Samz 16
16
Sé an sam David
Sé Bondyé Ki Ka Ban Nou Tjè Kontan
1Pwézèvé mwen, Bondyé,
paski sé an ou mwen ka chaché pwotèksyon.
2Mwen di Bondyé Senyè-a, “Ou sé Senyè mwen.
Sé ou ki ban mwen tout sé bon bagay-la mwen ni-an.”
3Pli gwan plézi mwen sé pou mwen toujou la épi sé moun Bondyé-a ki an péyi-a.
Sé yo ki méwité wèspé.
4Sé moun-an ki ka adowé lézòt bondyé-a
ka mennen twaka asou kò yo menm.
Mwen pa kay ni anyen pou fè épi sé sakwifis san-an yo ka ofè bay sé imaj sala.
Mwen pa kay menm mansyonnen non sé bondyé yo-a.
5Bondyé Senyè, sé ou ki tout byen mwen,
èk sé ou ki ban mwen tout sa mwen bizwen.
Lavi mwen an lanmenʼw.
6Pòsyon-an mwen éwityé-a sé an pòsyon mwen kontan an pil.
Byen-an mwen éwityé-a bèl an pil!
7Mwen ka lévé non Bondyé Senyè-a, paski i ka di mwen ki chimen pou mwen pwan,
jis lannwit konsyans mwen ka di mwen ki sa pou mwen fè.
8Mwen toujou ka mété Bondyé Senyè-a douvan mwen.
I tou pwé, kon sa anyen pa sa jété mwen.
9Kon sa mwen ni tjè kontan épi mwen ka chanté,
èk anyen pa sa wivé mwen.
10Ou pa kay kité lam mwen koté sé mò-a yé-a,
épi ou pa kay kité kò sèvant ou-a ki ka viv baʼw tousèl-la pouwi an twou-a.
11Ou ka moutwé mwen chimen-an ki ka ban mwen lavi-a.
Ou ban mwen tjè kontan paski ou toujou la épi mwen.
A kotéʼw mwen ni plézi pou tout tan.
Iliyochaguliwa sasa
Samz 16: acfDBL
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 1999, Wycliffe Bible Translators, Inc. All rights reserved.