Pulim 14
14
Abaram jwoŋi Lot o yage
1Kanto maŋa kam ne, pwa badwonna déem mo wora. Babilonia#14:1 Babilonia: Hiburu = Sinare teo pɛ yere mo Amarafeli. Elasare teo pɛ yere maa ye Arioki. Elam teo pɛ yere maa ye Chɛdɔlaoma. Ko daare Goyim teo pɛ yere mo Tidali. 2Pwa bana banto déem ke ni daane mo se ba vo ba kwaare jara de ba dona pwa banu dedaane ba nɔɔna. Banto maa ye Sodom teo pɛ Bera, de Gomora teo pɛ Birasa, de Adema teo pɛ Sinaba, dedaane Zeboyiim teo pɛ Semebera, se ko woli de Bela teo pɛ wom. (Zoara teo kom mo konto). 3Pwa banu banto déem ke ni daane mo ba jeeri Sidim bwolo kom ne. Zem jei sento mo ye Yɛ naneo kom#14:3 Yɛ naneo kom = The Dead Sea. 4Bena fuga-yalei maama wone mo pɛ Chɛdɔlaoma tei pwa banu banto. Ko daare bena fuga-yatɔ bene dem ne ba ma lɔ o kwaga ne.
5Bena fuga-yana bene dem ne Chɛdɔlaoma de pwa balo na ke ni ded‑o to laam ma vo Asetarof-Karanayim ba ke jara ba wane Refayi tiina bam. Ba déem ta ma vo Ham ba wane Zuzi tiina bam ba di-ba, ye ba daare ba wane Emi tiina bam na wo Savɛ-Kiriafayim ne to. 6Ba ma daare ba wane Hori tiina bam na wo Edom#14:6 Edom: Hiburu = Seyira zwonnu laŋa kam ne to. Ba ma zeili-ba taa ba vo ba yi El-Paran na bwola de kagoa kam jei sem to. 7Ba ma pipiri ba jwoori ba vo ba yi En-Misipate, (Kadese teo kom mo konto). Ba ma ja jara ba wane Amaleki tiina bam de ba teene dem maama, ko woli de Amori tiina bam ba na zoore Hazazon-Tamare ne to.
8Kanto maŋa kam ne mo Sodom pɛ, de Gomora Pɛ, de Adema Pɛ, de Zeboyiim Pɛ, de Bela Pɛ nwoŋi ba ke daane se ba kwaare jara de pwa badwonna bam Sidim bwolo kom ne. 9Pwa banu banto déem mo kwaare jara de pwa bana. Ko maa ye Elam Pɛ Chɛdɔlaoma, de Goyim Pɛ Tidali, de Sinare Pɛ Amarafeli, dedaane Elasare Pɛ Arioki mo kwaare-ya.
10Gwonnu dedɛ déem maa wo jei sem konto ne ye kɔtaale wo te wone. Ko ma pa se Sodom de Gomora pwa bam de ba jar-keira bam na duri se ba lu jara yam ne to, ba badaara ma vo ba to gwonnu tem wone. Ba badwonna ma duri ba vo ba yi zwonnu laŋa se ba lu. 11Pwa bana bam laam ma vere Sodom de Gomora tiina jejaano tem maama de ba wodiiru maama ba ja ba viiri. 12Abaram choro bu Lot déem na zoore Sodom ne to ŋwaane, ba ma ja‑o ba woli da ba viiri, de o jejegero tem maama.
13Nɔɔno wodwoŋi déem ma wane o lu jara yam ne. O ma vo Hiburu tu Abaram tei o ta o bere‑o kolo maama na ke to. Ka maŋa kam ne o déem zoore o twɛ de tei-kamunnu tem na ye Amori tu Mamere nyem to mo. Mamere wom chorro déem mo ye Esekola de Anera, ye ba maama dedaane Abaram déem ya maŋe ba sɔ ni daane mo. 14Abaram na lɔre we pwa bana bam jaane o choro Lot ba woli da to, o ma bwoŋi jar-keira bia yatɔ de fuga-nana (318) ba na loge-ba o sɔŋɔ ne to. Ba ma pare pwa bam ba vo ba yi Dan. 15Tete ne Abaram ma pɔɔre o nɔɔna bam kɔgɔ kɔgɔ se ba kwaare de o dona bam ye o wane-ba. O ma zeili-ba o vo o yi Hoba na wo Damasika baŋa ne to. 16O ma jwoori o jwoŋi jejaano tem maama ye o daare o vere o choro bu Lot de o jejegero tem maama ba jeŋa ne o ja o jwoori, ko woli de kaana bam dedaane nɔɔna bam maama.
Melkizedeka ke zaane Abaram yuu ne
17Abaram na wane Chɛdɔlaoma de o pwa badwonna bam ye o jwoori to mo Sodom Pɛ nwoŋi o jeeri‑o Savɛ bwolo kom ne. Ba ta bwoi-ko we ‘Pɛ bwolo kom’.
18Melkizedeka déem maa ye Salem#14:18 Salem ye Jerusalem yere-dwoori mo. tiina Pɛ. O ta maa kwori o ye Yuu-tu Wɛ wom kaanem tu mo. O ma ja bworobworo de sa-sona o ba o pa Abaram. 19O déem ta ma ke zaane o ke Abaram yuu ne ye o we,
“Yuu-tu Wɛ wom na ke wɛyuu de tega baŋa to
wó swɛ nmo swolim.
20Yuu-tu Wɛ wom yɔɔre o maŋe de tia,
o na wane nmo dona bam
o ke-ba nmo jeŋa ne to ŋwaane.”#Hiburu 7:1-10
Abaram laam ma pɔɔre jejegero tem o na jaane o jwoori jara yam jei ne to maama kuni fuga, ye o pa Melkizedeka popɔra dedoa.#Pulim 28:22
21Sodom Pɛ déem ma ta de Abaram we, “Pa-ne a nɔn-bia bam maama se n daare jejegero tem n ta‑n jega.” 22Abaram ma leiri Sodom Pɛ wom we, “Amo seene yia mo a ma a du duuri de Yuu-tu Baŋa Wɛ wom, o na ke wɛyuu de tega baŋa to we, 23amo seene a bá jwoŋi kolokolo na ye nmo nyem to. A bá sɛ a jwoŋi nmo woŋo fenfee de, ko ná maŋe ko ye n gare-ŋona, naa n natere ŋona de, kokuri to, a ba lage se maŋa kadwoŋi ne se nmo bere n tete n ta we, nmo mo pɛ se amo ji naduni. 24Amo bá sɛ a jwoŋi kolokolo n tei ne ko ná dae wodiiru telo yerane a nɔɔna bam na di to. Ko daare, Anera de Esekola dedaane Mamere jege se ba jwoŋi ba tete popɔra mo, banto de diim na tɔge ba woli amo ye dé ke jara yam to ŋwaane.”
Iliyochaguliwa sasa
Pulim 14: KBG
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2020, Ghana Institute of Linguistics, Literacy and Bible Translation (GILLBT)