Luke 23
23
Pilate mai ah Jesus Kipaipui
(Matthew 27:1-2; 11-14; Mark 15:1-5; John 18:28-38)
1A kikhawm theampo hong ding a, Pilate mai ah Jesus paipui uh a, 2tua munah amate in hi bangin mawsiat uh hi: “Hisia pa in, ka minamte lampui khial in, Kumpilianpa zongh shia piak ngawl natu in, mihingte hol in, ama le ama Messiah kumpipa ka hi hi a ci laitakin ka man uh hi,” ci hi.
3“Nang sia Jew te ii Kumpipa na hi ziam?” ci in Pilate in dongh hi.
“Nangma ci bang ahi hi,” ci in Jesus in zo kik hi.
4Tuasia ciangin Pilate in thiampi liante le mihonte tungah “Hisia pa mawsak natu thu bangma mu ngawl khi hi,” ci hi.
5Ahihang amate in nasia seseam in mawsak uh a, “A thuhilna taw Judea ngam bup mite buaisak tu in, kipan hi. Galilee ngam panin hong kipan a, tu in hi sung hong theng hi,” ci uh hi.
Herod mai ah Jesus Kipuak
6Pilate in hi thu a zaak ciangin, “Hi pa Galilee mi ziam?” ci in dongh hi. 7Ama in Jesus sia Herod ii ukna ngammi khat hi, ci in a tel ciang Jerusalem ah tua hun laitak hong om Herod kungah puak hi. 8Herod in Jesus a mu ciangin, a lungdam mama hi, banghang ziam cile ama thu za ngei zo a, a mu nop zawk khuangei zo hi. Jesus in nalamdang lakna pawlkhat vawt tu in Herod in muangmaw hi. 9Tua ahikom Herod in Jesus thu tam mama dongh a, ahihang Jesus in a zo bua hi. 10Thiampi liante le thukham hil syate mai sangah pai a, nasia takin Jesus mawsak uh hi. 11Herod le a ngalkapte in Jesus etsatna taw selno hi; tua zawkciang puantual pha khat silhsak in, Pilate kungah puak kik uh hi. 12Tua ni mama in Herod le Pilate ngualtamh suak uh hi; tua masia hun ahile amate kingal vilvel uh hi.
Jesus Thidaan Kipia
(Matthew 27:15-26; Mark 15:6-15; John 18:39—19:16)
13Pilate in Thiampi liante, lampuite le mihonte sam a, amate munah, 14“Hisia pa in, mihingte lampui khial hi, ci in nong paipui uh hi. Tu in noma mai ah thu ka sit ciangin na mawsak nop uh mawnate khat zongh ama in vawt ngawl hi, ci in ka mu hi. 15Dom ngawlin Herod zongh in, a maw na tu a mu zawk ngawl hu in, hong puak kik hi. Hisia pa in thina thuakna tu taw kilawm ngamtatna bangma a vawt bua hi. 16Tua ahiciang ama ka saatsak zawkciang, ka tha tu hi,” ci hi. 17Paisan Poai om simin, Pilate in thongtaakte khat veu amate atu in a suataksak a ngeina hi.
18Mihon bup in, “Ama that in! Barabbas sia koma atu in suaktasak in!” ci in au uh hi. 19(Barabbas sia khuapi sungah buaina khat a om hu le, mihing thalupna thu khat hu in, thong kitaaksak ahi hi.)
20Pilate in Jesus suatak nuam a, tua hu in mihonte tungah son kik hi. 21Ahihang amate in ausan kik a, “Thinglamtee tungah thatlum in! Thinglamtee tungah thatlum in!” ci uh hi.
22Pilate in a thum veina hi bangin ci hi. “Ahihang ama in bang khialna vawt ziam? Thina thuakna tu za dong ngamtatna a vawt bangma ka mu bua hi! Tua ahikom ama ka saat tu a, tua zawkciang ka tha tu hi,” ci hi.
23Jesus sia thinglamtee tungah thalup natu in, amate in tawlnga ngawlin au uh a, a khakbel ciangin amate auna in zo hi. 24Tua ahikom Pilate in amate ii nget thidaan sia Jesus tungah pia hi. 25Buaina hu le mihing thalupna hang a, thong a kitaaksak, amate ii dei sia pa suaktasak a, tuaciang a uuk babang a vawt tu in, amate tungah Jesus aap hi.
Thinglamtee tungah Jesus Kithat
(Matthew 27:32-44; Mark 15:21-32; John 19:17-27)
26Ngalkapte in Jesus paipui uh a, tuabang a pai laitakin, ngamsung pan khuapi sungah hong pai Simon a kici Cyrene khua mipa taw kisi uh hi. Amate in tuasia pa man a, thinglamtee suan in Jesus nungzui in puasak hi.
