लूका 19

मलगुजारी गोः होड़ जकई

1दो ईसू एरीहो सहररे बोलोकियानखने सलाःआ। 2दो हंडा जकई ञावीग मी होड़ होड़ दोहोना। हाँय मलगुजारी गोः होड़कूरीग हातपात होड़े दोहोना अरू गिरहते दोहोना। 3हाँय ईसू करेग हवे, माःआन ञेञेल लगाय ओंगलेःआ। दो हंडा मुरुक बगरा होड़कू दोहोना अरू हाँय बवनाय दोहोना। हनालगा हाँय ईसू मेरेय ञेल अवेगेया। 4अरू हनानाः दूररे ईसू सेने पारा दो, जकई होड़कूते मड़ंग बतकाव सेनेवाडखन मीटोंग लुवा दूबरेय देगयान।

5दो ईसू हना लुवा दूबरेय सोदोरनेन दो, संगीलवाडखन हाँय एचेरेय कताया, “ने जकई, हलूतेम उतराव वेग। तिसिंग ईंग आम ओड़ाःरे गुतियायिंग सेनता।” 6हनते जकई ओहेन सींग दूब अते उतरावकियानखन बहालते ईसू अनँयग ओड़ाःरेय गोःयाडीग।

7नाःआ ञेलवाडखन होड़कू ईसूराः बदीरे कुरबुराः घड़ीनकू कताया, “माँय कसूर होड़राः ओड़ाःरे गुतियाय सेनेकिया।”

8दो जकई चड़ाँनेनखने कताया, “ने परबू अयुमेमे, ईंगराः आन-धानरे अदोम ईंग गरीब होड़कू लगायिंग हटिंगगोडता। ईंग तोनोंगीग होड़ अते अडिग गोःकेड दो, हनाराः चइर गुना ईंग एमे कुदागोडवाकूता।”

9दो ईसू हाँय बदीरेय कताया, “नाँय हों इबराहीमरिकुःआ नइड़-बाँस होड़कूरीग बेटा हवे। हनालगा तिसिंग भगवान नाँय अरू नाँय ओड़ाःरिकुःआ होड़कूय सडावकेरा। 10मनुवारीग बेटा, केड़ेत होड़कू ञामकू लगा अरू सडावकू लगा चउंदीसरेय वेगकिया।”

रिचकी ढिबुवाराः अउल-तउल कहड़ी

(मती 25:14-30)

11जमा होड़कू ईसूराः हना बड़राकू अअयूमा। हनमेला हँकुःआ होड़कू एरुसलेम सहरकू सुदुरुःआ अरू हँकू ओंगलेःआ, नुँहू भगवानराः राइज अले तलारे भाय ञिलुःता, माःआन। हँकूराः ओंगोल सुदीतेडखन ईसू हँकू एचेरे मीटोंग अउल-तउल कहड़ीय कतातेरा, 12“मी होड़ गिरहत होड़ मीटोंग लंका देसरे राजा बड़ाँवकियानखन कुदन लगा हना देसरेय सेनेडा। 13हाँय सेन अते मड़ंग अनँयग दसटोंग सेवकियाकूतेने राःतेरा अरू मेमेड होड़ मेमेड होड़ एचेरे मेमेडटोंग सोनाराः रिचकी ढिबुवा एमेतेडखन हँकू एचेरेय कताया, ईंग अरीनिंग कुदा वेग वरी अपे नानाःतेपे पुंजियावगे। हनते हाँय तोराय।

14मनदो गिरहत होड़राः सहररिकुःआ होड़कू हाँयकू हिनइस-बिनइसवाःआ अरू तोनोंग तोनोंग होड़कू नाःआ इया कताय लगाकू वारतेडकुःआ, नाँयग होड़ अलेरीग राजा बड़ाँः लगा अले मेरले चहाःतना, माःआन।

15हना तयोमरे हाँय राजाय बड़ाँवयान अरू अनँयग ओड़ाःय कुदा वेगयान। सोनाराः रिचकी ढिबुवाकूने एमेतेरा, हँकुःआ होड़कू करा इया पुंजीकू बड़हावकेरा हना जासगे लगाय राःतेडकुःआ।

16दो मड़ंगीग होड़ वेगवाडखने कताया, मालिक आम ओवातिरिंगा हनाते ईंग दस गुना नफायिंग उडुंगकेरा, माःआन।

17मालिक हाँयग सेवकिया होड़ भलावातेडखने कताया, आम मुरुक नपायतेम बुताकेरा। आम गुनमिनाःरे बिसवासगेयीगमे दोहोना। नुँहू आम दसटोंग सहररीग हातपात होड़मे बड़ाँव जुवाः, माःआन।

18तयोमरे एटाःयीग सेवकिया होड़ वेगवाडखने कताया, मालिक, आम ओवातिरिंगा हनाते ईंग पाँच गुना नफायिंग उडुंगकेरा, माःआन।

19मालिक हाँयग सेवकिया होड़ भलावातेडखने कताया, आम हों पाँचटोंग सहररीग हातपात होड़मे बड़ाँव जुवाः, माःआन।

20अरू मी होड़ सेवकिया होड़ हाँय एचेरेय वेगवाडखने कताया, ने मालिक, नेहेन ञेलमे। सोनाराः आमराः रिचकी ढिबुवा नंडा इदा। नाःआ ईंग तउलीयारे तोलकेडखनिंग दोहोकेरा। 21आम कटकट जीव होड़ इदानमेःआ। हनालगा ईंग आमिंग बोरोवाःआ। आमराः मेर दोहोनता हनाम गोःता अरू आम मेरेम वेरकता हनाम ईरता, माःआन।

22दो मालिक कताया, आम बेलूर सेवकिया होड़ इदानमेःआ। आम कताकेरा हनानाः कताते आमिंग फड़ियावता। आम सुदीया, ईंग कटकट जीव होड़ हवे अरू ईंगराः मेर दोहोनता हनायिंग गोःता अरू मेरिंग वेरकता हनायिंग ईरता, माःआन। 23नाःआम सुसुदीया दो ईंग एमेतेरा हना ढिबुवा पुंजियाव लगा तोनोंगीग एचेरे चिला लगा मेरेम एमेगाड? नाःआ इया आम एचेकेः दो, ईंग एमेतेरा हनाराः नफा सुदा ईंग पवावकुःआ। 24हनते हंडा चड़ाँकुःआकू हँकुःआ होड़कू एचेरेय कताया, नाँयग होड़ अते सोनाराः रिचकी ढिबुवा गोःयापे अरू दसटोंग रिचकी ढिबुवा इदाना हाँय एचेरे नाःआपे एमेगोड, माःआन।

25दो हँकुःआ होड़कू कताया, ने मालिक, हाँय एचेरे दो दसटोंग रिचकी ढिबुवा इनिदा, माःआन।

26दो मालिक कताया, ईंगपे अयूम, तोनोंगीग एचेरे कहिसाः इदान दो हाँयके भगवान अरूय एमेवायता। मनदो तोनोंगीग एचेरे कहिसाः कोवानेःआ दो, ईंग एचेरे इदा, माःआने ओंगलेता हना हों हाँय अते भगवान गोःयाता, माःआन।”

27हनते मालिक कताया, “ईंग अँकूरीग राजा बड़ाँवगींग लगा मेरकू चहाःआ हँकुःआ मुदइ होड़कू नंडापे अगूकू अरू ईंग मड़ंगरेपे ञेड एंडाकू, माःआन।”

ईसू मरंग सहर एरुसलेम अगीय सेना

(मती 21:1-11; मरकूस 11:1-11; एहुना 12:12-19)

28नाःआ बड़रा कतावाडखन ईसू मरंग सहर एरुसलेम अगी मड़ंग मड़ंगे सेना। 29हाँय बतफेगा गाँव अरू बेतनिया गाँवराः लेसान जइतून पहाड़रेय सोदोरयान। हाँय चेलाकूतेन अते बार होड़ कतावातेडकिनखने वारतेडकिना, 30“मड़ंगराः गाँवरेबा सेन अरू हंडाबा बोलता दो नुँहू वरी तोनोंगीग मेरेय दुडुःगना मीटोंग गदहा होन तोलतोबा ञेलेयता। हाँयग गदहा होन लड़ाकिडिगखन नंडाबा अगूगेय। 31तोनोंगीग अबा एचेरेय होंबरे, नाँयग गदहा होन चिला लगाबा लड़ा गोःयायतना दो कतायबा, परबूके नाँयग गदहा होनराः जरूरइत इदा, माःआन।”

32परबू वारतेडकिना हँकिन, सेनेवाडखन हाँय कतातेरा हान इयाकिन ञेलतिरिया। 33हँकिन गदहा होनकिन लडाःआ दो, हाँयग गदहा होनरीग मुवार होंबोरतेरा, “नाँयग गदहा होन चिला लगाबा लड़ागेयतना?”

