Ann Bokwakwarin 41
41
Joseph Aiwab Orot An Bomomout Yabin Iyaubunag
1Kwanda ruam inai isawar gibunai, Egypt an aiwab orot ibomomout on Nile sareu rewanai itatawar. 2Ato cow engon nimtereban ruam usis obis kadidis on sareu emon sigai sinai tefai ato sibosuruf wayo si yam. 3Namon cow engon nimtereban ruam ba sigai; osi on usis teinis rarikis. Osi sinat ato cow ato sareu rewanai wayo si yam on bisisi sitawar. 4Ato cow usis teinis rarikis on simisir cow usis obis kadidis on siyam isawar. Namon aiwab orot on bomomout i tai on iror imisir. 5On iyeinir men iyen bubur ato bomomout tani ba it. On ibomomout on sawareg ann kaitamomai yabis engon nimtereban ruam siya gagamis tutufis obis ato simari. 6Namon sawareg nimtereban ruam ba sisisigis sigat. Osi sawareg on men obis a gagaf rabis yabin kwanda an yabat forabin irabis on mes. 7Namon sawareg gagaf rabis on simisir ato sawareg gagamis tutufis obis on sitonanis. Aiwab orot en bubur emon imisir weie, isagob on i bomomout. 8On mes aiwab orot fomenei imisir ato magin an itin on men yasisir. Ato on dura iyafar Eygpt amonai orot gigiboanotis, kwakwairotis a baromotis engon siruayo ato an bomomout ikasones, baise men iyafan tani iyau bunag aurin.
9Namon sareu wine kaifarotin on aiwab orot iyawur iyau, “Yau ari aurim anirufan, yau on bobo komasin aiyamai. 10Ra kaitamom om yau a rafi teren an orot gagamin rui auri uyatatab ufatumei ato fafatum goa an bainetewar orot an goai nan ureberuei. 11Fom kaitamom rafi teren an orot gagamin rui wabomomout ato waibomomout asi yabis on ta ta. 12Hebrew jorei boboun on mat nan wamama, on min fafatum kaifarotis asi bainetewar orot an bobo orot. Wei wai bomomout wakasonai ato asi yabis on mabi mabi iyau bunagen weinei mamaba wabomomout on fofonisi. 13On dura aifan iyau bubunagei on bobo engon nanaba simatar. Yau au bobo an efanai uyeiniu men, baise om rafi teren an orot gagamin on wengarai usikon.”
14Namon aiwab orot on sasasan wat an bobo orot iyafares sinai Joseph aurin ato fafatum goa emon on sibo sigat. On sareu iyeib, iyaragai ato sawar obis iyoten weie inat aiwab orot nanai itawar. 15Aiwab orot on Joseph iyawur iyau, “Yau abomomout ato men iyafan tani arimon itau bunag on. Baise yau sikasoneu on om fofonin bomomout asi yabis unau bubunagen.”
16Joseph iyafotai iyau, “Aiwab gagamim, yau on men fofoniu, baise God on arimon inau bubunagim tiwag ato iniyasisirem.”
17Aiwab orot iyau, “Yau abomomout on yau Nile sareu rewanai atatawar. 18Ato cow engon nimtereban ruam usis obis kadidis on sareu emon sigai sinai tefai ato sibosuruf wayo si yam. 19Namon cow nimtereban ruam ba sigai. Osi on usis teinis a rarikis ato asi itis on komasis bag. Yau Egypt amonai men meyan on nanaba aiten on. 20Namon cow usis teinis rarikis on simisir cow obis kadidis on siyam isawar. 21Baise men iyafan tani it isagob osi on tuturas siyam isawar, yabin osi itis on nana komasis. Namon yau en bubur emon amisir. 22A mat au bomomout tani ait on sawareg ann kaitamomai on yabis nimtereban ruam gagamis tutufis obis iya ato simari. 23Namon sawareg nimtereban ruam ba sisisigis sigat, osi on men obis gagaf rabis, yabin kwanda an yabat forabin irabis on mes. 24Ato sawareg gagaf rabis on simisir sawareg obis gagamis simari on sitonanis. Yau au bomomout on gigiboanotis, kwakwairotis a baromotis akasones, baise men iyafan tani arimon auriu itau bunag on.”
25Namon Joseph on aiwab orot iyawur iyau, “Atonio bomomout ruam on asi yabis on kaitamom. God iyoboem nono bobo aifan arimon iniyamai. 26Cow nimtereban ruam usis obis kadidis min kwanda nimtereban ruam, a sawareg nimtereban ruam obis gagamis simari on eb kwanda nimtereban ruam. Osi ruam asi yabis on kaitamom. 27Cow nimtereban ruam usis teinis rarikis gibui sigeg on a sawareg nimtereban ruam gagaf rabis kwanda an yabat forabin irabis. On an yabin min kwanda nimtereban ruam arimon gomar gagamin inmatar. 28Dura ato mamaba awurem on nanaba God iyoboem nono bobo aifan arimon iniyamai. 29Kwanda nimtereban ruam amonai Egypt tafanam engon on arimon mour gagamin inmatar. 30On gibunai kwanda nimtereban ruam amonai on arimon gomar gagamin inmatar, mour an kwanda obis on taninosfoten yabin ato gomar innanat on tafanam engon inikomasai. 31Mour an wera tutufin on asir bainosfot inmatar yabin gomar kounai e nat on inkomas kwakwan bag. 32God bomomout ruam ibiyoboem asi yabis on kaitamom wat. On iyau nono yen ra gibui arimon iniyamen sinmatar. Ato on min arimon sasasan wat inmatar.
