Tèmel keeya 11

Piyer wan fare ge see na ya pe

1 Nda ge temeya ge Zeso ne ma, ɓanna ge na̰ van ge ho fareba ge kaa no suwa ge Jude ne go ma, àa za̰a̰ go nda ge no rusu Yahuɗ zì to ma ame fare ge Dok ne ya go waɗme. 2Sok ge Piyer guwa̰ ya ge suwal Jerusalem diŋ, Yahuɗ ge ho fareba ge Zeso ta ma ɗege ne pagal, àa jan ne go: 3Ge dape, mo wa mbo ɗiŋ ge pe rusu ge ɗogle ma buwal zì yà, mo wa zam kaŋ zam ge num de? 4Ge sok mbe go, Piyer hee fare, ɗege wan num fare ma pe zum ɗu ge ɗu.

5Ge dwam a̰me go ɗu, mbi ka kee kaɗeya ge suwal Yafa diŋ, mbi kuwa kaŋ a̰me ɗu dyan tene ge mbi ndwa go. Mbi kuwa kaŋ a̰me dinna ge ba̰a̰ fiyal go, ne keŋ ge ndà ma kaa vwalla ge tàal, ka siri ge pḭḭ digi ya, mbo ya ge mbi ta se guwa. 6Mbi dol mbi ndwa ne ta ndilla kaal swag, mbi kuwa kaŋ kogor ma, kaŋ kavaar ma, kaŋ ge saa ge maa pul ma ɓanna ge njoole ge ɗege no pḭḭ digi ma. 7Mbi za̰a̰ ka̰a̰l a̰me ɗu, jan mbi go: Piyer ɗege digi, hṵṵ ɗu, mo zam. 8Ɗaŋɗe, mbi gwan ge ne janna go: To Bagezok! Kaŋ ge àa tele ne koo ge harcal to be gale waɗ ge mbi wa zì dwam ɗu to. 9Ka̰a̰l mbe dwage mbi janna ge pḭḭ zì ya go: Kaŋ ge Dok haɗ ne ya harcal, kaa ge mo gwan ndil ne harcal to to. 10Fare mbe dwage keeya ɗiŋ ndwa taa, guwa̰, a hee ne gwan mbo ge pḭḭ zì yà. 11Mbi ɗege tan tene, nda taa yan ja ɓyare mbi pe, ge zok ge i kaa gɔswal ne diŋ wa zum no gaw, àa teme num ge suwal Sezare ya. 12Ge sok mbe go, On̰om ge Harcal jan mbi go, ɓa̰a̰ mboya dagre ge num be giɗɗa. Na̰ van ge menengal mbe ma no ɗeme mbi ne mbo suwal Sezare, i ge num ɓa̰a̰ mbo ge Korney diŋ yà no. 13Sok ge i dee yà, ne sḛ ɗege wan i fare pe ge na kuwa malayka mḛḛya ge na diŋ, ge ka janna go: Doo tèmel mbo tol Simo̰ ge àa chiya ne dḭḭl go Piyer ge suwal Yafa ya. 14Mbo jan mo fare ge mo mbiya seɗ monna, mo, ɓanna ge mo zok mɔɗwag. 15Sok ge mbi hee fare janna go, On̰om ge Harcal mbo ya ge num pagal dinna ge dee ee pe mbo ya wal ge nè pagal go. 16Ge sok mbe go gaw, mbi pagal kale dwaɗ fare ge Bagezok ne ge jin̰a go: Yohana kee nda baptem ge mam se, kaɗɗa ge ḛ, ḛ mbo seɗ baptem ge On̰om ge Harcal ne. 17Mà kaɗɗa go Dok ho̰ num bobo ge mojo̰o̰ na ho̰ nè ne go, sok ge nè dee ya hoɗ fareba ge Bagezok Zeso Krist ta go no, mbi kaɗ huɗi ge mḛḛ piliya ge Dok de?

18Sok ge àa za̰a̰ ne fare mbe ma go, num dul wa ma mbo ya ee se, àa ka sale Dok janna go: O̰o̰ a fareba, Dok zane hage vin̰a ya ge nda ge no rusu Yahuɗ zì to ma pagal waɗme, ndwa go num seŋe ta se, num wa ame ndwa ge jin̰al.

Ɓase ge Krist ne ge no suwal Antiyoch diŋ ma

19Guwa̰ swày ge Etiyen ne go, nda ge ame hateya ma gwan seɗ yal ge ɗogle ge ee num ɓasare se. Nda a̰me ma chiya ɗiŋ mbo ge suwa ge Fenesi ne yà, ge til Chipr zì yà, ge suwal Antiyoch yà me. Ɗaŋɗe, àa ka oy Fare ge Kwaɗa ge Bagezok Zeso ne ge Yahuɗ ma ta ɗeŋew. 20Go no puy ɗe, nda a̰me ge num buwal zige ma, ge num suwal no Chipr mage Siren, ge àa mbo ya ge suwal Antiyoch diŋ, àa ka oy Fare ge Kwaɗa ge Bagezok Zeso ne ge Grek ma ta me. 21Ajo̰o̰ pool ge ɓaŋlaŋ ge Bagezok ne kaa dagre ge num, nda gḛḛ mboya hoɗ fareba, àa seŋe ta ya se ge ne ta me.

22Ɓase ge Krist ne ge suwal Jerusalem diŋ-ge ma za̰a̰ fare mbe, ge sok mbe go gaw, àa teme Barnabas mbo Antiyoch. 23Sok ge dee yà, kuwa kwaɗa keeya ge Dok ngay ne ge num ta, kee laa saal gḛḛ, ka moɗege num peɗ go, num ho̰ ta Bagezok ge dul wa ɗu. 24Ajo̰o̰ Barnabas ndu ge nda dore nee ne, kee tèmel ge On̰om ge Harcal pagal, kaɗ ndu ge ho fareba mbyaɗɗa tab me ɗe, ɓase ma gḛḛ mbo ya hoɗ fareba ge Bagezok ta.

25Guwa̰, Barnabas hee vin̰a mbo ɓyare Sol pe, ge suwal Tars yà. 26Sok ge see ne go, a ge ne ɓan-na mboya ge suwal Antiyoch diŋ. Del ɗu jan, àa ka kee kwateya ge ɓase ge Krist ne ma, àa ka hate ɓase ma gḛḛ me. A ge suwal Antiyoch diŋ, àa ee pe tol nda ge ame hateya ma no go Kretiyḛ ma.

27Ge dwam a̰me go ɗu, nda ge zwagre Dok wa ma mbo ge suwal Jerusalem ya, ge suwal Antiyoch diŋ. 28A̰me ɗu ge num buwal zige, ge àa tol ne Agabus, On̰om ge Harcal ee ne wuwage fare ge camal baktar ne, ge mbo mbo ja ge suwa pagal peɗ. Camal mbe mbo ya deɗɗa ge zaman ge gan ga̰a̰l ge waɗe Kloɗ ne go. 29Nda ge ame hateya ma za̰a̰ ta go, ndu ge diige ho̰ kaŋ ge na mbiya honna, ndwa go maa wa teme mbaaya mbo hon na̰ van ge ho fareba, ge kaa no ge suwa ge Jude ne go ma. 30Àa mbo ya kee mbe go tem, àa teme maa bobo mbe ge Barnabas mage Sol tok go, mbo hon nda ga̰a̰l ge ɗeme tèmel ge suwa Jude go ma.

Iliyochaguliwa sasa

Tèmel keeya 11: kiaGRB

Kuonyesha

Shirikisha

Nakili