Tegagia 11
11
Menara i Babeli
11:1-9
1I'asa wawotolino horio asa koa pau ka mpekena luwu dompepau. 2Tempono luwuno mia mpelungka melako i sabaano oleo ka domehaweo lembono i wita Sineari, merodo iramo mpo'ia i ra'ai. 3Singge mia motaeakono walino, ”Aiwa tompoweweu watu tela ka tomentunuo temomoiko.” Ka i'amba watu tela atuu domempakeo gagi watu ka tere gagi potakono. 4Mpotae ira mbo'u, ”Aiwamo tompowangu asa kotato ka asa menara anu punsuno hawe i langi. Aiwamo tompo'ungke nee, kasi tontesiarawo i asa wawontolino.” 5Ka i'amba Ondae i Ue metii kumitao kota ka menara anu winangudo anano mia atuu. 6Mepau Iramo i Ue, ”Ondae andio asa tongku ka luwudo asa koa pepaudo ka ndio da pompu'uano usahado. Mompu'u kanandio-andio maupo hapa anu sinongkado, nahina anu nahi ira mpokogagio. 7Laluopo Topetii ka Toposisinggeo paudo i ra'ai, ranta nahi dontepoto'ori mbo'u paudo.” 8Kanatuumo Dosiarawo ira i Ue inso i ra'ai i asa wawontolino, ka mpenaa-naa ira mewanguo kota atuu. 9Onaemo pu'uno kota atuu nineeako Babeli, hangano i tu'aimo Doposisinggeo i Ue pau i asa wawontolino ka insomo i tu'ai Dosiarawo ira i Ue i asa wawontolino.
Inuleno i Semu
11:10-26
10 #
1Taw. 1:24-27
Ndiomo inuleno i Semu. Tempono tinuwuno i Semu asa etu nta'u, orua nta'u umarino lolowi, onae hinao anano i Aripakasadi. 11I Semu tuwu lima etu nta'upo mbo'u, umarino hina i Aripakasadi. Onae mbo'u hinao ba opia anano tama ka beine. 12Mansano tinuwuno tolu pulu ka olima nta'u, i Aripakasadi hinao anano i Sela. 13I Aripakasadi tuwu pato etu ka otolu nta'u mbo'u, umarino hina i Sela. Onae mbo'u hinao ba opia anano tama ka beine. 14Mansano tinuwuno tolu pulu nta'u, i Sela hinao anano i Eberi. 15Mansano tuwu pato etu ka otolu nta'u mbo'u, umarino hina i Eberi. Onae mbo'u hinao ba opia anano tama ka beine. 16Mansano tuwu tolu pulu ka opaa nta'u, i Eberi hinao anano i Pelegi. 17I Eberi tuwu pato etu ka tolu pulu nta'u mbo'u, umarino hina i Pelegi. Onae mbo'u hinao ba opia anano tama ka beine. 18Mansano tinuwuno tolu pulu nta'u, i Pelegi hinao anano i Rehu. 19I Pelegi tuwu rua etu ka osio nta'u mbo'u, umarino hina i Rehu. Onae mbo'u hinao ba opia anano tama ka beine. 20Mansano tuwu tolu pulu ka orua nta'u, i Rehu hinao anano, i Serugi. 21I Rehu tuwu rua etu ka opitu nta'u mbo'u, umarino hina i Serugi. Onae mbo'u hinao ba opia anano tama ka beine. 22Mansano tuwu tolu pulu nta'u, i Serugi, hinao anano i Nahori. 23I Serugi tuwu rua etu nta'upo mbo'u, umarino hina i Nahori. Onae mbo'u hinao ba opia anano tama ka beine. 24Mansano tuwu rua pulu ka osio nta'u, i Nahori, hinao anano i Tera. 25I Nahori tuwu asa etu hopulu ka osio nta'u mbo'u, umarino hina i Tera. Onae mbo'u hinao ba opia anano tama ka beine. 26Mansano tuwu pitu pulu nta'u, i Tera hinao anano, i Burahima, i Nahori, ka i Harani.
Tutuluno i Tera
11:27-32
27Ndiomo tutuluno soborino i Tera. I Tera hinao anano, i Burahima, i Nahori ka i Harani. I Harani hinao anano, i Lo'oti. 28Tempono i Tera, amano da tuwu, i Harani mate i wita hinaano, i Uri-Kasidimi. 29I Burama ka i Nahori, singge ira mo'ala beinedo. Beineno i Burama, onaemo i Sarai, ka beineno i Nahori, onaemo i Milika, anano i Harani. I Harani atuu, amado i Milika ka i Yisika. 30I Sarai bita, nahi pe'ana. 31I Tera wawao i Burahima, anano ka i Lo'oti, ana'ueno, onaemo anano i Harani, saru i Sarai, ponino, beineno i Burahima, anano atuu. Onae melungka saru ondae inso i Uri-Kasidimi ira melako i wita Kana'a. Ka do'amba mehawe i kota Harani ka merodo i ra'ai. 32Tinuwuno i Tera rua etu ka olima nta'u, ka onae mate i kota Harani.
Iliyochaguliwa sasa
Tegagia 11: XMZ
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia