Ann Bokwakwarin 37
37
Joseph Tutuan A Tain Mat
1Jacob nana Canaan tafanamai ima, menan taman imama nan, 2ato atonio on Jacob an dam warar asi dudur.
Joseph on jorei boboun an kwanda auyotoat an yayatan nimtereban ruam on taitain tutuan mat sheep a goat sikakaifares. Osi fifirig min taman awawan ufuigeg ruam, Bilhah a Zilpah nanatus. Ato taitain tutuan aifan bobo komasis sibiyamen on inat tamas ikakasonai.
3Jacob wabin tani min Israel, on Joseph inuaboai kwakwan bag men nanatun fani ba, yabin on iorokwar bag weie Joseph irat. On Joseph an baitakwakwaren obin weromin a imas mat weromis iyamai wein. 4On an werai taitain tutuan sit on osi tamas on Joseph inuaboai kwakwan men osi ba, on mes tais tuas sisusuneai kwakwan ato men moa obinai aurin sibikakafun.
5Fom tani Joseph ibomomout ato taitain tutuan on bomomout ikakasones on, osi aumiet bag sisusuneai. 6Joseph on iyawures iyau, “Eii! Omi au bomomout anau wontatam. 7Ot engon masauai sawareg tagegedauen ato ra kaita yau au kafurir on imisir totor itawar. Ato omi ami kafurir on yau au kafurir sikibubuai ato aurin usos situr sisur.” 8Baise Joseph taitain tutuan on dura sitatam ato siyawur siyau, “Om enonosin om aiwab orot unmatar ato wei auri unibad i?” On mes osi nana aumiet bag sibisusuneai yabin on an bomomout a an dura aifan osi auris ibikakafun on fasinai.
9Namon Joseph bomomout tani ba it ato taitain tutuan ikasones iyau, “Yau bomomout tani ba ait, on nan ait on wera, roke a siribod auyotoat an yayatan kaitamom on yau auriu usos situtur.”
10Joseph an bomomout mat on taman iyawur, ato taman imisir igam iyawur iyau, “On bomomout on aifan? Om enonosin on ayom, taitaim tutuam a yau on wannat om aurim usoi wantur i?” 11Joseph taitain tutuan on sibiboboarai baise taman on bomomout aurin on nana ibinonotai.
Joseph Sitobonai Ato Sibo Sinai Au Egypt
12Ra kaitamom Joseph taitain tutuan sinai Shechem nan tamas an bobaitu sitkaifares mes. 13Jacob on Joseph iyawur iyau, “Yau agogoi unan au Shechem, menan taitaim tutuam bobaitu sekakaifares nan.”
Joseph iyafotai iyau, “Basit tamau, yau anan.”
14Jacob on natun iyawur iyau, “Om enai unites, taitaim tutuam a bobaitu mat engon basit wat ai ambin, ato unmatabir unkasoneu.” On mes on taman Hebron roubaban emon iyafarai inai Shechem igat,
15ato on efanai taitain tutuan inunuenis, ato orot tani Joseph aurin igat ato itetemai iyau, “Om abifan enunuen?”
16On iyafotai iyau, “Yau taitaiu tutuau anunuenis, osi nin asi bobaitu sikakaifares, fofonin utkasoneu osi on menan?”
17Orot iyawur iyau, “Osi sinai nono, atatamis siyau on au Dothan senan.” On mes Joseph taitain tutuan gibusi inai Dothan nan igatures.
18Joseph taitain tutuan on nanenei nan sit i nat, ato weie on auris itnat itiufin, osi siyanu sitasubun mes. 19Osi tous sanasi siyau bonen, “Woit! Bomomoutotin atonio enat. 20Omi ne wonat, ari weie tanasubun ato dogu sareu simamutinis sen on tani amonai tanribirirai insur; namon ot tanau on rega an bobaitu tutuenis siyan. Ato tanitai on an bomomout emon arimon aifan inmatar.”
21Reuben on taitain asi dura itatamis ato ifourtobon Joseph itiyawasai mes. On iyau, “Ot men tanasubun mes. 22Ot asir efan koiteterinai atonio dogu sareu rarraninai tanribirirai insur ato men usibaban tanitai.” On dura nanaba iyawures yabin on inonot taitain tutuan emon on itiyawasai ato itiyafarai men itmatabir taman aurin. 23On an werai Joseph inat taitain tutuan auris igat mom, osi an baitakwakwaren weromin imas weromis mat on sisafef siboseir. 24Namon osi Joseph sibo ato dogu sareu rarranin amonai siribirirai isur.
25Namon osi simair bayu sitam mes ato matas siyeit on Ishmael yangan Gilead emon sinan au Egypt on sites. Osi asi camel tefasi on asi fio yandes ninibis asi baiyas gagamis ta ta on siyagagaien siboen sinat. 26Judah taitain tutuan auris iyau, “Ot tait tanasubun tanibuniai weie on amon emon min arimon aifan wat tanboai?” 27Ot on Ishmael yangan auris tantobonai. On nanaba taniyamai on men arimon fifi usin taniruyein on. Yabin fifi on ot tait tuat a ot ati tara biot turin.” On taitain tutuan engon sibasit. 28On an werai Midian baitotobonotis sinat sigat, Joseph taitain tutuan on Joseph dogu emon sitibogai igai, ato Ishmael yangan auris agim silver orot kaitamomai sitobonai ato sibo sinai au Egypt.
29On gibunai Reuben imatabir men inat dogu sareuai ato it on Joseph nan ambin ato on iyababan kwakwan an beber isafef. 30On taitain auris imatabir inai ato iyau, “Fifi on nan ambin! Yau arimon abifan aniyamai?”
31Namon osi goat tani siyasubun ato Joseph an baitakwakwaren sibo tara ai sitamumun. 32Osi an baitakwakwaren sibo simatabir men sinat tamas aurin ato siyawur siyau, “Wei atonio baitakwakwaren on nan iyen wagaturai. Om eit tait, atonio baitakwakwaren min om natum noan i?”
33Jacob on natun an baitakwakwaren it tiwag isagob ato iyau, “Dura bag! Nin on yau natu Joseph an baitakwakwaren. Rega an kuke tutuenis fani siyasubun. Yau natu Joseph on sisafefai gugud imatar ato siyan.” 34Jacob iyabbaban ato beber gadur iyoten ato natun aurin ra weromin itou iroro. 35On nanatun fifirig jeverig sinat sitkubainunubai mes, baise on men igogoi sitkubainunubai ato iyau, “Yau nana natu an roro auman anmama anarab. On mes on natun Joseph aurin on nana itou roro auman ima.
36On werai Egypt nan on eb Midian yangan Joseph Potiphar aurin sitobonai. Potiphar min Egypt aiwab orot an goa kaifarotin gagamin a on toum min kaifarotis asi bainetewar orot gagamin.
தற்சமயம் தேர்ந்தெடுக்கப்பட்டது:
Ann Bokwakwarin 37: ubr
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2011, Wycliffe Bible Translators, Inc. All rights reserved.