Lukë 16

Diigbakälänyɔɔlɔ käa' yrʋ

1Jesu nya ‑gbala 'sɔɔwʋ 'ɔa 'wʋnyɛrɛnyüü ‑maa: «Nyɔɔ 'doo ji kä 'bɩɔ. 'Ɔ kä kä nyɔɔ 'doo 'ɔɔ kälä 'ɔa möliia wii ‑gba. 'Ünya ‑gbala 'ɔɔn ‑maa 'ɔa 'bɩɔ 'ɔa 'jrʋpafɛnyɔɔ bʋblɔ. 2'Ɔnya we 'ɔɔn 'ɔnya ‑gbala 'ɔɔn: ‹Wii 'plɛɛ ‑nö i 'n 'nööwli le? Ja ‑na möliia ‑pɔɔkɩ, 'be ‑mää ‑mɔ ‑ka ‑nëmä 'ia wiigba kälä.› 3Nyɔɔlɔ nya bobo bobo 'ɔ ‑nëma: ‹'Na 'kamanyɔɔ 'baa 'mɩ diia 'fɩɔ kälɩ. ‑Asɩ 'nyaa nʋ le? 'Nyɩ 'klü ‑a kä 'mä pla, 'i kä bɩa 'mɩ 'nyüsü 'wʋ 'mä ‑sɛ. 4'Na 'kamanyɔɔ ma prɛ 'mɩ, 'n jre 'sɩrɩ 'nëmäa' nʋ ‑bɛ nyüü ‑mölöö 'mäa' 'mɩ 'wʋdɔrɔ.› 5'Ɔnya we nyüülü kä 'fɩɔ 'klaaa' 'ɔa 'kamanyɔɔa 'kpa. 'Ɔnya 'bete ‑kätɩa nɔ: ‹'Na 'kamanyɔɔa 'kpalä ‑klaaa' ‑srüplɛɛ 'ä bä le?› 6'Ɔ ‑nëma: ‹'Kpɩa ‑puukpalëa ‑glʋɩgböö (100).› 'Ɔnya ‑gbala nyɔɔlɔ 'klaaa' 'ɔa 'kpa ‑maa: ‹'Kʋwälɩ, dɔrʋ ‑pɔɔkʋ 'wʋ ‑jɩjra ‑glʋɩsɔɔ ‑bɛ ‑pʋ (50).› 7'Ɔnya 'bete ‑moloo: ‹'Ɔa ‑srüplɛɛ 'klaaa le?› 'Ɔ ‑nëma: ‹‑Bleeea#16.7 ‑bleee: Juifëa jijri; 'i ‑beere ‑kɔpʋ. 'tenua ‑glʋɩgböö (100).› 'Ɔnya ‑gbala ‑mɔlɔ: ‹Dɔrɔ ‑na nu ‑pɔɔkʋ 'wʋ, ‑jɩjra ‑glʋɩmlɔɔ (80).› 8'Bɩɔjinyɔɔlɔ nya 'kɔlɔ bʋbɔ 'jrʋpafɛnyɔɔlɔ 'ɔa 'lɩgaglakʋa ‑gʋ. Nyüülü bäa' 'plälä kʋa' ‑pɩa nyüü nɩ, 'ü ‑glalɩ 'üa ‑tɔrʋpɩɔ, 'ünya ‑si 'napɛa nyüü 'wʋ. 9‑Bɛ 'mɔɔlɔ nɩ, 'n ‑gbala 'amɩ: 'ba nʋ 'ana ‑tʋtʋ ‑gälɩa 'bɩɔ 'amä ‑gbötüdɛɛ nʋ. 'Ama nʋ 'saa nɩ, 'taɩn 'lɩ 'bɩɔ ‑ka ‑nëmäa' 'lɩbä nɩ, 'ünya 'amɩ 'lɩkʋɛɛa nyëkalë bäa' cɛ 'lɩa 'mlɩ.

