Yohana 7

Zeso na̰ van ma be hoɗ fareba ne ta to

Mat 10.16; Yoh 5.44; 15.18-19

1Ano mbe ma guwa̰, Zeso ka mbo ge suwal ge Galile ne ma diŋ peɗ. Be vin mbo ge suwal ge Jude ne ma ya to, ge dape, Yahuɗ ma ga̰a̰l ma ka ɓyare vin̰a ge hun ne. 2Zane no, vḛḛso Gur ge Yahuɗ ma way gaa ya guwa. 3Zeso na̰ van ma jan ne go: Ɗege ge suwa mbe go, mo mbo ge suwa Jude yà, ndwa go mo nda ge ame hateya ma kuwa kaŋ ge mo kee num ma waɗme. 4Kaɗɗa ndu a̰me ɓyare go nda kuwa na, ne way tene ge na kaŋ keeya ma zì to. Kaɗɗa mo kee kaŋ ano mbe ma go, ngay tene zum ge nda ta. 5Ago, ne na̰ van ma sḛ puy, àa be hoɗ fareba ge ne ta to. 6Zeso jan num go: Mbi dwam ma gale be mbyaɗ to, ɗaŋɗe, dwam ma mɔɗwag jwab ge ḛ pe. 7Nda ge dunin̰a zige ma laa ɓyare ḛ ɓyare, ɗaŋɗe, num laa ɓyare mbi to, ge dape, mbi jan num go num kee go kaŋ keeya ge sone ma. 8Ḛ ɗe, ḛ mbo mbo kee vḛḛso. Kaɗɗa ge mbi, mbi mbo ge vḛḛso mbe ya to, ge dape, mbi dwam ma gale be mbyaɗ to. 9Guwa̰ ge jin̰a num fare mbe go, gaa kàɗɗa ge suwa Galile go.

Zeso mbo sok kee vḛḛso ge gur ma way yà

10Sok ge Zeso na̰ van ma mbo vḛḛso yà ɗe, ne sḛ mbo ge num pe yà waɗme, ɗaŋɗe, be kee tene kuwaya ge kɔn̰al go to, kaa ge nda buwal zì. 11Yahuɗ ma ga̰a̰l ma ka ɓyare ne ge vḛḛso mbe go, àa ka ele ta go Zeso mbe ge diya de? 12Ge ɓase ma buwal zì, nda ka faa gḛḛ ne fare. A̰me ma ka janna go: A ndu ge kwaɗa ne. Gegene ma ka janna go: To, a ndu ge n̰aame nda ne. 13Go no puy, ndu a̰me ɗu be ka faa ne fare zum waŋ to, ge dape, àa ka chiya maa ga̰a̰l ma voo.

14Sok ge nda kê vḛḛso deɗ-ɗa ne dwam ma tuwal ɗe, Zeso mbo ge zok ge Dok ne pul diŋ yà, ɗege ka hate nda. 15Yahuɗ ma ka kee ajab, àa ka ele ta go: Kee pe gyana, ndu mbe wa ka kuwa kaŋ gḛḛ go, be ge ne seɗ hateya ge sok hate nda a̰me go ɗu to de? 16Zeso gwan ge num janna go: Fare ge mbi hate num no ma mbo ge mbi ta to, ɗaŋɗe, ge Ndu ge teme mbi ya ta. 17Kaɗɗa ndu vin tene ya kee laa ɓyareya ge Dok ne, mbo kuwa go fare mbe ge mbi hate num ma, mbo ge Dok ta ya koo mbi hate num ne ge mbi pagal de. 18Ndu ge kaɗ faa na fare ma sḛ, ɓyare go nda dore na. Ɗaŋɗe, ndu ge kaɗ ɓyareya go nda dore ndu ge doo na tèmel ya, jan fare ge fareba, a̰me ge hày ne zì to. 19Daa be Moyiz ho̰ ḛ eeya ma ne to de? Go no puy, ndu a̰me ge ḛ buwal zige ɗu ge mbo ge num pagal to peɗ. Ge dape, ḛ wa ka ɓyareya go ḛ hun mbi de? 20Ɓase ma gwan ge ne janna go: On̰om ge sone wuwa mo zì ne de. Ndu ge ɓyare hun mo huɗi de?

