Matius 6
6
Pipaturo: mangaka ti miàdo: mao i tau ung mase-mase
1“Kalehai‑ko se! Hau mampukauꞌ se kauꞌ belomu i heleꞌna tau boso: mangking na ita‑i se. Ìna u mampukauꞌ se mène: to, ha mangkoraio: se upaꞌ nai Amammu i suruga. 2Deanna‑mo to, ìna u miàdo:, hau pikakoang‑ing mène: ung na pukauꞌ tau ung si belo: i rupa teng i tamming-tamming kapinombaang pang pai dalang mangking na pirerèngi tau. Matantu te ung Ku pusua: matung e teꞌ Na tarima‑mo nasang ti upaꞌna‑i se. 3Hampoꞌ dio, ìna u miàdo:, hau na ìsang kangkang kairimmu aka ti ung na pukauꞌ kangkang konangmu, 4mangking piàdomu ha tumenneng‑i, sangadi mao i Amammu i suruga. Pang Dea‑da ti ung mangita kauꞌmu ung dang tumenneng to, pang mampabalaꞌio:.”
Pasakiꞌ musumbayang
(Luk. 11:2-4)
5“Pang ìna u musumbayang se, hau mène: tau ung belo: i rupa teng, sàbaꞌ mampuroa:‑i se tèdeꞌ pai tamming kapinombaang pang pai kasikoraiang dalang musumbayang mangking na ita tau. Matantu te ung Ku pusua: matung e teꞌ Na tarima‑mo nasang ti upaꞌna‑i se. 6Hampoꞌ dio, ìna u musumbayang, mintama‑ko i kamaraꞌmu pang tanaꞌ ti baba:, màli: u musumbayang mao i Amammu ung dang niita. Sàbaꞌ Amammu mangita ti ung nu pukauꞌ mimbuni pang mampabalaꞌio:.
7Ìna u musumbayang se, hau na milàbi-làbi mène: ung na pukauꞌ tau ung dang si mangìsang‑kang Puang. Na konai:‑i se nipisàdìngia‑mo sàbaꞌ balanto ti pusumbayangna‑i se. 8Jadiꞌ, hau mène: dei: se, sàbaꞌ ha dolu‑mi u palau se, na ìsang‑moda Amammu aka ti kaparalluangmu se. 9Deanna‑mo to, musumbayang‑ko se mène: tee,
‘Amangki ung one: i suruga,
na konaMu‑rangmo lupu nisangadi.
10Bùruꞌ‑Mo: mai muparenta.
PampuinahamMu‑ra: ti ung jadi
i lino mène: i suruga.
11Hengi‑ingnang kinanne: ung kànaꞌ àlo tee.
12Pantengkai:‑ingnang ti kasalaangki,
mène: ho ti kami mampantengkai:‑ing tau ung kasalaang mao i kami.
13Pakarao:‑ingnang ti ung mambahai:‑kang mao i kamakarinnìngang
pang salokaꞌi‑kang nai ung bulituku.
[Sàbaꞌ Dio‑do ti ampunna kadatuang pang kuasa pang kamalabiꞌang deaꞌ tùrungna. Amin.]’
14Sàbaꞌ, ìna u mampantengkai:‑ing se kasalaangna tau, Amammu ho i suruga mampantengkaiing‑ko se. 15Hampoꞌ ìna ha mampantengkai:‑ingko se kasalaangna tau, baꞌ Amammu ho ha mampantengkaiing kasalaangmu.”
Pasakiꞌ mangaka ti mapuasa
16“Tempona u mapuasa se, hau masussa se mène: ung na pukauꞌ tau ung belo: i rupa teng, ung si mambàli: rupanna mangking heleangna mao i tau sintàna: mapuasa. Matantu te ung Ku pusua: matung e teꞌ Na tarima‑mo nasang ti upaꞌna‑i se. 17Hampoꞌ dio, ìna u mapuasa, muhunniaꞌ‑ko pang musaraka, 18mangking ha heleang mapuasa‑ko i heleꞌna tau, sangadinna Amammu pòteng ung dang niita ti ung mangìsang. Sàbaꞌ Amammu mangita ti ung nu pukauꞌ mimbuni pang mampabalaꞌio:.”
