Tèmel keeya 1

Luk wan zum fare ge na njaŋe maktub hon Tewofil

1Kondore Tewofil, ge mbi maktub ge zḛḛge zì, mbi wa̰a̰ mo kaŋ ge Zeso ee pe kee num mage hate num ma pe zum peɗ, 2ɗiŋ deɗ-ɗa ge dwam ge Dok hê ne mbo pḭḭ zì yà go. Zḛḛ ge go ne mbo digi, ho na nda ge temeya ge na taa num ma na wa no, ge pool ge On̰om ge Harcal ne ta.

3Guwa̰ swày ge ne ne go, ɗiŋ dwam warndà, ka ngay tene sok ma go pe hini-hini ge num ta, ndwa kee num kuwaya go, na tanna go, na ge na ndwa. Ka wan num fare ge muluk ge Dok ne ma pe zum me. 4Ge dwam a̰me go ɗu, sok zam kaŋ ge num go, hoɗ num na wa go: Ḛ wuwa zum ge suwal ga̰a̰l Jerusalem diŋ to, ɓyare go ḛ wa̰a̰ ta da̰a̰re bobo ge mbi wuwage ḛ ne fare, ge mbi Ba dee kee wa tii ndwa hon ḛ ne, On̰om ge Harcal. 5Ago Yohana kee nda baptem ge mam se, ɗaŋɗe, gaa dwam ma kwaɗa lag, ḛ mbo seɗ baptem ge On̰om ge Harcal ne.

Dok hê Zeso mbo ge pḭḭ zì yà

6Ajo̰o̰ Zeso mage na nda ge temeya ma kaa sok ge ɗu go, àa ele ne go: Bagezok, a ge dwam mbe go ɗoo, mo wa gwan pool ge kee muluk ya ge Izrayel van ma tok go de? 7Gwan ge num janna go: Dwam mbe mage sok mbe ma, a Dok Ba vḭḭ tene ee num ne, kuwa wa huyya ge num way ma ne me. Ago vin̰a be hage ge ḛ pagal, ge ḛ wa deɗ-ɗa kuwa num to. 8Ɗaŋɗe, On̰om ge Harcal mbo mbo ya se ge ḛ pagal, ḛ mbo seɗ pool mbyaɗɗa tab, ḛ seŋe nda ge mbo jan mbi fare ge ḛ kuwa num ma, ge suwal ga̰a̰l Jerusalem diŋ, ge suwal ge Jude suwa ne ma go peɗ, mbo ge suwa ge Samari ne yà, deɗ ɗiŋ ge suwa wa aaya dwab ma yà. 9Guwa̰ ge ne wa aa go, Dok hee ne mbo pḭḭ zì yà, num sḛ ma ka ndil ne ɗiŋ, pḭḭ ge laaya gutub mbo ya ban ne ge num ndwa zì gezi. 10Ajo̰o̰ num ndwa ma kaa gwaɗeya ndil mboya ge Zeso ne, mbo pḭḭ zì yà, àa tan ta ge nda zi mḛḛya ge maa ziya ge ba̰a̰ saal, àa jan num go: 11Nda ge Galile ma, ge dape ḛ wa kaɗ mḛḛya ndil sok ge pḭḭ zì yà go ɗa? Zeso mbe ge Dok hê ne ge ḛ buwal zì mbo pḭḭ zì yà no, mbo gwanna mbe go ca, ge ḛ kuwa ne mbo digi no go.

