Gẹnẹsis 6
6
Urhiamwẹ Emwa Nagbọn
1Vbe ẹghẹ ne emwa na vẹ gba uhunmwu otọe agbọn hia, iran kegha biẹlẹ emọ ikhuo. 2Eso vbe avbe iran ni rre ẹrinmwi, keghi miẹn wẹ avbe ikhuo na wa mose ẹsẹse, ẹre iran na viọ ni yẹ iran vbọ rọnmwẹ. 3Ẹre Nọyaẹnmwa na kha wẹẹ, “I i ghi kue ne emwa wa gha rre agbọn ẹdẹdẹmwẹdẹ rhunmwuda emwi ne ọ sẹtin wu ọre iran khin. Ke eban kpao iran i ghi ra gha ya gberra ukpo iyehan (120) vbe agbọn.” 4Vbe ẹghẹ ne a kha na kevbe iyeke ẹghẹ nii, avbe arhuanran ne ikhuo nii kevbe avbe ẹrinmwi nii biẹlẹe kegha rre agbọn. Iran nii ọre ọ gha re avbe ọkhae ni hin usi ọghe ẹkpo nẹdẹ. 5Ugbẹn vbe Nọyaẹnmwa ghi miẹn wẹ emwi dan wa gba emwa hia obọ vbe ehe hia kevbe wẹ, iro dan ọkpa ọre ọ wa rre iran ekhọe vbe ẹghẹ hia, 6ọ keghi dae ne ọ na yi ọmwa ye agbọn, ọ keghi gbe I ma rẹn ẹsẹse, 7Ẹre ọ ghi na kha wẹẹ, “I gha fuẹn iran an ighẹ emwa ne I yi, I gha fuẹn iran an ighẹ avbe aranmwẹ kevbe ahianmwẹ rhunmwuda I kpa rẹn I ghẹ yi iran.” 8Sokpan ẹmwẹ Noa keghi yẹ Nọyaẹnmwa.
Enoa
9-10Okha ọghe Noa ọre ena khin. Emọ eha ọre ọ biẹlẹe, Siẹm, Ham kevbe Jafẹt. E Noa kegha re ọmwa esi ne ọre ọmwa ọkpa kẹkan ne Osanobua ta ẹmwẹ ọnrẹn ẹse ẹghẹ nii, rẹn kegha gu Osanobua mu obọ. 11Sokpan, emwa nekpa hia keghi gha re emwa dan vbe odaro Osanobua, ọkhọ ne iran ru keghi vẹ gba ehe hia. 12Osanobua ghi tọn aro mu ghe agbọn, ọ keghi miẹn wẹ ọ ghe ọkhọ nọ, rhunmwuda emwa ke wa gha re emwa dan fẹfẹẹfẹ.
13Osanobua keghi tama Noa wẹẹ, “I tae nẹ ighẹ I ra fuẹn emwa fo. I ra wa fuẹn ehia a fẹfẹẹfẹ, rhunmwuda, agbọn vuọn ne uyimwẹ ika ne iran yin. 14Ye erhan ne ọ wegbe ka okọ obọ ruẹ, u ghi giagia ughugha yọ, u ghi ya ọdan nekhui siẹn ẹre aro kevbe iyeke gbua. 15Gie utanmwẹ ọnrẹn gha re akhuẹn obọ ekigbe siyeha yan uri eva (450), uvbẹmwẹ ọnrẹn ghi gha re akhuẹn obọ isẹn yan ekigbesiyenẹ (75), uyomwẹ ọnrẹn ghi gha re akhuẹn isẹn yan iyeva (45). 16U ghi bọ owa ye okọ nii uhunmwu, u ghi sẹ ẹkpotọ omwa akhuẹn obọ evairrọvbugie rae ye ẹkpo okpo ke okhiẹ emwiokọ. U ghi kan ẹnrẹn omuyan eha ne u vbe fian urho ye efẹn ọnrẹn. 17I ra gie uromwẹ amẹ rrie agbọn ne ọ fuẹn emwi ni rrọọ hia. Emwi hia ni rre agbọn gha wulo, 18sokpan I gha gu uwẹ ta ile. U ghi la okọ ke uwẹ ke avbe amwọn ọn, ivbuẹ nikpia, kevbe amwẹ iran. 19-20U ghi viọ ọdọ vbe amwẹ ọghe aranmwẹ hia, kevbe ahianmwẹ hia ba egbe la uwe okọ ne iran ghẹ wulo. 21U ghi viọ evbare ughughan ọghuẹ ke ọghe iran.” 22E Noa keghi ru emwi hia ne Osanobua tama rẹn.
Iliyochaguliwa sasa
Gẹnẹsis 6: EDO96
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
@ The Bible Society of Nigeria, 1996