21Zeso gwan ge num janna go: Mbi dana kê kaŋ a̰me ɗu boo, ḛ gwan kee ajab no peɗ me. 22Moyiz ho̰ ḛ eeya ge jan go ḛ vin̰a ḛ van ge soɗob ma bḛḛ ne. Go no puy, a be ne sḛ ee ḛ kee ano mbe ne to, ɗaŋɗe, ee pe ge nè baŋ ma ta ya day. A ge pe, ḛ vyan ḛ van ge soɗob ma bḛḛ no, koo ge dwam sabaɗ go. 23Kaɗɗa ḛ ge vin̰a ge vyan ḛ van ge soɗob a̰me ma bḛḛ ge dwam sabaɗ go, ndwa go ḛ ɓyare hele eeya ge Moyiz ne pagal to no, ge dape, ḛ laa wa ka hoɗɗa ge mbi ta ge mbi zo̰o̰ ndu tadaŋ-tadaŋ ge dwam sabaɗ go pe de? 24Ne kaa ge ḛ daa kṵṵ sariya ge kaŋ ge ḛ kuwa ne digi kaw pagal to, ɗaŋɗe, ḛ kṵṵ sariya temel ge kaŋ ge ḛ kuwa ne pe hetel pagal.

Zeso be talla ge Dok nee ne to de?

25Nda a̰me ge kaa no suwal ga̰a̰l Jerusalem diŋ ma ka ele ta go: Daa be ndu ge àa ɓyare ne hunna ne no to de? 26Ḛ kuwa, a faa no ge nda ndwa go no peɗ ba! Ndu a̰me ge jan ne fare to me. Ndil ge mojo̰o̰ nè ga̰a̰l ma kuwa ya go ne Krist, ndu ge Dok taa nee ne no kade? 27Kaɗɗa ge ndu mbe no ya, nè kuwa suwal ge mbo no ge ne ya kuwa, ɗaŋɗe, sok ge Krist, ndu ge Dok taa ne mbo mbo ja, ndu mbo wan pe go, ne ge dii ya de to.

28Sok mbe go, ajo̰o̰ Zeso wa ya ka hate nda ge zok ge Dok ne pul ge zum-ge go, oy digi ge ka̰a̰l ndaal go: Ḛ kuwa mbi kuwa, ḛ kuwa sok ge mbi mbo no ge ne ya kuwa me! Ḛ kuwa go mbi be mbo ya ge mbi pagal to, ɗaŋɗe, ndu ge teme mbi ya, a ndu ge fareba ne, ḛ sḛ ma kuwa ne kwaɗa to. 29Kaɗɗa ge mbi, mbi kuwa ne kuwa hetel, ge dape, mbi mbô ge ne ta ya, a ne sḛ teme mbi ya ne me. 30Sok za̰a̰ ne fare mbe ma go, àa ɗege ɓyare vin̰a ge wan ne, ɗaŋɗe, ndu a̰me ɗu ee na tok ne pagal to, ge dape, ne dwam ma gale be mbyaɗ to. 31Nda gḛḛ ge ɓase ma buwal zì mbo ya hoɗ fareba ne ta, àa ka janna go: Sok ge Krist, Ndu ge Dok taa ne mbo mbo ja, mbo mbyaɗ kee kaŋ ajab ma waɗe ndu mbe ne ge keeya ma no de?

Vin̰a ge ɓyare wan Zeso

32Fare ge ɓase ma ka siɗigi ne se se ta buwal zì ge Zeso pe, deɗ-ɗa ge Farisi ma tɔgwa zì. Ge sok mbe go, ga̰a̰l ge nda ge kee tuwaleya ma way mage Farisi ma teme nda ge koy zok ge Dok ne wa ma ya ndwa wan ne.

33Zeso jan ɓase ma go: Mbi go gale ḛ buwal zì swag, guwa̰, mbi mbo gwan ge ndu ge teme mbi ya ta yà. 34Ḛ mbo ɓyare mbi pe, ɗaŋɗe, ḛ seɗ mbi to, ge dape, sok ge mbi mbo kàɗɗa ne go, ḛ mbyaɗ mbo ne yà to. 35Sok mbe go, Yahuɗ ma ɗege ele ta, ta buwal zì go: Ne sḛ mbe ɓyare mbo na ndwa dii ya ge go nè wa seɗ ne to de? Ɓyare mbo ge nè rusu ge kaa no ge Grek ma#7.35 Rusu ge ɗogle ma: A ge pool kaɗ rusu Grek ge ame Dok ge Yahuɗ ma way. A ge pool gwan kaɗ rusu ge ɗogle ge faa Grek ma wa. buwal zì yà ndwa hate Grek ma de? 36Ɓyare jan ma̰ fare ge na fare mbe ge jin̰a num ma zì go: Ḛ mbo ɓyare mbi pe, ɗaŋɗe, ḛ seɗ mbi to, ge dape, sok ge mbi mbo kàɗɗa ne go, ḛ mbyaɗ mbo ne yà to de?

