Lucas 13

Ẽg tỹ ẽg jykre pãno tovãnh ke

1Kejẽn fóg tỹ pã'i tỹ Pilatos tóg, ga tỹ Galiléia tá ke ũ ag kãgtén ja nĩ, ag tỹ Topẽ mỹ ag mẽg tãnh kỹ pũn mũ ẽn kã. Kỹ ag kyvénh tóg, ag mẽg kyvénh mré kutẽ ja nĩ.

Kỹ ũ ag tóg, Jesus mỹ kãmén mũ, ag tỹ Pilatos tỹ ũn kãgtén mũ ag to: “ag hỹn Topẽ vĩ mranh mág,” hen kỹ. 2Kỹ tóg ag mỹ: “ãjag hỹn Galiléia tá ũn kãgter mũ ag to jykrén sór mũ,” he mũ. “Ag hỹn Galiléia tá ke ag jykre pãno kãfór han mũ nĩ, hã kỹ Topẽ hỹn tóg ag vóg kónãn mág, he ãjag tóg tĩ ag to. 3Hã tũ vẽ hã ra. Ãjag ri ke ag tóg nỹtĩ, mỹr, ha mẽ. Ãjag tỹ ãjag jykre tovãnh tũ nĩn kỹ ãjag tóg nũgme ki vár ke mũ, ha vem nĩ,” he tóg. 4“Ũ tỹ 18 (ke) ẽn ag to jykrén nĩ, ũ tỹ goj tỹ Siloé tá kãgter mũ ẽn ag. Ðn téj ẽn tóg, ag kri kutẽ, hã kỹ ag tóg kãgter mũ. Jerusalém tá ke kar ag jykre ri ke ja ag tóg nỹtĩ. Ag pijé, ag jykre pãno kãfór ja nỹtĩ', ha mẽ. 5Kỹ sóg ãjag mỹ ke mũ. Ãjag tỹ ãjag jykre pãno tovãnh tũ nĩn kỹ ãjag tóg, nũgme ki vár ke mũ,” he tóg.

Ka tỹ kanẽn vãnh kãme

6Kỹ tóg ag mỹ: “ũ tỹ Topẽ jykre han sór tũ ag vỹ, ge nỹtĩnh mũ, ha mẽ,” he mũ. “Kejẽn ũ tóg nĩgtĩ. Ka há krãn ja tóg nĩgtĩ, ka tỹ figueira. Ka kanẽ ko há vẽ. Uva kré kã mĩ tóg krãn ja nĩ. Kỹ tóg kejẽn ti kanẽ ko sór mũ, kỹ tóg venh tĩ mũ. Hã ra tóg kanẽn ja tũ nĩ. 7Kỹ tóg uva ki rĩr tĩ mỹ: “ti gỹn ra,” he mũ. “Prỹg tãgtũ vẽ ha, sỹ ti kanẽ vég tũ ki. Kanẽn vãnh ti hỹn jẽ. Kỹ ti gỹn nĩ, ti tỹ ga kókég tũ nĩ jé,” he tóg. 8Hã ra tóg ti patrão mỹ: “ti tovãnh ra ver,” he mũ. “Ti pénĩn sóg kũm mũ ver, sỹ ti pénĩn ga vãvãm jé ver. 9Hẽn ri ke mũn tóg kanẽn ke mũ ha. Ti kanẽn tũ nĩn kỹ sóg vãhã ã mỹ ti gỹn ke mũ,” he tóg mũ,” he tóg.

Vẽnhkán ke kurã ki ũn kaga tỹ há' he

10Kejẽn tóg vẽnh kanhrãn jafã krẽm ag kanhrãn mũ, vẽnhkán ke kurã ki. 11Hã ra ũ fi tóg tá jẽ nĩ. Jagrẽ kórég fi nĩ, hã kỹ fi tóg pãnh ke kỹ jẽ nĩ. Vẽnh ra hã fi tóg jẽ kórég nĩ, fi jagrẽ tugrĩn. Prỹg tỹ 18 (ke) han fi tóg, fi jagrẽ tỹ fi kagãg tĩ ki. 12Kỹ Jesus tóg fi vég mũ. Kỹ tóg fi jé prẽr mũ. “Kunĩg, jỹ,” he tóg. “Ã kaga tỹ sóg tũ' henh ke mũ,” he tóg fi mỹ. 13Kỹ tóg ti nĩgé tỹ fi kri fig mũ. Kỹ fi tóg vẽnh ra hã jẽg há' he mũ, ha mẽ. Kỹ fi tóg Topẽ mỹ vĩ há han mũ sir.

