Mata 2

Gà ɓəzla metsiɗike gər a gà mawusawus tə dara

a təv Yesuw a

1Ta wa Yesuw ka, i kwite Betelehem ika ahəɗ Yuda, akahər ana *Hiridus ŋgat batsah Əbay ana i fataya. I təv ana ta wa ŋgat a ka, gà ɓəzla metsiɗike gər a gà mawusawus ana ti de a aà gəza mbulum a, tə dara ika tsèke pat ana à mbizera a ya. Tə da a Yeruzalem. 2Tə daha, ta gwa: «Kəla ana ta wa ŋgat biɗikw ŋa ɗa i faha, ŋgat batsah Əbay gà Yahuda ya ana, i ŋga? Aɗaba maa ŋgat a mawusawus ŋgar ana a mbəzara ya, dite na mì dara aà medzer gurmits a bəɗ a.»

3Batsah Əbay Hiridus a tsaraka bazlam tar ata tsara ka, a wiser a tar gər hinne, nda gà asiŋ gà mburma ana i Yeruzalem a tserdze. 4A daha, a yaha gər a gà Əbay gà ɓəzla mandəva kuɗa a Mbulum, dite nda gà ɓəzla medzeŋge məpala ahəm Mbulum a mburma tserdze. A gwaɗa a tar: «Ta we a batsah Əbay ana Mbulum a gwa, i slir a kurumehe a ya dze ana, i ŋga?» 5Ta gwaɗar aaka: «I kwite Betelehem ana ika ahəɗ Yuda ya. Aɗaba mala məma à guma Mbulum a tsik ahər, a gwa:

6<Dite kər ka,

kwite Betelehem ana ika ahəɗ Yuda ya.

Kər ka, kəla ŋa i magər gà kwite ana

ika ahəɗ Yuda ya asa tsa.

Aɗaba Əbay ana a ta kiv a gà mburma gà

gà Isərayel kamala təmaŋ a,

à pèt a aba ka, i fata.> «*fa*

7Aləka i dəba ŋa ya, Hiridus a zal a gà ɓəzla metsiɗike gər a gà mawusawus ata nda akəl, a tsam aà tar, a gwaɗa a tar: «Ndeɗime na kə̀ ŋgatum a mawusawus ata a mbəzara dze ya?» 8Dite i dəba ŋa ya, a slər gà mburma ata a Betelehem, a gwaɗa a tar: «Dumaha, ti yahum kəla ata a Betelehem nda metsehe. Na kàa ŋgatum tə̀vəməŋa ka, ka dumara, ka tsikwimiŋ, dite i ti dzer a gurmits a bəɗ mbeete.»

9Gà mburma ata tə dza zləm a bazlam ŋgar ata kataya ka, ta mah ba, ti diŋa. I təv ana ta meh a ba ya ka, ta ŋgataha a mawusawus ata, aka mbəzara asa. A lah a tar aka miɗ. Tar tə zazamaha i dəba ya. A de a ka, tar tekeɗe, ti dehe a te. Aləka a ndze a təv ana ta wa iɗəm kəla ata ya ka, dzeŋ a hitse aà gəza mbulum, ɗegirgir aka kəla ata. 10Ta ŋgat a mawusawus ana a hitse a fataya ka, ta ŋgayaba hinne. 11Tə daha, ta pəts a ga ana ta ŋgat iɗəm gà kəla ata nda məmər ŋgar Mariya ya. Tə daha, tə dzar gurmits a bəɗ, tə zàmbaɗa à kəla ata kuɗa. I dəba ŋa ya, ta pətsàk gà kàzlàŋa tar, tə dzàyar dukw maslawa tar ana tsakala ŋa hinne ya: Gà gura nda wirdè dizl dukw ana a ze hwaŋŋà lele ya, nda gà atwa dizl dukw ana ta wene a ka, a ze a lele ya mbaŋa asa. 12Aləka i dəba ŋa ya asa, Mbulum a gwaɗa a gà mburma ata i sunwa ya: «Kà mbəɗum gər nda təv Əbay Hirirus asa tsa.» Tə tsaraka kataya ka, ta mah ba, ta mbəɗ gər a ma nda tsèke ŋgiɗ.

