Yohana 1

Zeso Krist a Fare ge mbo ge Dok ta ya ne

1Zḛḛ ge pe dolla ge kaŋ ma way go peɗ, ndu ge àa tol ne Fare wa ya go. Ndu mbe mage Dok kaa dagre, ndu mbe sḛ Dok ne ge na pagal. 2Kaa ya dagre ge Dok mbe go, ge pe dolla ge kaŋ ma way ya day. 3Dok kê kaŋ ma peɗ ge ne ta, koo a̰me go ɗu ge kê, be ne sḛ to ɗe, a to. 4A ne ka hoɗ ndwa ge ɗiŋ ge din ne, ndwa mbe gene kɔn̰al ya ge nda duwana ma ta no. 5Kɔn̰al zen tṵṵ pagal, ɗaŋɗe, tṵṵ mbe ɓyare ne to.

6Dok doo na ndu ge temeya ge àa tol ne Yohana ya no, 7mbo ya jan nda fare ge kɔn̰al mbe ne zum no waŋ, ndwa go nda peɗ num za̰a̰ ne, num ho fareba ge ne fare mbe pagal me. 8A be ne sḛ gene kɔn̰al ya ge nda duwana ma ta ne to, ɗaŋɗe, mbo ya ndwa jan fare ge kɔn̰al mbe ne. 9A kɔn̰al mbe ɗu ɗeŋew ne kɔn̰al ge fareba, ne mbe ge mbo ya ge nda duwana ma ta ge dunin̰a zi, zḛḛ num ta no peɗ me.

10Ndu ge àa tol ne Fare kaa ge dunin̰a zì. Ajo̰o̰ Dok doo dunin̰a ge ne ta puy ɗe, nda ge dunin̰a zige ma be vin ne to. 11Mbo ge na suwa sḛ yà no puy, nda ge ne rusu zige ma be ame ne to. 12Go no puy ɗe, nda a̰me ma ame ne no, àa ho fareba ne ta no. A go mbe no, hage vin̰a ge num pagal ge seŋe Dok van ma no. 13Àa be seŋe Dok van ma dinna ge nda duwana ma tol van ge laa ɓyareya ge num ba ma way pagal go to. Ɗaŋɗe, a Dok sḛ ɓyare ne go, num seŋe na van ma.

14Ndu ge àa tol ne Fare seŋe ndu duwana, kaa ge i buwal zì no, ne kwaɗa keeya kaɗ gḛḛ i ta, kaɗ ge diir ge fareba ge Dok ne me. I kuwa pateya ge ne ne, Dok Ba ee ne seɗ pateya mbe go, ge dape, a ne Van mbe ne ɗu kikiɗ. 15Yohana jin̰a ne fare ge nda ta no, ge sok a̰me ma go, ka oyya go: A ndu mbe ge mbi jin̰a ḛ ne fare ne, mbo ya mbi guwa̰, a ge hormo gḛḛ waɗe mbi, ge dape, a ndu ge no ya teg ne. 16Ge ne kwaɗa keeya ge gḛḛ i ta pe, kee i wa tare ya no peɗ. 17A Dok ee Moyiz ne hon ɓase ma eeya, ngay kwaɗa keeya mage fareba ya ge Zeso Krist ta no me. 18Ndu a̰me be kuwa Dok dwam ɗu to baɗ. Ɗaŋɗe, a ne Van ge ɗu kikiɗ ge no Dok sḛ ge na pagal, ge kaa no dagre ge Dok Ba, a ne sḛ ɗu ge kee ne kuwaya ne ge nda ta.