12Guwa̰, àa ɗege ge njal ge àa tol ne, njal ge ɔwara oliv ma way pagal digi ya, ndwa go ɔwara oliv ma do̰o̰ ne pagal digi, àa gwan-na ge suwal ga̰a̰l Jerusalem diŋ. Num buwal kaal gḛḛ to, kaa guwa ge tok biyal dubu ɗu go. 13Sok ge àa dee ya diŋ go, àa ndee mbo ge zok ge kon pagal digi-ge yà, sok ge àa kaɗ ka seɗ ta ge ne go. Nda ge kaa ge sok mbe go ma dḭḭl ma no: Piyer, Yohana, Jak mage Andre, Filib mage Tomas, Bartelemi mage Mata, Jak ge Alfe van, Simo̰ ge iyal kyarga ge na suwal pe, Jude ge Jak van me. 14Àa peɗ wa dagre ɗu, àa ka seɗ ta ɗaɗag kee kaɗeya, ge nda zaab ma kwaɗa lag, ɓanna ge Zeso na̰ van mage ge ne na̰ Mari me.

Matiyas, ndu ge eya Yudas

15Ge num dwam kee kaɗeya a̰me go ɗu, nda ge ho fareba ma seɗ ta guwa ge kis ge ziya warzi go. Ge sok mbe go, Piyer ɗege digi, hee fare, jan go: 16Na̰ van ma, ɓyare go fare ge Njaŋeya ge Dok ne jin̰a ge Yudas pagal go, ne mbo ngay nda ge ho̰o̰l ma vin̰a wan Zeso, ne wa huy ne. Fare mbe, On̰om ge Harcal ee Daviɗ wuwage ne, ge zḛḛ ya wal day. 17A nè kon ge tèmel ne, ne sḛ waɗme, kaa ndu ge temeya ne, ge nè sḛ ma go. Ge tèmel ge Dok ho̰ nè ge num keeya ma zì, ne ne ndwa kaa waɗme. 18Ge bware ge àa poo ne, ge sone ge ne kê sok yaɗ Zeso gezi pe, yiya tene gaaso no ɗu. Ge ne zì, mbeɗe no, mbaa se ge na pagal no, ne laa foo no, ne laa zaaso ma busugi ya zum no peɗ me. 19Nda ge Jerusalem diŋ-ge ma peɗ, àa kaa ge fare mbe kuwaya, a ge pe, àa too gaaso mbe ge maa wa no go: Hakeldama, ne pe wanna go, gaaso ge swàm ka̰a̰ ne zì. 20Ago a njaŋe ge Maktub ge kaŋ mballa ma way zì go:

«“N̰a zok ge ne ne gaa pṵṵl,

Ndu a̰me ɗu ne kaa ge ne zì to me.”#Mkm 69.26.

Gwan njaŋe no iya go:

“Ndu ge ɗogle he ne tèmel keeya digi.”#Mkm 109.8.»

21-22Go mbe no, ɓyare go nè taa ndu ɗu, ge ne wa ɓan kee tèmel dagre ge nè, ge mojo̰o̰ ndu ge kaa sayda ge tanna ge Bagezok Zeso ne go. Ɓyare go ne kaa ndu ge nè buwal zige, ge ka an sok dagre ge nè, ge Bagezok Zeso Krist pe go, ge sok ge Yohana ndu ge kee nda baptem kê ne baptem ya go day, ɗiŋ deɗ-ɗa ge dwam ge Dok hê ne mbo pḭḭ zì yà go. 23Àa mbo ya hee nda zi: Ge ɗu dḭḭl Jozef ge àa tol ne Barsabas, ge àa chiya ne dḭḭl go Justus, ge zi dḭḭl Matiyas. 24Guwa̰, àa kee kaɗeya go: Bagezok, mo ge mo kuwa dul wa ge nda way peɗ, ngay i ndu ge mo taa ne, ge nda ge zi mbe ma no buwal zì, 25ndwa go, ne eya Yudas ge ne tèmel temeya zì, tèmel ge ne sḛ n̰a ne, mbo ge sok ge na kaŋ keeya ge sone ma gene na yà no. 26Ge sok mbe go, àa mbo ya ee daŋ, daŋ deɗ Matiyas, waɗ-ɗa ge Zeso nda ge temeya ge wol pɔgwa ɗu ma buwal zì.

Iliyochaguliwa sasa

Tèmel keeya 1: kiaGRB

Kuonyesha

Shirikisha

Nakili