14Hã ra vẽnh kanhrãn jafã to pã'i tóg Jesus to jũ mũ, ti tỹ vẽnhkán ke kurã ki fi tỹ há' hen kỹ. Kỹ tóg vẽnh kar jyvẽn kỹ ag mỹ: “kurã tỹ 6 (ke) hã ki ẽg tóg rãnhrãj ke mũ ha,” he mũ. “Hã kỹ kurã tỹ 6 (ke) ẽn ki kãmũm nĩ, ti tỹ ãjag tỹ há' hen jé. Vẽnhkán ke kurã ki vẽnh kygtãg kãmũ tũg nĩ,” he tóg mũ.

15Hã ra Jesus tóg ti vĩ kãfãn kỹ: “jykre régre ã nĩ mỹr,” he mũ. “Vẽnhkán ke kurã ki ãjag tóg ãjag mẽg ki rĩr tĩ gé, monh ki, kãvãru ki ke gé, ha mẽ. Ãjag mẽg kygvãg ãjag tóg tĩ, ag tỹ goj kron mũn jé, ti tỹ ĩn kã kã se kỹ jẽ kỹ, cocho to. 16Kỹ tag fi vỹ se kỹ jẽ ẽn ri ke ja nĩ gé, ha mẽ. Satanás hã vỹ fi sé', prỹg tỹ 18 (ke) ki. Ẽg jógjóg ve tỹ Abraão krẽ'krẽ ũ fi vẽ. Ẽg mẽg kãfór fi tóg jẽ. Hã ra ã tóg jũ sór mũ, isỹ vẽnh kán ke kurã ki fi tỹ há' hen kỹ. Isỹ fi kavãn ri ke vẽ,” he tóg.

17Ti vĩ tag to ag tóg mỹ'ãg'ãg mũ sir, ti kato tẽ mũ ag. Hã ra tóg vẽnh e ẽn mỹ sér tĩ sir. Ag mỹ tóg nén ũ há kar han tĩ, hã kỹ tóg ag mỹ sér tĩ sir.

Topẽ vĩ tỹ vẽnh kar kri rũm ke

(Mt 13.31-33; Mc 4.30-32)

18Kỹ tóg ag mỹ: “Topẽ tỹ tỹ ẽg pã'i nĩnh ke vỹ tỹ ka tỹ krén ri ke nĩ,” he mũ. 19“Ti krãn ẽg tóg tĩ. Kỹ tóg mog há han tĩ. Hã kỹ sẽsĩ tóg ti féj kã ki jagfénh tĩ,” he tóg.

20Kỹ tóg fag mỹ: “Topẽ tỹ tỹ ẽg pã'i nĩnh ke vỹ ũn tỹtá fag tỹ ẽmĩ han ri ke nĩ,” he mũ gé. 21“Fermento sĩ tỹ fag tóg farĩnh e mré jẽgjãg tĩ, hã ra tóg tỹ són ke kãn tĩ,” he tóg, Jesus ti.

Jãnkã sĩ kãme

(Mt 7.13-14, 21-23)