Fare ge Yohana ba ge kee nda baptem jin̰a ne

Mat 3.1-12; Mrk 1.1-8; Luk 3.15-18; Yoh 5.33-36

19Ḛ za̰a̰ fare ge Yohana ba ge kee nda baptem jin̰a ne, sok ge ga̰a̰l ge Yahuɗ ma way ge no Jerusalem diŋ ma teme nda ge kee tuwaleya ma ya ɓanna ge nda ge mbaa maa ma ndwa go rusu ge Levi ne ma. Sok ge àa dee ya, àa ele ne go: Mo-noo, mo huɗi ne de? 20Yohana be tumri to, jin̰a num fare gezi kɔn̰al be wayya go: Mbi be Krist, Ndu ge Dok taa nee#1.20 Mesi wa hebre, Krist wa grek. Ne pe wanna wa garab go: Ndu ge Dok taa ne. ne to. 21Àa ele ne go: Mo sḛ huɗi ne ɗaŋ de? Mo Eli ne ya? Gwan ge num janna go: Mbi be nee ne to. Àa gwan ele ne go: Mo ndu ge zwagre Dok wa mbe ge wa tii kê ya ge ne pe ne de? Gwan ge num janna go: To. 22Sok mbe go, àa ele ne go: Mo dwaɗ go mo huɗi sḛ ne tem de? Jin̰a i ne ndwa go, i wa gwan mbo jan nda ge teme i ya ma. Mo sḛ jan gyana ge tene pe de? 23Yohana gwan ge num janna ge fare ge ndu ge zwagre Dok wa Ezay ne ge dee jin̰a pagal go: «Mbi ka̰a̰l ge dḭḭ ca ge ndu ge oy no babur pul go go: Ḛ nuusi vin̰a ge temel ɗu ge Bagezok Dok pe.»#Eza 40.3.

24Ge nda ge àa teme num ya ma buwal zì, Farisi a̰me ma kaa. 25Àa gwan ele ne go: Kaɗɗa mo be Krist, ndu ge Dok taa nee ne to, mo kaɗ Eli to, mo gwan kaɗ ndu ge zwagre Dok wa mbe to me no, mo sḛ kee nda baptem ge dape de? 26Yohana gwan ge num janna go: Mbi, mbi kee ḛ baptem ge mam se, ɗaŋɗe, ndu a̰me go ɗu ḛ buwal zì, ḛ wan ne pe to, 27mbo ya mbi guwa̰, mbi be mbyaɗ hugi se saa ne tyako tàal ma to peɗ. 28Àa ka jan ta fare mbe ma no peɗ ge suwal Betani ge no mangaɗam Urdun lee ge mbii-ge go diŋ, sok ge Yohana ka kee nda baptem ne go.

Zeso tame van ge Dok ne

29Sok yan kin̰are, Yohana kuwa Zeso ya mboya ge na ta, jan go: Ḛ kuwa, ndu ge Dok teme ne ya dinna ge tame van ge nda kee tuwaleya ge ne ndwa pore sone ge nda duwana ge suwa pagal ma way no. 30A ndu ge mbi jin̰a ḛ ne fare ne go: Ne mbo ya go ge mbi guwa̰ ya, ɗaŋɗe, ne hormo gḛḛ waɗe mbi, ge dape, a ndu ge no ya teg ne. 31Kaɗɗa ge mbi, mbi be wan pe go, ndu mbe mbo kaɗ huɗi ne tem de to, ɗaŋɗe, mbi mbo ya kee nda baptem ge mam se ndwa go, ɓase ge Izrayel van ma wa̰a̰ ne pe kwaɗa. 32Yohana gwan jan zum waŋ go: Mbi kuwa On̰om ge Harcal siri ge pḭḭ digi ya se dinna ge maale siri go, mbo ya gaa kàɗɗa dagre ge ne no. 33Zḛḛ wal, mbi be wan pe go ndu mbe mbo kaɗ huɗi ne de to, ɗaŋɗe, Dok ge teme mbi ya kee nda baptem mam se, jin̰a mbi go: Mo mbo kuwa On̰om ge Harcal mbo ya se, gaa kàɗɗa dagre ge ndu a̰me ɗu, a ndu mbe ge mbo kee nda baptem ya ne ge On̰om ge Harcal. 34Yohana jin̰a no go, mbi kuwa kaŋ mbe ge kê, go mbe no, mbi gwan jan zum waŋ go, ndu mbe sḛ Dok Van ne.

