Mataio 13
13
Parabole o ipi uiti mere tovuseaita vita vei
(Mareko 4:1–9; Luka 8:4–8)
1Lea sare voa Iesu uvi kiripi sitoi poe miri voa forera avi, 2karu sitavu sitavu arero tai kokorukōpe. Iesu lōfeare vei oroti aea voa forea avōpe, aea lea karu sitavu foromaiapo ere miri voa popōva puavōpe.#Luk 5:1–3 3Are etau rauapo la parabole o ita o mei mei mō ōpe,
Mapaia, forōva arita karu aea uiti mere tovuseai vei terōpe. 4Te are uiti mere tovuseaiape soa, mere hea otiharo voa sisapi, ori fufuka fafuka erero la’ haroavaiape. 5Mere hea fave mea voa sisapi siseiape; lōvoa mea kafearu kao; haiauru utohoa forerōpe ipi mea seseroro eavia, 6sare sa patei, erero toa hehea lei fefeōpōpe, ipi ere likilea seaupai kofa auke leipe eavia. 7Mere hea ikoika ve aru voa sisapi, lea ikoika ere ita haiauru foreri, erero aieri mekeke leipe. 8Soka uiti mere hea sisi mea voa sisapi, fare taipe, uti hea fare 100, hea ta 60, hea 30. 9Karu mapaita ōvauta ita oria, lea o la mapaia.
10Soka satiriaraita karu arero tai koti mō ōpe, A erero parabole o sa sukōvō vovo meita ipi levea? 11Are tava o mō ōpe, Ualare ve basileia ve hohore etau la ero miōri, e sa ore leiti vei, a—, erero miarai kao. 12Ipi etau ovi meita lea karu la etau maea aeata topiari miarai roi; a—, etau ovi mei auke leita lea karu, are ovi meita lea etau orakafofa la farai roi.#Mat 25:29; Mak 4:25; Luk 8:18; 19:26 13Lea vei ara erero parabole o sa sukavaita ipi meha, ere ofae eovi, a—, eavai sore, aea ere mapi, a—, mapai sore, eite ta ere ore leiti sore.#Isa 6:9–10 14Lōfeare vei Isaia sa evera moipe o ere vei okofa la leipea, mōfeare,
E mapi mapi, a—, eite ore levi leiti roi;
e ofae eovi eovi, a—, haiiri levi fapai roi.
15Ipi mea karu ve haiivavu kafearu;
aea ereve ōvafae ta suru,
aea ereve ofae ta kaputa roroa,
ere ereve ofae sa eovi, ereve ōvauta sa mapi,
aea ereve haiiri ta fapi, ere haiiri kerori,
ara erero ata lei lareva leiti ave.
16A—, eve ofae lareva ia, ipi ere ofae eavaitore, aea eve ōvauta ta reha, ipi ere mapaitore.#Luk 10:23–24 17Ipi okofa ara ero omoi, Peroveta karu ita aea mai haura karu rauapo ita e sa ofae eavaipeta mea etau la eavai haikaeaiape, a—, ere eavai kasirau; aea e sa mapaipeta mea etau la mapai haikaeaiape, a—, ere mapai kasirau.
18Soka uiti mere la tovuseaita vita ve parabole ve eite mapaia. 19Karu aea ovoro basileia vei mapaita, a—, eite ore auke leitita, lea mea maealolo vita koti areve haiiri voa tovuseaita mere la toapi ovaitore. 20Uiti mere otiharo voa tovuseaita karu ve mai meha, are ovoro la mapai, a—, meahailareva ita arero sukaerereai; 21a—, areve iri voa likilea auke feare lei, soa taheka haria pōvi, aite haisora ō hasiavaita etau sa lea ovoro vei foreraita lea mea, are utohoa haiarara lei kiripaitore. 22Uiti mere ikoika ve aru voa tovuseaita lea karu ve mai meha, are ovoro la mapai, a—, maerovaeka ve haikavora etau hariaharia, aea pisoso etau ve maeahahauhahau ovoro la aieri mekeke lei, are fare lōfeare tai auke leititore. 23A—, sisi mea voa tovuseaita lea karu ve mai meha, are ovoro la mapi, eite ta ore lei, fare taitore, hea fare 100, hea fare 60, hea fare 30.
Parabole o ipi uiti aea mere merava vei
24Are parabole o aeata erero mō moipe, Kauri ve basileia are usoso mōfeare, uiti mere lareva areve forōva oti voa tovuseōpe vita feare. 25A—, karu ivutu iroropōpe lea mea, areve ote karu koti, mere merava uiti ve aru voa tovusea roroka lei, au soeōpe. 26Soka uiti haiauru foreri fare taipe lea mea, lea etau merava ta eovi ore leipe. 27Lea mea lea forōva oti ve papuvita ve sarufa karu arero tai koti mō ōpe, Papuvita e, a uiti mere lareva la haria ave forōva oti voa tovuseai kao ei? Lea etau merava lehara? 28Are erero mō ōpe, Ote karu sa leipe etau reha. Ere arero mō ōpe, Aita, a haikaeaipea ela te erero fareovai vei? 29Lō mei are mō ōpe, Kao, ipi e etau merava la fareovaita, a—, e uiti ere ita fareovai ave. 30Ereuka fareho asi asi te fare sarapaita soa foreraita lea mea, ara fare sarapaita karu la satiriōri mō moi roi, Etau merava la omopa fareōvi kokoruka hiuka hōea a voa sukapai vei; a—, uiti la arave sitoa uvi voa toeaia.