Kasukiꞌang i suruga
(Luk. 12:33-34)
19“Hau mantammung se kasukiꞌang i lino. I lino, toa:-toa: pang tai: rangkaꞌ hela mampuleleang, pang ung pumanauang hela massòboko pang mampumanau. 20Hampoꞌ àna: ti kasukiꞌang i suruga, i kaoneang ung dang ara toa:-toa: pang tai: rangkaꞌ ung mampuleleang, pang hari: pumanauang ung massòbòka pang mampumanau. 21Sàbaꞌ iaka ti na one: kasukiꞌangmu, onea‑da ho i anto ti pinanahammu.”
Ung masilao: mao i kalae:
(Luk. 11:34-36)
22“Mata dea‑mo pallita mao i hatang kalae:. Deanna‑mo to, ìna maritoto ti matammu, nasang kalaemu miluhalia masilao:. 23Hampoꞌ ìna masilatang, baꞌ nasang kalaemu makarinnìnga. Jadiꞌ, ìna pallita i laling kalaemu to podaꞌ, ha makàdaꞌ‑ida kadetunna ti to i heleꞌna Puang.”
Puang pang kasukiꞌang
(Luk. 16:13, 12:22-31)
24“Hari:‑da tau ung hela mallayani idua tuang. Sàbaꞌ na toroꞌia ti besa, pang besa na pakaliung, dea‑raka minumpua mao i besa, pang besa hari:. Mène: ho mao i dio se. Ha hela‑ko dosse: mallayani belo: pàli iduanna, Puang pang kasukiꞌang.
25Deanna‑mo to, Ku pusua: matung teꞌ, Hau pusussa se ti tuhomu, aka ti ung nu annea pang ung nu enùnga se, dea‑raka aka ti ung nu pakea se. Ha làbi‑i naꞌ ti tuho: nai ung niannena, pang kalae: làbi nai pakeang? 26Hele‑ko se ti kudaꞌ-kudaꞌ. Ha sumahuꞌ‑i, ha mangkìtiꞌ‑i, pang ha mangkungku‑i ho haseleꞌna i talukung. Hampoꞌ moi mène: to, na parakai‑da ho Amammu i suruga. Ha làbi kianggaꞌna‑ko se naꞌ nai kudaꞌ? 27Pang isaimmu se ti ung nai mampusussa tuhona hela mampakànaꞌi sungaꞌna, moi sanjaang‑i?
28Pang aka pu u pusussa‑ko se ti ung nu pakena? Pumahele‑ko se ti bunga-bunga ung tuho: i padang. Ha mingkamaꞌ‑i pang ha sumasa:‑i. 29Hampoꞌ moi mène: to, Ku pusua: matung teꞌ, Moi Datu: Salomo i laling nasang kamalabiꞌangna, ha mipake‑ida ho ung sibali matairingna nai besanna bunga-bunga tee. 30Pang dea ti làmaka i padang ung manghoa:‑ing bunga-bunga to, i latenna tuho:, hampoꞌ i hingkoꞌna dumbengi nikobu: pang nituhe:. Na moi mène: to, làmaka to, na pakei‑da Puang ung matairing. Deaa‑mo kang dio se! Hampoꞌ ha mupatongang tungka‑mo: se. 31Deanna‑mo to, hau mariaꞌ se moa teꞌ, ‘Aka ti ung ta annea?’ dea‑raka, ‘Aka ti ung ta enùnga?’ dea‑raka, ‘Aka ti ung ta pakea se?’ 32Sàbaꞌ nasang to, na lola tau ung dang mangìsang‑kang Puang, pambàtiꞌ Amammu i suruga mangìsang teꞌ nasang to u parallui se. 33Hampoꞌ okaꞌ‑kai: dolung ti kadatuangna Puang pang katongangangNa, pang nai anto, nasang to u nihengiing ho. 34Deanna‑mo to, hau mariaꞌ ti àlo i hingkoꞌna. Sàbaꞌ i hingkoꞌna, laing‑da ho ti kamasussaangna. Àlo tee kànaꞌ‑da ho ti kamasussaangna.”
Iliyochaguliwa sasa
Matius 6: skx
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
