Matius 4
4
Yesu na kakaꞌi Datuna dihata bulituku
(Mrk. 1:12-13, Luk. 4:1-13)
1Nai anto na baha Pinanahanna Puang ti Yesu làngang mao i padang ung tunini mangking na kakaꞌi Datuna dihata bulituku. 2Ladu mapuasa ùpaꞌ pulona àlona ùpaꞌ pulona henginna ti Yesu, burorang‑mo. 3Bùruꞌna‑mi ti Pumpukakaꞌi to pang musua: teꞌ, “Ìna U Anakàna Puang, baꞌ pupiluhali‑mi roti ti hatu-hatu tee.”
4Hampoꞌ Na sùmui teꞌ, “I laling Suraꞌna Puang nironno: teꞌ, ‘Tulino ha tuho:‑ida nai roti teng, hampoꞌ nai nasang sua: ung sòhong nai takona Puang.’*#4:4 Ul. 8:3.”
5Nai anto, na baha Datuna dihata bulituku mao i Yerusalem, pang na paone: i kaoneang ung kamìnang iaho i kaoneang Tamming Kabussùngang. 6Na konaina‑mi moa teꞌ, “Ìna U Anakàna Puang, baꞌ mingkaràsang‑Ko. Sàbaꞌ i laling Suraꞌna Puang nironno: teꞌ,
‘Puang mampantuyua pira-pira malaikaꞌNa mantimang‑ko,
mangking moi kokoꞌmu ha mingerong‑i i hatu.’*#4:6 Mas. 91:11-12.”
7Na sùmuinna‑mi Yesu teꞌ, “Hampoꞌ nironno: ho teꞌ, ‘Hau mangkakaꞌi Puangmu.’*#4:7 Ul. 6:16. Mangkonai: Hau mangkakaꞌi Puangmu, Yesu mampusua: sua: to manturo: pàli i kalaeNa, moa teꞌ ìna mingkaràsang, palleona mangkakaꞌi‑Da Puang.”
8Nai anto, na baha Datuna dihata bulituku mao i mungku ung iaho tungka na panturo:‑ing nasang kadatuang i lino sola: nasang kamalabiꞌangna. 9Musuana‑mi mao i Dea teꞌ, “Nasang tee U ku hengiing, deinti U tumunnuku mampinombai‑kaꞌ.”
10Na sùmuinna‑mi Yesu teꞌ, “Malai‑ko Iblisiꞌ! Sàbaꞌ i laling Suraꞌna Puang nironno: mao i taunNa teꞌ, ‘Parallu u mampinombai teng Puangmu, pang mallayani‑I!’*#4:10 Ul. 6:13.”
11Na paliina‑mi Datuna dihata bulituku ti Yesu, màli: na pira-pira malaikaꞌ bùruꞌ sahe: massommoꞌ‑I.
Yesu mamparara kamaꞌangNa i Galilea
(Mrk. 1:14-15, Luk. 4:14-15)
12To na sàding‑mo Yesu teꞌ nitingkang ti Yohanes Pumpudoiꞌ, malai nai Yudea mao i Galilea. 13Hampoꞌ ha mòrok‑I hura: i Nasareꞌ, sangadinna mingeliꞌ mao i lipu: Kapernaung i minanaꞌ Tasiki Galilea, i pangalanna maang tampo: tu Sebulon pang Naptali, 14mangking nikannaꞌi aka ti ung nipusua: mangola: nabi Yesaya teꞌ,
15“Tau ung leta: i tampo: tu Sebulon pang tu Naptali, dea‑mo Galilea,
i dalang mao i tasiki i heteꞌna Uhai Yordan,
ung na kaonei: ho tau ung dang dea tu Yahudi,
16ung tuho: i laling kamakarinnìngang,
mangitaa‑mo kamasilaoang ung makàsaꞌ.
Pang kamasilaoang to, tumpanaa‑mo mao i dei: se ung tuho: i tampona tau ung mate kapatongangang.”*#4:15-16 Yes. 8:23 – 9:1.
17Nai anto, na rara‑mo Yesu ti mampakareba suana Puang moa teꞌ, “Mingkatobaꞌ‑mo: se nai dosa-dosammu se, sàbaꞌ na rara‑mo Puang ti muparenta!”
Yesu manghàngo pasikolaNa ung parrara
(Mrk. 1:16-20, Luk. 5:1-11)
18Tòna mammulao i minanaꞌ Tasiki Galilea ti Yesu, mangita idua tau ung mantaladi:, dea‑mo Simon ung nikonai: ho Petrus sola: Andreas. Tarrang‑i se mujallaꞌ i tasiki, sàbaꞌ pumpujallaꞌ‑i dasse:. 19Musuana‑mi ti Yesu moa teꞌ, “Hàmo: se. Ulaꞌ‑Maꞌ. U Ku pupiluhalia se pumpujallaꞌ tulino.” 20Na paliina‑mi se sahe: ti kamaꞌangna pang miluhali‑mo pasikolana Yesu.
21Pang nai anto na patùrung Yesu ti pammulaoangNa. Mangitanna‑mi idua tau sintàna: ung mantaladi: ho, dea‑mo Yakobus pang Yohanes anakàna Sebedeus, i laling lemmangna tarrang mampabeloi: jallaꞌna‑i se sola: amanna. Na hàngona‑mi ho Yesu, 22pang sàhe: na palii:‑i se ti lemmang pang amanna pang mangulaꞌ‑I.
Yesu mupaturo: pang mampumatalete: tau
(Luk. 6:17-19)
23Nai anto, Yesu mingkuliling i nasang pangalanna Galilea mupaturo: i tamming-tamming kapinombaang. Mampakareba Kareba Belo: mampatu: kadatuang suruga, pang mampumatalete: ho tau ung si mipanaꞌ nai nasang sai pang ung si sala-salaang i àlaꞌna‑i se. 24Karebanna Yesu dumallaꞌ deaꞌ i nasang pangalanna propinsi Siria, dea pùna mambaha‑i se nasang tau ung si mipanaꞌ nai rupa-rupa sai mao i Yesu. Ara ung si na sosoko dihata bulituku, ung si aniꞌang, ung si na kosu. Nasang Na pumatalete:, 25mambùruꞌ‑ing boso: tungka tau ung mangulaꞌ‑I tempo to. Ara ti ung bùruꞌ nai Galilea, ara ung nai Dekapolis, nai Yerusalem, nai Yudea pang nai lipu: i heteꞌna Uhai Yordan.
Iliyochaguliwa sasa
Matius 4: skx
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