Parabole o sinapi mere vei
(Mareko 4:30–32; Luka 13:18–19)
31Soka are parabole o aeata erero mō moipe, Kauri ve basileia are usoso sinapi mere farakeka feare, karu farakeka aea sa ovi areve forōva oti voa vipōpe. 32Etau mere foromai voa are titilese kofa, a—, are asi rovaea leitita lea mea, are laloita tolotolo foromai la sapatei, tola feare lei, lea vei arori voa roroaita ori areve lakai voa ta iroropaitore.
Parabole o faloa la lei fefesita muramura vei
(Luka 13:20–21)
33Soka are parabole o aeata erero mō moipe, Kauri ve basileia are usoso faloa fefesita muramura feare, ua aea sa ovi faloa kōkusaesa oroisoria voa korari korari tetete faloa foromai fefesipe reha.
Uiti aea mere merava ve parabole o ve eite
(Mareko 4:33–34)
34Mea etau foromai la Iesu karu sitavu la parabole o sa moiape; are erero ovoro parabole o auke ita satiriarai kasirau. 35Lōfeare vei peroveta karu sa mō moipe lea o la okofa leiti vei.
Ara arave ape parabole o la moi vei fapai roi,
mearovaeka la pisosipe soa itiiti faitora arorisa siseita lea etau la ara pisiri mei muiai roi.#Sal 78:2
36Aite are karu sitavu la kiripi, uvi voa oropi, areve satiriaraita karu arero tai koti mō ōpe, A mere merava ve parabole o ve eite elaro omoia. 37Are erero tava o mei mō ōpe, Uiti mere tovuseaita vita Karu ve Atute reha; 38forōva oti ve eite mearovaeka; mere lareva ere basileia ve atutemori; 39mere merava ere maealolo vita ve atutemori; erero tovuseōpe lea ote karu Diabolo reha; fare sarapaita soa mearovaeka ve kaleitita soa, aea fare sarapaita karu ere aneru. 40Mere merava kokoruka a sa sa’ kaleitita lōfeare, mearovaeka kaleitita soa ve mai ta lōfeare leiti roi. 41Karu ve Atute areve aneru la itapi, ere areve basileia voa siseita feravi putoita etau etau aea kaiae leita karu foromai la kokoruka fareōvi, 42erero kemo a voa toapai roi. Lōvoa ere fi a’ a’, tao ta karekare ari roi. 43Lea soa voa haura karu ereve Oa ve basileia voa sare feare haea ovava leiti roi. Karu mapaita ōvauta ita oria, lea o la mapaia.
Parabole o milafukōpe pisoso etau vei
44Kauri ve basileia are usoso mea voa milafukōpe pisoso etau feare, karu sa au eovi ata milafuka miavōpe. A—, are hailareva ita te are ovi meita etau foromai la itaea lei miōri tava moni ovi kekese lei, lea oti la itaea lei ovōpe.
Parabole o isave fare vei
45O aeata meha, kauri ve basileia are usoso tava rovaea isave fare lareva kofa la eli itaea lei ovaita karu feare. 46Are isave fare lareva lareva‐eiteapo la eovi, are te are ovi meiape etau foromai la itaea lei miōri, lea isave fare la itaea lei ovōpe.
Parabole o ipi loko vei
47O aeata meha, kauri ve basileia are usoso makaikara iri voa paraeōpe loko feare, ekaka firu hariaharia la elori ovōpe. 48Lea loko soōpe lea mea, ekaka tapora karu arero miri arori voa aruovi patei ovōpe, aea ekaka lareva ere posea voa arisovi vovoisea, a—, ere maealolo la mutatapōpe. 49Mearovaeka kaleiti soa ta lōfeare leiti roi; aneru pisiri voa foreri, haura karu ve aru voa pepeita kaiae karu la fari, 50erero kemo a voa toapai roi. Lōvoa ere fi a’ a’ tao ta karekare ari roi.
51Iesu erero lalasi lei mō ōpe, E mea etau foromai ve eite ore ei? Ere arero mō ōpe, A. 52Soka are erero mō ōpe, Kauri ve basileia ve satiriaraita karu leitita lea Safu Karoro ore karu, are usoso uvi ve papuvita feare, are areve etau toeaita lalava voa etau etau áre, aeata everove etau etau ita la fari muia vovea.
Iesu Nasareta karikara voa
(Mareko 6:1–6; Luka 4:16–30)
53Soka Iesu lea parabole o la mei mei kaleipe soa, are lea oti kiripi, 54aea areve elore karikara voa patei forerōpe. Foreri are sunako uvi voa satiriōri, areve karikara karu lea vei haihava lei mō ōpe, Mea vita mea haiororo aea siahu ita la leavoa ovaitore? 55Mea vita kamuta karu ve atute kao ei? Areve lou ve rare Maria, aea areve mariosu Iakobo, aea Iosefa, aea Simona aea Iuda, ere kao ei? 56Aea areve uarosu foromai ereita ita farehoria roroaia kao ei? Soka mea vita mea etau foromai leavoa ova vovea? 57Lōfeare vei ere arero haiarara lei sukavuteōpe. A—, Iesu erero mō ōpe, Peroveta karu maeati o ita mea vovea, a—, areve elore karikara voa aeata areve uvi karu voa, are maeati o auke ita kerori vo meitore.#Ion 4:44 58Are haihava etau lōvoa leiti kao, ipi ere sa sukaerereai auke leipe eavia.
Iliyochaguliwa sasa
Mataio 13: TQO1983
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Published by the Bible Society of Papua New Guinea in 1983.