Tə da aka ahəɗ Ezipt

13Gà ɓəzla metsiɗike gər a mede gà mawusawus ata, tə da iɗəm a tsara ka, gawla Mbulum ilik a pàt aba a Yasufa i sunwa ya asa, a gwaɗar: «Hitse, val à gà kəla aaha nda mama ŋgar aka ahəɗ Ezipt, tsəka, aɗaba *Hiridus a riŋ a yehe a kəla aaha teftef. A waya medzeye à ŋgat. Kàa daha ka, ka ndza riŋ i fata haa a pat ana Yàa gwaɗak, mbəɗara gər a.»

14Yasufa a tsaraka kataya tsara ka, a hitse, a da à gà kəla ata nda mama ŋgar a, aka ahəɗ Ezipt ndaàvəɗ ata tsara. 15Tə ndza riŋ i fata haa a pat ana Hiridus a mət a. Dukw ata tserdze ya, a ge ba ka, dite dukw ana Mbulum BATSAH kwa ŋa a tsik akahər ata nda ahər mala məma à guma ŋgar a ka, aka pat aba lele kuɗa. A gwa ka: «Yàa zalara iɗəm a kəla gà ika ahəɗ Ezipt ya.»*fb*

*Hiridus a bats gà ɓəza ndirkiz

16Aləka i dəba ŋa ya, Əbay Hiridus a fə̀r ka, gà ɓəzla metsiɗike gər a mede gà mawusawus ata ta gəs bazlam ŋgar ata tsa, ti lèlekwe ihər a ma ndaka tsèke ŋgiɗ a ka, a tsəɓar hinne. Tsam ka, a slər gà mburma asa, a gwaɗa a tar: «Dumaha, batsum gà ɓəza ndirkiz gà asləka ŋana ika ahəɗ Betelehem a, nda gà na i gà kwite ana ta mberra ya fit. Ki giswim a, ki betswim a ka, daga aà gà ɓəza ana mive sula ya, tsikw aà gà na ta waya kinehe ya.» A ziwe aɗəm taŋa ka, tits ahər ana gà mburma ata tə daha, ta gwaɗar ka, maa ŋgat a mawusawus a. 17Kamala taŋa ya, dukw Hiridus ata a ge ya, a ndəv ka, à bazlam ana Yeremiya, mala məma à guma Mbulum a tsik akahər ata ya kaɗəŋ. 18A gwa ka:

«Mewideye duwa a ɗera huwwa i kwite Rama ya,

tuwa a riŋ hinne, ndzəŋ ndzəŋ ndzəŋ

ta geye a dər zlaàzla asa mbaŋa.

Rasel a tiwe a gà ɓəza ŋgar.

A sle a aà magəsa gəzləŋ aà tuwa ya tsa,

aɗaba gà ɓəza ŋgar a riŋ asa tsa,

tàa bats tar fit.»*fc*

Yasufa a màra à Yesuw ika ahəɗ Ezipt ya,

aka ahəɗ Isərayel a

19Aləka Əbay *Hiridus a mət ka, gawla Mbulum a pàt aba a Yasufa i sunwa ya, ika ahəɗ Ezipt asa. 20A gwaɗar: «Kinehe ka, hitse, mbəɗ gər à kəla aaha nda mama ŋgar a, aka ahəɗ Isərayel kuɗa. Aɗaba gà na ti yehe a vatwa aà makə̀ɗà kəla aaha ya ka, tar riŋ asa tsa, tàa mata.»

21I dəba ŋa ya, Yasufa a tsaraka kataya tsara ka, a mbəɗ gər à kəla aaha nda mama ŋgar a, a ma tar aka ahəɗ Isərayel. 22Ama i dəba ŋa ya asa, Yasufa a tsaraka ka, Arkilawus kəla Əbay Hiridus aaha ndeɗiŋa ya, aka mà à Əbay tsir ŋgar a bəra ika ahəɗ Yuda asa ka, magəɗa a ger aà mede a fata. Ama sunwa a da aaka asa, Mbulum a ɗifer à dukw ana a ge a ya. Tsam ka, a da à tar aka ahəɗ Galile. 23A ndzawa riŋ i kwite ana tə zalar Nazaret a i fata. Kamala taŋa ya, dukw ana gà ɓəzla məma à guma Mbulum ti tsik akahər ata ya ka, aka ge ba kaɗəŋ. Ta gwa: «Ti ti zel a a kəla ata ka, gà Nazaret.»

Iliyochaguliwa sasa

Mata 2: gnd

Kuonyesha

Shirikisha

Nakili