Kodaku

हेना वरी ईसु राः परिक्छा सयतान राः दोवारा ते होयाः लगड पवितर आत्मा सुनहर जगह हनते गोःतेडिया। चालीस दिन, सींञ ञींद कनर मेनेय जोम बेड़ा गडा, हेना वरी हेंय अखरी रे रँगेज तेडिया। तहाँ अआजमोवय बँदेत रे मेजकेन तेय कहनी वडिय दोहो एनु, “सही मेते अम भगवान होपोन हवे रेदो, न दिरीम कहनीवाँ रोटी बनोऊ।” तहाँ ईसु जबाब वडिया,
“नआँ घयते धरमग्रंथ रे लिखल इदाना,
‘होड़ सीरिफ रोटी ते मेने,
लेकिन भगवान राः अहा वरी उडूंगुआ,
हर एक टेबोः ते जीवातिय दोहोना’।”
तहाँ सयतान पवितर सहर रेय इदी तेडिया, अवुर मँडिल रे सींड़ वरी उसूला जघा रेय चँड़ा तेडिया, हेना वरी हेंय ईसु थरेय कहनी तेडा, “सही मेते अम भगवान होपोन हवे रेदो, न वरिम ऊजू, कहेकि धरमग्रंथ रे न याःते लिखल इदाना,
‘भगवान अम बंचो लगड सरगदूत कुतयिय हुकूम वआ,
अवुर हेंकू अम कटाम रे दिरी ते अलो लोजोर टोवीजुः लगड हथे पथे तेकू तिला दरम मिआँ’।”
तहाँ ईसु हेंय थरेय कहनी तेडा, “नआँ घयते हो धरमग्रंथ रे लिखल इदाना, ‘अम अनामअय परभु, भगवान अलोम अजमोवियू’।” हेना वरी फेर सयतान हेंय मियाँटंग अखीर उसूला बुरू रेय इदी तेडिया, अवुर गोटा दुनिया राः राज अवुर राज राः सोबहा तिबके डियतेय कहनी वडियू, “अगर अम लोजोर कोःते इंञ मी जोहारवा रेदो, नआँ सींड़ आँमिंञ ओवाआ।” तहाँ ईसु सयतान थरेय कहनी तेडा, “ए सयतान हटोः मी, कहेकि धरमग्रंथ रे नआँ घयते लिखल इदाना,
‘अम अनामअय परभु, भगवान मी जोहारवा,
अवुर सीरिफ हें-नी राः सेवम सेवा’।”
हेना वरी सयतान हेंय वरिय चलो यनु, अवुर ञेंल पे, सरगदूत मेजकेन ते हेंयिय देख रेख तेडा।


एहुन्‍ना जेहेल रेकू डलो केडिया मेनाआ ईसु अँजोम तेडा, तहाँ हेंय अहूदिया जिला वरी गलील जिला हनतेय चलो एना। हेना वरी हेंय नसरेत गाँव बगी वते, कफरनहूम सहर रे सेनकेन तेय दोहो एना, नआँ सहर जबूलून अवुर नपताली कू दोहोन हेना सिवन रे, गलील समुन्धर बँदेर रे इदाना। ताकि एसायाह भविस्यवक्‍ता कहनी तडा, हेना टेबोः पूरा होयाऊ, हेना टेबोः नआँ हवे, “जबूलून अवुर नपताली परदेस, गलील समुन्धर हनते चलोआ होर रेआ, अवुर नआँ एरिया जरदन जोड़ वरी पुरूब गतर रेआ, जबूलून अवुर नपताली परदेस गलील जिला रेआ, नआँ रे अखीर अनजातकू दोहोना। नआँ रेनकू होड़कू अंधरा ओत रे दोहोनकू घयगिअकू, नेकू बडेआ इंजोतकू ञेंल वडा; अवुर जेतना होड़कू मिरतू राः देस अवुर उँबुल रेकू दोहोन दोहो एनु, हेंकू थरे इंजोत चमको एना।” हेन तोलोग वरी ईसु पपरचार अवुर न घयतेय कहनी बोंहड़ी तेडा, “मन पे मिड़ाऊ, कहेकि सरग राज बँदे रे मेजियाना।”


एक दिन ईसु गलील राः समुन्धर बँदे तेय से-ने दोहो एनु, तहाँ बा होड़ भाई कीञिंय ञेंल ञँमतेडा, हेंकींञ मेंडे मियाँहोड़ ञुमू सिमोन हवे, नेय पतरस मेनते होकू कहनी वया, नेय बोहोत अन्दिरयास दोहो एना। नेकींञ बना होड़ मगिया, समुन्धर रे जाल कींञ एनेज दोहो एनु, कहेकि हेंकींञ हकुकू ञेंञेंड कींञ दोहो एना। ईसु हेंकींञ थरेय कहनी तेडा, “इंञ तयोम तेबा मेजुऊ, इंञ अबा होड़कू ईंञाःकू चेला बनो कीञिंञ बनोबआ।” हेंकींञ तुरेत्ते जाल चिली बगी वते, हेंय तयोम तेकींञ सेनतेडा।
हेना वरी मड़ंग हनते तोरा केनते, ईसु अवुर बा होड़ जबदी कोड़ा होपोन एकूब अवुर हेंय बोहोत एहुन्‍नाय ञेंल ञँमतेडा। अपत कींञ जबदी सुदा डोंगा रे अनाकू राः जाल कू तँग तुँगो दोहो एनु। हेना वरी ईसु हेंकींञ होय राःतेड किञाँ। हेंकींञ तुरेत्ते अपत अवुर जाल कींञ बगी वते, हेंय तयोम तेकींञ सेनतेडा।


हेना वरी ईसु गोटा गलील रे सेनकेनते, एहूदिकू राः आराधना ओड़ाः तेय चेडकू दोहो एनु, अवुर भगवान राः राज राः बढ़ियाँ खभेरिय परचार तेडा, अवुर केय प्रकार रेनकू रोगियाकू, अवुर बेमारिया कुय चिकन दोहो एनु। ईसु राः खभेर गोटा सीरिया देस रे मिरीज यनु, अवुर होड़कू सगोर रोगियाकू अवुर केय प्रकार ते हसु तनकू, अवुर दुख रेकू दोहो एना, हेंकू हेंय थरे कू अगतेड कुआ। अवुर जे जे थरे भूतकू लगो तना, अवुर मिरगीः हेंकू, अवुर लवका ञेंडतड कुः हेंकू हो, हेंय थरे कू अगतेड कुआ, अवुर ईसु हेंकुय चिकन तेडकुआ। अवुर गलील अवुर दिकापुलिस, एरुसलेम, अहूदिया, अवुर जरदन जोड़ वरी मेना परोम तेनकू भीड़ेक भीड़ हेंय तयोम तेकू सेनतेडा।

கேளுங்கள் मत्ती 4