Matayo 6

Yesu ákangirisa era luulu se'kuasa ebakene

1«Muményaa! Muténdaa mwáira emabuya era muhondo se'bandu chasiya muchilose era muhondo sabo. Bushi múkaira bacha, kutachiri lwêmbo lusibya lwa mungábona era mw'Eho wenyu ola ulí kwa nguba.

2«Bushi no'ku, emango wáasa ebakene, uténdaa wábanda mwa kaperere ngo'kwe'batebanyi bénde báira mwa mashenge mabo no'mwa njira, chasiya ebandu bénde bábatonga. Kubinali, nábabura kwa beke bàbonyire elwêmbo lwabo mira. 3Si woyo mango wáasa ebakene, emino yao ye'marembe iténdaa yámenya cha'ye'malyo yáira. 4Rero amu mabuya, úndaa wámaira mwa bubisho-bisho, n'Eho wao i'ùsene mwa bubisho-bisho kwe'bya wáira, angákwemba.»

Yesu ákangirisa era luulu se'kwema Ongo

(Luk 11:2-4)

5«Mango mwéma Ongo, muténdaa mwába nga batebanyi. Bushi beke mwa kuba béma, batúla bàsimire kwêmanga mwa mashenge mabo, no'mwa mahanganyisa me'njira, chasiya balórekane'ko ne'bandu. Kubinali, nábabura kwa bàbonyire elwêmbo lwabo mira. 6Si woyo mango wáhonda kwéma Ongo, wěngiriraa mwa chumba chao, wánachinga elwisi, wánere wéma Eho ola ùtaseneke'ko. No'yu Eho, i'ùsene kwe'bya wáira weine, angákwemba.

7«Kanji mango mwéma Ongo, muténdaa mwáteteresa myasi era itéte mufa, ngo'kwa ebandu ba bàteshi Ongo bénde báira. Bushi beke, bénde báanyisa mbu Ongo angômva'bo bushi ne'bwingi bwe'binwa byabo. 8Abu bandu, mwabo muténdaa mwêya'bo, bushi Eho wenyu anêshi bya mùlaire'ko anabe mùtasa kumwěma. 9Rero, bacha ku mundaa mwéma:

‹Ongo Tata u'ùli kwa nguba,

esina lyao líye ngulu.

10Ebwami bwao, bubáhaa.

Ekuhonda kwao, ku'kwindaa kwánaba

muno butala, ngo'kwa nguba.

11Utwêresaa ebiryo byetu bya chira lusuku.

12Úndaa wátubabalira ebibi byetu,

ngo'kwa netu twénde twábabalira ba bénde bátukorera emabi.

13Uténdaa wáreka twěngirire mwa miereko,

si úndaa wátutabala ku Wamusimu.

[Bushi woyo, u'ena ebwami, ne'buashi, ne'ngulu, esuku ne'mango! Bibe bacha!]›»

14Yesu era kuteta kanji mbu: «Akaba mùngende mwábabalira ebanji emabi ma babákorere, Eho wenyu ola ulí kwa nguba nai àngabababalira. 15Si akaba mùtangababalira ebanji, Eho wenyu ola ulí kwa nguba nai atákabababalire.»

Yesu ákangirisa era luulu se'memo ma ménde máirwa busira kulya

16«Mango mùli mwa memo ma ménde máirwa busira kulya, muténdaa mwáchilosa nga ba basínanyire ngo'kwe'batebanyi bénde báira. Bushi beke, bénde básinya ebuso bwabo, chasiya balóse ebandu kwa bàli mwa'mu memo. Kubinali, nábabura kwa bàbonyire elwêmbo lwabo mira. 17Si woyo, mango ulí mwa'mu memo, úndaa wôwa era buso, wánasanura ne'mviri sao, 18ebandu bangesha kumenya kwa kasi ùli mwa'mu memo. Si oyu mwasi, anêshibwe n'Eho wao ola ùtaseneke'ko. No'yu Eho i'ùsene kwe'bya wáira weine, angákwemba.»