37Ge dwam vḛḛso wa aaya go, a dwam ge hini caɗ ne ge na ka̰a̰m, Zeso ɗege digi, oy ge ka̰a̰l ndaal go: «Kaɗɗa mam njuwal kee ndu a̰me go, ne mbo ya ge mbi ta, ne wa njoɗ mam. 38Ndu ge hoɗ fareba ya mbi ta, mam ge hon nda ndwa ma mbo ka ɓul ge ne zì ya, dinna ge Njaŋeya ge Dok ne faa ne fare ma no zì go.» 39Zeso ka jan fare ge On̰om ge Dok ne, ge num ge ho fareba na ta ma mbo ame ne ya. Ago ge dwam mbe ma pul zì, Dok gale wa ya be teme On̰om mbe ya ge num mbe ma pagal, ge dape, Zeso gale wa ya be seɗ pateya.

Za̰a̰ ta to ge Zeso fare pagal

40Nda a̰me ma ge ɓase ma buwal zì, sok ge àa za̰a̰ fare mbe ge Zeso jin̰a ma go, àa ka janna go: A Ndu ge zwagre Dok wa ge nè jobre ne mbe ne fareba. 41Nda gegene ma ka janna go: A Krist, ndu ge Dok taa nee ne. Ɗaŋɗe, nda a̰me ge ɗogle ma ka gwan ge num janna go: Krist, Ndu ge Dok taa ne mà mbo ge suwa Galile ya de? 42Njaŋeya ge Dok ne jan go, Krist, Ndu ge Dok taa ne, mbo kaɗ gan ga̰a̰l Daviɗ Baŋ ge mbo mbo ge Betlehem ya ne, suwal ge Daviɗ too ne diŋ. 43Go mbe no, ɓase ma daa za̰a̰ ta to ge Zeso fare pe. 44Nda a̰me ge num buwal zige ma ka ɓyare go àa wa̰a̰ ne, ɗaŋɗe, ndu a̰me tal tene ee na tok ne pagal to.

Yahuɗ ma ga̰a̰l ma vin hoɗ fareba Zeso ta to

45Guwa̰, nda ge koy zok ge Dok ne wa ma gwan-na ge ga̰a̰l ge nda ge kee tuwaleya ma way mage Farisi ma ta. Num sḛ ma ɗege num pagal janna go: Ge dape ḛ wa gene Zeso ya to de? 46Àa gwan ge num janna go: Ndu a̰me be jan fare ge ne sḛ jin̰a num ma pe go dwam ɗu to. 47Farisi mbe ma gwan jan num go: Ḛ sḛ ma puy, ḛ n̰a ta ya n̰aameya ge ne pe ya waɗme koo? 48Ge ga̰a̰l ma koo ge Farisi ma buwal zì, a huɗi ho fareba ge ne ta ne de? 49Ɗaŋɗe, ajo̰o̰ ɓase mbe ma wan eeya ge Moyiz ne ma fare ma pe to ɗe, àa nda ge Dok vḛḛne na wa no num pagal ma ne.

50Nikodem, ndu ge no ɓan pagal ge Farisi ma way zì waɗme, ge dee mbo ya wal Zeso ta, jan num go: 51Ge nè eeya ma pagal, nè ge vin̰a ge kun sariya ge ndu a̰me pagal be ge nè gale za̰a̰ fare ge ne wa zige mage kuwa ne kaŋ ge kee ma to de? 52Àa gwan ge ne janna go: Mo sḛ puy, mo kaɗ mà se ndu ge suwal Galile ne no waɗme to wa? Kaɗɗa mo hale Njaŋeya ge Dok ne ma pul ya kwaɗa, mo mà seɗ go ndu ge zwagre Dok wa a̰me daa gwan ndage ge suwal Galile diŋ to. 53[Guwa̰, ndu ge diige gwan mbo na yà.

Iliyochaguliwa sasa

Yohana 7: kiaGRB

Kuonyesha

Shirikisha

Nakili