34दो हँकिन कताया, “परबूके नाँयग गदहा होनराः जरूरइत इदा।”

35हनते हँकिन गदहा होन ईसू एचेरेकिन गोः सोदोरतिरिया अरू सोनहे गदहा होन चोटरे लतकातेडखनकू एचे दुड़ुःतिरिया। 36ईसू गदहा चोटरेय सेना दो, हना दूररे होड़कू सोनहेकू बेल इदीया।#19:36 तोनोंगीग मरंग होड़राः मान मरजइत लगा हाँय सेन दूर मड़ंग मड़ंग होड़कू सोनहेकू बेल इदीता।#2 राजा 9:12-13

37हँकुःआ होड़कू जइतून पहाड़ दरा अते उतराः लगाकू बुँहड़ीनेन दो, जमा होड़कू, भगवान एचेतेरा हना बयाव जुवाः इयाःआ बुताकून बदीरे बहालते खिररी घड़ीन भगवानकू जागा,

38“परबूराः ञावतेय वेगता हाँयग राजा भगवान भलावायता।

नुँहू सेरमो देसरे सलसत होयाः,

अरू सेरमो देसरीग भगवानराः जाग होयाः।”#सेरेंगकून 118:26; सेरेंगकून 148:1

39होड़कूराः तलारेकू दोहोना हँकुःआ अदोम फरीसी होड़कू ईसू एचेरेकू कताया, “ने गुरुजी, आमरिकुःआ चेलाकूम कलेकाल दोहोन लगा कतावाकू।”

40दो हाँय हँकू एचेरेय कतातेरा, “नँकू कलेकालकू दोहोन दो नाःआ दिरिकून खिररी रेम जुवाःता।”

41ईसू एरुसलेम सहररेय सोदोरनेन दो, हाँय हना सहर अगीय ञेलतेडखने इयामा 42अरूय कतातेरा, “ने एरुसलेम सहररिकुःआ होड़कू, अपे सलसत पवाः लगा चिला करेग इदा हनापे सुदीकेः दो, अपे तुमिन नपायतेपे दोहोकुःआ। मनदो अपे नुँहू हना मेरपे सुदी अवेयतना। 43मी दिन निचकाःतना, अरू हना दिन अपेरिकुःआ मुदइ होड़कू अपे सहरराः चइरो गतर भीटकू रेमता अरू अपेकू रेडगोडपेता, 44अरू नंडा दोहोनता अपे अरू अपेरिकुःआ लइंकू ओतरेकू ञेड लेबदा एंडागोडपेता। भगवान अपेय मयावातेरा हना अपे मेरपे मनेवागाड। हनालगा अपेराः दिरिराः ओड़ाःकून रेमगे एंडा अते ओरोकू अड़ाःतेरा।”

ईसू भगवान ओड़ाःरे

(मती 21:12-17; मरकूस 11:15-19; एहुना 2:13-22)

45हनते ईसू भगवान ओड़ाःरे सेनेवाडखन हंडाकू अअकिरिंगा हँकुःआ होड़कूय जोः उडुंगतेडकुःआ। 46अरू हँकू एचेरेय कताया, “भगवानराः कागदरे ओजाःतो इदा,

ईंगराः ओड़ाः अरजी ओड़ाः हवे,#एस 56:7; इर 7:11

मनदो नान अपे इनिग होड़कूराः लातपे बड़ाँवगोतेडा।”#इर 7:8-11

47ईसू सगर दिन भगवान ओड़ाःरे सेनेकियानखन होड़कूय चेडा। मरंग पुजउरीकू अरू नियम चेडदार होड़कू अरू एटाः हातपात होड़कू ईसू ञेड एंडाय लगा दोंगकू ञामा। 48मनदो जमा होड़कू ईसूराः कता नपायतेकू अअयूमा। हनालगा हँकू तोनोंगाः एचे लगा दोंग मेरकू ञाम अवेगाड।

Iliyochaguliwa sasa

लूका 19: kfp

Kuonyesha

Shirikisha

Nakili