Yesu ákangirisa era luulu se'buare

(Luk 12:33-34; 11:34-36; 16:13)

19Yesu era kuhuba kuteta mbu: «Muténdaa mwáchibikira ebuare muno butala, bushi ekaembe ne'luhwarenge byénde byákumbya'bo. Ne'besi bénde bátula enyumba na bêba. 20Si mundaa mwáchibikira ebuare kwa nguba, bushi okola kweke ekaembe ne'luhwarenge bìtangaala kukumbya, ne'besi bàtangaala kutula na kwiba. 21Bushi ala bikulo byao bìri, we'muchima wao nao énde ánaba.»

Emeho ku'kamore ke'mubiri

22«Emeho ku'kamore ke'mubiri. Akaba emeho mao machíri màtungenene, emubiri wao woshi, ánaba mwa bulangare. 23Si akaba emeho mao màuchire, emubiri wao woshi ánaba mwa musimya. Rero, akaba ebulangare bwa bulí mwa ndanda sao bùngabinduka musimya, oyu musimya ánere ába munene busese!»

Ekukorera Ongo nesi ebikulo

24«Kutali mundu ola ùngaala kukorera ba enawabo babiri. Bushi kuika anáhombe muuma ánasima eunji. Nesi àngaba luuma-luuma na muuma, na kukena eunji. Mùtangaala kukorera Ongo, mukórere ne'bikulo.»

Yesu ákangirisa era luulu se'kuchǎnya

(Luk 12:22-31)

25«Bushi no'ku, nábabura kwa muténdaa mwáchǎnya bushi ne'kalamo kenyu mwa kuchibusa mbu: ‹Chi tungálya, chi tungámwa, nesi chi tungémbala?› Si ekalamo, ku kète mufa kurenza ebiryo! Ne'mubiri, iwète mufa kurenza enjimba! 26Mulólaa kwa milonge! Ìtainga, ìtashebula, ìtatusa na nguli. Si chiro bacha, Eho wenyu ola ulí kwa nguba, énde ánalisa'i. Rero mwabo, kasi atá mumwète mufa munene kurenza ei milonge?

27«Ewashe! Nde mu'mwabo, ola bushi ne'kuchǎnya kwai àngaala kuchibikira lunji lusuku luuma kwa kalamo kai?

28«Chi chátuma mwáchǎnya bushi ne'njimba? Mulólaa kwa bwaso bo'mwe'hwa bwénde bwáhowa. Obu bwaso, bùtakola bùtanachilanjira na njimba. 29Si chiro bacha, nábabura kwa anabe na mwami Solomono mwa buare bwai boshi, atémbalaa luchimba lwa lùngahuhanyisibwa ne'bukome bwo'bu bwaso! 30Ebichi byo'mwe'hwa byénde byálorekana'ko lwarero na mishangya byánaumwa mwa muliro. Si chiro bacha, Ongo énde émbasa'bi njimba sa sikomire. Rero kute atáběmbase kubuya busese, mu'bandu be'bwemeresi bueke?

31«Bushi no'ku, muténdaa mwáchǎnya mbu: ‹Chi tungálya, chi tungámwa, nesi chi tungémbala!› 32Ebi byoshi, ebandu ba bàteshi Ongo bu bénde báchiribusa mwa kuhonda'bi. Eho wenyu ola ulí kwa nguba anêshi kubuya-buya kwa mubilaire'ko. 33Mundaa mwáhonda tanga eBwami bwa Ongo*, na kuhonda bya bìtungenene era muhondo sai, nai angáberesa ebi binji byoshi.

34«Bushi no'ku, muténdaa mwáchǎnya bushi ne'bya bingába mishangya, bushi ebyera, bingáchihonda byeine. Chira lusuku, lunéte emai malibuko.»

Iliyochaguliwa sasa

Matayo 6: tbt

Kuonyesha

Shirikisha

Nakili