10«Nyɔɔlɔ ‑trääräa' 'lɩ diijie nɩ, 'ɔnya bɩa 'lɩ dii kpakü ‑trääräa. ‑Bɛ nyɔɔlɔ 'nyɩa' 'klɩgä diijiea 'mlɩ nɩ, 'ɔ ‑nëmä 'klɩ ‑a ‑gä dii kpaküa 'mli. 11‑Bɛ 'ama 'nyɩ ‑träärälɩ 'bɩɔlʋ bäa' ‑pɩ ‑tʋtʋ ‑gälɩ ‑a nɩ, nyɔɔ 'plɛɛ 'mä 'amɩ 'mʋfa 'bɩɔ ‑nyɩ le? 12‑Bɛ 'ama 'nyɩ ‑träärälɩ nyɔɔ ‑molooa dɛɛ ‑a nɩ, nyɔɔ 'plɛɛ 'mä 'amɩ dɛɛlɛ bäa' 'ana nɛ ‑nyɩ le? 13‑Geei 'nyɩ 'lɩ ‑a bä 'ɔmä 'kamanyüü 'sɔɔa 'jrʋpa 'wʋfɛrɛ. 'Ɔnya 'doo 'nyüamlɩjraraa 'kä 'ɔnya ‑mɔlɔ ‑wa. 'Aiɛ 'ɔnya 'lɩ 'doo ‑trääräa ‑gböösa, 'kä 'ɔnya ‑mɔlɔ sawʋ 'pa. 'Anyɩ 'lɩ ‑a bɩa 'amä Nyɔsʋaa 'jrʋpa nyra möliia 'jrʋpa 'wʋ ‑fɛrɛ.»

Jesu 'pala Farisinyüülü ‑waa' mölii nyɔsʋaawii ‑gba

14‑Bɛ Farisinyüü po wiili kä 'fɩɔ Jesu 'paaa' 'nyakli, ‑bɛ 'ü srörö 'ɔɔn, 'be 'ü ‑wa mölii. 15'Ɔnya ‑gbala 'üün: «'A nö dii ‑beere 'sɩrɩ 'a bäa' 'cɩcanyüü, ‑maa Nyɔsʋa jre 'ana polu. Dɛɛlɛ nyüü 'daraa' dɛɛ nɩ, 'ɛ bä cacɩ Nyɔsʋaa 'klʋɩ ‑gälɩ. 16Sɔrɔ ‑Dɔ nyra nyɔsʋaamlɩpalanyüüa 'taɩn 'lɩ, ‑a ‑tɔɔ Jaan Batiisëa 'taɩn 'lɩ nɩ, 'Mʋfagogolä 'paaa' Nyɔsʋaa 'kamapläa ‑gä ‑ka 'sara. ‑Moloo ma bälɩ nɩ, 'klü 'ɔ 'paalɩ 'ɔmä 'lɩ pa. 17Cɛ nyra ‑tʋtʋa sakakʋ ‑nëmä 'lɩ ‑a kla 'i ‑nëmä ‑dɔpɔɔkʋa 'mlɩa 'jrii jɔa sakakʋ 'wʋ ‑a ‑si. 18Nyɔɔ o nyɔɔ prɛa' 'ɔa 'ŋlʋʋ ‑bɛ ɔ 'paaa' 'tä ɔ käa' 'ŋlʋʋ ‑moloo nɩ, bätësa 'ɔ 'paa. ‑Mɔlɔ käa' bɩa 'ŋlʋʋlɔ 'ɔa dʋɔ prɛa' nɩ, bätësa 'ɔ 'paa bɩa.»