27Mihonpi khat in ama zui a, tuate sungah numei pawlkhat in ama kaa a, mau in om uh hi. 28Jesus in amate sang nga in, “Jerusalem numeite awng! Kei atu in kap heak vun, noma atu le na tate atu in kap po vun. 29Banghang ziam cile, ‘Numei ta nei thei ngawlte le nau noailuai a nei ngeingawlte bangza in hampha ziam?’ a kici hunte hong theng tu hi. 30Tua hun sia mihingte ii, mualpite tungah, ‘Ko tungah hong cim tavun!’ mualnote tungah, ‘Hong seal tavun!’ a kici hun hi tu hi.#Hos 10:8; Tpl 6:16 31Banghang ziam cile a thingkung sia a hin lai in, hi bangin kivawt ahile, a ko ciang bang suak tu ziam?” ci hi.
32A dang phalakte nii zong Jesus taw kithat tu in, paipui uh hi. 33Amate “LUNGU” a kici na mun a thet ciangin, tua munah Jesus sia thinglamtee tungah kilh uh a, phalakte nii zongh a ziatsang ah khat, a veisang ah khat kilh uh hi. 34Jesus in “Pa awng, amate mawna maisak in! Amate in bang vawt uh ci zongh a tel bua uh hi,” ci hi.#Ps 22:18
Tuaciang amate in nuangtang lotna taw ama puante hawm uh hi. 35Jesus sia lampuite in ciammuina in nei uh a, “Ngualdang zongh hun thei hi; Pathian ii teal Messiah ahile ama le ama kihun ve hen!” a ci uh laitakin mihonte in, dingin en hon uh hi.#Ps 22:7
36Ngalkapte zongh in, selno uh hi: amate in ama kungah kaato uh a, sapittui haau pia uh hi.#Ps 69:21 37“Jew te kumpipa na hile nangma le nangma kisuaktasak in,” ci uh hi.
38Ama ii tungah, “Hisia in Jew te ii Kumpipa ahi hi,” ci in ki at hi.
39Ama taw a kikhaikhawm phalakpa khat in selno hi. “Nang Messiah hi ngawl ni ziam? Nangma le nangma kisuaktasak in a, ko zong hong suaktasak ta'n!” ci hi.
40Ahihang phalak dangkhat pa in, ama teih a, “Pathian kiita ngawl ni ziam? Nang in ama bangma in daan na thuak hi. 41Ahihang ei ih hile ih ngamtatna taw a kiphu tu in, ih thuak ahiciang ahi tu ma hi; ahihang ama in khialna bangma vawt ngawl hi,” ci hi. 42Tuaciang ama in Jesus munah, “Jesus awng, Kumpi in nong pai ciangin, kei hong phawk ta'n!” ci hi.
43Jesus in ama munah, “A maan tak kong ci ciang, tuni in nang sia keima taw Paradise ah na om tu hi, ci in kong kamciam hi,” ci hi.
Jesus Thina
(Matthew 27:45-56; Mark 15:33-41; John 19:28-30)
44Sun nai sawm le nai nii hun bang ciangin ni taang nawn ngawl a, nitak nai thum dong ngamsung buppi khuazing hi; 45tuaciang Biakinn sungah inndoi doina puankhai sia khen nii kisua in, kizentham hi.#Pu 26:31-33 46Jesus in nging takin hi bang hong au hi, “Pa awng! Na khut sungah ka thaa kong aap hi!” a ci zawkciang ama thi hi.#Ps 31:5
47Ngalkap hon ukpa in a piang thu teng mu a, ama in Pathian pok hi. “Ama sia mihing pha tatak khat hi!” ci hi.
48A en tu kikhawm mipite in, a piang sa thu teng a mu zawk uh ciangin, inn ah cia in, hee leilam in a awm beang uh hi. 49Jesus taw a kihe theampo le Galilee ngam pan ama a zui numeite in, ngal et uh hi.#Lk 8:2-3
Jesus Kiphumna
(Matthew 27:57-61; Mark 15:42-47; John 10:38-42)
50Judea ngam Arimathea khua mi Joseph kici khat om hi. Ama a zatakhuai mihing pha khat hi a, Pathian Ngam hong thet tu a ngakpa ahi hi. 51Ama Council Upa khat ahihang, a lawmte ii thukhenna le, ngamtatnate a thukim bua hi. 52Ama in Pilate omna ah pai in, Jesus luanghawm ngen hi. 53Tuasia zawkciangin, a luang khiasuk a, puankaang neal khat taw a tun zawkciang, kuama kisial ngeingawlna, a kikhuak suanghawng thaan khat sungah sial hi. 54Tua ni sia nipi zawk ni nga ni hi a, Sabbath ni hong theng dektak hi.
55Galilee ngam pan Jesus nung a zui numeite Joseph taw hong pai uh a, a thaan le Jesus luang kisialna mu uh hi. 56Tua zawkciangin amate in a luang zut natu in, hel namtui le paaknamtuite vawtkhol tu in inn ah cia kik uh hi.
Thukham om bangin amate Sabbath ni in tawlnga uh hi.#Pu 20:10; Thkna 5:14
Iliyochaguliwa sasa
Luke 23: SCB2
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Siyin Chin Bible © Bible Society of Myanmar, 2016
