If you have would like a copy of this version please contact info@davaraudiobibles.org

Text: Halbi New Testament, CC-BY-SA-4.0, The Love Fellowship. Audio: Halbi New Testament Audio Biible, CC-BY-SA-4.0, Davar Partners International, The Love Fellowship, 2023

Halbi New Testament

Halbi Bible by The Love Fellowship is licensed under Creative Commons Attribution-ShareAlike 4.0 License.

मुर ने बचन रये, आउर बचन माहापुरू चो संगे रये, आउर बचन माहापुरू रये। ऐई ची मुर ने माहापुरू चो संगे रये। सपाय काई हुनचेई बाटले उपजास होली, आउर जोन काई उपजास होली से हुन थानले कोनी बले तीज हुनचो बिना उपजास नी होली। हुन थाने जीव रये आउर हुन जीव मानेमन चो उजर रये। उजर अंधार ने चमकु आय, आउर अंधार हुनके गरहन नी करली। गोटक माने माहापुरू चो बाटले ऐऊन हाजिर होलो जेचो नाव यूहन्ना रये। हुन गोहई देऊक ईलो कि उजर चो गोहई देओ, कसनबल्लोने सपाय हुनचो बाटले बिश्वास आनोत। हुन खुद तो हुन उजर नी रलो, मान्तर हुन उजर चो गोहई देतो काजे ऐऊ रये। सत उजर जोन सपाय माने के उजर करू आय, जगत ने ऐतो बिती रये। हुन जगत ने रये, आउर जगत हुनचो बाटले उपजास होली, आउर जगत हुनके नी चिताली। हुन आपलो घरे ईलो आउर हुनचो आपलो लोग हुनके गरहन नी करला। मान्तर जितरो लोग हुनके गरहन करला, हुन हुनमन के माहापुरू चो पिलामन होतोर अधिकार दिलो, बल्लोने हुनके जोन हुनचो नाव ने बिश्वास संगाऊ आत। हुनमन ना तो लऊ ले, ना देंह चो इच्छा ले, ना माने चो इच्छा ले, मान्तर माहापुरू ले उपजास होला से। आउर बचन देंह चो रूपधरली; आउर अनुग्रह आउर सत ले समपूरन होऊन भाती आमचो मंजी ने डेरा करलो, आउर आमीमन हुनचो असन महिमा दकलु, जसन बुआ चो एकला बेटा चो महिमा। यूहन्ना हुनचो बारे ने गोहई दिलो, आउर चिचयाऊन भाती बल्लो, “ऐ हुनी आय, जेचो बारे ने मय बरनन करले कि जोन मोचो पाचे ऐये से, हुन मोचो ले बडुन भाती आय, कसनबल्लोने हुन मोचो ले पयले रये।” कसनबल्लोने हुनचो समपूरनता ले आमी सपाय पावलु बल्लोने अनुग्रह थाने अनुग्रह। ऐईकाजे नियम तो मूसा चो बाटले दिया गेली, मान्तर अनुग्रह आउर सत ईशु मसीह चो बाटले पोंचली। माहापुरू के कोनी केबीई नी दकला, एकला बेटा जोन बुआ चो कोरा ने आसे, हुनी ची हुनके उजागर करलो।

यूहन्ना चो गोहई ऐ आय, कि जिदलदाय यहूदीमन यरूशलेम ले याजकमन आउर लेवीमन के हुनचो ले ऐ पचारतो काजे पठालो, “तुय कोन आस?” तेबे हुन ऐ मानलो आउर इन्कार नी करलो, मान्तर मानलो, “मय मसीह नुआय।” तेबे हुनमन हुनचो ले पचारला, “तो फेर कोन आस? काय तुय एलिया आस?” हुन बल्लो, “मय नुआय।” “तेबे काय तुय हुन अगम गिआनी आस?” हुन जबाप दिलो, “नाई।” तेबे हुनमन हुनचो ले पचारला, “फेर तुय आस कोन? बल्ले आमी आपलो पठालोबितामन के जबाप देऊ दें। तुय आपलो बारे ने काय सांगे सीस?” हुन बल्लो, “जसन यशाया अगम गिआनी बल्लो से, ‘मय रान ने गोटक हाग देतो बिता चो शब्द आय कि तुमी परबु चो बाट सलकाहा’।” हुनमन फरीसीमन चो बाटले पटाया जाऊ रवत। हुनमन हुनचो ले ऐ सवाल पचारला, “अगर तुय ना मसीह आस, आउर ना एलिया, आउर ना हुन अगम गिआनी आस, तो फेर डूबन केंव देये सीस?” यूहन्ना हुनमन के जबाप दिलो, “मय तो पानी ले डूबन देयें सें, मान्तर तुमचो मंजी ने गोटक माने उबा आसे जेके तुमी नी जानास। बल्लोने मोचो पाचे ऐतो बिता आय, जेचो पनही चो बांदन के मय निकरातोर लायक नुआय।” ऐ गोठमन यरदन चो हुनपाट बैतनिय्याह ने होली, जोन थाने यूहन्ना डूबन देते रलो।

