Luke 24
24
Thawkikna
(Matthew 28:1-10; Mark 16:1-8; John 20:1-10)
1Nipi ni zingsang tuungin, numeite thaan vil uh a, amate helkholsa sathau namtuite keng uh hi. 2Thaan kongvang panin, suangtumpui sia a kiliik sa in mu uh a, 3tua ahikom amate a sungah tum uh hi; ahihang amate in Topa Jesus luang a mu bua uh hi. 4Hi thu lamdang sa in, tua munah a din laitakin, thakhat thu in mihing nii, a taang mama puansilh in, amate kungah ding uh hi. 5Numeite lau mama in, a kun uh ciangin, tua mihingte nii in, “A thisate ii omna munah, banghangin a nungta khat hong zong nu ziam? 6Ama hi sungah om ngawl hi; ama kitho kiksak zo hi. Galilee aa a om lai, no tung a hong thusonte phawk kik tavun. 7“Mihing Tapa sia mawneite khut sungah ki aap in, thinglamtee tungah kithat tu a, a ni thum zawkciangin nuntakna sungah hong thoto kik tu hi,” ci hi.#Mt 16:21; 17:22-23; 20:18-19; Mk 8:31; 9:31; 10:33-34; Lk 9:22; 18:31-33
8Tuasia ciangin numeite in a kammalte phawk kikin, 9thaan pan heak kik a, hi thute theampo nungzui sawm le khat te le, a dangte tungah son uh hi. 10Tua numeite Mary Magdalene, Joanna, le James ii nu Mary hi a; amate teng le a dang numeite in hi thu teng sawltakte tungah son uh hi. 11Ahihang sawltakte in, numeite ii thuson sia luithawthong hi tu in, ngaisun uh a, a um bua uh hi. 12Ahizong Peter ding a, thaan sangah hong tai in; kunsuk in a et ciangin, thaan puan simngawl bangma dang a mu bua hi. Tuaciang in thupiangte huvau tumdang sa in, ama inn ah cia kik hi.
Emmaus khua A Paina
(Mark 16:12-13)
13Tua ni mama in Jesus nungzuite nii sia, Jerusalem pan tai sali a khualana Emmaus khuano ah pai a, 14tuaciang amate in tua hunsung thupiang teng kikum uh hi. 15Tuabang a kikup laitakin, Jesus ama mama in, neak a, amate taw tonkhawm hi; 16amate in Jesus mu napi a tel bua uh hi. 17Jesus in amate tungah, “Lampai kawm in khat le khat bang thu son nu ziam?” ci in dongh hi.
Amate maikhingin ding uh hi. 18Amate ngeal sung panin Cleopas a kici pa in, “Jerusalem khual hong haw mihingte sung pan, tu sung teng a thupiangte a he ngawl sia nangma bekma hi thong ni ziam?” ci hi.
19“A bang thu ziam?” ci hi.
“Nazareth mi Jesus tungah thupiangte hi,” ci in zo kik hi. “Hisia pa in, kamsaang khat hi a, ama sonte le sepna theampo vaang nei hi, ci in Pathian le mihing theampo ii ngaisut pa ahi hi. 20Ka thiampi liante le ngamukte in thidaan thuak tu in aap uh a, tuaciang ama thinglamtee tungah kithat hi. 21Israel te suatak a pia tu pa hi tu hi ci in ka lam en uh hi! Tua banah hi thu hong pian zawk sia tu in a ni thum ni hi zo hi. 22Koma pawl sungah numei pawlkhat in hong liinglawngsak hi; amate khuavak bekin thaan vil uh a, 23ahihang a luang a mu zo bua uh hi. Amate hong heak kikin, vantunglalangte a muna thu le ama sia nungta kik a hina thu son uh hi. 24Ka pawl uh sung pan aheap thaan ah pai uh a, numeite thuson bang tatakin om a mu uh hi; ahihang ama a mu bua uh hi,” ci hi.
25Jesus in amate tungah “Bangza ta in mawmaw nu ziam? Kamsaangte son theampo bangza in um thei papaih ngawl nu ziam? 26Messiah in hite a thuak phot tu kul a, tua zawkciangin vaangletna sungah tum tu hi ngawl ziam?” ci hi. 27Jesus in ama huvau Moses ii laibute pan a kipan kamsaangte lai at theampo dong Laithiangtho a vekpi sungah a kison teng sonthiang hi.
