Ninge 18
18
A nianga tupas no tunotuno nong i kure ira ut na ninge: Devit no tultulai tano Watong ga pit iakan ra ninge. Ga inge kaiken ra nianga tupas no Watong ing no Watong ga halon ie sukun ira lima diet ira uno ebar ma sukun no limane Sol. Ma ga tange hoken:
1Iau sip ugu, Watong, no nugu dadas.
2 #
Lo 32.18; 2Sml 22.1-51; Snd 30.5 No Watong aie no nugu haatkis, no nugu subaan na munmun ma no nugu Ut na Harhalon.
No nugu God aie no nugu haatkis, aie nong iau barahit tana.
Aie no nugu bahbahit ma no dadas tano nugu harhalon, no nugu dadas na balo.
3Iau tataau uram tano Watong nong i takodas bia da pirlat ie,
ma iau te langalanga sukun ira nugu ebar.
4Iau te wiwis taar um tano winwisaan na minaat.
No dadas na tektek na halhaliarai i te kap iau.
5 #
Nng 116.3
No winwisaan tano midi ga wiwisane iau.
No kuun na minaat ga tur mamate iau.
6 #
Nng 50.15
Tano nugu tapunuk iau ga tataau uram tano Watong.
Iau ga suah uram hono nugu God wara harharahut.
Meram tano uno hala na lotu ga hadade no ingagu.
No nugu sunuah ga haan tupas ie ma ga hadade.
7 #
Ais 13.13; Hag 2.6 No ula hanuo ga dedar, gaam kunakunar,
ma ira burena ira uladih ga gunagune.
Diet ga dedar kanong warah God ga ngalngaluan.
8A mis ga tubuala suur ta ira matana ngarngarona.
No iaah nong i la tuntun haliare ira linge ga hansur tano hana.
Ma no kalangaruana iaah ga lulungo suur tano hana mah.
9I ga harbasiane no mawe ma gaam hansur.
Ga papaas kora ta ira bungbungana bahuto.
10 #
Nng 99.1
I ga kawas hut ta ira kerubim ma gaam pupungo.
Ga beel laah ta ira babana no baiangin.
11 #
Lo 4.11
I ga gil no kankado bia uno hanuo na munmun, ma uno pupulus wara hakukuh bus ie
ma ra bungbungana bahuto na bata tano mawe.
12 #
Nng 104.2-7
Meram tano pilpilakas tano uno matmataan, ira bahuto diet ga haan saakit
tika ma ra polo na bata ho ira haat, ma ra tamat na hile.
13No Watong ga ianga parpar meram ra mawe.
No ingana Nong i Naliu Harsakit ga kakel hoing ra taram karot.
14 #
Hab 3.11
I ga lapotane ira uno rumus ma gaam pasak harbasiane ira ebar.
A tamat na hile ga haliare harbasiane diet.
15 #
Nng 106.9
Ira salil tano balana no tes ga hanuat puasa,
ma ira burena no ula hanuo ga kis palai
tano num harboor, Watong,
ing no dadas na mansungum ga suur tano matana ngarngarom.
16 #
Nng 144.7
I ga sasangaha suur meram naliu ma gaam palim leh iau,
gaam sor leh iau mekaia ra lamlamana taah.
17 #
Nng 59.1
Ga halangalanga iau sukun no nugu dadas na ebar
ma sukun mah ira sukagu ing diet manga dadas tagu.
18 #
Nng 16.8
Diet ga tur mamate iau tano bunguno no nugu halhaliarai
iesen no Watong ga palim hatatol iau.
19Ga kap hasur tar iau ukai tiga bilai na sibaan na harbalaurai.
Ga harahut iau kanong ga kanakana utagu.
20 #
1Sml 24.19
No Watong i te balu iau haruat ma ira nugu takodasiana magingin.
I te kul iau haruat ma ira limagu ing pai bilinge.
21 #
2Sto 34.33
Kanong warah, iau te mur ira ngaas tano Watong.
Iau pai le gil ta nironga be ni tar tihigu tano nugu God.
22Ira uno harkurai bakut kanik menalua tagu.
Iau pai le tur talur ira uno harkurai.
23Iau te mur ira bilai sen mon ra matmataan tana,
ma iau pai le gil ta sakena.
24 #
1Sml 26.23
No Watong te balu iau haruat ma ira nugu takodasiana magingin.
I te kul iau haruat ma ira limagu ing pai bilinge ra matmataan tana.
25 #
1Kng 8.32
Ta diet ing pai haruat bia da nurnur songa ta diet, nu haminas be augu at pai haruat bia da nurnur songa taam.
Ta diet ing diet takodas harsakit, nu haminas bia u takodas harsakit.