दुसर दिन ईशु के आपलो बाटे ऐतोर दकुन भाती बल्लो, “दका, ऐ माहापुरू चो मेमना आय जोन जगत चो पाप के उठाऊन नेऊ आय। ऐ हुनी आय जेचो बारे ने मय सांगुन रले, गोटक माने मोचो पाट-पाट ऐये से जोन मोचो ले खुबे अच्छा आय, कसनबल्लोने हुन मोचो ले पयले रलो। मय तो हुनके चिता ते नी रले, मान्तर ऐईकाजे मय पानी ले डूबन देते ईले कि हुन इस्राएल थाने परकट होऊन जाओ।” आउर यूहन्ना ऐ गोहई दिलो, “मय आत्मा के परेयां चो असन बादरी ले उतरतोर दकले से, आउर हुन हुनचो उपरे ठेबुन गेली। मय तो हुनके चिता ते नी रले, मान्तर जोन मोके पानी ले डूबन देतो काजे पठालो, हुनी मोचो ले बल्लो, ‘जेचो उपरे तुय आत्मा के उतर ते आउर ठेबते दक से, हुनी पवितर आत्मा ले डूबन देतो बिता आय।’ आउर मय दकले, आउर गोहई दिले से कि ऐई ची माहापुरू चो बेटा आय।”

दुसर दिने फेर यूहन्ना आउर हुनचो चेलामन ले दुय झान उबा होऊन रला, आउर हुन ईशु चो उपरे जोन जाते रये, दकुन भाती बल्लो, “दका, ऐ माहापुरू चो मेमना आय।” तेबे हुनमन दुनो चेलामन हुनचो ऐ सुनुन भाती ईशु चो पाटे होला। ईशु पलटून भाती हुनमन के पाटे ऐ तो के दकलो आउर हुनमन ले बल्लो, “तुमी काचो डगर ने आसास?” हुनमन हुनचो ले बल्ला, “ऐ रब्बी (बल्लोने हे गुरू), तुय काहां रऊ आस?” हुन हुनमन ले बल्लो, “जो, तेबे दका से।” तेबे हुनमन जाऊन भाती हुनचो रतो जगा के दकला, आउर हुन दिने हुनचो संगे रवत। ऐ दस घंटा चो लगे-लगे रये। हुन दुय झान ले, जोन यूहन्ना चो गोठ सुनुन भाती ईशु चो पाटे होऊ रवत, गोटक शिमोन पतरस चो भाई अन्द्रियास रलो। हुन पयले आपलो खुद भाई शिमोन के भेटुन भाती हुनचो ले बल्लो, “आमके तो ख्रिस्त, बल्लोने मसीह मिरलो।” हुन हुनके ईशु चो लगे आनलो। ईशु हुनचो उपरे दकुन भाती बल्लो, “तुय यूहन्ना चो बेटा शिमोन आस, तुय कयफा बल्लोने पतरस बलाय होसे।”

दुसर दिने ईशु गलील जाऊक चाह लो। हुन फिलिप्पुस ले भेट होलो आउर बल्लो, “मोचो पाटे होऊन जा।” फिलिप्पुस, अन्द्रियास आउर पतरस चो नंगर बैतसैदा चो रतो बिता रये। फिलिप्पुस नतनएल के भेट होलो आउर हुनचो ले बल्लो, “जेचो बरनन मूसा नियम ने आउर अगम गिआनीमन करला सोत, हुन आमके मिरली; हुन यूसुफ चो बेटा, ईशु नासरी आय।” नतनएल हुनचो ले बल्लो, “काय कोनी अच्छा तीज बले नासरत ले निकरूक सकु आय।” फिलिप्पुस हुनचो ले बल्लो, “जाऊन भाती दक।” ईशु नतनएल के आपलो बाटे ऐतोर दकुन भाती हुनचो बारे ने बल्लो, “दका, ये सते इस्राएली आय: ऐचो थाने कपट निआय।” नतनएल हुनचो ले बल्लो, “तुय मोके कसन ने जानीस?” ईशु हुनके जबाप दिलो, “ऐचो ले पयले कि फिलिप्पुस तुके हाग दिलो, जिदलदाय तुय अंजीर चो रूक चो खाले रलीस, तेबे मय तुके दकु रये।” नतनएल हुनके जबाप दिलो, “हे रब्बी, तुय माहापुरू चो बेटा आस; तुय इस्राएल चो माहाराजा आस।” ईशु हुनके जबाप दिलो, “मय जोन तुचो ले बल्ले कि मय तुके अंजीर चो रूक चो खाले दकले, काय तुय ऐईकाजे बिश्वास करू आस? तुय ऐचो ले बले बड़े-बड़े काम दक से।” फेर हुनचो ले बल्लो, “मय तुमनमन ले सत-सत बलें सें कि तुमी सरग के उगाढ़ी होलोर, आउर माहापुरू चो सरग दूतमन के माने चो बेटा चो उपरे उतरते आउर उपरे जातोर दका से।”

கேளுங்கள் यूहन्ना 1