kweni uti umanyenge pamanyuma.”

8Petrosi wakati kwa iyo, “Kuti muti mugeziskengepo malundi ghane chara!”

Yesu wakamuzgora wakati, “Usange ndareka kukugeziska kuti ungamanya kusanganaso na ine chara.”

9Simoni Petrosi wakati kwa iyo, “Fumu, kuti muti mugeziskenge malundi ghane pera chara, kweni na mawoko ghane na mutu wane wuwo.”

10Yesu wakati kwa iyo, “Uyo wageza kale thupi lose wakukhumbaso kugeza chara kweni malundi pera, ndipo thupi lakhe lose ndakuphotoka. Muli ŵakuphotoka, kweni mose chara.” 11Chifukwa Yesu wakamumanya kale uyo wamwenderenge mphiska, ndicho chifukwa wakayowoya kuti, “Kuti mose muli ŵakuphotoka chara.”

12Yesu wakati wageziska malundi ghawo na kuvwaraso malaya ghakhe, wakaya kakhara pa malo ghakhe, ndipo wakati kwa iwo, Kasi mukumanya chifukwa icho ndamuchitirani ntheura?#Luk 22.27 13Ine mukundichema kuti Fumu na Musambizgi, ndipo nadi mukuneneska pakuti ndimo ndiliri. 14Sono usange ine nda Fumu yinu, na Musambizgi winu, ndamugeziskani malundi, namweso mukwenera kugeziskana malundi. 15Ndamupani chiyerezgero kuti namwe muchitenge ntheura nga ndi umo ine ndamuchitirani. 16Inya, inya nadi, nkhumunenerani kuti muteŵeti kuti ndi mukuru kuruska sekuru wakhe chara, nanga ndi nthumi kuti yikumuruska chara uyo wakuyituma.#Mat 10.24; Luk 6.40; Yoh 15.20 17Usange mukuvimanya vyeneivi muŵenge ŵakutumbika usange mukuvichita!

18“Mazgu agha kuti nkhunenera mose chara, chifukwa nkhuŵamanya awo ndaŵasora. Kweni kuti ghafiskike Malembo agho ghakuti, ‘Uyo wakurya chingwa pamoza na ine ndiyo wandiwukira.’#Mas 41.9 19Nkhumuphalirani ichi sono pambere chindachitike, mwakuti para chachitika mupulikane kuti ndine mweneuyo. 20Inya, inya nadi nkhumunenerani kuti, yose uyo wakupokerera uyo ndamutuma wakupokerera ine. Ndipo yose uyo wakupokerera ine wakupokerera mweneuyo wakandituma ine.”#Mat 10.40; Mrk 9.37; Luk 9.48, 10.16

Yesu wakuphalira nkhanira uyo wamkumwendera mphiska

(Mat 26.20-25; Mrk 14.17-21; Luk 22.21-23)

21 Yesu wakati wayowoya vyeneivi, wakakweŵeka chomene mu mzimu wakaphara pakweru wakati, “Inya, inya nadi nkhumunenerani kuti, yumoza wa imwe wati wandenderenge mphiska.”

22Ŵasambiri ŵakhe ŵakamba kulaŵiskana ku maso, ŵakazizikika chomene na munthu uyo wakanenanga. 23Yumoza wa iwo, musambiri mweneuyo Yesu wakamutemwa wakeghamira pafupi na chifuŵa cha Yesu. 24Simoni Petrosi wakamuchewuzga wakati, “Tiphalira kasi wakunena njani?”

25Musambiri yura wakasenderera pa chifuŵa cha Yesu, wakati, “Fumu, kasi ndi njani?”

26Yesu wakazgora wakati, “Ndi mweneuyo nditi ndimupenge mphiri para ndakovya.” Penepapo Yesu wakati wakovya phiri, wakamupa Yudasi mwana wa Simoni Isikariyoti. 27Penepapo Yudasi wakati wapokera phiri, Satana wakanjira mwa iyo. Yesu wakati kwa iyo, “Icho ukukhumba kuchita, chita luŵiro.” 28Sono pakaŵavye mwa awo ŵakakhara pa kurya, uyo wakamanya chifukwa icho Yesu wakayowoyera ntheura kwa iyo. 29Pakuti Yudasi wakaŵa msungiliri wa thumba la ndarama, ŵanji ŵakaghanaghananga kuti Yesu wakamuphaliranga kuti, “Kagule ivyo vikukhumbikwa pa chiphikiro,” panji kuti wakapereke vyawanangwa ku ŵakavu.

30Sono wakati wapokera phiri, penepapo wakafumira kuwaro, ndipo panyengo iyi kukaŵa usiku.

Dango liphya

31Yudasi wakati wafuma, Yesu wakayowoya wakati, “Sono ndipo Mwana wa Munthu wachindikika, ndipo Chiuta wachindikikira mwa iyo. 32Usange Chiuta wakachindikikira mu Mwana, Chiuta nayo wati wachindikenge Mwana mwa iyomwene ndipo wati wamuchindike penepapo. 33Mwa twana, kwakharako kanyengo kachoko waka apo ndichali namwe. Mwamkundipenja, kweni nkhumuphalirani sono mazgu agho nkhaŵaphalira ŵaYuda kuti, ‘Uko nkhuruta ine, imwe kuti mungizako chara.’#Yoh 7.34 34Nkhumupani dango liphya kuti mutemwanenge. Umo ine ndamutemwerani imwe, ndimo namwe mutemweranenge.#Yoh 15.12, 17; 1 Yoh 3.23; 2 Yoh 5 35Na cheneichi ndicho ŵanthu wose ŵati ŵamanyirenge kuti ndimwe ŵasambiri ŵane, usange mukutemwana yumoza na munyakhe.”

Yesu wakuyowoyerathu kuti Petrosi wamkumukana

(Mat 26.31-35; Mrk 14.27-31; Luk 22.31-34)

36Simoni Petrosi wakati kwa iyo, “Fumu, kasi mukuruta nkhu?”

Yesu wakazgora wakati, “Uko nkhuruta ine, kuti ungandirondezga sono chara, kweni wizamkundirondezga pamanyuma.”

37Petrosi wakati kwa iyo, “Fumu, chifukwa uli ndingareka kumurondezgani sono? Nditi ndiŵikire pasi umoyo wane chifukwa cha imwe.”

38Yesu wakamuzgora kuti, Kasi uŵikirenge pasi umoyo wako chifukwa cha ine? Inya, inya nadi nkhukunenera kuti, tambala wati walire chara, mpaka ukandikane katatu.

தற்சமயம் தேர்ந்தெடுக்கப்பட்டது:

Yohane 13: Tumbuka

சிறப்புக்கூறு

பகிர்

நகல்