26 #
WkP 26.23-28; Snd 3.34 Ta diet ing diet gamgamatien, nu haminas ugu bia augu at u gamgamatien,
iesen ta ira sakapsakapuana nu haminas be a keskes ugu.
27 #
Snd 6.17
U la halhalon diet ira ut na kis matien,
iesen u la bulbul hasur diet ing ira mata diet i latlaat.
28Watong, u la halulungo tar at no nugu laam.
Nugu God, u la pukpukusane no nugu kankado wara madaraas.
29 #
Nng 40.2
Ing nu harharahut iau, ni petlaar bia ni harsomane timaan tiga matana ubane.
Ing no nugu God i tika ma iau, iau ni kawe tiga tamat na balo.
30 #
Lo 32.4
Iesen ing ta God, ira uno ngaas i bilai harsakit.
No nianga tano Watong i tutun, taie ta bis tana.
Aie tiga bahbahit
ta diet ing diet na barahit tana.
31 #
Lo 32.31,39; Ais 45.5 Kanong warah, no Watong sen mon aie no God. Taie tiga mes.
Ma sige mah um no Haatkis? Taie tiga mes. No udahat God sen mon.
32Ne God at nong i la tartar dadas tagu,
ma i la hatakodasne timaan no nugu ngaas.
33 #
Hab 3.19
I la gilgil ira kakigu hoing ira kakina dia.
I la harharahut iau waing nigi tur aram naliu ra uladih.
34I la tangtagure ira iruo limagu wara hinarubu,
waing ni haruat bia ni lukun tiga dadas na laplapot saakit.
35 #
Nng 33.20
U tar tagu no num bahbahit na papaas hasur ira ebar.
Ma no kata na limaam i la hadadas iau.
U la tudu suur wara hatamat iau.
36 #
Snd 4.12
U la gilgil hatapegas no ngaas napu tagu,
waing ira kakigu pa na surmalagir.
37Iau ga pasak mur ira nugu ebar ma iau gaam pasak soot diet.
Iau pa ga tahurus tuk iau gaam haliare diet.
38Iau ga gisiane diet, kaik diet pa ga haruat be diet na tut hut.
Diet ga puko napu ta ira kakigu.
39U ga hapapalim iau ma ra dadas wara hinarubu.
U ga gil ira nugu ebar bia diet na singa bukunkek ra matmataan tagu.
40 #
Nng 21.12
U ga gil ira nugu ebar bia diet na tar tihi diet tagu, ma diet naga hilau,
ma iau te haliare diet ing diet ga malentakuane iau.
41 #
Jop 27.9; Snd 1.28 Diet ga suah wara harharahut, iesen ga taie tikai wara halhalon diet.
Diet ga suah uram hono Watong, iesen pa ga babalu.
42Iau ga milau diet, diet gaam maririsuan hoing ra kaabus no dadaip i kap ie.
Iau ga hurange hasur diet hoing ra pikaia ta ira ngaas na hinahaan.
43U te halangalanga iau sukun ira halhaliarai ta ira matanaiabar.
U te gil iau no lualua ta ira hunhuntunaan ta ira mes na hanuo.
Ira matanaiabar iau pa ga nunure diet, diet kis napu tagu.
44Ing at mon diet hadade iau, diet taram iau.
Ira wasire ing pai Israel diet, diet ruruo menalua tagu.
45 #
Mai 7.17
Diet bakut, i puko ira udiet nurnuruan,
ma diet hanuat ma ra dedarine diet mekaia ta ira udiet dadas na subaan diet barahit kaia.
46 #
Jop 19.25
No Watong i lon! A pirharlat tupas no nugu Haatkis!
Da hatamat God no nugu Ut na Harhalon.
47Aie no God nong i la turtur wara utagu,
nong i paas hasur ira hunhuntunaan ta ira mes na hanuo, ma i bul diet napu ra nugu harkurai,
48 #
Nng 59.1
ma nong mah i la halhalon leh iau mekaia ta ira nugu ebar.
U ga hatamat iau naliu ta ira sukagu.
Mekaia ta ira ut na ngalngaluan u ga halangalanga ise iau.
49 #
Rm 15.9
Io kaik, Watong, iau ni pirlat ugu nalamin ta ira hunhuntunaan ta ira mes na hanuo.
Iau ni inge na pirhakasing tano hinsaam.
50 #
Nng 89.4
I te tar tano uno king no dadas wara papaas hasur ira ebar.
I haminas ra harmarsai nong pai la patpataam taar ta nong ga gilamis ie.
I haminas ie taar tane Devit ma ira uno bulumur, ma pana le pataam.
தற்சமயம் தேர்ந்தெடுக்கப்பட்டது:
Ninge 18: gfkNTP
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© (Active), Wycliffe Bible Translators, Inc. All rights reserved.