'Bɩɔjinyɔɔ nyra Lasaaa 'klɩpaplawii

19«Nyɔɔ 'doo bä kä 'lɩ, 'ɔ ji 'bɩɔ. 'Kotili kä 'peru 'bʋaa' 'ii 'ɔ 'sroo, ‑bɛ 'ɔ kʋ 'bɩɔ 'lɩ ‑srɩ o ‑srɩ. 20'Ɔa ‑gböööa palafawʋa 'pʋablanyɔɔ 'doo ma 'pie, 'ɔɔ 'ü 'dara Lasaa#16.20 Lasaa: Lasaa 'nyrɩa ‑gbaa bä «Nyɔsʋa jö ‑gba».. 'Ɔa fugba 'fɩɔ 'si ‑fë 'klɩ. 21'Bɩɔjinyɔɔ ma jidɛɛ, jijri jie 'doorodoolü böblöa' nɩ, 'ii 'ɔ 'bata 'ɔmä dɛɛji, ‑bɛ ‑fä bɛ 'ɔa ‑gbaa ‑fë. 22'Taɩn 'doo 'lɩ nɩ, 'pʋablanyɔɔlɔ nya jä, 'aanjë nya fa 'ɔa ‑susu Abraamëa ‑gba. 'Bɩɔjinyɔɔlɔ nya jä bɩa, 'ünya ‑tʋ 'ɔɔn. 23'Kuaabre#16.23 'Kuaabre: Jäjänyüüa ‑gaglaa ‑pɩɔ bäsaa. 'Ii 'klɩgänyüü nyra nyüülü 'nyɩa' 'klɩgä kʋä ‑bɛ 'ü ‑glaaa' ‑gäa 'taɩn. 'Ia kʋfë 'sɔɔ: *Kapulu 'nɩ bɩaraa' a ‑pɩɔ bälɩ, ‑bɛ Nyɔsʋaa ‑nyɛɛ bälɩ (*Paradii). 'lee nɩ, 'ɔ 'jää ‑sʋɩ ‑gböösa. 'Ɔmä 'wli 'wʋdɔrɔkalɩ mi nɩ, 'ɔ 'jää Abraamë 'wʋ 'lee, ‑bɛ Lasaa bä 'ɔa ‑gba. 24'Ɔnya we 'ɔɔn: ‹'Na tʋ Abraamë, 'jä 'na nyatɛrɩ. Blɔ Lasaa ɔ 'ku 'ɔa wli 'nɩ dɛrɩ ɔ ji ɔ 'cɛɛ 'na mɛa fɔfɔkʋ 'wʋ. ‑Maa ‑sʋɩ 'n 'jää ‑taa kapulua 'mlɩ!› 25Abraamë ‑nëma: ‹'Na 'jʋ, ‑nyɩ ‑trɔ 'sɩrɩ ma käa' 'mʋfadii, 'taɩn 'lɩ ‑ma bäa' 'plä 'wʋ, ‑bɛ Lasaa 'jäa' bʋbɔdii. ‑Maa 'saarɩa ‑srɩlɩ nɩ, 'ɔɔ dɔrʋ 'blaa, ‑bɛ ‑mɔlɔ nɩ, ‑bä ‑sʋɩ 'lɩ. 26‑Bɛ 'sɔɔwʋ nɩ, 'bütügba kpakö bä ana ‑tɔrʋpɩɔ, 'kä nyüülü 'bataa' 'ümäa' ‑tɛ sɔ 'ümäa' 'ana ‑nyɛɛ 'prɛrɛ nɩ, 'ü ‑pɩ 'pɩ; 'aiɛ 'ü bäa' 'ana ‑nyɛɛ ‑pɩ ‑tɛklɩ ji.› 27'Iibäa' 'bɩɔjinyɔɔ nɩ: ‹Ima bäsaa nɩ, 'na tʋ 'n bibie ‑mɩ, blɔ Lasaa 'na tʋa ‑gbööli, 28'be 'na ‑wlajü ‑gböö bälɩ. Ɔ mi ɔ ‑gbala 'üün dotro, 'üa 'mʋgbɛ ‑pɩ ‑tɛ ‑sʋɩa 'mlɩ ji.› 29Abraamë nya ‑gbala 'ɔɔn: ‹Moisë nyra nyɔsʋaamlɩpalanyüüa ‑pɔɔkɩ bälɩ 'lee 'imä 'üün ‑gbala; ü po 'üün 'nyakli!› 30‑Maa 'ɔ ‑nëma: ‹'Woo, 'na Tʋ Abraamë, nyɔɔ ma sɔ jäjänyüüa ‑tɔrʋpɩɔ ‑bɛ ɔma mi 'üün ‑gbala nɩ, 'ünya 'üa ‑balʋa ‑gʋ fioa!› 31Abraamë nya ‑gbala 'ɔɔn: ‹'Üma 'nyɩ po Moisë nyra nyɔsʋaamlɩpalanyüü 'nyakli ‑a nɩ, ‑bakää nyɔɔ 'nyɩ sɔ jäjänyüüa ‑tɔrʋpɩɔ, 'ü ‑nëmä 'cici ‑a 'cici.› »

Iliyochaguliwa sasa

Lukë 16: Bakwé

Kuonyesha

Shirikisha

Nakili