Genesis 2
2
Ya meikkeppitun aggew
1Hanniman hu nanletuan nan Apu Dios ni puyek niya kabunyan niyaddan emin hu wadadman. 2Ginibbuh tu law ni emin hu ngunu tu et man-iyyatun meikkeppitun aggew.#2:2 Hebrews 4:4, 10 3Binendisyonan tu hu humman ni aggew et ibilang tun kamengillin tep humman ni aggew hu nengibbuhan tun ngunu tu et man-iyyatu.
4Hanniman hu naltuan ni kabunyan et ya puyek niya emin hu hipan wadadman.
Ya etan leguntad Eden.
Lintun Apu Dios hu puyek niya kabunyan 5Endi hu neitnem niya endi simmemel di puyek tep endi ni udan ni impaelin Apu Dios ey endi ni hu mantennem. 6Entanni ey wadadda utbul ni menennum ni emin ni puyek.
7Entanni ey immala hi Apu Dios ni puyek, et kapyaen tun annel ni tuu et heb-ukan tu eleng tu, ey yimmayyah.#2:7 Ang-ang yu hu 1 Corinthians 15:45-47 8Wada etan sineneman Apu Dios ni legunta e Eden di appit ni kasimmilin aggew et yadman nengiha-adan tun nunman ni tuun lintu tu. 9Impatmel Apu Dios di legunta hu nambakbaklang ni keyew ey kakkayyaggud ang-ang da niya lameh da. Yadman di gawwan etan ni legunta ey wada etan keyew ni kaum-idwat ni biyag#2:9 Revelation 2:7, 22:2, 19 et ya etan keyew ni kaum-idwat ni laing ni pengamtaan ni kayyaggud niya lawah.
10Wada etan wangwang di Eden ni kamenennum ni nunman ni legunta. Yad a-allaw tu ey nan-epat huyyan wangwang. 11Ya ngadan etan ni nemangulun wangwang ey Pishon e indalan tud Habilah. 12Yadman hu kawad-an ni nemahmah ni balituk, yadda etan nenginan batu niyadda etan kunan tun letan keyew ni kayyaggud hamuy tu. 13Ya ngadan etan ni meikkadwan wangwang ey Gihon e kamampellaw di bebley di Kush. 14Ya etan meikkatlun wangwang ey Tigris e humman kamampellaw di Assyria di appit ni kasimmilin aggew. Ya etan meikka-pat ni wangwang ey Euphrates.
15Entanni et ilaw nan Apu Dios etan lintu tun tuud leguntad Eden, ma-lat hi-gatu mampaptek diman. 16Kan Apu Dios ni hi-gatuy “Dammutun kennen mu hu lameh idan linggeman ni keyew eyad legunta, 17nem entan tu ekan hu lameh etan ni keyew ni pengamtaan ni kayyaggud niya lawah. Tep hedin kennen mu lameh ni nunman ni keyew ey mettey ka.”
18Entanni ey kan Apu Dios ey “Beken ni kayyaggud ni an manhahhakkey hu laki. Umletu-ak ni dayutun pangkadwa tun umbaddang ni hi-gatu.”
19-20Hi Apu Dios ey lintu tu dedan la hu nambakbaklang ni animal niya sisit e puyek hu naltuan da. Humman idan lintu tu ey tu impeang-ang etan ni laki ma-lat ngadanan tudda. Et emin hu hipan impangngadan tun hanhakkey ni hi-gada ey humman ngadan da. Nem emin ida humman ey endi dayutun pangkadwa tun umbaddang ni hi-gatu. 21Et ya impahding Apu Dios ey inuyeng tu etan laki et ekalen tu hu hakey ni tu-ngal di taglang tu et han tu pandummit etan laman. 22Kinapya tun bii humman ni tu-ngal ni taglang et ilaw tud kad-an etan ni laki. 23Ey kan etan ni laki ey “Kayyaggud et wada law eya pangkadwak ni keingngeh ku. Nalpud tu-ngal ku niyad laman ku. Bii hu ngadan tu tep nalpud laki.” 24Et humman hu, hedin mengahwa hu laki ey hi-yanen tud ametun inetu et makiaddum etan ni bii et henidda hakey.#2:24 Matthew 19:5, Mark 10:7-8 et ya 1 Corinthians 6:16, Ephesians 5:31
25Humman idan laki niya bii ey eleg ida mambalwasi, nem eleg ida umbaing.
தற்சமயம் தேர்ந்தெடுக்கப்பட்டது:
Genesis 2: ify
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
©2009, Wycliffe Bible Translators, Inc. All rights reserved.