22Kỹ tóg tĩg mãn kỹ ẽmã e fĩn rãm mũ, ẽmã mág, ẽmã kãsir ke gé. Tĩg kỹ tóg ag kanhrãnrãn mũ sir. Kỹ tóg vãhã, ẽmã tỹ Jerusalém kukãm tĩ mũ. 23Kỹ ũ tóg ti mỹ: “Senhor,” he mũ. “Ũn krenkren mũ ag mỹ pipir nỹtĩ, e nỹtĩ vó?” he tóg. Kỹ tóg ti mỹ: 24“inh ki rã vỹ, jãnkã sĩ ra rã ri ke nĩ,” he mũ. “Vãsãn nĩ, ã tỹ ra rã jé. Kejẽn ũ tóg, ra rã mãn ke tũ nĩ ha. Ẽn kã ũ tỹ hẽn ri ke ag vỹ, ra ge sór ke mũ, hã ra ag tóg, tỹ hẽ ri kenh ke tũ nĩ sir. 25Ðn ki rĩr tĩ ẽn tỹ nĩfénh ja vẽ mỹr, hã kỹ ag tóg, kã ra genh ke tũ nĩ ha. Kanhkã to ken hã vẽ, ĩn ti. Ðn ki rĩr tĩ ẽn hã ne nĩfénh ke mũ', kỹ ãjag tóg sir re tá nỹtĩ kỹ tỹ tórón' tórón' kenh ke mũ.“Senhor', ẽg mỹ róm, ẽg jy nón, jãnkã ti,” he jé ãjag tóg ke mũ. Hã ra tóg sir ãjag mỹ: “ãjag ki kagtĩg sóg nĩ,” henh ke mũ. 26Kỹ ãjag tóg ti mỹ: “ẽg hã vỹ ã mré jẽn ja nĩ, ã mré ẽg tóg kron ja nĩ, ẽg kanhrãn ja ã tóg nĩ, ẽg jamã tá. Ẽg hã vẽ,” henh ke mũ. 27Hã ra tóg ãjag mỹ: “inh pijé ãjag ki kanhró nĩ',” henh ke mũ. “Ãjag pijé tỹ inh mré ke nỹtĩ'. Ha mũjẽg. Vẽjykre pãno han ãjag tóg mũgtĩ,” he jé tóg ke mũ. 28Ãjag tỹ ra mũnh ke tá ãjag tóg vẽsỹrénh ke mũ, tá ãjag tóg ãjag jã tỹ gángán kenh ke mũ. Kór há tá ãjag tóg Abraão venh ke mũ, tá, Isaque ke gé, Jacó ke gé, Topẽ vĩ tó tĩ ag kar ke gé. Ẽn ag kar vỹ, Topẽ tỹ tỹ ẽg pã'i nĩ venh mũ sir, ãjag jãvo. 29Ẽn kã Topẽ ki ge kỹ nỹtĩ kar ag tóg kãmũnh mũ, rã jur ja tá, rã pur ja tá, kanhkã fyr kar tá. Kãmũ kỹ ag tóg, Topẽ tỹ ag ki rĩr nĩ ti venh ke mũ, ãjag jãvo. 30Ẽn kã tag ki ũn kãsir ũ ag tóg tỹ ũn mág nỹtĩnh mũ, tá. Kỹ tag ki ũn mág ũ ag tóg tỹ ũn kãsir nỹtĩnh mũ gé, tére kỹ,” he tóg, Jesus ti.

Jesus tỹ Jerusalém ra tĩg ke

31Kurã ẽn kã Fariseu ũ ag tóg ti mỹ: “ha mẽ,” he mũ. “Pã'i mág tỹ Herodes vỹ ã tén sór mũ. Hã kỹ vẽnh péjunh tĩg,” he tóg.

32Kỹ tóg ag mỹ: “mĩg sĩ ri ke ti nĩ, hã kỹ tóg ke mũ,” he mũ. “Kỹ ti mỹ: “ver sóg vẽjagrẽ kórég pan mũ, ver sóg ũn kagyga ag tỹ há' henh ke mũ, ũri, vaj kỹ ke gé. Kurã tãgtũ ki sóg han kãn ke mũ, he ti,” hem nĩ. 33“Ũri sóg ver tĩnh mũ, vaj kỹ ke gé, vaj ũn kỹ ke gé. Iser ken kỹ sóg Jerusalém hã tá ter ke mũ. Tag ki ke pijé'. Jerusalém tá ke ag hã tóg Topẽ vĩ tó tĩ ag kãgtén tĩ, he ti,” hem nĩ ti mỹ,” he tóg.

Jesus tỹ Jerusalém tá ke ag to fe kaj nĩ

(Mt 23.37-39)

34Kỹ tóg: “Jerusalém tá ke',” he mũ. “Topẽ vĩ tó tĩ ag kãgtén ãjag tóg tĩ. Topẽ tỹ ãjag mỹ ũn jẽgnẽg tĩ ag pin ãjag tóg tĩ, pó tỹ. Isỹ ãjag ki rĩr há tóg tĩ vẽ. Garĩnh fi vỹ fi krẽ kri jẽg tĩ. Fi tỹ ag vẽsỹrénh tũ nĩ jé ke vẽ. Ẽn ri ke han sór sóg mũ vẽ, hã ra ãjag tóg ke jãvãnh nỹtĩ. 35Hã kỹ ag tóg ãjag jamã pũn kãn ke mũ, kỹ ũ vỹ kãnhmar tá nĩg mãn ke tũ nĩ ha. Inh ve mãn ke tũ ag nĩ ha mỹr. Kejẽn ãjag tóg iso: “Topẽ tỹ ti jẽnẽ ja vẽ,” henh ke mũ. Ẽn kã hã ãjag tóg inh ve mãn ke mũ,” he tóg.

Iliyochaguliwa sasa

Lucas 13: kgp

Kuonyesha

Shirikisha

Nakili