Matyu 4
4
Satanr Jisasr kfo nhebehmo yuhat
(Mak 1.12-13; Luk 4.1-13)
1Be Jisasr ndhart htanymort. Bi Bro Nkifrarhu Yafothat thu nhombrayetrn, to be nd Yafothatn yak hatoh hanymottr, yimor nungur tik furatn. Bro Nkifrar duka memor, “Jisasr nd tkitt tohhato tndhr yihato rorhu yima yuhur tadborhawonrahrr.” 240 yiham toh furamor. Nhai nuwa yarmor. Tu wuroh yiharn bi yatinoh namborhohetrn, 3nd yima yuhum tadborhiwa tndhr mfnahhato kfo memorr, “Ni Bro Nkifrarhu yonn rhu thombat, ndar tahim wakfokahtnm, bretpam kekutrahm.” 4Tfit Jisasr kfo wok memorr, “Bro Nkifrarhu gonborngt kfo kangt,
‘Nhai wom yimar bretparpat yehato tohwonkahr. Nhai.
Bro Nkifrar kfoyuk mrokfo bugam yehato tohwor.’” Lo 8.3
5Inji nna pthanihato tfit nd tndhr yaknimorr, hanymorr Jerusalemko yorhwa temperrhu mingiahurhu bikatitn. Yura mhatohmorrn, kfo memorr, 6“Ni Bro Nkifrarhu yonn rhu thombat, watuhatoknikahnn, bbinysoft wamitohwonn. Bro gonborngt kfo kangt,
‘Bro Nkifrarhu mounmotm kforuhatrm,
wuyakitohak hanyrahmn.
Rroh tirmn mirhuniruhann,
nhai tahimpno mitawokruhatnm ninhu wuram.’” Sng 91.11-12
7Jisasr tfit kfo wok memorr, “Bro gonborngt kfo kangt,
‘Mirahn Bror ninhu Bro Nkifrar frnhombrakahann
afo htiruha finji hingrnaruhar.’” Lo 6.16
8Inji kfomotrr, tfit yaknimorr hamuhmorr yura kminysofmn. Yura mhatohhato fak nuhasmorr ndar bbinysofthu bro yufa nanyjaret kmi kmim. 9Kfo memorr, “Kanga akfoyann, nanhu yufat kfo nakuhato kfo tatorahn, be ninn nda bbinysof bugat hiruha.” 10Jisasr sinyahato kfo wok memorr, “Wuri wai! Bro gonborngt kfo kangt,
‘Bro Nkifrarparhu yufat kfo nakuhato kfo bruttnakfot.
Rorpar kfo bruttnahato hikkfot.’” Lo 6.13
11Be nd tndhr htanymorr Jisasr. Tndhr htanymohat Jisasr bi yati noh namborhoh bugamor. Tfit mounmotm yihato romn toh dbu hmbreyaknimotmr bmteft tfit fakmor.
Jisasr Galiliko rihingrnakmo yuhat
(Mak 1.14-15; Luk 4.14-15)
12Jonrhu kalabus hta mrokfot Jisasr wanyhato be tfit Galiliko yimor. 13Taun Nasaret htanyhato taun Kaperneamtn yi mtohmor. Kaperneamt korht Galili bari thmbtn, Sebulun Naftaliroh frikef yuhafhu bbinysoftn. 14Nd neft Jisasr namohat, bi Bro Nkifrar profet Aisaiarhu tngt kfo htamo yuhatn fak hikmort. 15Aisaiar kfo memor,
“Met yindarim Sebulunrhu tkitm tohyukm
yo Naftalirhu tkitm tohyukm,
marombko yita yihota yuhat yorhwa tkitm
yo tek Joden mkuko yorhwa tkitm,
ndm Galili distrikkorhofem.
Nd distrikt yima tangirohet.
16Nd met yindarim, be tu bro kspt yiro tohwam,
be htirahmt bro nukeft.
Nd met yindarim yifungt rhu hasoyukm nukeft yakrahtm.” Ais 9.1-2
Bro Nkifrarhu kingdomkfot Jisasr kfo ptha nuhasmo yuhati tuhan yindariroh dbohnefm yak thumo yuhat
(Sapta 4.17–9.34)
Jisasr yakmo barkof husfihus hingrnanho yimam
(Mak 1.16-20; Luk 5.1-11)
17Nd yiharn Jisasr turhu mrokfot rikfo pthakmort. Kfo memour, “Hefenrhu kingdomkfot bi brbohwot. Ndnettn tamoh tamoh nefenm mong troh bugakfot.”
18Jisasr Galili bari thmbt yau hanyhato Saimon Andru najohf rugit yak yif hasetfn htimorf. Saimonr kto Pita yufat futamomr. Rof nd hingrneft hingrnahato maru kakmouf. 19Jisasr rof htihato kfo memorf, “Nann wania wahikfn. Nann wahikkahtfn yimaroh yakneft yak nuhasruhanfn.” 20Be rof inji wanyhato nd rugi wuskar myak htanihato mhikakni twanhomofr.
21Saimon Andru najohf yaknihato yimom. Yau hanyhato tfit buha Sebedirhu yon Jems Jon najohf mhtimorf. Rom tum nitohfit turoh mmbrt tohhato rugim fak nahu dbofta hasomom. Nd Sebedirhu yonf mhtihato kfo naku kangrf, “Wania wahikfna.” 22Be nd yon najohf inji wanymohat be mhikakni twanhomofr. Yifem Sebedir, ror htanymofr mmbrtn.
Jisasr bok yimam yak marnyamo yuhat
(Luk 6.17-19)
23Jisasr distrikt Galilit frhtfas bugamort. Turoh rhu rifinyuk rmonm yihato met yindarim mrokfom hemourm. Hefenrhu kingdomkfothu mrokfomn kfo nuhas bonuhasmourm. Yo met yindarim hatohyuk wonk wonk dbohnefm fak thu bugamorm. 24Rorhu ndkorhof yi nmbuhat Siria profinshu met yindarim wany hanyhato hne hna bugamomm womhtet womhtet dbohnefmpno kkor hasetm yo kmi yarh fknayetm yo yimam noh mumeft yakhato tir wuram mengongaknihato bruktpno bruktpno tohakniyetm yo tir noh wura nohetm, ndhtet ndhtet dbohnetm hne hna bugamotmm Jisasr fak marnya hanymorm. 25Nhai be kuken yima rifhur Jisasr hikrmomr. Kmim sinya buga hanymom. Galilikorhofm, distrik Dekapoliskorhofm, Jerusalem, Judia yo tek Joden mkuko tohyukm sinya bugahato hik hanymomr.
Iliyochaguliwa sasa
Matyu 4: amp
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2003, Wycliffe Bible Translators, Inc. All rights reserved.
