Korwa - WBT (NT) Non Drama

Korwa - WBT (NT) Drama

हना तयोमरे सुद बिरुवा ईसू टयंगाब ततेर अगी अगुवाइतिरिया। अरू हंडा कलउ ईसू अंदजावगेय लगाय दोहोना। हंडा ईसू चालीस दिन अरू चालीस रइत उपासरेय दोहोना। अरू हना तयोमरे हाँय रंगेगतिरिया। हनते कलउ वेगनेनखन हाँय एचेरेय कतातेड, “आम भगवानरीग बेटा हवे दो, नाःआ दिरिकून रुटी बड़ाँः लगाम हुकुमगोड।”
दो ईसू कतातेड, “भगवानराः कागदरे नाःआ इया ओजाःतो इदा,
मनुवा रुटी एकलाते ओरोय जियावनेना,
मनदो भगवान कतायता हना मेमेडटोंग सरवनते हाँय जिनियाःता।”
हना तयोमरे कलउ भगवानराः सुद सहररे ईसूय गोःयाडीग अरू भगवानराः ओड़ाःरे उसूल दोहोना हना सड़ुम मुंधनीरे एचे चड़ाँगोतेडीगखन, ईसू एचेरेय कतातेरा, “आम भगवानरीग बेटा हवे दो डेगानमे। भगवानराः कागदरे नाःआ इया ओजाःतो इदा,
भगवान सेरमो देसरिकुःआ बराहीलकू एचेरे
आम बदीरेय हुकुमवाकूता,
अरू
बराहीलकू अँकू तिःईते आम कसड़ुः अतेकू रेममेता
जेमहा आम काट दिरिरे अहा लगाः।”
दो ईसू हाँय एचेरेय कतातेरा, “भगवानराः कागदरे नाःआ इया हों ओजाःतो इदा,
आमरीग परबू भगवान अहम लहरावगेय।”
हना तयोमते कलउ ईसू मीटोंग मुरुक उसूल पहाड़रेय गोःयाडीग अरू हाँय चउंदीसराः जमा देसकून अरू हना देसकूनराः आन-धाने उदुःवातेरिया। अरू हाँय ईसू एचेरेय कताया, “आम ईंग तबेरकेडखनमे जागिंग दो, नाःआ जमाकून आम लगायिंग जिमागोडता।”
दो ईसू हाँय एचेरेय कतातेड, “ने कलउ, ईंग अते ञीर जुवाःमे। भगवानराः कागदरे नाःआ इया ओजाःतो इदा,
आमरीग परबू भगवानमे जाग अरू हनाँय एकलाम सेवा।”
हनते हाँयग कलउ ईसूय अड़ाःगोतेडीग अरू ओहेन सेरमो देसरिकुःआ बराहीलकू ईसू एचेरे वेजेडखनकू सेवातिरिया।


हना तयोमरे तोनोंगीग ईसू एचेरेय कतातेरा, एहुना जेहेलरे इदानिया, माःआन। हनालगा ईसू गलील छतर अगीय कुदायान। तोनोंग दिन तयोमरे ईसू नसरत सहर अते उडुंगनेनखन, जबुलून अरू नपताली गोतोररिकुःआ होड़कू दोहोना हना छतरराः, हुडिंग समुंदरते धरीराः कपरनहूम सहर सेनेडखन हंडाय दोहोना। भगवानराः कागदरे, भगवानराः बड़रा कता होड़ एसयाह कतातेरा हना कता पुराः लगा नाःआ इया होयानेना,
“जबुलून अरू नपताली राइजरिकुःआ होड़कू,
एरदन नईराः मार परोमरिकुःआ होड़कू,
समुंदर धरीराः दूररेकू दोहोनता,
अरू गलील छतररिकुःआ बेगर एहूदाकू,
अंदरारेकू दोहोना, हँकुःआ होड़कू मुरुक विड़चेड़तो मरसलकू ञेलतेरा,
अरू बेर निंदावारेय उडुंगगुःता,
हनन इया गुजुःराः बोतोरतेकू दोहोना हँकुःआ होड़कूराः जीव मरसलयान।”
दो हना वरीते ईसू परसारगे लगाय बुँहड़ीतेरा अरूय कतातेड, “भगवान अपे एचेरे राइजगे लगाय बुँहड़ीकेरा। हनालगा अपे कसूर अते जीवपे कुदा।”


मी दिन ईसू गलीलराः हुडिंग समुंदर धरी धरीय सेन मेला बार होड़ वगीयाकिने ञेलतेरा। मी होड़राः ञाव दोहोना सिमोन अरू हनाँयकू कतावा पतरस। अरू बोहोतराः ञाव दोहोना अंदरियास। दो हँकिन केंवटाकिन दोहोना अरू जालते हकूकू दाःआ। दो ईसू हँकिन एचेरेय कताया, “ईंग देह दूरबा वेग। दो ईंग एचेरे अबा होड़कू राः अगूदारिंग बड़ाँवबाता।” दो हननमेला हँकिन अँकिनराः फेका जालकून अटू एंडातेडखन ईसूरिकिनाः चेलाकिन बड़ाँवयान।
हनते हँकू अरू तोरेकू सेनेड दो जबदीरिकिनाः बेटाकिन एकूब अरू एहुना, ईसू ञेलतेडकिना। हँकिन अपात सुदा डोंगारे दुड़ुःकेडखन जालकू तुला सोझावा। दो ईसू हँकिन होंय राःतेरा, अरू हँकिन ओहेन डोंगा अरू अँकिनरीग अपात अटूतेडखन ईसूरिकिनाः चेलाकिन बड़ाँवयान।


हनते ईसू जमा गलील छतररे सेनेडखन हँकूराः अरजी ओड़ाःकूनरेय चेडतेडकुःआ। हाँय होड़कू एचेरे भगवानराः राइजराः नपाय सरवने परसारतेरा अरू अबड़ाहा होड़कू अरू जमा बरानाः बेमरियातेकू दोहोना हँकुःआ होड़कूय नपायगोड ञवना। हाँयराः ञाव जमा सिरिया राइजरे जगावयान, अरू हाँय बदीरेकू अयूमतेरा, हँकुःआ होड़कू अँकूरिकुःआ हसूत होड़कू, अरू भूतकू समसावनेना हँकुःआ होड़कू, भपरी होड़कू अरू लकवा ञेडतेडकुःआ हँकुःआ होड़कू, हँकू जमाकू हाँय एचेरेकू अगूतेडकुःआ। अरू हाँय हँकुःआ जमा होड़कूय नपायतेरा। गलील छतर अरू दिकापुलीस राइज अरू एरुसलेम मरंग सहर अरू एहूदिया छतररिकुःआ होड़कू अरू एरदन नई मार परोमरिकुःआ मुरुक बगरा होड़कू ईसू देह दूरकू ओतोंग वेजेडा।

கேளுங்கள் मती 4