33On mes aiwab orot, om ari bag not sagob gigiboan an orot on unrubin ato Egypt tafanam inkaifarai. 34Om am bainetewar orot fani unrubines Egypt tafanam sinkaifarai. Ato mour an kwanda nimtereban amonai, osi orot jever sinawures asi bayu sinkukuwain on bayu matas engon nim sinyaya ato matan tani on sinboai mabinai sinyeyeinin. 35Om unawures ato kwanda obis se nat nan on bayu engon tutufin sinboai sintubabarai. Mat om faiwar unites mafam gagamis amosi goa gagamis sinyonen ato sawareg engon tutufin nan siniwan ato an kaifar yangan nan sinkaifarai. 36On bayu on sinigosusur i nen sabu auris ato kwanda nimtereban ruam Egypt amonai gomar inmamatar aurin. On eta ai sabu Egypt amonai on men arimon sinibitanangi.”
Joseph On Egypt An Gawan imatar
37Aiwab orot an babadis mat atonio bainonot eta on sibasitai. 38Ato iyawures iyau, “Ot arimon men meyan orot tani Joseph ba tangaturai, on orot on God an ayu bisinai emama.” 39Aiwab orot Joseph iyawur iyau, “God ato osi engon iyoboem, men iyafan tani ansagob a gigiboan gagamin om ba. 40Yau arimon anyeinim unnat au tafanam engon tutufin unkaifarai ato om dura aifan unau on au sabu engon fonam sinboai. Om am baibad on yau ekesiu wat babawui. 41Yau ari arurubinem unnat unigawan Egypt tafanam engon tutufin unkaifarai.” 42Aiwab orot imakokoanai urakof, aiwab asi baifafaro a kukufot er an fot auman on iboseir ato Joseph imakokoanai iwan. Usis baitakwakwaren obin fafa on iyotai a anyonai agim gold damud auman on igidomanai. 43Ato an baigagam wa bairuin on itai nan inabib, ato an baigagam orot aunan sitawar ato siyoku siyau, “Eta worereb! Eta worereb!” Ato Joseph on irubinai baibad itai Egypt tafanam engon an Gawan imatar. 44Aiwab orot on Joseph iyawur iyau, “Yau on aiwab orot baise men iyafan tani Egypt tafanamai on an gogoi ai aifan iniyamai ab ainau om unibasit weie.” 45-46Aiwab orot Egypt yangan wabis Zephenath Paneah on Joseph itai, a Heliopolis mafam gagamin an tafaror bainetewar orot Potiphera natun jeverei, Asenath on Joseph itai iawan.
Joseph an kwanda on orot kaitamom, orot ta aurin auyotoat an werai on ibosuruf Egypt aiwab orot aurin ibobo. Aiwab orot an goa ikirir ato Egypt tafanam engon ibibib. 47Kwanda nimtereban ruam amonai bayu an mour on gagamin bag imatar. 48Osi bayu engon Joseph an bobo yangan iyawures siboen mafam gagamisi nan goai situbabaren a mafam gugudis ta ta mat asi goa nan siyonen, ato bayu osi mafam masau emon i gat on asi goai bag situbabaren. 49Sawareg on irat kwakwan bag Joseph men fofonin itifofon, anitin on tore an gasa ba.
50Weie gomar an kwanda itinat itgat, Joseph nanatun fifirig orot ruam on awan Asenath itu. 51On iyau, “God iyameu au baikokosar engon ainosfoten a tamau an dam warar mat.” On mes natun ainau orot wabin iyor Manasseh. 52On eb iyau, “God nanatu iteu au yababan emon nin tafanamai.” On mes natun gia orot wabin iyor Ephraim.”
53Kwanda nimtereban ruam mour an wera Egypt tafanam ibiyasisir on inat an kanfoun igat. 54Ato gomar an kwanda nimtereban ruam on ibosuruf, mamaba Joseph i yau on nanaba. Ato gomar min tafanam fani mat iboes, baise Egypt amonai on bayu i yen. 55On an rai Egypt sabu sibosuruf sibibitanangi ato aiwab orot aurin bayu mes sibifefeyan. On mes on iyawures iyau, “Omi wonai Joseph woit, ato aifan inau on nanaba woniyamai.” 56On gomar on irat kwakwan Egypt tafanam engon ibo, on mes Joseph bayu sawareg goa gagamis engon iruserenen ato Egypt sabu sawareg sitotobon. 57Sabu tafanam ta ta emon engon sinat Joseph bisinai sawareg sitotobon. Yabin gomar irat kwakwan tafanam ta ta engon ibo.
தற்சமயம் தேர்ந்தெடுக்கப்பட்டது:
Ann Bokwakwarin 41: ubr
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2011, Wycliffe Bible Translators, Inc. All rights reserved.