28A pai natu khuano sia a thet nai tu ciangin, Jesus in a paisuak tu bangin ki omsak hi. 29Ahihang amate in tho uh a, hi bangin ci uh hi. “Koma kungah hong taam ta'n, ni zong tum dektak zo a, khuazing tu hi,” ci uh hi. Tua ahikom amate kungah taam tu in pai hi. 30Amate taw an ne tu in to a, anluum la in thupha a piak zawkciangin, balneen in amate pia hi. 31Tuasia ciangin amate ii mit hong kihongin, ama tel uh a, ahihang amate kung panin ama bo hi. 32Amate khat le khat hi bangin kici uh hi, “Lampi tungah Laithiangtho hong sonthiang laitakin ih thinsung meikuang taw hal bang hi kana ngawl ziam?” ci uh hi.
33Amate ding pai a, Jerusalem khua ah pai kikin, nungzui sawm le khat te le a dangte kikhawm a om a mu uh ciang, 34hi bangin ci uh hi. “Topa tho takpi zo hi! Simon tungah kilak hi!”
35Tuaciang amate nii in lampi tungah a piang thu le, anluum a balneen ciang, Topa ahi hunlam a telna uh bang teng son uh hi.
Jesus A Nungzuite tungah Kilak
(Matthew 28:16-20; Mark 16:14-18; John 20:19-23; Sawl 1:6-8)
36Mihing niite in hi thu teng a sawson laitakin, thakhat thu in Topa amate laizang ah ding a, “Thinnopna na nga tavun,” ci hi.
37Thithaa khat mu kisa in amate patau mama hi. 38Ahihang ama in, “Banghangin patau nu ziam? Banghangin hi up laaknate na thinsung ah hong piang ziam? 39Ka khut ka peang hong en tavun. Keima tatak ma ka hi hunlam hong en tavun. Hong tham tavun, banghang ziam cile thithaa in ngu le taang le samalte, tu a ka nei nong mu thei uh bangin a nei bua hi,” ci hi.
40Hi teng ci in amate a khutte le a peangte lak hi. 41Amate in a um thei bualai hi, banghang ziam cile, amate lungdamna le lamdangsakna taw kidim uh hi; tua ahikom ama in, “Neak tu khat po na nei uh ziam?” ci in ngen hi. 42Amate in ngasa pumhuan bek khat pia uh a, 43amate ii mu tangin la in ne hi.
44Tua zawkciang ama in, “Note taw kong om lai a, kong sonsa thu teng veuma ahi hi: kei taw kisai a ki at, Moses thukhamte, kamsaangte lai atte, le Psalm te hong taangtun kul hi,” ci hi.
45Tua zawkciang amate Laithiangtho a tel natu in, ama in a thinsung uh honsak a, 46tuaciang ama in amate tungah, “A ki at sia hisia hi: Messiah in thuak tu hi, a ni thum zawkciangin thina pan tho kik tu a; 47tuaciang ama min taw kisiik kikna le mawmaisakna sia Jerusalem pan kipan minam theampo tungah kihil tu hi. 48No sia hi thute ii tetti na hi tu uh hi. 49Tuaciangin ka Pa ii hong kamciamsa sia noma sungah keima tatak ma in kong puak tu hi. Ahihang note in tungsang pan vaangletna note tungah hong thet dong khuapi sungah na ngak tu uh hi,” ci hi.#Sawl 1:4
Jesus Van ah Kila
(Matthew 16:19-20; Sawltak 1:9-11)
50Tuaciang ama in amate teng khuapi sung pan Bethany dong paipui a, tua munah khut laamin thupha pia hi.#Sawl 1:9-11 51Thupha a piak laitakin, ama sia amate taw kikhen a, vantung ah kila to hi. 52Amate in, ama a biak zawk uh ciang, lungdamna lianpi taw kidim uh a, Jerusalem ah heak kik in, 53a hun nei uh theampo Biakinn sung Pathian tungah lungdamkona in zangh uh hi.
Iliyochaguliwa sasa
Luke 24: SCB2
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Siyin Chin Bible © Bible Society of Myanmar, 2016