Nda ge ame hateya ge Zeso ne ge zḛḛge ma

Mat 4.18-22

35Sok yan kin̰are, Yohana go gale ɓanna ge na nda ge ame hateya ge zi ma, 36sok ge kuwa Zeso kaleya, jan go: Ḛ kuwa ndu ge Dok teme ne ya dinna ge tame van go no! 37Nda ge ame hateya ge zi mbe ma sok za̰a̰ fare mbe ma go, àa kàre Zeso pe ya. 38Zeso seŋe tene se, kuwa go num kàre na pe go, ele num go: Ḛ ɓyare da de? Àa jan ne go: Rabbi, ndwa go Ba ge Hateya, mo kaɗ ge diya de? 39Gwan ge num janna go: Ḛ mbo ya kuwa zok. Ano mbe kee ge gyala tok gasamal go. Sok mbe go, àa mbo ya kuwa zok, àa gaa kàɗɗa din gyala ge ne ta dwam mbe go.

40Ndu ge ɗu ge nda ge ame hateya ge zi mbe ma buwal zige, ge daa za̰a̰ fare ge Yohana jin̰a num ma, ge kare Zeso pe ya, àa tol ne Andre. Ne na̰ van Simo̰ Piyer. 41See zḛḛ wal cecew na na̰ van Simo̰ mbe, jin̰a ne no go: I kuwa Ba ge Monna ge wa tii kee ge ne pe, ge àa tol ne Krist, ndu ge Dok taa ne. 42Mbo ge ne ya Zeso ta no, Zeso ndi ne no, jin̰a no go: Àa tol mo Simo̰, mo ba àa tol ne Yohana. Àa gaa tol mo Kefas ndwa go Piyer#1.42 Piyer pe wanna wa garab go njal..

Tolla ge Zeso too Filib mage Natanayel

43Sok yan kin̰are, Zeso vin tene go na mbo suwa Galile. Sok mboya go, deɗ-ɗa ge sok ge Filib no ne go, jan ne go: Seŋe mbi ndu ge ame hateya. 44Filib ɓanna ge Andre mage Piyer, num suwal Betsayda. 45Guwa̰, Filib mbo ya seɗ Natanayel, jan ne go: I kuwa ndu ge maktub ge Eeya ge Moyiz ne mage nda ge zwagre Dok wa ma jin̰a fare ge ne pe, Zeso ge suwal Nazareɗ ne, ge Jozef van. 46Natanayel jan ne go: A̰me ge kwaɗa ge mbaa ndu ge pool mbo ge suwal Nazareɗ ya de? Filib gwan ge ne janna go: Mbo ya mo mà kuwa.

47Sok ge Zeso kuwa Natanayel ya mboya ge na ta, jan go: Ḛ kuwa Izrayel van ge jan fare ge fareba no. 48Natanayel ele ne go: Kee pe gyana mo wa kuwa tem go mbi ndu gegene ne de? Zeso gwan ge ne janna go: Sok ge mo kaa ge fere pe zì, mbi kuwa mo, zḛḛ ge go Filib too mo. 49Ge sok mbe go, Natanayel jan ne go: Ba ge hateya! Mo Dok Van ne, mo gan ga̰a̰l ge Izrayel ma way ne. 50Zeso gwan ne janna go: Ge mbi jin̰a mo bàŋ gagag go mbi kuwa mo fere pe zì pe ɗo, mo hoɗ fareba ya gaw de? Mo mbo kuwa kaŋ ge ɗogle ma keeya waɗe ano mbe no! 51Fareba mbi jan ḛ ne no, ḛ mbo kuwa pḭḭ hageya gezi, ḛ kuwa gyana ge malayka ge Dok ne ma mbo ya se ge Van ge Ndu ne ta, àa ka gwan ge ne ta se mbo pḭḭ digi yà.

Iliyochaguliwa sasa

Yohana 1: kiaGRB

Kuonyesha

Shirikisha

Nakili